4th Cycle

我同老公一路都無特別唸過幾時生BB，但係周圍嘅朋友或者係親戚，無論係先過或者係後過自己結婚嘅，都相繼有左BB甚至乎生埋，我地先開始發現呢個問題係要去正視，畢竟生BB都有期限！

 

我唸老公幾時都ready，係我成日都唔急咁！零七年無做舖頭，啱啱轉黎入境處做又唔多慣，福利又麻麻，果時就同老公講，等我轉埋工我就安心有BB嘞！後來發現搵番份咁上下嘅工又有d難，又要轉得成之餘都要做番一排先要得BB，真係唔知要等到幾時！無法啦！我就話，我除左結婚影婚紗相同蜜月外，都無時間去旅行，有左就有排都唔使去，所以大家都決定去一次旅行先再順其自然嘞！不過我份工頭一年都無大假攞，都有唸過攞no paid復活節去旅行，唔使等到contract完咁耐，但係no paid去旅行，加埋紅假，真係唔抵，唸落都唔急於幾個月啫，所以最尾都決定九月先去旅行！

 

之前都做過哂婚前檢查同婦女健康檢查，見人地好似話有BB就有，從來都無唸過有咩問題。上forum睇吓，先至發現好多人都好似我咁唸，一切又正常，但係都試好耐都唔得，咁我就開始知驚！可能因為咁我突然之間都有d壓力，見Ellen Law同我同時plan住有BB都有左，重要係2nd Cycle就有，都唔好話唔緊張！每次M黎前一定會痛好幾日先到，因為plan住生BB，所以一feel到痛我都會失望到喊！其實又唔係好急住要，但係唔知點解就真係驚同失望，可能我都唔應該睇咁多forum，等自己唔好亂唸野！

 

十二月三十一日，M應該今日黎，suppose我應該過左呢日先去驗吓，但係之前又無咩M痛，所以起身之後心血來潮驗吓，過左一陣就見到“＋”，都有d意外，即刻叫醒老公睇，佢重問我即係點解，我話即係bingo左，因為枝tester响日本買嘅，佢重問係唔係“＋”就代表bingo架？我攞埋張説明書俾佢睇，佢先至識傻笑，重讚我叻，哈哈！

 

都好開心第四個Cycle就bingo，因為之前我地好擔心有問題，雖然人地話試一年唔得先睇醫生，但forum d人試半年唔得都仆去睇，攪到我地幾咁有壓力！

結婚周年

十一月二十六日是結婚周年日，因為要上班，老公決定提早慶祝！

 

因為一直也想去山頂的蠟像館，老公便預早買了十一月二十二日的門票。為了避開繁忙時段的擠擁，我們決定中午出發。我們到達山頂後便直接來到蠟像館，沒太多人，我們幾乎和全部蠟像影過相，而且不會將其他人攝入鏡內，感覺真好！我們大概花了個多小時便逛完了蠟像館，由於山頂並沒甚麼地方閒逛，我們便到外面走走逛逛及影相。我們於黃昏前便下山了，當我們在山下看到那條長長的人龍等候著上山，真的慶幸我們沒有下錯決定！

 

時間尙早，老公提議往香港公園逛逛。我沒去過香港公園，所以也想看看，沒想到往香港公園的路不是斜路便是樓梯，累得我站在公園門前氣喘如牛！其實到達公園時天色也開始轉暗，沒有想像中多姿多彩、繽紛燦爛的花，反而到處也陰沉沉的，不很吸引。一場來到，也拍了些照片！

 

今天很累，但很充實！

日本之旅 – Day 8

終於黎到旅程嘅最後一日！好唔捨得走！

 

今日我地嘅行程係無嘅，departure係六點半，兩個鐘頭前到機場即係要四點半，池袋去機場要個半鐘，即係最遲三點要上車搭去機場，之前有過搭唔到火車而遲到機場差d上唔到機嘅經驗，我地買左兩點鐘車飛，而酒店就要十點check out，中間果四個鐘真係唔知去邊好，話長唔長，話短唔短咁！下次再去日本真係唔會幫襯super hotel，俾多少少去東橫inn，應該方便d，起碼我幾時想番去休息下都得，check out應該唔使咁早，可以瞓晏d！好彩係我地check out左佢都俾我地放行李，酒店關門清潔期間有鐘禁番入去攞行李，算係咁啦！之前睇定車站locker全部都放唔入我地d喼，如果酒店無得放行李，都唔知點算！

 

因為M痛，我地都無去太遠嘅地方，去左池袋Sunshine City附近食左份西式早餐，太多時間，我地都慢慢食坐耐d，跟住行下商場，不過行左咁多日街，真係興趣唔大，我地走左入去d遊戲機舖睇下（平時顧住行街一定唔會行入去），見到有公仔夾，又唱錢夾下，都夾唔到，又唔敢太落力繼續玩，因為我地嘅喼都full哂！我個喼入左LV連盒喎，已經無左一邊位，老公個喼入左六神合體，又係無左一邊，如果再黎多個公仔都唔知點攪！玩過開心下就算嘞！再磨下藥房，依然無野買！呢幾日行得好勁但張床又瞓到條腰好痛，加上M痛，行左一陣條腰真係痛到震，唔想再行，响商場坐下休息下，未夠鐘搭車但又無地方想去，都係攞埋行李早d去車站等！

 

上左車之後，我唸我真係失血過多，一坐低就昏迷過去，醒番都差唔多到機場咯！响機場食lunch，最後都係食我鍾意嘅烏冬，唔知點解日本烏冬間間都好好食，間間都好似手打烏冬咁！之後我地就四圍行睇下有咩買可以用哂d散銀，好攪笑！

 

日本之旅去到呢度已經係尾聲，雖然好唔捨得，唔想番工，但係我同老公都好掛住自己張床，唸下可以瞓番响自己熟悉嘅床上面，盡情咁瞓，真係好期待！

 

上左機之後，我地等左好耐都未起飛，今日真係响等待之中度過左好多時間，確係令人不耐煩！我唸我地班機delay左成四十分鐘左右先起飛。呢程機無二人位，得三人或五人位，我地係三人位，要同陌生人坐，我地坐入面，點知果個男人坐開面，由上機瞓到落機，無食野，攪到我地去廁所都唔係幾好意思，襯佢俾空姐叫醒收餐，我地一齊出去去廁所，等埋一齊先返入去！老公話最慘係果個男人瞓到個頭一係中左去出面，d空姐推車派餐要睇住就住；一係中埋過佢度，油立立，好臭喎，真係唔知好嬲定好笑！

 

呢次行程有個小插曲，話說架機飛到香港機場要landing嘅時候，突然抽頭再飛番上去，呢個情形有d恐怖，因為我係一路睇住個窗，睇住同個地面好接近，唸住重有一、兩分鐘架機就land，之後大概十分鐘就可以離開機艙，點知抽頭得咁突然，有d驚！可能之前我睇National Geographic嘅air crash太多，明白到一個好小嘅零件，一個很細嘅人為疏忽，一些很微細嘅環境因素，都足以機毁人亡，所以响抽頭果一刹那真係有d擔心。當飛機再次上昇同開始遠離機場，我覺得今日真係好漫長，唔知幾時先可以返到屋企！飛機越飛越遠，由原來一片死寂嘅海面飛到去青馬大橋一帶嘅上空，嘩！香港嘅夜境真係好靚，屯門公路就好似一條龍在飛舞，好宏偉！呢個夜景同上山頂所睇到嘅真係完全唔同，我唸我都無咩機會再睇到咯！land唔到睇到呢個夜景都好抵！旅程嘅尾聲原本係咁難忘嘅！

日本之旅 – Day 7

黎到東京之後，日日都行街，行左幾日，真係夠哂！原本話去淺草，但又怕唔夠時間行街而取消，今日都係去番，因為都唔知去邊好，近近哋都唔錯，又可以買手信！

 

我之前都去過淺草，印象中是不難去的，所以當今朝決定去的時候，我同老公都無唸太多，甚至乎連書又無睇又無帶出去，就咁出發！去到車站，見到有“淺草橋”站，心唸唔記得左睇書，不過都應該啱啦！點知真係唔啱，出左站後先發覺果度似係住宅區，好靜！人都無個！我地咪行下望下，終於見到有間舖頭有人，面懵懵去問下，好彩果個人都估到我地去旅遊區嘅淺草雷門，約略講到大概方向，我地咪唯有行下估下，我唸都行左半個鐘先到！

 

例行影下相買下手信咁，無咩特別！係老公忽然緊張買手信俾同事、家人，一次過買左四、五盒手信，都重重哋！其實我今日Ｍ到，又痛又累，而老公想行多次秋葉原但又驚我又累又悶，我就提議佢自己行，我攞埋d野返酒店休息一陣，然後自己响附近行，再約定五點响酒店等。老公都有d唔放心，不過東京嘅火車好systematic，去到山手線嘅池袋站，返酒店係好easy，我就好有信心，所以老公最後都同意。

 

啱啱分開行嘅感覺有d怪，又有d刺激。好順利返到池袋，本來想將d野lock响車站locker就算，因為費時行返酒店又行返出來shopping，點知車站locker已經full左，咁咪死死氣行返酒店囉！點知行到去先發現酒店關門，因為呢間酒店已經寫明早上十時至下午三時係清潔時間，住客需要離開，我見燈都熄埋，又死死氣走左。好彩唸起行去商場條路有間locker shop，唯有响果度擺低d野先，如果唔係都支持唔到好耐。

 

一個人行街都好快過，不過可能我都買左LV，太滿足，無咩購物慾，所以都無咩買到，哈哈！我都好慳家！^_*

 

我過左約定時間三個字先返到酒店，老公已經返左，佢話返來見唔到我好驚喎！好攪笑！但都好sweet嘅！

日本之旅 – Day 6

已經去到Day 6，老公都無買過野！女人就係咁架啦，平時行街成日覺得要買下野先似様，何況去旅行？多多少少都要嘅！今日我地決定去中野，搵六神合體超合金魂！

 

今日去到中野既時候，好好太陽，可以話係黎到日本以來最好天既一日，俾太陽曬住又有少少秋涼既感覺真係好好，不過話時話我條頸巾買得唔抵，捱過左最凍果日先至買到，之後已經無咁凍嘞！頂多一早一晚無太陽既時候寒d，其他時候都還可以。尋日買既長袖衫同毛布恤衫，今朝興高彩烈咁攞出黎著，tee著底，毛布恤衫做外套，點知都唔係著左好耐，去到中野已經熱到要除左件毛布，唉！真係買得太遲啦！

 

去到中野都好早，十點幾，發覺呢度都多玩具店，有機會搵到六神合體喎！不過，d玩具店要十二點先開呀！又早左！咁我地唯有慢慢行，又行下日日都會“拱”嘅藥房！磨左一間超市，發現左Ellen Law講嘅頭髮貼！呢塊頭髮貼用黎貼住前額嘅頭髮，等佢唔使跌落黎，方便女仔洗面化妝，因為佢貼完d頭髮，唔會好似d髮夾咁留底痕跡，聽落都幾好用咁！估唔到會响間超市先搵到！磨完超市，我地都係周圍hea，好彩都唔係好辛苦咁就夠十二點，開始大搜查嘞！

 

好順利見到成個商場有幾間有六神合體超合金魂，價錢各異。因為呢隻六神合體超合金魂真係好難搵，有嘅都唔係全新，睇咁多間都係話“未開盒”或者“未使用”，雖然係咁其實都好好好新，唔係殘野，所以我地決定買最平果盒！老公不知幾開心！傻下傻下咁！

 

滿足完佢既購物慾之後，我地就去新宿、原宿、涉谷一帶進發。

 

去到竹下通，好多野睇，不過都係衫褲鞋襪居多！之前响大阪見到有對毛毛靴响屋企著嘅，又靚又唔貴，一路都無買，唸住唔知會唔會真係有機會咁凍要著，都係唸左幾日，想買時已經無哂！！！！不知幾後悔，因為間舖頭好多分店，成日都見到，唸住實唔會無架麻，點知就係無！黎到東京都無見過呢間野，終於喺竹下通俾我見到佢，即刻跑入去買啦！粉紅色都係最後一對啦！女人就係奇怪嘅動物，之前有又唔見好“恨”買，到無嘅時候又“恨”到飛起！

 

其實我地都無target要去買d咩要去d咩舖頭，行到邊咪睇到邊囉！點知竟然有個女仔走埋黎用廣東話問我地知唔知Head Porter响邊，真係唔好意思，我地真係唔知，睇住佢好失望個様都有d無奈，不過都好得意，因為無唸過會响日本聽到自己嘅語言。

 

行行下我地唔知點解會去左表參道，見到有間Agnes b，都循例走番一轉啦！入到去見到有個紅色餃子袋，中間露條邊係深藍底白星星，好sharp！其實呢個形嘅袋真係出左好耐，只不過係耐不耐出唔同色咁，所以之前响香港我都無唸過要買，但係紅色對於我黎講係無抗體，而且個袋係表參道店限定嘅，“限定”呢個字又加下分，望下價錢，都有香港貨七折咁上下，唔太貴，唸左陣，都係據為己有先！其實個袋重有個優點，就係夠輕！

 

一出Agnes b行前多少少就見到一間好宏偉嘅LV，我講笑話唔知有無Damier Neverfull，老公話入去望下囉！本住之前個sales話全東京（定還是全銀座？）都無貨嘅心情入去，無期望會有！一入去，嘩！一個客都無！得d sales企响度，樓底又高，好似好grand 好high咁，我地就牛記笠記“拱”入去，都有d唔自然！不過黎遠都見到有Damier Neverfull個display响度，唔使左行右行去搵就直行去個櫃位度啦！咁响呢間舖嘅service梗係同銀座果間無得比啦！無客自然唔使等之餘sales重會自動自覺行埋黎serve我地，我地咪問中size有無貨，仲唸住佢又唔知會講咩，跟手又係講一餐都話無架啦！點知佢好清晰咁同我地講“wait a moment please”而唔係話“choto”，你話個感覺有幾好呢？^_^好快見個sales擰轉身開櫃，揭左一下櫃裡面嘅袋，即刻已經攞左個新袋出黎俾我！嘩！我真係無唸過會有，因為之前個sales話全部分店無貨，我都係唔係好信佢有幫我地check電腦先至“拱”入去證實下，見佢有貨果刻又意外又開心，有一刻都後悔啱啱先買左個Agnes b架！早知買到Damier Neverfull就唔買Agnes b，雖然話style都唔同，始終都覺得有d奢侈咁，最衰都係老公唔買野，攪到好似得我買野，好揮霍咁！我都係鍾意買袋架嘞，都有成年無買過新袋，就當係一次買番今年（定上年）個quota啦！值得讚嘅係個sales，英文ok又有禮貌，我地買完野，佢抽住我個袋送我地去大門口，先至將個袋俾我抽，重同我講 wish we enjoy shopping in LV and have a nice trip in Japan！下次要去LV，都記得去間人少d至得！
 

由於老公抽左佢個六神合體超合金魂成日，我又買左兩個袋，抽住d野响條街行真係好阻街，所以我地都唔係行多左好多地方就返池袋嘞！

日本之旅 – Day 5

黎到東京，其實就冇固定行程，只係之前睇過有邊d地方想去，唸住黎到先決定邊日去邊度，隨遇而安啦！

 

老公餓左幾日（因為响大阪亰都等地都係睇風景多，冇咩啱佢shopping既地方），所以今日原本想去之前我冇去到既台場行街同睇彩虹橋，都係快d去左上野、秋葉原等地去睇佢d玩具先。

 

由於尋日主要係搭車過來東京同响酒店附近行，都冇咩野做過，所以唔太累，重可以話休息左一日！今朝我地好早起身十點都未夠就到左上野，雖然話好早，但我地都係食唔到酒店包既早餐，想食？麻煩七點至八點半啦！去到上野發現我地真係早得濟，d舖頭有d都未開，大部份都係開緊！四圍行左一陣，見到有個商場門口有人企哂响度等入去，望下原來十點開，咁我地又一齊等下，唔夠兩分鐘就入得。

 

黎上野唔係唸住買手信，而係老公想搵下有冇六神合體。行左一個鐘左右，佢已經feel到冇，所以我地都係轉戰秋葉原。

 

秋葉原都有d玩具店，不過都行左幾遠搵左好多間先見到一間有得賣六神合體，不過幾貴，老公都好理智咁話唸下再睇下先。可能老公驚我悶，佢行得都好求其，好快咁我地又轉戰銀座。

 

其實都知銀座名店多，之前都冇plan去呢度，不過有個英國牌子既護膚品（Neal’s Yard Remedies） 得英國、美國同日本有得賣，之前好想買架嘞，黎日本前check左分店地址，銀座果間好似易搵d，同可以用百貨公司卷，重有Blue Label既旗艦店、玩具博品館，所以一定要去呢度。

 

銀座既building design好靚，好多樓都係一個牌子全幢，所以可以全幢樓decorate或者design到好靚好有特色。黎日本之前知道LV岀左Damier（格仔）Neverfull，雖然自己有個Monogram，但係我始終都係鐘意格仔，好似深色襟用d。呢個Damier　Neverfull重要係日本限定。本來都將佢忘記左，黎到日本見d日本妹用又好靚，去到銀座既LV，忍唔住去望下。可能老公覺得我冇咩點買野，個袋又唔係天價（圍起大約五、六千左右），佢就話不如買左佢啦，旅行使下錢開心d麻，我之前果幾日又冇咩睇啱想買（今日都day 5，day 8都走嘞）。咁我緊係好開心啦！點知間shop既sales個個都好忙，冇人理我地，咁唯有等下啦，過左好一陣我地搵到個有利位置，終於有個sales留意到我地，叫我地等下喎！等下等下有個sales喺門口似乎係專責控制店內情況嘅，走黎話我地係next customer，又問我地想睇邊個款，叫我地等下，咁我地又等囉，我地以為佢問完即係會幇我地check貨，點知都唔係，真係有d！到個sales得閒理我地既時候，佢問我地想睇邊個，真係激死，果個門口sales真係問完就算，冇follow過！佢拎左個袋俾我地睇，有三個size，我地都好firm話睇中size架嘞，咁好快望完咪話要中size果個囉，又要等．．．．．．．佢返來同我地又講多次個袋有三個size，我地話要中size，佢先話得大同細size有貨，佢講完唔知點解又行開左，門口果個控制員又行埋黎問我地點，我地咪話個sales話冇貨，佢又行開左，轉頭果個sales返黎睇下我地會唔會要大或細果個（重以為佢行開左係幫我再搵下有冇，因我見隔離個客檯面好似有一個），我地梗唔要啦，咪叫佢check邊間分店有，見佢禁左一下個電腦，就話冇，我confirm佢一次係咪全部分店都冇，佢又話係，咁我地就走左嘞！之前冇唸住買所以都冇咩野，決定要買而同我講冇貨就真係超失望！不過，唔好唸住LV係國際名牌，sales就講到英文，其實唔係囉，只係我地識聽Choto（等等），同埋佢地都講到簡單英文單字，再深少少都唔得架嘞！

 

之後，我地都好快搵到Neal’s Yard Remedies，其實佢响條橫街，招牌唔大，好彩我認得個logo，睇地圖行到差唔地方就望到佢，二話不說就衝入去！因為之前太失望，响度就掃多少少貨，如果唔係聽個sales話開左既products要三個月內用哂，我唸我會買多兩枝Rose Oil，都係返去試下好唔好用先！

 

再去Blue Label旗艦店，其實都冇話“好”嘅，睇完又真係冇咩啱，冇謂勉強買野啦！玩具博品館又係冇咩驚喜，行左一陣都走左嘞！最奇係間H&M，好似唔使錢咁，條龍長到隔幾條馬路都重排緊，有冇咁誇呀？

 

今日我地以驚人速度好快行哂schedule左既地方，時間尙早，只不過係四、五點，我地都冇唸過早左行程會係點，咁咪臨時話去埋海濱幕張個outlet，反正都喺銀座，話近唔近，話遠唔遠咁，不過有機會放棄唔去台場，因為個outlet係schedule同台場一日，近d呀麻！

 

其實都唔sure去outlet要幾耐，話去就去！結果一坐車，都要一個鐘！個outlet會在八點關，我地去到都成六點，兩個鐘，夠啦！個outlet望落都唔係好大，可能我真係志不在shopping啦，我唸唔使一個鐘都行完！

 

第一站係Agnes b，衫，我無興趣！都係睇手袋，但係d款一係幾out，一係就當季貨，都唔係特別平，所以好快走左！之後去Coach，好似好大間，但同Agnes b一様，d款平嘅就out，靚嘅就係當季貨，無折！不過Coach都唔係我既心頭好，睇完無野抵，慳返！再行左d精品、服飾咁，唔吸引！之後去Levis，都睇左好一陣，見到有長袖童裝tee同格仔毛布恤衫，size都細細件，啱我身形，價錢都ok，跟手試埋牛仔褲，好想買條灰色好耐，一路都試唔啱，响度又試下，都唔ok，最尾都係買左條深藍色直腳嘅，都幾抵，大概三百五十蚊，唔高要求只係basic野都唸得過啦！老公都係無買過野，衫褲鞋襪佢都唔“好”，唸住下一站Edwin，佢可能都有野啱，點知都係無，而我就又買多件毛布格仔恤衫，頭先果件係黃色，呢件係紅色！其實我唔係唔鍾意girlish一d既打扮，以前我返工都會著下裙，睇果日心情啦！而家呢份工，我都係boyish一d，多男人麻，同埋d地方好似貨倉咁，又唔係幾方便啦！軍裝既人唔知係咪豪氣d，我office嘅女仔都唔著裙日日都係著褲，d人都習慣左，反而如果你著靚少少（唔係T-shirt牛仔褲波鞋）佢地會以為我約左人食飯甚至乎去飲！所以黎到日本見d衫咁靚，件件衫搭來搭去，我都無咩幫襯，怕買左無咩機會著啦！毛布格仔恤衫啱返工呀！

 

攪一攪又成八點，時間過得好快，係時候返池袋嘞！

日本之旅 – Day 4

今日要搭子彈火車去東京嘞！

 

講開呢程子彈火車，買飛既時候真係好無奈！話說我之前上網發覺呢程車好似要reserve先得，上網可以用信用卡book定，去到指定既ticket counter就可以攞飛，幾方便架！但最後我地無book到，因為驚到時搵唔到個counter，如果no show都會响信用卡度扣錢，同埋攞飛都係要用信用卡俾錢，我地唱錢個rate低d，怕用信用卡個rate唔知幾多，貴左就唔抵麻，所以都決定去到日本至買，最多第二日去reserve定囉！喺Day 2果日我地去左神戶，回程既時候我地見到ticket counter定係travel service office，因為好大間推門入架，唸住佢大大間，梗係要成日serve好多人，英文都ok啩！重要無人响入面，唔使排隊喎！入到去講左兩句就發覺唔多對路，大家都唔知大家講咩，唯有寫出來新大阪──＞東京，佢至知我地想買飛。但係當佢問我地祥細既資料時，我地依然係溝通唔到，佢講完一大堆野之後，起碼過左成十秒我至feel到佢果堆日文裡有幾隻英文字，我要澄清雖然我d英文唔係話好叻，但係佢講果d真係．．．．．．．．基本上我地唔可以以completed sentence同佢講野，單字都好鬼勉強！就喺佢禁完一餐佢部電腦之後，話左有邊d班次可以搭，同幾錢，我就發覺有d唔妥，因為我都有上過網check車期同價錢，都唔係咁嘅！再同佢講，原來佢以為我地由神戶去東京，佢重複講呢度係神戶，開頭我地連佢話呢度係神戶都聽唔明，最尾我地明左（估到？），但係我地就唔明點解我地已經寫左新大阪──＞東京，佢都以為我地要神戶──＞東京！！！我地話我地知呢度係神戶，但我地要既飛係新大阪──＞東京，佢一臉疑惑咁，如是者又禁一輪電腦，重落力講話有special discount，唔知點點點，由呢度去果度幾錢同埋由果度去東京幾錢，加埋就咁多錢．．．．．．．點呀？我地唔要轉車要直去最快果隻喎？佢就話乘車時間係兩個半鐘，唔使轉車，價錢同我响網上check個價差唔多，差都係果一百幾十yen，似似地喎，或者個special discount係要分兩程咁計先有呢個價啦，咁我地見時間日期地點都無錯咪confirm囉！點知佢又真係出四張飛，每人兩張，我地又好不安又問左問右，當然都係徒勞架啦，就係咁我地買完飛好唔安落咁離開左。大佬，大拿拿成二千蚊車飛喎，買錯都唔知點算！唉！望下隻錶，嘩！買左半個鐘頭呀！真係沮喪！

 

買左十二點車飛，所以今日都唔係好趕，瞓醒起身慢慢出發。因為我地住難坡，搭子彈火車要去新大阪，所以其實係要轉車。其實酒店係同近鐡近d，同JR都幾遠，加上我地張車飛怪怪咁，所以我地都預早d出門口拉喼搭車，以防有咩意外。下次如果自由行去大阪同佢周圍既地方，我唸住新大阪會方便d，如果只係stay大阪裡面玩，咁都可以住返難坡，出入關西機場都方便嘅！

 

去到新大阪站先搵食，都冇咩好食咁，時間又尷尬，食lunch又未咁早，食早餐又晏左d，搵左間餐廳可以拖埋喼入，但係要食飯，唔係幾食到囉！喺waiting room等夠鐘入閘，都幾悶！其實可能可以搭早d既火車，不過係怕上左車冇位坐，所以都係等下啦！

 

夠鐘入閘！去到閘機，我地都唔知入邊張飛，我地由難坡去新大阪果程都未出閘，但子彈火車既閘口又真係响裡面，唔使出閘架喎！我地叫住個職員問，其實話係問，不如話我地攞住果疊飛“揚揚下”個様就傻下傻下。個職員唔知講咩，將d飛疊埋俾返我地，今次我好叻，我話佢叫我地一次過入哂d飛。果然真係得左，部機唔知點解識分飛咁，出返果兩張去東京既車飛，食左果張黎新大阪既嘅，唔知同疊飛既次序有冇關係既呢？定還是我求其疊飛入，佢都分到？真係好得喎！話時話，d日本人都好奇怪，我地擺明唔識日文，用英文問佢地野，永遠都係答番我地日文，重要d日文水蛇春咁長，講咁大段野至可以打斷再問過，好無奈！都唔知話佢地有禮貌定冇禮貌好？話佢地有咩，我覺得佢地就唔應該人地問佢英文重起勢答人日文，話佢地冇咩，我又覺得佢地都好似好努力去答你，好少話擰頭走人！點解佢地既英文真係差到咁架！

子彈火車既車箱幾寛濶，重好坐過國泰機，令人喜出望外！可惜既係我地坐三人一排，要同陌生人坐囉！

 

東京我地book左池袋既super hotel，因為之前book左民宿，四晚得三晚有連厠浴既房，好似有d麻煩咁，不過又懶下懶下冇理，又冇book其他地方，後來唸唸下都係唔想住民宿，唸住book東橫Inn，點知就冇哂房，所以就book左super hotel，重平d呀！

 

由新大阪去東京係搭到去東京站，要去池袋就要轉搭山手線。當我地上左車，都驚嘆東京果然係先進d，因為架車裡面係有顕示屏，話你知架車去到邊個站，預計去到各個站既時間，重有就係停站前會顕示果個站有咩出口，同各個出口有樓梯或扶手電梯，非常之清楚，同大阪果邊真係冇得比！

 

Super Hotel 既入口就真係唔多似酒店，可能係商務酒店啦，感覺好實際，其實佢都只不過係遠東橫Inn一個街口，同埋離車站都叫ok近，好易搵！上到酒店房，個門口係鐡門，冇鎖匙開門，而係用密碼開，都好新奇，但係作為酒店既感覺有d怪，甚至乎有d似坐監咁，對門俾人既感覺好冷漠咁！入到去裡面重細過大阪果間，唔可以開哂兩個喼，真係幾迫！唔單止咁，夜晚冲涼既時候，我行左入浴缸，發現頭頂有d暗，望上去先至發覺有條樑，原本個浴缸唔濶，啱啱好夠就咁企既，而家條樑佔左個浴缸差唔多一半，連我都好有壓迫感，我即刻唸起老公咁高，實頂頭！果然，佢出來同我講佢要打斜企先得，笑死我！

 

今日既行程冇特別，去到東京再check埋in都成四點幾，都係响池袋附近行下，熟下環境先！

日本之旅 - 牛奶篇

老公好鍾意飲牛奶，奈何而家d奶真係信唔過，三聚氰胺鬧得熱烘烘，都係飲少d安全d！

去到日本就唔同嘞！感覺安全d！所以老公都好盡情咁晚晚飲一盒牛奶，返到香港就無架嘞！

老公話張相似賣廣告喎！

 

 

日本之旅 – Day 3

酒店既冷氣好強勁，但佢張羽絨被真係又輕又暖，雖然個枕頭好唔掂，扁到死，但都瞓得幾舒服，起身果下要出被窩，超凍，好似平時冬天咁！尋日都無見到啱既頸巾或者褸，所以今日都係著多件衫出去好d！連埋打底件小背心，一共著左四件衫，不過因為全部都好薄，唔覺得好暖。

 

今日落雨，唉！好彩都知天氣麻麻，有帶遮過黎日本。出左門口，兩個人用一把遮，老公個相機袋要斜揹，兩個人都要淋雨，都唔係辦法，去左seven買把大遮至得。日本人好鍾意透明遮，街上既人好多都用呢隻遮，我地就買左把磨沙既，攞上手都好紮實，圍起港紙都係四十蚊，重平過响香港seven買既帆布遮，好抵！

 

今日真係好凍，可能因為落雨啦，感覺係好似香港十三、四度著住短袖衫咁凍！我地搭車去到京都，再要轉車去嵐山，因為唸住去搭嵯峨野觀光小火車，唔會坐激流船，所以唸住直去左亀崗，坐番觀光小火車去嵐山先至仔細咁行。買左飛（都成400 yen搭唔係好多站咋）上左車睇到佢有幅圖關於嵯峨野觀光小火車路線，發覺小火車既尾站亀崗並唔係JR站既亀崗，而係叫馬堀，呢個時候，我都突然醒起好耐之前睇過一個網友既遊記，講過類似既經歷，不過人地就真係响亀崗落左車至發現，行去馬堀都遠遠地，最重要既係佢話果度附近係農田，無咩人可以問路（不過就算有都問唔到d咩架啦，雞同鴨講）。因為驚貿貿然响馬堀落車要搵小火車個站，出面又濕又凍又落雨，老公話去返嵐山先（去嵐山只要230yen咋，每人蝕左170yen嘞@_@）。其實因為行程plan係我plan，睇人地既遊記又係我，發現呢個問題都係我，老公咩都唔知，我同佢講有問題既時候佢又反問番我好多野，我又要解釋一大餐，攪到我鬼死咁。因為覺得佢之前真係一d都無理過，而家又問長問短，如果佢一早同我有discuss過行程，又或者有睇過d書有番少少concept，我就唔使攪錯左煩緊果陣重要解釋咁多啦！嬲嬲地响嵐山落左車，好易咁搵到小火車個站（喺正隔離），但係班車要成九個字之後先開，老公話行左呢度先晏d返黎，是但啦，九個字真係耐左少少，好難响個站度hea咁耐嘅！

 

我地唸住行去附近天龍寺，一路行既地方都好靜，周圍都係民居，唔太像樣！老公突然好醒咁話轉左（定轉右？我唔記得嘞），我問佢點知，佢話見到有路牌喎！嘩！個路牌超細個，高度係去到我膝蓋架咋，重要响轉角位，有d樹蔭咁，睇唔到都唔出奇。見到天龍寺，無即刻行入去，因為反正回程都行返同一條路，回程至行都唔遲，咁我地就再行入d搵渡月橋。

 

雨一路都無停過，天氣又凍，加上之前既小意外完，個頭開始赤赤哋。見到渡月橋，其實d水都唔係好澎湃，但係條河真係幾濶，都幾壯觀，加上背後連綿既山脈、河邊小船、微雨煙霧、天空飛鳥等，構成一幅好靚既景象，我相信有陽光既時候，又是另一番境像！

 

影完相開始行下周圍既商店，都係賣野食既多，有d就賣江户時代既油紙遮呀、布袋仔呀、公仔咁，我就無咩興趣買嘞！反而平時唔“好”食既我都肯睇下野食。我地入左間小店睇精品同野食，見到有盒手信個様包得好靚咪研究下囉，個老闆娘好客氣咁話叫我地試（當然係我地估佢係咁意思啦），以為佢剪少少俾我地試食（香港好興剪到一粒粒俾人試架麻），點知佢一件三角形既菓子，剪左一半俾我老公食，重要好熱切地望住你既反應，因為老公覺得好甜，都無咩意思買，見人地咁好剪成半俾佢，攪到超唔好意思咁！我就係咁意買左包糖仔同一罐Hello Kitty餅（我鍾意儲靚既公仔鐡罐麻），Hello Kitty著和服背景係京都紅葉，當係留念囉！行行下見到有間店賣燒米餅，係新鮮燒出來重暖嘅，重有好多唔同味，忍唔住一人買一塊。再行下，見到有間幾大既店買d一盒盒既手信，重有碟仔擺d試食出來，咪走入去試下，點知攞起一件來吃既時候，有個sales已經好快撲左過來講左一大堆野，當然我地又係唔知佢講咩，我只係知道果件野勁甜，佢又係好殷勤咁望住我，攪到我都唔係幾好意思表現出好難食咁！其實間店都好多人，個sales都真係好快反應咁來招呼我，係抵讃嘅，不過我就冇expect過會有人行埋來，因為擺哂d野食出來俾人試，我以為會好free！經此一役，老公無唸住要再試，我就師奶仔一名，梗係想試埋其他果d啦，咁我咪唯有睇下邊個位冇sales，以好快既速度攞左擺入口然後行開，好鬼祟咁，都係試左一、兩次咋！最後都俾我買到一盒，好靚架，不過呢盒無得試嘅！

 

出返去天龍寺，果度真係好寧靜，最衰係落雨，好麻煩！天龍寺裡面有d葉開始轉紅色，真係得少少，我就係咁叫老公幫我影相，一定要影埋d紅葉（但係其實d紅葉响好高，但係我又矮喎，哈哈）！

 

人地話天龍寺附近有個竹林幾靚，我一早都唸住去，唸住有陽光射入個竹林會好靚，但係今日落雨，冇陽光，冇哂我唸既野！老公就好想去，我個心就重响小火車度，不過唸住唔太晏，搵埋竹林都唔遲嘅！開頭以為天龍寺通向竹林，點知搵極都冇路行，要出返去搵左一陣就發現嘞，個入口唔太突出，分分鐘過左都唔知！入到去，當然真係唔係果回事啦，一d陽光都冇，都幾陰暗，影d相出來唔靚，同入左個樹林冇咩分別！

 

行完竹林，都七七八八，老公話唔搭小火車，都幾失望，一路都唸住係must go架麻，佢話都係睇風景，應該唔太特別喎！唉！我見又凍又累，重要係大家都凍到極之頭痛，真係捱唔到咁耐，去返京都站行商場暖下至得，唯有放棄小火車啦！咁我地見有個巴士站寫住返京都站，咪費時行番黎果條路咁遠搭JR囉！點知等左好耐都未有車，再試下睇下個牌幾耐一班，嘩，半個鐘先一班，重要等多幾個字，唸下唸下都係行番原路搭JR算嘞！

 

唔係我渣，連老公都凍到頭痛，真係好凍！至慘係我地口渴㩒機買茶飲，果枝茶凍到入心入肺，可能就係呢枝茶令到我地忍唔到企响條街等巴士，咁辛苦都寧願行去搭JR。

 

去到京都站，果然暖d！去左手塜治蟲博物館，本旅遊書推介嘅！去到簡直有受騙既感覺！本書講到果度好大好多野睇咁，去到大就大，果d俾人影相既公仔好零落咁擺左出來，間賣紀念品既店細細間响一邊，其他咩都冇，地方大但冇野响裡面，真係俾本書騙左！

 

夜晚返去心齋橋行衘，除左指定行藥房外，我地重行埋賣衫既舖頭，再唔買番d野保暖，都唔知過唔過到聽日，褸又好，冷衫又好，底衫都好啦！其實日本衫真係幾靚，日本女仔好識打扮，响條街度既女仔，個個都著高跟鞋同化哂裝，唔會有人著T-shirt牛仔褲波鞋，有既我唸都係好似我咁，係遊客！所以我好難買到衫或褸襯番我d咁sporty既衫，最尾都買左條頸巾，紅色格仔，又靚又軟熟，方便帶出街，又唔使返香港入喼既時候阻位麻！

日本之旅 – Day 2

今日plan左去奈良睇鹿、神戶食神戶牛同上神戶塔，一日去兩個大市係緊迫d，但預番聽日全日會去京都，行程更緊迫，我又捨棄唔到奈良或神戶，趕就趕啦，反正啱啱開始，重有精力嘅！

 

雖然未出發去日本之前已經keep住check天氣，最高有廿四、五度，最低有十七、八度，曾經見過有十五度，但係當香港熱到有三十度既時候，真係好難想像十七、八度有幾凍，我咪成日唸係比香港涼少少囉，安全計我都帶多一件冷外套（不過係中袖架咋）同一、兩件薄長袖衫。但係日本都真係幾凍，今日著哂薄長袖（摺左做中袖）同件冷外套都重有d寒意，今日出去睇下有冇啱既頸巾或厚d既外套至得！

 

朝早食左個西式早餐，好靚架，有個籃裝住隻蛋，不過果度人人都食煙，所以都係急急食完就閃。由大阪去奈良其實都幾近，不過d車好鬼煩，又普通，又急行又特急又唔知咩區間急行，唔同車係唔同速度，停既站又唔同，至慘係我地一去到月台見車就上，有時都睇唔到係咩車，上左車又無display話到俾你知果架係咩車，好渣！尋日由機場出難坡已經領教過呢d野，今日盡量小心d 啦！

 

無驚無險咁用左成九個字去到奈良，d書話半個鐘架，無計，講緊係快既，都無計到上唔到最快架車，下下都搭住車等轉快車既時間麻！出左站，其實好易locate奈良公園既位置，因為好多人都向同一方向進發。唔知係近公園定係時間重早，呢度d空氣都好淸新，加上涼涼地，行得幾舒服！好快我地就見到有兩、三隻鹿，心情都好興奮。其實來之前老公都好質疑我點解咁想去睇鹿，佢話：「你唔驚咩？」無錯，對於d動物，不論其大小，我都好驚架，不過睇書見到d鹿咁可愛，好似好善良咁，我就覺得自己“應該”唔驚，去旅行就係要見識見識，唔係就好浪費麻，所以我都幾想去嘅！

 

但係原來唸同實際係兩回事，離遠見到d鹿既時候我同時見到有隻白鴿响我附近，好驚！老公買左餅餵鹿，其實我都好想餵，不過我真係怯，唯有揸機影相（但又驚隻白鴿行埋黎我度唔知，唉）！

 

行入去見到五重塔，周圍影下相，重喺間士多（應該係小店）買左盒餅俾同事做手信（其實係口渴買野飲但係得張10000 yen，唔好意思買咁少野咪攞多盒餅囉，都好靚架！）

 

其實沿路都有成群白鴿飛來飛去，我都要運路走，行下停下等d白鴿飛走先行，老公都怕左我，哈哈！點知有一下我驚得滯，一路跑上條樓梯，氣都喘埋，擰轉頭見老公原來喺樓梯底影緊我呢幕「奪命狂奔」，好攪笑！

 

原來之前行既地方未真正入到奈良公園，我地再行左一陣就開始見到好多鹿，幾隻幾隻一堆响條路度，見到d人手攞住野就哄埋去八下係唔係野食，其實佢地都無話好大動作，都會慢慢來哄人，所以感覺佢地無襲擊性咁，離遠睇佢地呢d擧動重好得意可愛架，不過真係要「離遠睇」囉！唔知點解行近d，睇到佢地對眼既時候（雖然係又大又黑又天真無邪咁），我都真係好驚，真係好鬼無用！呢度d鹿都唔怕人嘅，之前話佢地心臟好渣，唔好嚇佢地，唔係會嚇死佢地，真係唔明點解，但見佢地個身真係震下震下咁，好攪笑，我同老公講，我俾佢地嚇死就有。我地重見到有隻鹿過馬路，咁佢緊唔係企定定睇紅綠燈過馬路啦，而係跑完再跨欄，幾英呀！重話膽小喎，我有d唔信囉！

 

去奈良既目的係睇鹿，睇又睇過，我地都無行哂成個公園（其實都係行左佢既一小部份），開始出發去神戶，唸住過去食神戶牛lunch set，平d麻！

 

由奈良去神戶，係要返左大阪再轉車（唔知係我地唔識蠢左定係真係無其他方法），都好費時，但算啦，志在到此一遊啫！都唔係有太多must go既地方，應該夠時間嘅！

 

之前喺網上見人講有間食神戶牛lunch set好食又抵，好似好近車站咁，點知搵唔到，好失望，重要搵到過哂兩點，就算俾我地搵到都無用，無左lunch set，貴一倍喎，老實講，我就唔多捨得，又唔係話十分“好”呢様野。搵唔到又行到又累又餓又渴，是但搵左間野食烏冬就算！

 

喺神戶行左商店街，搵到Mosaic，之前有唸住玩果度個摩天輪，點知行到去見無人玩，我地都唔想玩，就咁影下相算！之後上神戶塔睇夜景，其實以前去過東京鐡塔，上到去睇完都無咩特別，所以唔係咁“好”，但唸住循例都去啦，d境會唔同嘅！好快睇完，响個塔又無其他野好做，得間旋轉café。我地未食dinner，但間café似飲野多，所以都係出去食嘞！老公一出塔就問我有冇schedule其他地方上塔，我話有，因為唸住佢呢期鍾意影相，咪schedule多d俾佢影下夜境囉！佢即刻話唔會再去其他塔，因為都幾無聊，上塔都話貴唔貴話平唔平，上得果一陣，傻下傻下咁，我梗係非常贊成啦！

 

夜晚我地搵左間小店食和牛，埋單重計錯錢定有優惠，收少1000 yen，哈哈，好開心！

日本之旅 – Day 1

之前已經喺網上做左電子登機，但係唔放心都係早兩個鐘前到機場，食埋早餐行去登機閘口，原來都只係時間啱啱好咋！重以為要周圍hea添！

 

話就話國泰機，其實都好迫，重好殘舊，無我地唸得咁好！我地睇左功夫熊貓，真係幾攪笑，有幾次都忍唔住禁實個咀笑左出聲！應承左老公個妹喺飛機攞個花花碗仔俾佢個女做食飯碗，好衰唔衰一個碗係裝蛋糕，一個碗係裝冷麵，最後唯有食完冷麵飲哂d冷麵汁，抺乾後放入外套袋，幾大犧牲呀！我就鐘意個青蘋果綠杯仔，横掂都攞開，順便啦！不過d空中小姐黎收餐既時候，我都好驚架！

 

好順利去到關西機場，搭車去到大阪難坡，呢個時候先至係我地既旅程既開始。其實我之前都做足功課，搵哂地圖帶埋黎，奈何d地圖真係唔係幾on scale，我地一人拉住一個喼行下行下都未搵到間酒店。我手又短，隻手抝後拉喼，原來真係好累！老公唯有一個人拉兩個喼，我就睇地圖（佢竟然信得過我喎）。拉左都好耐，好似唔知重有幾遠，我地忍唔住走去問人＠＿＠，但係都係雞同鴨講，好彩個伯伯都醒，喺我地幅地圖點左我地當時所在地，咁起碼有個reference重有一段路先到！

 

都唔記得行左幾耐，終於到酒店，真係好開心！因為之前飲哂d冷麵汁，好鬼口渴，好期待去到酒店擺低d野就出去搵野飲！間酒店房無我想像中咁細，可以同時開哂兩個喼，哈哈！

 

原本打算今晚即去梅田既空中觀境台睇夜境，但老公話都係响酒店附近行下，熟悉下先，原來佢都有“意見”嘅！

 

出左酒店，原來好近道頓堀，好熱鬧，我地即時已被吸引左去。成條街好多食店，真係目不暇給。雖然只係當地時間六點幾（香港時間五點幾咋！），但我地朝早喺機場既意粉屋食左個又貴又細既早餐，喺飛機食左個叫ok既牛肉飯同冷麵，經過一輪搵酒店之後，真係好肚餓，所以我地不約而同咁話食野。我地好快見到間元祿壽司，我見同香港一様名，其實麻麻地想食，不過太肚餓，見佢又平（136yen一碟咋舌）唔理咁多，試下囉！嘩！間野真係掂喎！可能我對食都無咩太高要求啦！我同老公都覺得d壽司料好鮮甜，出乎意料之外咁滿足，嘻嘻！

 

醫完肚就四圍行，影下相。其實來日本並唔係有太大購物慾，都係唸住行下睇下，雖然我講過幾次，我知道老公之前都有d擔心我會失控同口是心非（我唸）！我唸行完今晚後佢都要跌眼鏡，事關我様様都覺得靚，但係睇完都放番低，最後都只係買左枝睫毛液，絲襪同lunch用小袋啫！重要係喺老公多番鼓勵下我先至買，哈哈！可能人大左，唔會好似以前去旅行咁買埋d無謂野，得個攞字，旅行過後又後悔咁衝動買野，又懊惱點收埋呢d無謂野！所以，都係睇下開心下最多影相影低就算嘞！

日本之旅 － 前傳

時間真係過得好快，唸左好耐既旅行，終於都去左，想趁記憶猶新既時候，寫番低佢！

之前有舖頭喺身，想去旅行都抽唔到時間去，到無左舖頭，咁啱大家又轉埋工，我份工响頭一年係無假嘅，要放就要no paid，好似好唔抵咁，所以只好plan做夠一年之後可以攞大假既時候去，所以呢次旅行真係等左好耐！

六月既時候我地就開始格價，見價錢ok重confirm埋，果時都未唸去邊d地方，機票就confirm左大阪入東京走，包既酒店得兩晚，不過好彩既係住兩晚送一晚，咁好順理成章stay响大阪既時間就三晚，再要响東京book多四晚酒店。初步行程就係咁決定左，之後既時間就係認真睇書睇下去邊好同study下買唔買rail pass嘞！

老公既態度係由我全權plan個行程，表面上係放任我，實際上我話佢懶既成份多d。其實今次去旅行，感覺都無以前啱啱畢業既時候有得去旅行咁興奮，我重記得果時第一次東京自由行，我睇書plan行程既熱心程度非常髙，好多地方都好想去。今次去八日七夜，我都唔係好的得起心肝寫下行程，去到八月尾至認真d去睇書，睇website，睇完都無咩結論果隻。老公又好好野咁無問過，我都有話佢唔幫手，多個人傾下唸下好d麻，而且有discussion先至有樂趣架麻，佢又成日話見到d字咁細好眼瞓喎，所以我成日話過到去要賣甩佢，哈哈！

九月，開始倒數去旅行，無好興奮既感覺，反而好失落，感覺又想快d去旅行，又唔想咁快，好怕去完返來又要重新投入工作既失落，好矛盾咁！係咪因為期待得太耐，所以當真係要起行既時候，好似突然無左d寄託？！呢種心情真係好難解釋！最後，我既行程依然是原地踏步，只係揾左d地方想去既，唸住到時再算，重有就係決定唔買rail pass，就係咁簡單！

平時响公司都唔忙，點知老細好似當我唔會返咁，放假前一個星期成日叫我做呢様做果様，咁都唔緊要，至慘我同佢都唔响同一層樓，成日要搭lift又上又落，好鬼煩！因為廿七號早機，我重唸住之前攞日假執下野，睇下有咩要買，點知就忙到一日推一日都攞唔到假不特止，就連放假前果日都準時走唔到，真係意料之外！

遺忘

有好長的一段時間也沒寫網誌了！最初，其實我自己也不知道為甚麼突然就這樣失蹤了，直到有一天當我想寫點甚麼的時候，開了相機看看拍過甚麼相片、做過甚麼、去過那裡，我看到小馬哥，看到他替我拍的照片，看到麻麻最後和他的合照，由那一刻起，我連隨身的相機也放在家裡，因為，我很怕再看到他，再想起他，再記起他已不在我們身邊的事實！

小馬哥的離開，最傷心莫過於麻麻！最初的時候，麻麻沒有表現過不開心的情緒，甚至還有點放鬆的感覺，後來，她開始每天致電給我，常常問：「你估小馬哥返唔返來？你估小馬哥喺四川定東莞？你話．．．．．？」每天的午飯、放工、甚至乎是晩飯後也會致電給我，説的是同樣的話題，我真的不知道怎樣答，我自己也很想知道答案，我不想猜測，不想令她有太大希望之後反而是更大的失望！我可以理解她有多麼不捨小馬哥，儘管她從來沒有説過這個字，我可以從她重複的提問、頻繁的來電想像到她有多麼的受傷！大概，她最想有人會向她説小馬哥只是去玩一會兒，很快便會回來！

老實説，我根本應付不了她對我在情感上的依附，我真的有種窒息的感覺！

媽媽沒有工作、沒有朋友，全職家庭主婦的她常鑽牛角尖，思想偏激及固執，加上兩個哥哥也不理家事，爸爸又不常在身邊，她情感上的依附不其然便落在我身上！身為女兒的我雖然理解及習慣，但還是有感到辛苦的時候！為甚麼每次也是我？為甚麼家裡的事每每也只有我獨力支撐？為甚麼我不可以像其他女孩子般是家中的嬌嬌女？

小馬哥的離開，我自己也很心痛、很不捨！我實在負載不起更多的傷痛！我想，潛意識裡，我選擇了逃避，逃避寫自己的網誌，逃避再觸碰那相機，逃避想起他的一切！

這也許是我一直以來自我保護的一種方法：傷痛、逃避、忘記。我開始明白，我不是人大了所以記不起從前種種，而是有太多的傷痛需要遺忘，有太少的開心需要永存！

火燭

今晚和老公的親戚在家附近的酒家吃晚飯，老公突然說，為甚麼陸續有這麼多消防車經過，我不以為然，定睛看看，真的，大大小小的消防車直駛同一方向，不就是媽媽家的方向嗎？看看手機載的新聞，原來是火燭！我頓時心頭一震，不是媽媽家吧？大嫂這陣子也瘋癲的常來媽媽家吵鬧，不是也常咒罵說要報復嗎？一想到這裡，我真的有點暈，立即撥電話看看媽媽有沒有事，幸好是鄰座發生火災，不是我家，嚇壞我了！

最近因為大哥大嫂的事，常弄得我很擔心，有時候我真的十分痛恨這個大哥，為甚麼我會有這個沒有貢獻、不為人設想、不顧後果的大哥？當我擔心家裡會否發生甚麼事的時候，當我擔心大嫂會否又到媽媽家搗亂的時候，他人究竟在那裡？為甚麼我們總要處理他的爛攤子？！

生日快樂

小馬哥：

生日快樂！今天是你的六歲生日呢！

「小馬哥」，大概只有我還會叫著這名字，因為大家也改叫你珈唯－你的名字！我還記得小馬哥是你媽替你起的，因為你是在馬年出生，而你是我們家的第一個小生命，大家也不想像其他人一様叫你「Be Be」，所以才有這個名字的出現。小馬哥，你知道嗎？你剛出生時的様子很醜，不像現在這麼精靈．可是你小小的身體，瘦弱的手腳卻觸動著我的心靈，你緩慢眨眼的可愛樣子還在我腦海裡，就像是昨天的事。因著你的出生，我才會看到你爸爸温柔的一面。你爸爸平時不常說話，一家人從來也看不穿他的喜怒哀樂，直到你的出現，我看見他眼裡的愛。你剛出生的幾個月還是你爸爸照顧你，從喟奶、掃風、換片以至洗澡，也是你爸爸包辦。他還喜歡買一些細小的衣服給你，穿在身上總是剛剛好大小的，他說如果怕嬰兒長得快而買大些的衣服，根本不好看，又論盡！這個爸爸連幾個月的嬰孩穿得好不好看也照顧到，我真的很意外，一個對自己外表沒甚要求的人所說的這句說話，六年後的今天，姑姑我依然記得很清楚！

因為你媽媽的證件問題，不能留在香港，所以也帶著你回東莞生活，我再見你時，你已兩歲了，那睌我們的重遇，竟然在醫院！你爸爸帶著病了多時的你回香港醫病，爺爺見你病得瘦瘦的，當晩便帶你去急症室，我和丈丈（當時還是哥哥）立即趕到醫院看你，原來你已經會站了！你病到兩眼也是呆呆的，又因陌生，你應該哭過了，兩眼睛還淚汪汪的，十分可憐！你對我們還有點抗拒，一直待在爺爺的懷裡，不讓我抱你，不過不知怎地你卻肯跟著丈丈，站在他的掌心上，也許從那時開始，你便喜歡他多於我吧，因為你總是黏著他纆著他，我可以知道為甚麼嗎？

往後你便留在香港，很快你媽媽也來香港定居，房署也派了屋給你們，一家人終於團圓了！

你知道姑姑為甚麼疼你？除了因為憐惜你常面對爸媽吵架而想對你作點補償，更大的原因是你真的很乖，很懂事，你從來都不會有太過份的要求，你彷彿知道自己不像其他小朋友有父母驕縱而亂發脾氣。我記得之前你來我家看見了我在7-11換回來的熊仔，你很想要，可是我吿訴你姑姑也很喜歡它而且也很辛苦地儲印花換回來的，你扁扁嘴，過了一會，我還是將它送給你，你開心得立即放入袋內。當你離開我家時，你突然又取出熊仔要還給我，我問你為甚麼還給我，你不是喜歡它嗎？你說姑姑不是也好喜歡它嗎？這句說話很窩心，才五歲多的人兒會這麼貼心！姑姑疼你，所以你每次要我買給你的東西或是我答應了你的事，我從來都不會令你失望。我也許不能令你幸福一點，但我不想我的小馬哥有更多不開心，知道嗎？我還記得在你媽媽和我們鬧得不甚愉快之後，麻麻有一次送你回家，你到樓下便不讓麻麻送你上樓，更要她走。麻麻不開心，說你現在只親媽媽，連麻麻也趕走，你沒有說甚麼。我問你為甚麼趕麻麻走，你一個人上樓很危險，你卻說因為怕媽媽罵麻麻，所以不想麻麻送回家。我沒有疼錯你！

現在，你在那裡呢？這些日子以來你這喊包一定哭過好幾遍了，對吧？今天有沒有人和你慶祝生日呢？又有沒有你喜歡吃的蛋糕呢？我還記得你早早在想著要我買甚麼禮物的模樣，你還沒告訴姑姑啊！姑姑還沒帶你去泳池游水呢！

小馬哥，我想告訴你大家也很掛念你，無論你身在那裡，很想你知道你不會是孤單的，因為我們愛你啊！小喊包，你要堅強啊！

祝早日回家！

姑姑

東莞

證實了小馬哥身在東莞，聽說還有表哥陪著玩，我的心也定了一點！不過我還是希望他可以在香港上學，因為我去過的東莞，環境著實不太好。

電視做著廣播，小一派位需要辦理一些手續，我和媽媽也很著急，不知道大嫂是不是真的要小馬哥在大陸讀書，還是嚇唬我們，但如果要在香港上小學，她便不可錯過那些辦手續的日子了．．．．．．

信

大嫂回來了，卻不見小馬哥！

今晚回媽媽家吃飯，剛巧大哥收到大嫂的信，大容盡是對大哥的指責，而她深信我們這一家在她離開以後必定開心不已，甚至乎還會慶祝一番。至於姪兒，她說已帶回四川了．．．．．她在信中不斷形容姪兒在陌生的地方面對陌生的人和事是如何害怕，稚子以涙眼望著母親，是何等脆弱與無助。大嫂指控我們這一家剝奪了小馬哥在香港生活及上學的權利！

我很心痛，心痛著小馬哥這個小人兒怎様在這個陌生的地方熬過去，沒有父母，沒有疼他照顧他的麻麻爺爺，沒有和他玩的妹妹．．．．．．

我很難過，為甚麼要這樣？為甚麼一聲不響地帶走他？為甚麼要留他在這樣陌生的地方而自己卻回來了？究竟是誰狠心讓這小心靈受傷害？是我們嗎？

我很氣憤，大哥從來也沒說一句，是難過？是放棄？還是事已不關己？

四川，才剛地震完，雖然小馬哥身處的地方應不受影響，但有誰保證那裡真的安全？

退學

星期日，大嫂又來到媽媽家吵起來．．．．．

星期四，媽媽致電給我說大嫂替姪子辦了退學手續，而且會帶返大陸，媽媽是由幼稚園老師那兒知道這消息的。我和媽媽都很驚訝，不是要等小一派位的嗎？雖然大嫂時常說要帶兒子回大陸生活，但狼來了的故事依然會發生。最初大嫂時常說要帶走姪子，目的大概是要讓我們緊張，迫使媽媽為不想孫兒在環境較差的地方生活，不想以後也看不到孫兒而硬撐著幫她照顧兒子。她和大哥婚姻的不幸，不單時常以吵罵來發洩在大哥身上，還不時辱罵爸爸媽媽，更甚的是將所有責任算在我們一家身上。時間久了，大嫂的橫蠻、要脅已對我們失效，要帶走姪子，由你！不是因為我們狠心，而是我們都相信這只是她的詭計，一來是她自己對兒子的將來有一定期望，二來我們相信她本人也不會捨棄香港的生活。

大哥提出離婚後發生了很多事，驚動過警察好幾次，大嫂找大哥或爸媽時的各種糾纏，真的令我很擔心，因為我覺得這個女人真的有問題，激動起來連我爸爸也拖不走她，也不知會不會做甚麼危險的事！

才星期日吵完，媽媽不見孫兒幾天，大嫂便在這幾天一聲不響地辦退學手及帶走姪子，這使我不得不聯想到她會不會做傻事，二嫂上過大嫂家，鄰居也說她和兒子返了大陸。雖然不捨得，大家似乎對她的離開鬆了一口氣！可是我心底還是覺得很擔心，叫了媽媽到她家開門看看，幸好真的沒甚麼。

但我下一個擔心是，大嫂要帶姪子返東芫還是她的家鄉　－　四川？

情何以堪？

最近常為大哥大嫂鬧離婚的事很煩！

其實自從大嫂憑單程證來港開始，麻煩便開始了。因為要找工作，她把兒子交給媽媽照顧，媽媽眼睛不好，精神差，年紀大了，要照顧一個幾歲的活潑小孩，真的很吃力，但還是半推半就的幫忙照顧蓍。我從來感覺不到大嫂對於媽媽的幫忙有所感激，反而有點「奉旨」！所以一直以來，我和她，或者說家人和她的關係只是淡如水。這幾年，大哥老是找不到工作，有時有工作但又沒薪水支，經濟有一定壓力。可能是這些原故，每次見到他們一起的時候，也是吵吵鬧鬧的，甚至乎你不會感覺到他們是夫妻，生活中的共同話題也只有錢！每次吵鬧大嫂也嚷著要離婚。這些日子也維持了數年，直至最近，大哥真的採取行動，她郤又大吵大鬧，提出諸多無理要求，一心只是來找碴，不是解決問題。有好幾次半夜或是清晨來接睡著了的兒子，更甚的是有好幾次要勞動警察才能平息風波．．．．．

雖然我並不是首當其衝面對這些局面，但單是從大嫂一次給我的清晨六時電話留言，內容盡是咒罵指責，我可以想像她對我的父母造成的困擾有多大，最可憐的是我的姪子，才五歲，每次也要看著父母及爺爺麻麻吵吵鬧鬧，小小年紀，情何以堪？

瑜伽

四月尾與Ellen報了瑜伽班，一心想多做一點運動，拉拉筋，身體好一些。以前的我是不會做任何運動也不會覺得有甚麼問題，大概人大了，身體機能也大不如前，不是這裡痛便是那裡痛，我也不得不正視自己健康問題。一、二月持續腰痛，現在雖然已好了很多，沒有那錐心之痛，腰也能正常彎下，但是行久了、坐久了或是睡得不好時還是會痛，而且如果看看其他人的話，我彎腰的幅度也真的太不堪了！所以，拉了Ellen陪我學瑜伽，因為一個人實在太沒動力了。

上完第一堂後，其實很沮喪，一來老師教得太快我不太跟得上，二來是當我看見那些肥師奶竟然可以坐下擘腿上半身可以貼在地上，我竟是全班最「高」而年齡最輕的一個，我真的開始擔心自己再老一點的時候會是怎樣？

到如今我已上了四堂瑜伽，雖然也是最「高」的一個，有些動作又只可非常勉強做到，但我感覺到做完瑜伽後那種輕鬆，腰痛彷彿也紓緩了一點，這是一種鼓舞，我相信多練習，總有一天我也可以做得更好，可以不用做「高妹」！

二百七十八天

時間過得很快，一眨眼，在入境處上班已九個多月。由最初很不開心，天天也想著要離開，時常想著未找到工作也要走，到現在已差不多一年了，當初自己也沒有想過能夠呆在這裡這麼久，那怕是三個月！如果你問我，是不是開始喜歡這份工作，所以最後也沒離開？答案絕對是否定的！

我依然不喜歡我的工作性質，依然不喜歡在這裡呆著的感覺，依然不習慣這裡的人與事，依然擔心在這裡呆下去再也走不出來。我仍然會因為我的工作不開心，為我的前途擔憂，只是發作的頻率沒有剛來到的時候那麼高，不開心的程度亦沒有剛來到的時候那麼大．．．．．．．

原來即使你有多不習慣不願意，時間久了，終有一天會習慣！也許這半年下來我也時常生病，沒有時間、心情再想開心不開心或者喜歡不喜歡！現實亦告訴我，走出來原來也不易！

今個月我被通知會有薪酬調整，這是繼二月後再有的調整。原則上我應該很高興，一年的合約竟然加兩次人工，比率達十二巴仙，這樣的工作往那裡找？事實上，除了有過一剎那開心外，剩下的只有更擔心，我還可以去那裡呢？

大埔之旅

今日忽然很想去看看大埔林村的許願樹，奶奶又說看雜誌大埔有一個水陸墟的地方，挺熱鬧的，就這樣我們便一行人出發了。

首先是去了林村，看了新的許願樹，感覺它很小似的，也許是剛移植於香港，真的需時生長與發展。前行不遠，看見了舊有的許願樹，大大棵的，好不壯觀，可是它的枝幹因長年承受遊人擲上的寶碟而向橫延伸，因為太橫太重的原故吧，整棵樹像是上重下輕要倒下似的，也許樹也老，健康不佳，樹也不太有生氣！為挽救這棵大樹，可看見樹下有很多大木柱支撐著，看見這樣的情況，也為這棵服務了香港多年的老榕樹而惋惜！

下一站是水陸墟，由於預期太高，去到不禁有點失望，其實它只是一個海濱公園附有行人及單車徑，行人徑的盡頭便是一個小小的墟，內有一些攤位，撈金魚、騎馬仔、賣小食及玩具，地方不大，其中比較特別的是有小艇開出海，可以遊船河欣賞風景，但我們帶著小孩的關係，不方便玩這玩意了，唯有四處逛一下便走了。

 

B3

深圳灣口岸開通已有一段時間，而我家樓下更有巴士直達，一直也想試試經此路返內地，但一直也只是想而沒實行，一來是懶惰，二來是明知道回內地沒甚麼節目。

四月二十六日，我和老公也挺無聊，即興便走到巴士站搭B3去深圳灣口岸，沒有計劃去到那裡之後又怎樣，沒有做任何資料搜集便起程了，感覺有點像探險！

車程很短，大概二十五分鐘便已到達，出入境大樓很新，奇怪的是人卻不太多，星期六的下午耶？！過關沒有人龍還是第一次呢！過了內地的關往外走，發現除了的士，只有兩三架巴士，四周也是像新開發的模樣，甚麼也沒有，有點荒蕪！我們往各個巴士站看看巴士行駛路線，發覺根本上沒有一個站是認識的，除了「世界之窗」。就這樣，我們決定上90路車往「世界之窗」出發！

車程不到十分鐘，我們便又到達了，四處逛逛，由於大家小時候也去過「世界之窗」，沒甚麼興趣又往內鑽，只有在門外拍個照，算是到此一遊，我們還在奧運專賣店買了一隻小小的杯（有香港馬術的圖案）及孖裝鉛芯筆留念，專賣店前放有福蛙大公仔，我又怎會放過與它合照的機會呢？（不說還以為去了北京呢！）  

再行了一會看看歡樂谷，只是沿途有小孩兜售鮮花，途人不買便拉著人家的衣服不放，幸好我拒絕她後沒被纏著，但沿路走來也像跟著我們，危險警號不禁亮起，放鬆的心情開始緊張起來，只逛了一會兒，我們也沒往回走找巴士搭，手一揚便截的士直駛深圳灣口岸回程。

雖然沒有做過甚麼，但走了一趟內地，不用擠火車，感覺蠻特別的！ 

So Lazy

四月又無點update個blog啦！So Lazy！

呢排唔知點解個人都懶懶地，無咩mood寫野，可能都係果句，病！病係會令人意志消沉，做甚麼也沒勁，只有shopping才能稍稍紓緩心中的鬱悶！

本以為四月能夠安安份份，唔使病假，點知都係衰左！四月都好過一排，唔知邊日條腰又有少少痛，唔理，之後，個肚又痛左成個禮拜都無理，屯門醫院突然打來話有期照超音波，唔可以唔理，如此種種，我都要無奈病假一天去解決呢ｄ煩人既病！四月二十一日，屯門醫院照超音波又係一ｄ唔開心既經歷，再一次令我相信，唔係死人同無錢既話，都係去私家好ｄ，同埋，我都係要認真唸下買醫療保險。去完屯門醫院再趕去睇私家醫生，今日要睇醫生，條腰又唔痛，真係激死人，唯有只睇肚痛，醫生禁完同聽完個肚就話我腸炎同腸抽筋．．．唉！前排先至胃抽筋而家又到腸，沒完沒了！重要係無咩原因，或者係無咩先兆！每一次都突然呢度痛果度痛，好煩！食左兩日藥，都好左好多，但都重係有時有ｄ肚痛，唔知係咪無戒口．．．．醫生叫我唔好食蔬菜同白粥同奶，唔．．基本上我唔飲奶唔會食白粥（除非病到死啦），我一向都偏食菜多過肉，唔食菜我只有白飯．．．．所以我都無戒口照食菜，唔知係咪咁而未好番哂呢？今年病痛真係多，最近唸緊做番個女性body check，但原來好多地方都要office hour時間先做到，星期六又無，我都成日病假同No Paid Leave，真係唔好意思又No Paid去body check，雖然，No Paid應該無咁唔好意思，但係個個月都No Paid好難開口，唯有等我再search下先啦！

講開shopping，可能成日呢度唔舒服果度唔舒服，個人都down down 地，shopping買野真係心情好ｄ，不過，有時候我都擔心自己會變左購物狂，因為有時候出街無野買到真係好失落，唔出街又心癢癢咁，呢ｄ係咪病呢？定還是係女人既通病？Anyway，我希望病痛可以快ｄ遠離我，等我可以係開開心心shopping而唔係down down 地走去shopping！

飯聚

四月十五日，與一些大學宿友飯聚，四個人一見面便找地方坐下點食物。其實平時很少和朋友飯聚，因為我太被動了吧！飯聚通常是一大班人，要不，便是剛好兩個人的，很少時候是中間情況，四個人，感覺也挺特別！四個人，說著說著，也十一時了，因為太多近況要update，大家也渾然不覺時間過得這麼快！我比較喜歡這種小圈子飯聚，因為人不是太多，才能真正可以傾談近況，一大班朋友的時候，總是你一言我一語，東拉西扯，實際談不上甚麼，不過見上一面也是難得！

飯聚間知道Gigi原來將於九月結婚，很為她高興，我的好姊妹快要進入人生的另一階段，有一刻我的感覺像是回到自己未嫁的時候，很為她緊張及興奮，遺憾的是她沒邀我做姊妹，想她也有親妹及太多朋友吧！當年Gigi是我的姊妹，我覺得能夠為她做姊妹是很奇妙的緣份及淵源，將來老了再回想這些事也應該十分美好，遺憾，遺憾！

又一個月

又一個月沒有寫網誌了，是太懶了還是太累了？我發覺，一些事或一些感覺沒寫下來的話，我會很快地忘了！

三月份仿似沒甚麼特別事發生，還是常常與病魔戰鬥！

三月八日，該是前幾天已染病，到今天才大肆地影響我的身體，放假才生病，我果然會選時候，老公非常無奈，因為我的病總是沒完沒了，循環不息，今次是最近經常談論的「流感」！我沒有看醫生，只是吃之前看醫生吃剩的藥。因為病而沒任何食慾的原故，老公煮了瑤柱粟米粥給我，讓我能夠於短暫有知覺的時間裡稍稍回復體力（我已昏睡了兩天）！這還是他第一次煮粥，雖然是稀了一點，但對於一個非常病的人來說，是剛剛好能夠嚥下！

三月十日，病假！已經不知道連續多少個月取病假了，今個月是第一次病假，希望不會像一月、二月時每月取兩、三天吧！吃了兩天藥還是一點起色也沒有，大概還是要看看醫生才會好！很辛苦的在一點前爬起床看醫生，要不然又要等到四、五點了！今次決定轉一轉看其他醫生，不想再看那個一等三小時又或是那個不用等但藥不怎麼湊效的醫生！

三月十四日，新看的醫生似乎也很好，吃了兩天藥已好得七七八八了，今晚約了Ellen一起上香薰護膚DIY堂，很是期待！最近不知怎地愛上了香薰，除了愛上嗅那些香香的味道外，我發現香薰也可用在日常生活中，如清潔家居或製造自家的護膚品，一枝小小的香薰油，功能挺多呢！有這麼一刻在想，我能否在這範疇裡開拓一點商機呢？我知道香薰不是甚麼新興的玩意，而香港又不比其他地方如日本台灣般普遍流行，但我想香港人之多，總會有它的粉絲吧！今天晚上的香薰班，比我預期中沉悶，但讓我對於香薰的基本認識增加不少，實屬意料之外，而且，親手製作了個人的護膚品，感覺很特別。但這麼一來，我發覺要在這裡找商機，沒有更多認識是不可能了，反而促使我去想代購一些有名但在香港買不到的貨品，這樣簡單得多！不過我想，這些念頭還是想想罷了，要實行一定要做很多資料搜集及研究，像我這樣後知後覺的人，根本很難早著先機！

三月十八日，中午去了飲茶後便開始有一點點胃痛，一直也沒理會，直到睡前也在嚷著痛，心想睡醒了便好吧！

三月十九日，早上起來還是有點胃痛，趕著出門沒理會，回到公司吃早餐時已痛得吃不下，但又擔心不吃點甚麼胃會更痛，勉強地吃完早餐，但已痛得渾身是汗了。感覺不對勁，隨即吃了胃藥。等了一小時多，痛並沒有紓緩，只有更痛，有過之前腰痛到哭的丟人經驗，縱使這次真的痛得要命，我也忍著，不敢說出來，又不敢在座位伏下休息，因為這幾個月以來我真的病得太多，十分不好意思！還是輝哥細心，時常會看出我的不對勁，他一問我有甚麼事，我已沉不住說要早走，十一時半，上班未夠半天，我也理不了這次是怎樣扣糧，我一定要走，看醫生也好，回家躺下也好，在那刻，我深深知道在公司呆下去是不行的。我想輝哥聽見我說得堅決，不像上次般堅持留在公司，他知道我一定痛得很，不然，我既然返到公司，沒理由又嚷著走，他立即報告了上級，我便立即離開了！我沒有立即去看醫生，而是先回家休息，吃過另一款胃藥躺在床上昏睡了！幸好今天老公放假在家，當我醒來後發覺吃下的藥完全沒有些微效用的時候，老公勸我吃點東西（下午三時還沒吃午飯），他替我點了米粉，雖然真的有點餓，但當外賣送來後，我根本吃不下去，只吃了幾小口，一整碗米粉完封不動的放在桌上。三時許，老公嚷著要我看醫生，我口中說好，人就痛得還在床上翻滾，久久不能成行。到診所時已是四時許，排十五個了！醫生檢查後說我是胃抽筋，怪不得吃甚麼藥也沒效！醫生開了八種藥給我，很久也未試過一次要吃這麼多藥，為了快點好，也得乖乖吃下！說來也神奇，吃過醫生的藥，真的止痛了！

三月二十日，老公放假來灣仔接我放工，一起過了銅鑼灣逛逛，胃痛剛癒，去了一間日本店吃烏冬，便又隨處逛。這幾天老公放假獨個兒沒事做，又時常提起之前吃過一次很美味的雙皮奶，我便提議吃甜品，但不太熟路的我們想找「義順」還是找不著，結果還是決定回家算了。由於銅鑼灣沒有巴士回家，我們決定坐電車到灣仔轉乘巴士。不過我們實在太大鄉里，在電車站上看見有車，我們便毫不考慮上了車，雖然老公問我：「跑馬地．．．．」我的答案：「銅鑼灣去灣仔咩車都得．．．．」但當電車駛離站，行經剛才我們行的路，還看見剛才已到但又看不見的「義順」時，我們也驚覺「跑馬地」是真的不經銅鑼灣．．．．．最後當然是大笑著下車，又再行一次同一條路，吃過「義順」才走。

三月二十一日，西貢之行。老公放了幾天假悶足幾天，今天我開始放假便駕車到西貢走走。假期的關係吧，很多人也圍在碼頭圍欄看船上的海鮮，一場來到西貢，我們也買了些海鮮回去。在西貢的一間小店買了Cath Kidston的Hand Cream和 Lip Balm，是近期我愛的天竺葵味，我覺得很少有便買下了！回奶奶家準備吃海鮮大餐，怎料奶奶突然不適，老公和她看醫生，大餐便由我操刀。蒜蓉蝦、豉椒炒蜆、清蒸蟹、蒜蓉粉絲蒸大帶子、清蒸桂花魚、瑤柱扒豆苗。幸好很多海鮮也是清蒸，只要洗好及預備蒜蓉薑蔥便可以，炒蜆及菜也不太難．．．．．．炒熟！晚上八時許才有飯吃，今天真累！而當我第一時間品嚐大大的帶子，發現蒸得熟了一點，味道還不錯！可這之後，我的胃又痛了，沒心情去品嚐其他．．．．．回到家趕快吃下最後一次藥。

三月二十二日，又要趕在一時前起床看醫生，被醫生揭發我沒戒口所以胃痛又發作，真不好意思！但我之前真的以為胃不痛了便痊癒了，沒想到吃海鮮又胃痛兼作嘔。醫生說幸好我沒吃魚生這類食物，不過當我告訴他我吃過帶子便開始痛，他忍不住縐眉，他著我不要再吃難消化的食物，盡量吃清淡一點讓胃休息一下，不然情況嚴重的話有機會嘔血或胃酸！

三月二十八日，周年晚宴。我竟然不是工作人員，有點難以置信，不知是好是壞，不過，很有Hard Feeling，所以當輝哥甚至乎Madam邀請我去參加見識一下，我也沒辦法說服自己去，更何況我已約了人。這件事上，其實我並沒有損失甚麼，不用工作，還可約約朋友，我想換著其他人也會拍掌歡呼避過一劫，而我也許是較敏感脆弱吧！被Single out那種受傷感覺掩蓋了得到自由應有的歡愉．．．．

三月三十日，BBQ@大尾篤。老公期待一次BBQ已很久，但我常常病而沒法成行，今天終於讓他「恨到」。雖然天色還是陰陰的，BBQ也能順利完成，只是途中警察派牛肉乾而需要「走鬼」，哈！

腰背痛誘發情緒病

 【 本 報 訊 】 下 腰 背 痛 是 打 工 仔 常 見 的 職 業 病 ， 腰 骨 經 常 隱 隱 作 痛 不 但 影 響 工 作 及 生 活 ， 更 會 引 發 情 緒 問 題 。

痛 楚 越 高 越 抑 鬱

聯 合 醫 院 一 項 研 究 發 現 ， 受 腰 背 痛 困 擾 的 住 院 病 人 ， 抑 鬱 及 焦 慮 指 數 均 較 一 般 人 高 ， 研 究 更 顯 示 指 數 越 高 ， 患 者 的 痛 楚 不 適 會 越 嚴 重 ， 首 次 確 定 可 利 用 病 人 的 情 緒 狀 況 ， 作 為 評 估 腰 背 痛 楚 其 中 一 項 重 要 指 標 。
如 何 能 客 觀 量 度 痛 症 病 人 的 痛 楚 ， 一 直 是 醫 學 界 研 究 的 問 題 。 聯 合 醫 院 一 項 研 究 分 析 了 102 宗 因 下 腰 背 痛 入 院 的 新 症 ， 患 者 在 入 院 時 會 先 接 受 焦 慮 及 抑 鬱 評 估 ， 確 定 其 精 神 狀 況 ， 評 估 分 為 0 至 42 分 ， 0 分 為 沒 有 焦 慮 及 抑 鬱 ， 42 分 則 是 最 嚴 重 的 焦 慮 及 抑 鬱 ， 結 果 患 者 的 平 均 分 為 19.46 ， 得 分 較 一 般 人 高 。 研 究 更 發 現 隨  患 者 自 行 評 估 的 痛 楚 程 度 越 高 ， 焦 慮 及 抑 鬱 評 估 的 得 分 也 越 高 。
專 家 指 出 醫 護 人 員 雖 然 較 難 評 估 痛 症 患 者 的 痛 楚 程 度 ， 但 由 於 痛 楚 可 引 發 情 緒 問 題 ， 故 建 議 可 利 用 入 院 時 的 精 神 評 估 作 參 考 ， 給 予 患 者 合 適 的 對 抗 痛 症 治 療 ， 相 信 有 助 加 快 治 療 過 程 。

 

一生？

我是一個悲觀的人，很多時候也會從最壞處想．．．．．．

近日因為腰痛的問題，看了很多次醫生，吃了很久藥，似乎也沒甚麼起色，沒有像那天痛到要早走看醫生打止痛針，然而很無奈地，痛總是陰魂不散地纏繞著我，時好時壞！當我今天感覺沒那麼痛以為邁向痊癒的時候，往往笫二天便又痛起來！我已放棄吃藥了，反正不吃便腰痛，吃了又胃痛，倒不如讓腰痛吧！那我至少可以正常的吃飯，品嚐美食！

今天放假起床後腰又痛，在床上看完DVD，突然悲從中來忍不住哭，究竟我會不會好起來的呢？究竟我會不會就這樣過我這一生？

進展

第一天吃政府醫生開的藥，感覺也不錯，腰比起之前可以彎得更低！

第二天腰不太痛，但因為想著勤點吃藥會快點好，雖然醫生已千叮萬囑我記緊不要吃藥吃得太密，但我還是決定依處方每天也吃藥，讓自己快點擺脫痛症！今天吃藥後，胃痛得不得了，吃飯也吃不下，做甚麼也沒心機！我想，該是那止痛藥太傷胃，難怪醫生千叮萬囑我要間疏吃藥！

坐骨神經痛

今天放工後去灣仔看醫生 ，預約六時二十分，到達診所大概六時十分。人不太多，可能是預約的關係，不會積聚太多人吧！

很快地可以看醫生，經過我簡述情況，醫生已即時診斷為「坐骨神經痛」，再做了一些測試評估，醫生說情況不太嚴重，但一般來說痛症會持續一至三個月。他說我“只”是痛了一個月，很“輕微”！我真是想像不到“嚴重”的會是怎樣痛法！醫生開了一個月份量的藥給我，吩咐我盡量不要拿重物，包括手袋！

老公約了七時看傷風咳，準時到達，登記過後不消五分鐘已輪到他，很快！但我想說的是，他這麼普通的病，竟然比我還看得久（我和他的醫生是同一個）！可見我的病情真的比傷風感冒“輕微”！

我發現我每次看醫生也是這樣，感覺醫生敷衍我，或者是感覺醫生覺得我“扮病”，每一次也是這樣，無論我是用medical card，或是真金白銀付款，又或是看不同的醫生。所以如果不是要取病假紙，或者是感覺自己病得嚴重，我真的不想看醫生！

腰痛

腰依然很痛，吃的藥大概只能止痛，藥一停便又痛，真是拿它沒辦法！看了很多次醫生，不知道還可以怎樣？

奶奶今日替我到灣仔的貝夫人診所排街症，因為大家也覺得再看私家醫生一來很貴，二來醫生也只是給消炎止痛藥，三來覺得如果手尾長或者要照甚麼的話，政府會平宜一點，對於我這個沒有醫療保險的人來說，這是最好的方法！更何況奶奶說只要排過一次，下次再看醫生的話，可以電話預約，十分方便，比起我看私家醫生不能預約動輒兩、三小時，政府還是不錯的選擇！

放工後便趕著到診所接力排隊，奶奶告訴我今天沒有籌看醫生，七時才可登記，明天才有醫生看！其實今天腰痛得緊，一心想著看醫生而不吃止痛藥，怕止了痛，醫生看我時說不出那裡痛！今天是白費了，明天又得捱痛了！

換到了

今天放假，特地早起一點等老公放工吃午飯和換銀包（其實也只是沒睡過十二時罷了）！

來到尖沙咀的LV，不用排隊已是好彩的事！店裡人很多，我還是喜歡金鐘的店，店子大，人多也不會太擠！站在counter前，正等待sales辦理換銀包手續，突然間有一男子衝過來，直指著一個新款皮包，二話不說直叫店員取來，同一時間，他對太太說：「是這個了吧？」太太點頭，男子未及店員拿這個皮包到面前，已一手搶下並說：「就要這個！」店員說明皮包的價錢，男子已在說知道了。要知道全程也只是十幾二十秒內的事，而該男子是全程莫視我的存在，莫視我也正在等候，他就只是站在和我相距不夠半寸的距離，大刺刺地在呼喝！接著是我身旁的女人，聽見男子說之前兩間店也沒找到該皮包，店員又說要check貨，原本沒有興趣的她，竟也伸手要看該皮包！我和老公對望一眼，無不對這些自由行感到驚訝，因為他們就像是在市集買菜！

終於等到了店員處理我的銀包，只見她檢查得很仔細，每一暗格也“猛”開看，然後她著我們到收銀處等，兩個傻人站著站著，忽然覺得我們似是看完醫生等取藥！終於等到叫我們了，店員並沒有取出貨物讓我們檢查，而是將貨物放進紙袋，一手便將紙袋交給我們。我心裡好奇，怎麼她不讓我檢查，我又怎麼知道這真是我要的款式？但，在那樣的環境，我只能看一看袋中盒子裡的銀包是不是我要的皮面便離開了！我們離開了之後，不約而同的說起，為甚麼我們會覺得在店內想打開檢查一下銀包，感覺這樣羞怯？

情人節

已經想不起上年的情人節是怎樣渡過的了，看看自己的網誌，也沒記載，大概也是沒甚麼特別吧！

今年約好了老公在家「煮飯仔」，因為他說當天很難訂臺！想來也是很無聊，因為情人節的關係，餐廳會定了當晚之餐單，而且更比平時昂貴，我實在不明白為甚麼要白付錢吃一些指定了的食物，而且周圍也該是一對對的情侶在做一樣的事情，有點無聊！所以，老公提議「煮飯仔」也是不錯選擇！

午後老公有點時間便先到朗豪坊地庫買牛扒，放工後我們便一起去超市買酒，原打算買紅酒，不過其實我不飲酒，我便提議買威士忌，可以溝綠茶，酒味不會太重，然後便回家「煮飯仔」。雖說「煮飯仔」，也只是牛扒加pasta！老公買了煎牛扒的汁，這是我們第一次這般講究的煎牛扒！老公在廚房忙著，我便走出廳張羅著燭光晚餐的道具！因為之前根本沒想到「香薰爐」，只是想著要「煮飯仔」，所以沒預備甚麼！唯有燃起香薰爐，既可「扮」燭光晚餐的燭光又有點香味。沒有酒杯，就用透明水杯剩酒吧！最後，發現碟子放下牛扒後不夠放pasta，更怕牛扒汁和pasta汁混在一起影響味道，唯有用碗分開剩pasta！這麼一來，便沒有了西餐的感覺了！接著是關燈，卻又發現關了燈只靠香薰爐的一點燭光，根本看不到食物，唯有開走廊燈，卻依然不夠光，最後要開書房燈才僅僅夠光切牛扒！雖然和看電影或電視的燭光晚餐有點分別，不過因為實在太「攪笑」，這頓飯也變得很難忘！

這是老公買的士多啤梨，很大顆，還有桱的！ 

情人節的禮物我從來也沒太大expectation，老公前一晚已送了給我，是LV長銀包！原來前一兩天他沒陪我看醫生及吃晚飯，便是去四圍逛，看看買甚麼給我！前一晚還沒吃晚飯回家，準備睡覺時便拿出禮物給我，讓我在情人節正日有新銀包用，十分感動！相比之下，我托朋友在日本買的電話繩，實在沒花太多心思，有點慚愧，不過算罷，我也不是時常這樣子，而且新年已沒太多時間預備，自己又一直病又要看醫生，我便很快的原諒了自己！哈！說回銀包，其實自從上年三、四月時跌了銀包後，我一直也沒買新了，因為有card holder放卡，一直也是用散紙包放紙幣及硬幣，是有點不方便，不過既然沒有合心意的銀包，而且用久了散紙包又習慣了，所以也沒怎麼想過要買新的！可能因為新年時和親戚打麻雀，老公替我拿錢時驚覺我的散紙包拿紙幣不方便，驅使他買了銀包給我吧！  

不過，今次又白費了老公的心思了，因為他選了LV花給我，而我最終還是想要格仔的，過兩天才有時間換，所以不能如他所願，在2月14日用上新銀包，希望他不會太失望吧！

更新

原來整個一月也沒有更新我的網誌，大概是天氣實在太冷了，做甚麼也沒勁，不是吃便是鑽被窩，還是讓我一次過更新我的近況吧！

十二月三十一日，老公的朋友來我家倒數，其實也離不開雀局，倒數過後，老公低調地拿出一份用白色A４紙包裝的禮物給我，想他是趕著所以連花紙也沒時間買吧！我拆開發現是手寫板，是我較早前著他替我買，我想放在家寫網誌會快一點吧！（後來我發現我從來也絕少踏入書房，更遑論坐下來寫網誌！）上床睡覺的時候，我又發現有一暖水袋放在我的位置上，是老公買的，是Chip&Dale 的Dale，很可愛很暖噢！終於“恨”到有暖水袋，很開心！

一月九日，今天要開會，每次要開這個會，我也很想不幹，因為每次也要報告各大環頭攪活動的情況，而其實每次逐一致電查詢也讓我感到壓力，他們攪活動的頻密度及參與率是我不能控制的，而往往，人們彷彿也會算在我身上，我實在是沒那種拚勁攪活動！今天最終我也有上班，沒辦法，可以逃避多少次呢？

一月十日，竟然病假了，是太懶的原故，還是頭痛的原故，我也分不清，大概兩者也息息相關！

一月十二日，早上難得約了媽媽飲茶，還和她逛了一會，買了一對鞋給她，過年嘛！下午出了尖沙咀和老公行街，原想買鞋，怎料還是買了衣服，也算是有一點收獲吧！

一月十八日，因為明天老公的同事來我們家，大家負責不同食物，我們負責沙拉及南瓜糖水。今晚我便忙著做沙拉，這還是我第一次親手做，希望也吃得吧！

一月十九日，老公同事來到，女同事好幫手做了很多美味食物，廚房也很乾淨整齊，我放心了！只是其中有些人實在太爛賭了，打麻雀到二時多，可憐我倆公婆要等他們走後才可執拾及睡覺！

一月二十日，部門舉辦了war game，幸運的是，我不用去，很開心！

一月二十三日，老朋友約了我吃晚飯兼參觀我新屋，一肚氣，究竟是我沒要求還是她太挑剔？她真的很難纏，一頓飯，挑這不好那不是，問題是她的嘴臉實在萬二分不屑，我真的很不喜歡，加上，由我會合她，到我上洗手間出來再找地方吃飯，坐下來直至我拿了一碟前菜在吃，她一直也是在和別人講電話，說的不見得是甚麼緊要事，只是在說公司的人的是非，掛線後連一點歉意也沒有，我不明白，無論我們有多老朋友也好，基本的尊重也是要的吧！來到我家，三兩步便參觀完，沒有任何評語（也好，免得聽些不想聽到的話！），感覺是：我像個經紀，在帶我的客人看樓！真是可笑！老公也在場，只是沒有與我們吃飯。之前吃飯的氣氛也怪怪的，現在三個人在家真的是有點僵！電視賣廣告時她便嚷著要走了！今晚最幸運的是在吃完飯步行回家時經過一運動店，看到我之前很想買的金色converse波鞋，問一問還有我的碼，最後一對，終於也買下來，很開心！

一月二十六日，同事結婚，早上起來已經流鼻水頭痛，約了輝哥tea完打麻雀也要取消個tea。比約了的時間遲了40分鐘，見到輝哥一個人呆等，十分不好意思，幸好最遲的不是我！坐下來吃了藥，感覺也很累，沒甚麼精神，最後當然是輸家！今晚遇見老朋友，不是同一臺，說不上多少句，不過見上一面已很難得了！

一月二十九日，婚宴後開始病，到今天忍不住又要病假，其實真的不想，因為明天要去屯門醫院，下午也未必趕到公司上班，今個月已請了病假，今天和明天便要no paid了！

一月三十日，十一時到屯門醫院，排了很久，差不多一時才輪到我，之後醫生又要我過X-ray部排期，今天又濕又冷，剛除衣服檢查已冷得很，現又要走出去行過別座排期，很辛苦呢！今早又未吃早餐，又不敢行開買水，又冷又累又渴！死死氣還是要去，當我到達時，counter已關，二時再重開！我的天！一小時怎打發呢？第一時間致電回公司報告我趕不及回來，第二時間是醒起我忘了拿到診紙，雖然今天是no paid，有沒有到診紙也沒有分別，但答應了Madam，還是走多趟，很擔心連醫生也走了，跑著過去，折騰了十五分鐘，終於取了到診紙，便到處“搵食”！二時未夠，我便撲去排隊，幸好只是幾個人．．．．但最終姑娘告訴我，排期將於兩個月內寄到家，若兩個月內也收不到才致電她們！不是吧！！！兩個月再寄來的期會否是半年後的事？由今天開始，我真的很不喜歡政府，不喜歡我這份沒medical，沒病假的工作！！！我這種人一定要找有包medical的工作才行啊！

二月四日，持續腰痛、感冒、咳，非常辛苦！每一下咳也讓我的腰痛到入心，鼻水不斷的流．．．．．當輝哥問候我的時候我便忍不住哭了出來，叫來了Catherine慰問我，開哥即時取了空氣淨化機給我，Madam借了腰墊，Paul替我買飯盒，又買了利賓納給我，Andy給我藥膏，對於自己一時衝動哭了出來真的很尷尬。今天我沒有工作，一直只是睡，直到下午四時，Paul轉述Lo Sir意思，要我回家休息，早走的時間不計。Paul陪我走到巴士站，著我到達後致電給他。到了診所，以為只是幾個人，原來我已排到十幾，五時坐下八時才看到醫生，醫生檢查後說是坐骨神經痛，見我連行路轉身也痛得要命，問我不如打針，我聽見有針打，當然說好！一向我也不太怕打針，不過我不會主動要求，只要是醫生提出或是自己也感到病入膏肓才會打針。醫生著我背對他，他會打在腿上，然後我便放鬆心情，但醫生突然間吩咐我深呼吸忍著，我聽後心頭一驚，心想難道這支針有別平常的？因為平常醫生反會著人放鬆，為甚麼這次他教我深呼吸呢？懷著不安的心情，等！很快地便感到針打入來了，滿以為很快打完，但感覺比平常要久，以為要打完的時候，醫生竟然問我痛不痛，我答他沒特別感覺，我想全程打了二十秒吧！完成後我問了醫生一些問題便準備離開，怎料，當我起身要步出醫生房時，發覺打針的那條腿痛得幾乎行不到，要一捌一捌才行！醫生寫了兩天病假給我，其實自覺很辛苦，但我一個月也只有一天有薪病假，多放一天是扣薪水的，心裡也矛盾著第三天還要不要上班，第二天則一定不上班的了！原本想著看完醫生和老公一起去辦年貨的，因為一直病又沒時間，現在距離新年只有三天時間，實在時間無多。不過，這一針真的很「甘」，我幾乎行不到，更遑論去逛街辦年貨，最後當然是取消了！

二月五日，吃了藥在家休息，感冒關係，差不多能夠起床活動的時間只有兩、三小時便一定要上床睡覺了！不過打完針後，腰真的不痛了！我後來發現醫生給我打針的地方雖說是在腿上，不過也差不多只是腰對下少少而已，大概是和我腰痛的地方成水平吧，因為位置高（不是臀部）的關係，行路時拉動該組肌肉，怪不得那天打針後痛到行也行不到！

二月六日，今天最後也沒上班，no paid 就no paid，病也是沒辦法，吃了藥人很“wing”，返到公司也做不了甚麼，還是在家睡的好，加上新年假期將至，乾脆一次過放到假期後，希望多休息很快好吧！今天吃藥時才驚覺原來吃錯藥，感冒藥六小時一次，一日三次，腰痛的是早晚一次，一日共兩次！但我竟然將腰痛的藥由一日兩次變成一日三次，因為我以為是和感冒藥一樣，怪不得腰痛的藥吃得七七八八而感冒藥還有，怪不得會“wing”啦！明天大年初一，今天還是去配一次藥過年較安全！

二月七日，大年初一，先到媽媽家吃午飯再到奶奶家，每年的指定動作是老爺那邊的親戚會聚在一起，差不多一整天的！

二月八日，大年初二，因為公公婆婆不在了，舅父又不在港，每年初二原本也要到舅父家團拜，這兩年也不用了，變成是奶奶那邊的親戚團拜！

二月九日，大年初三，老公的朋友來團拜，等人齊的關係，很晚才吃飯，接著又是雀局！

二月十日，大年初四，沒有團拜，在家休息及打機等夜晚應親戚的飯局！最近沉迷Xbox的Kingdom Under Fire，幾乎在家而又不是睡覺的時間也沉浸在這game中，我也不明所以！今天沒藥吃，腰仍然是痛，怎麼攪的！

二月十一日，初五了！零八年笫一天上班，想不到會收利是，原來這裡不單是根據結婚否而派利是，而是根據Rank，我不屬於紀律部隊，但今天也收了多封呀Sir及Madam的利是，感覺很特別！今天是輝哥生日，lunch time去了Joe Bananas吃飯，人少少，舒服一點！放工後看醫生，一等又是兩、三小時，九時二十分才輪到我！不知是否趕收工，今次醫生沒問我甚麼，我告訴他停藥後腰仍痛，他只開出之前的藥給我，枉我等了他三小時，早知的話我便只配藥便算！又省錢又省時間！