回歸＠創意畫班 (4y2m)

打從九月開始，媽咪就無為Ambrose繼續周末畫班了！原因很多，譬如係，已經有兩個畫班，似乎又無需要就同一範疇再花時間學；譬如係，所報嘅興趣班越來越多，想為Ambrose騰空多一天free day，好讓佢有點無聊時間；譬如係，之前總覺得畫畫技巧停滯了，並無突破，所以想停一下想一下；譬如係，媽咪都想星期六日有一天free day可以瞓晏少少，不用早起帶興趣班，偷懶一番，諸如此類的理由，令媽咪忽然就無去交學費，無聲無息咁停了！

以為Ambrose會唔記得或唔留意自己少上一個興趣班，誰知九月尾時，Ambrose無啦啦有一晚問起媽咪，點解咁耐都無得去Ms Chen Chen度畫畫？！Ambrose仲話好掛住Ms Chen Chen添！認真地問過Ambrose，如果再上　Ms Chen Chen的畫班，不如cut一樣其他興趣班，但經一輪討價還價，佢都唔多願意cut其他興趣班，結果，媽咪又要左度右度佢嘅時間表，諗吓係咪可以再加番呢個畫班俾佢，而又可以保有佢嘅free day呢？

就在諗來諗去嘅時侯，就發生了英文班不愉快事件，英文班上不了，那意味著Ambrose嘅free day又多了一天！本打算不再上英文班，那加回畫班，一加一減之後，free day不變，也可考慮一下。但十月內4個星期日有2個星期日已有約；若平日要上畫班，又要夾埋畫室開放時間，夾無可夾之下，又令媽咪很惆悵，根本上要即時加番畫班是不可能的。

就在諗緊如何向Ambrose解釋，要等到十一月才可去Ms Chen Chen度畫畫，突然就收到畫室facebook message十月將開設比賽專班，用兩個半小時完成一幅作品再交去比賽。媽咪見有比賽參加，當然有興趣幫Ambrose報名，見只係上兩個半小時，問過老師可以分兩堂進行，正合Ambrose的時間表，可以盡快俾佢見番Ms Chen Chen，又可參加比賽，亦同時可以試驗一下佢係咪真係好想上番畫班。

由於之前上英文班有陰影，媽咪都有擔心Ambrose再上多過一小時嘅課堂會有問題。兩堂比賽專班都係一小時十五分鐘，兩堂過去後，老師話，第一堂，Ambrose的確有問住幾時放學，不過情緒未見有何異樣，同學仔放學佢都無太大反應。第二堂，Ambrose已經無再問幾時放學嘅問題，上課就似平時一樣，唔覺得佢有任何問題。媽咪亦有問過Ambrose，佢話返畫班好開心，仲叫媽咪幫佢繼續報讀。

就係咁，媽咪只好乖乖交了十一月嘅學費，由下月開始，又要回歸恆常班了！交學費時，老師話Ambrose可以升上進階畫班了，媽咪有點驚訝，記得進階畫班係K3以上的程度，唔太明白為何會突然升班。升班學費其實只係貴左少少，時間就長左十五分鐘，本來媽咪想問問老師，Ambrose呢個時候是否適合升班？Ambrose是否可以應付得了？但又想想，既然老師主動提出，而媽咪之前不是也覺得Ambrose畫畫技巧並無突破？現在正好可以升班上進階，雖然課堂長了十五分鐘，但對於咁輕鬆嘅畫班黎講，Ambrose應該沒太大壓力吧，或者更是件好事，等佢慢慢適應長少少嘅興趣班。所以媽咪沒有深究，只係期待，升班後的Ambrose，得著更多！