十七號面試完，廿四號已經收到結果，真係好快！一如我所料，啟思收左Ambrose，佢地重打電話通知我之前報佢地嘅歲半playgroup一月可以開始上！我對啟思已經有個唔好印象，收到通知話一月八號可以上playgroup時，真係忍唔住反問，一月呀仔未到歲半都上得架咩？最妙係個老師停左一停就直接講，咦，係喎！我真係覺得佢地全部人都有問題，做野咁唔細心都有嘅，如果佢話俾我知係呀，差一個月都可以上架，如果唔係要等下一期又要好耐，咁我都可以接受到，但佢竟然係睇漏左囉！重要問我咁四月先上有無問題，我話唔得喇，四月有另一個playgroup要上，佢再諗一諗，好勉強又話咁你上一月都得嘅！咁無原則，咁混亂都得嘅！
因為之前嘅唔好印象，再加上呢個電話，我決定唔會交留位費，亦都唔會去上佢個playgroup，呢間學校已經係disqualified！同Ambrose報左三間幼稚園，一間waiting，一間收左唔讀，一間三月先interview，而心儀果間又要足歲半即二月中先可以交表，五月至interview，即係話Ambrose而家得番兩間學校嘅機會，真係分分鐘無學返喇！
呢兩日Ambrose都唔知點解係咁痾，原本一日一次至三次正常，而家係一日七至八次，重有少少潺咁！至慘係佢半夜瞓著左無啦啦都會痾，半夜同佢換片抺pat好慘架麻，最慘係佢pat pat痾到定腌到紅哂，同佢一洗pat pat佢就喊到死去活來，係咁典唔俾你整佢，真係好慘！
奶奶話佢呢d叫牙仔屎，即出牙會係咁！但我又唔覺Ambrose有牙要出咁！上得網多同聽人講，小朋友出牙可能牙痕會搵野咬，d野污糟有菌就會肚痾，再見之前有個朋友仔都係咁醫生都無藥俾到，話痾清就無事，我地都無諗住睇醫生。
之不過上網有人話驚痾得多會脫水，我地都係唔放心，啟思面試完後就去左睇醫生！
我奶奶好好笑，同醫生講Ambrose出牙仔屎怕唔怕，醫生咪同佢講無牙仔屎呢樣野，只係小朋友鍾意放野入口咬，食左d污糟野至會痾，同出牙係無關，只係有時小朋友牙痕會搵野咬，有菌至會痾，兩野係無必然關係，醫生話Ambrose唔係出牙，係腸胃炎！
對於牙仔屎concept我一向都知，而且都唔係無講過係點，不過奶奶係要相信有，我都無辦法，而家經醫生咁樣一講，佢先至完全明白無牙仔屎呢樣野，真係為我平反左呀！
不過Ambrose好似睇完醫生之後出奇地無咩野喎，都只係食左一次藥！佢都係掛住陳醫生架喇，係都要睇一睇佢至安落嘅！
今日Ambrose要去啟思面試，雖然啟思唔係我第一心水學校，但因為位置在樓下，返學都唔使五分鐘，而心儀學校要夠歲半先可以交表，兼且只收到八月bb，Ambrose勉強趕得切，但歲半先交表五月先面試，相比其他學校已經進行面試更有一d有埋結果，心儀呢間都有d凍過水，所以啟思如果收，都係一個唔錯嘅選擇！所以對於呢個面試我都有少少緊張！
同Ambrose著靚靚斯斯文文去學校，一入去就見到奶奶個朋友，佢地寒喧一番，又撩Ambrose玩，不過Ambrose無見過佢地，加上佢未瞓覺，狀態麻麻，個呀嬸又大大聲，都幾煩，我係Ambrose都唔鍾意佢地啦，Ambrose唔啋佢地避去我地度，呀嬸又大大聲話佢渣渣，我唔係覺得自己個仔好叻，又唔係唔鍾意人話自己個仔，不過我覺得你做得幼稚園都應該知道小朋友係怕生，你一埋去就想佢接受你真係唔得囉，重要咁大聲話佢渣，我覺得佢咁樣惡攪Ambrose，都唔知會唔會刺激佢扭計兼且面試時表現差添呀！為左分散注意力，同埋避開d“煩”音，我同Ambrose去左隔離個爬架度玩，希望佢玩得興起會無咁吽，生猛少少同埋有番平日嘅笑容，但係無瞓覺就無瞓覺，都係比較吽一d！
玩左無耐就叫名入房喇，都好快！我地坐低左發現房入面計埋我地有兩堆人，果堆應該係面試緊嘅。我地坐定左一陣之後，個朋友遲黎都入埋黎等面試喇！點不知有個老師好快行埋佢地度開始左，而我地坐左响度就無人理。眼見有兩個女人在遠處背對住我地傾野，但又有時望吓過黎又轉返去，我就覺得有無攪錯，要我地入黎等都唔緊要，點解人地遲黎重遲入房都快開始面試過我地，要知道要一個咁細嘅小朋友坐响度咁耐都真係好考定力架麻，雖然响張台度都有d玩具氹住Ambrose！等呀等，其實個心又嬲嬲地，面都好想黑出黎，但呢個係面試，又唔知果兩個人係老師定係雜工，見有d家長講出面d名校幼稚園都睇好多野，考左你都唔覺,，我都唔敢黑面，驚俾人見到丫麻！
終於果兩個女人其中一個攞住份form行埋，望住Ambrose問佢叫咩名，Ambrose得果十六個月人仔，唔好話名啦，佢都未識講其他野啦！加上個女人又眼定定係咁望住Ambrose問佢，我覺得Ambrose有d怕左佢，個女人問左幾次Ambrose都無反應，場面都幾odd架，我咪唯有出聲代Ambrose答係呀我個名叫楊XX呀！之後個女人係咁話Ambrose好似女仔呀，重話咩見張form寫係男仔但有個女仔坐左响度喎，我真係好想講頂你囉，一入黎佢有人已經俾張名字大label貼左响件衫度，你覺得佢係女仔，而我地又坐左响度等咁耐，你唔識睇吓label上面個名架咩，怪不得我地等左咁耐都無人理啦，佢就掛住傾計，睇都唔睇吓我地叫咩名，重行埋黎起勢咁話Ambrose成個女仔咁，唔知原來係佢，講到好似係我地唔啱咁，不知幾慶呀！一輪咀講完之後佢又再眼定定去研究Ambrose個樣，都幾乞人憎，做咩啫，係咁望，而家面試幼稚園之麻，又唔係選美！之後佢又話Ambrose好baby喎，都short short地架，佢雖然都歲幾，不過點計佢都真係一個baby喎，你咁話佢好baby，係咪即係話我個仔望落咩都唔識咁丫，佢唔啋你或者唔理你都好正常啫，我唔覺得佢唔啋人有咩問題喎！
之後個女人就撩Ambrose玩台上面嘅玩具，其實都只係放响佢面前睇佢玩，佢又係牛咁眼眼定定望，唔出聲，都唔知佢想點！突然間問你佢平時鍾意玩咩野，咁Ambrose都無話特定玩d咩，成日流流長佢咩都玩哂架啦，咁佢好明顯對動物有興趣，咁啱Ambrose又係玩緊台上lego動物，我咪話佢平時玩動物多，揸住行行行囉，咁講好似好扮野，因為咁啱佢又真係玩緊，不過我都係講事實！問左呢句之後，佢又無野講！又係dead air咁望住Ambrose玩，無啦啦又彈一句出黎，問平時邊個湊佢，答左佢係奶奶湊，佢又無出聲！我覺得佢覺得Ambrose表現麻麻地所以走黎問邊個湊，係咪我地involve得少咁，我都有少少不滿！因為如果佢係真係想知我覺得佢應該都會有follow-up問我地平時陪佢多唔多之類問題，但佢無問，我直覺佢睇完Ambrose表現之後make左少少assumption，再開口問我地confirm一下，問左原來係佢心目中諗嘅野咪唔問落去囉！再之後就重嬲，佢無啦啦問Ambrose平時响屋企講唔講野喎，十六個月人仔，我唔知點為之講野，我話佢成日一大堆外星話，係成篇咁一連串唔停，佢就問Ambrose有無講一d有意識嘅野，SHIT！咩叫有意識，我真係唔知，其實佢係咪想問Ambrose識唔識講野咋，佢係咪見Ambrose一路唔聲唔聲自己玩又唔理佢覺得佢係自閉呀，都痴線架！佢不如直接d問好過啦，真係嬲呀！
之後咪又係眼定定望望望，無野講！後尾台上有一籃珠仔同電線，個女人咪同Ambrose串珠仔囉！其實幼潛都串過通粉同飲管粒，Ambrose都做到，我都唔太擔心，不過似乎係個女人覺得Ambrose唔識，佢一手揸住條電線，要Ambrose串d珠仔入去，但其實係佢自己隻手郁去就Ambrose粒珠黎令Ambrose成功串到，一路串佢都係唔出聲望住，我好想同佢講Ambrose係可以自己揸住電線同珠仔自己串架！基本上，佢俾我嘅感覺係佢唔覺得Ambrose可以做到d咩，因為佢重係好baby，同埋佢唔出聲！其實我覺得Ambrose呢part表現唔錯架，因為串珠仔係同個女人有互動，佢都無抗拒，好合作咁做，重要有一粒珠仔跌左落地，佢念念不忘成日望個台底好想去執番好佢，只係個女人無叫佢咁做，唯有爹爹執起！同埋個女人叫Ambrose俾珠仔我同爹爹同埋佢，Ambrose都有做到，我覺得已經算唔錯喇！
再之後個女人問我Ambrose識唔識眼耳口鼻果d，我話佢識，個女人就叫我叫Ambrose指出黎！Ambrose都成功指出我地要求佢嘅部位，呢part佢又係表現唔錯！
其他都唔記得做過d咩，係佢無啦啦話重有咩問題問，我至覺得頭先嘅一切原來係已經開始左面試，佢唔係d校工走埋黎撩Ambrose玩！我問左少少問題就無咩好問，佢話我地可以出去玩吓喇！我重好緊張咁同Ambrose企起身，要佢推番好張椅子先好行，點不知個女人企响身好似有同我地講再見（都唔sure有無喇），之後佢望都無望我地就行左去！有人話出面d學校都會睇小朋友推番椅子回原位，呢個係加分位，好明顯，呢度唔需要，做左都唔會有人欣賞！
出左黎之後我同爹爹講開，佢話佢唔知果個女人係老師，佢唔知面試已經開始左！我都有呢個感覺，起碼佢坐埋黎自我介紹係咩老師都無，一黎只係問Ambrose叫咩名，又唔見佢有mark野，又唔覺佢問d咩野，我地只係坐左响度咁，真係唔知呢d就係價值三十元嘅面試費！爹爹話個女人直頭全程用手托住個頭黎睇Ambrose，佢唔講由至可，我都唔知佢係全程托，我只知佢好似有托，佢俾我感覺係我個仔表現麻麻，好悶，佢好唔耐煩咁，爹爹一講我真係火都黎埋，一出門口我地已經話呢間收Ambrose我地都唔會去讀架喇！呢d老師咁無愛心又無禮貌，送個仔入去都驚俾佢地教壞啦！
出奇地，當我地同奶奶講話啟思收我地都唔會去讀時，佢非常贊成，重話啟思唔好，至於點解咁講，佢就唔肯講喇！等我重報埋佢個歲半playgroup，好期待可以响屋企樓下返playgroup咁爽架麻，而家咁都唔知去唔去上好喇！
原本我係好想記低Ambrose上每堂幼潛嘅情況，但係呢個媽咪實在太懶喇！頭一兩堂寫唔切，之後想寫時記憶又開始模糊，再過多 一兩 堂之後，就覺得一次過寫番哂好難，倒不如一次過寫番個總結罷啦！
其實十堂入面我地只係無上一堂，果堂重要係可以影相嘅添，好可惜！開頭上果兩堂我同爹爹都有輪流入房同Ambrose玩，原來大家都不期然對個姨姨無好感。我覺得佢好似好惡咁，無咩笑容，我有一堂唔記得帶手冊，佢已經燶面叫我下次一定要記住，攪到我之後去上堂都好大壓力，成日就係要自己記住本手冊！同之前上Dr Poon唔同，果度係好正面好多笑容不過就有少少混亂，可能我地上堂時bb重細啦，呢度就好似嚴格d，唔係只係玩咁！而爹爹就話覺得個姨姨有d不可一世咁，覺得你地d人個個仆黎上我地d堂，覺得自己好勁咁喎！
不過之後再上落去，我開始發覺雖然幼潛呢度好似唔同出面playgroup咁musical同玩吓hea吓居多，呢度真係上堂嘅地方，家長同bb一齊去學點玩遊戲去幫bb訓練大小肌同social skills等，姨姨教左玩咩遊戲之後，自己玩一陣，佢係會逐個埋去睇吓同糾正番，係幾有用，只係個姨姨cool一d，我覺得都接受到。同埋最唔同嘅係呢度如果玩玩具，或者有一d野好吸引bb嘅，姨姨唔會即刻俾bb得到，一定要佢地坐靚靚數十吓先得到，目的係訓練佢地耐性同專注力，如果出面嘅playgroup一定唔會咁！呢方面我都比較欣賞，雖然我都要花九牛二虎之力捉實Ambrose，要佢坐靚靚，要佢耐心等待，但過左兩三堂之後，佢都有時做到，我覺得係進步，亦都開始覺得雖然呢度感覺嚴格一d，但呢度係可以學習跟rules，其實係好嘅！
幼潛上到後期時我地發現Ambrose真係實在太鍾意掉野，好多時佢會摷哂佢書櫃嘅書同咭出黎散落一地，所有玩具倒哂出黎至安落，倒左出黎佢其實又唔係玩，只係要成地都係一片混亂佢先歡喜，我都不知幾煩惱點解佢要咁做！响好無助嘅情形下，有一堂落左堂之後我留响度問姨姨睇吓有無問題同點可以幫到改善，點知佢又出奇友善咁安慰我同教我方法，我覺得好好，因為呢度唔係真係收左你錢之後上堂玩吓hea吓就算，即使有我呢d課堂上無cover過嘅問題，我去問佢意見，佢都會理我同幫我，所謂親職教育，係真係教育家長點去培育小朋友，呢度就係一個咁嘅地方。呢一次傾談之後，雖然我好難實行佢教嘅方法，但有少少都可以做到，而Ambrose都仍然係掉野，但感覺比以前好像改善左少少！我對幼潛亦因此比較推祟！
課堂最後一堂係做評估，呢堂係可以影相，但我完全唔記得左！一入課室就見人人都揸住單鏡機，先醒起影相！重要呢一堂係可以父母兩人一齊入房同bb玩，都唔知點解我會唔知！重要一開始原來頒畢業證書，好慘，我無相機，爹爹又在樓下等位泊車，到Ambrose出去攞張證書時，都係其他家長幫我影相，而Ambrose人生第一次咁正式攞證書（之前Dr Poon都有證書不過係派嘅）爹爹竟然錯過左，我見勢色唔對都急call爹爹快d是但搵個位泊好車上黎，都係趕唔到！好彩影大合照都趕到，不過我地都無相機，真係嘥氣！
呢堂做評估係逐個逐個做嘅，所以未做時都係free play，同埋之前姨姨已叫我地預備咁多同學仔嘅小禮物比bb呢段時間逐個去送， social time，我就係成日都驚自己唔記得買同攞呢d小禮物，滿腦都係呢樣野而唔記得左可以影相呢樣野，俾爹爹怪責我咁無記性，激死人！
Ambrose第二個做評估，我開頭重以為坐埋去要聽姨姨叫做咩做俾佢地睇，睇吓識唔識，點知原來唔係，等我之前都好擔心Ambrose做唔做到，事關我自覺佢小肌肉比大肌肉係差d，一d細動作佢係重未做得好！原來個評估係個姨姨根據佢十堂嘅觀察對Ambrose有個總結，我估唔到班上有成八個bb，佢竟然都睇到Ambrose嘅野，重要係我自己都認同嘅，不由得令我對佢改觀！太濕碎嘅comment我又唔太記得，不過佢話遲d有份written report會收到，幾好！姨姨話佢大肌肉都ok，不過行都未係好穩，雖然我覺得Ambrose都係但我以為個個bb都係咁上下添，佢講出黎可能係未夠掛，佢有suggest我地多d同Ambrose去公園行石“駁”令佢嘅平衡感好d！之後佢提到Ambrose嘅專注力响呢個階段係好好，叫好突出添，其實都有少少“R”頭，我地一向都覺得Ambrose專注力麻麻，睇故事書成日又走左去，玩玩具又玩吓呢樣又攪吓果樣咁，呢d都叫有專注力咩？！不過姨姨同我地講呢個時候嘅bb要佢地坐定定一分鐘都幾難，佢話佢留意到Ambrose係真係可以專注聽佢講咩野，同埋雖然有時佢會自己行左去，但一陣之後佢又會自己返黎再聽。佢咁講之後我又再諗起上堂時Ambrose真係有聽姨姨講野，姨姨有玩具同野食話邊個想要就舉手，Ambrose通常係第一個；姨姨講野，雖然有時佢係會企起身，但佢唔會走出去攪。最重要係點名或者輪住出去玩或者攞玩具，Ambrose通常都係第一個舉手，但果時我發現姨姨唔係即時俾佢，有時重要俾左遲舉手嘅bb先俾佢，點名重係一堂比一堂後叫，但Ambrose都無野，會等無扭計。而家咁諗唔通姨姨就係覺得佢專注力好所以刻意遲d俾同點佢名？！真係唔知，不過聽到佢咁講都好開心，可能我地對佢要求高所以唔覺佢專注力好啦，咁如果以佢年紀黎講係好，咁我地都要調節番我地對佢嘅要求喇！哈哈！
上幼潛覺得幾好，我重同Ambrose報埋下期，抽中左，不過地點就要去到觀塘咁遠！
十二月五日，Ambrose上最後一堂幼潛，狀態同平日無大分別，上完堂後，因為有標位泊車，我地四圍行左一陣先返屋企。新買car seat固定在一個位上，回程時Ambrose係曬住瞓著左，我曾經都有猶豫佢咁樣會唔會好熱，但見佢又無出汗，摸佢又唔係好熱，諗住佢既然肯坐car seat又瞓著左，小小太陽都無咩所謂啦！
泊好車，爹爹抱Ambrose返屋企，覺得佢好熱，幫佢量體溫，發現Ambrose發燒！不過因為我覺得佢啱啱曬完有可能都係偏高，所以又隔左半個鐘同佢量，依然係發燒！真係好突然！見Ambrose瞓左，唔敢摷醒佢食藥，諗住貼左退熱貼等佢抖吓先再算！到黃昏時，呀姨同奶奶都返左黎，知道Ambrose重發緊燒，都係決定餵藥喇！
Ambrose呢一晚都瞓得唔係幾好，佢一直都無退過燒，體溫一直徘徊在三十九度中至四十度鬆d，係食左退燒藥頭一個鐘先會稍稍退到三十八度中尾，成晚都耐唔時幾聲喊，係無原無故，唔係甩左奶咀，攪到我地都無覺好瞓！
十二月六日，Ambrose重未退燒，見佢無其他病徵，食左幾次藥加貼埋退熱貼都唔退燒，加上一早起身見佢鼻孔有d乾左嘅鼻血痴住，再望吓佢張床單又有幾滴血，真係好擔心！而我星期六開始已經無原無故全身肌肉骨頭好痛，頭又痛，有d閃電嘅痛，平時只會係頭痛先會，而家係全身都係咁，見Ambrose發燒，唔知我地係咪感染左d咩不知名病毒，好驚！我請左日假，一齊同Ambrose去睇醫生喇！
醫生睇左一輪，話Ambrose喉嚨發炎令佢發燒，發燒高又會令佢流鼻血喎，都唔知係咪嘅！Ambrose都唔係好肯丫大口俾醫生睇，個醫生都係睇到一兩秒之後話佢喉嚨發炎，佢咁講咪咁聽囉！而我，因為我無感冒病徵，佢反問我呢幾日有無體力勞動過，真係俾佢激死，如果我有我周身痛都知咩原因啦，重走黎睇醫生咁白痴咩！佢都無咩結論，話可能係吽感冒喎，俾左d骨痛藥我！
返到屋企餵左藥俾Ambrose食，佢又瞓左！食左兩次，計埋之前果日嘅三次，即五次藥都退唔到燒！爹爹又要返夜，check左保險後，佢不斷交帶話有咩事唔好諗咁多送入醫院先，攪到我都好緊張！當時我就已經話既然入醫院好似係遲早嘅事（因為一直都無退燒跡象），不如趁佢未返工執定野即入，好過佢返左工得我同奶奶重難攪！當我地諗住入醫院執緊野嘅時候，奶奶就四出打電話問人，問完一輪後話Ambrose除左發燒其他都無問題，食得瞓得玩得，都叫精神，又叫我地唔好入醫院，再睇吓先！入唔入，入唔入，真係好難下決定！入又驚攪一餐又抽野驗又瞓唔慣會驚，好陰公；唔入又驚佢咁燒發唔知有咩野事。擾攘一排之後，都係覺得Ambrose都好精靈，估計有機會係出玫瑰疹，所以都係再睇多一日至算。呢一晚，爹爹返左工，得我睇住Ambrose，又係成晚無覺好瞓！
十二月七日，起身時Ambrose都重係發燒，同姨姨夾手夾腳餵左退燒藥就出門口返工喇！其實都幾唔想返工，Ambrose咁耐以黎第一次發燒咁耐都唔退，我當然想睇實佢啦，但工又一定要返，無法，唯有希望佢盡量瞓多d快d好番啦！下午時候打番屋企問Ambrose情形，原來早上退過燒，知道後都總算鬆一口氣。但當我放工返去時，Ambrose又再發燒，原本重期待佢退左燒之後會出玫瑰疹，點知重未燒完，一日唔出疹，一日都唔知佢係咪真係因為出疹而燒，好煩！
十二月八日，Ambrose半夜都已經退左燒，今朝由爹爹湊佢。中午時候爹爹打俾我話Ambrose好似出左少少粒粒，唔知係咪出疹，我即刻好肯定係啦，因為玫瑰疹特性係發燒，退左燒之後會出疹，Ambrose情況一樣呀！爹爹問使唔使睇醫生，我覺得無咩必要喇，既然燒都退左，疹都出左，其實真係無咩可以做。下午四點幾五點，爹爹再打俾我話Ambrose粒粒越黎越多，面又有，身又有，佢都係唔放心，要同佢睇醫生，都好嘅，俾醫生confirm一下安心d麻！醫生certified係玫瑰疹，話出疹期間盡量唔好出街，因為抵抗力會好弱，而且因為都有傳染性，都唔好去人多地方，通常黎講係只會傳俾同齡小朋友唔會俾大人，而大人應該都有抗體，所以唔驚喎！就係咁，Ambrose要閉關喇！
十二月九日，出疹越黎越多，成身成面都係！
十二月十日，面部嘅疹有d退喇，但肚同背都重有！
十二月十一日，我放假，但要同Ambrose閉關，爹爹返工，全日只得我一個人湊Ambrose，無得出街消磨時間，單對單湊足一日，都咪話唔辛苦！好彩係中午時份大哥陪媽咪過黎，可以幫手同Ambrose玩，我可以分身去煲蕃茄薯仔湯！玩完之後Ambrose大覺瞓，我又可以做吓自己野同休息吓！時間都叫易過！基本上見Ambrose身上都無哂疹喇，一心諗住明天星期日應該都可以出去啦，點知夜晚同佢沖涼時發覺大脾同小腿嘅疹都未退，唯有希望第二日瞓醒退埋先有機會出關喇！
十二月十二日，疹退哂喇！姑仔一家話去影燈飾同食buffet，幾經考慮，我地都決定出關，哈哈，不過黃昏時間出發，務求唔會吹太多風，叫去過吓街咁啦！Ambrose同我地食buffet真係幾抵，唔使錢，但佢又好鍾意食野，係咁要食，我地都俾佢試左好多唔同嘅野，不過佢最鍾意食始終係西瓜，係咁指住要食，一無哂就喊，好好笑！
今日兩點幾機返香港，係好似好早，不過有小朋友，驚飯店check out左之後又要顧行李又要顧小朋友，實際又得好少時間唔會去到邊度，咁不如早d搭飛機返香港，唔使煩！之前已經叫定飯店幫我地book車去機場，兩點幾機book左十一點半車。尋晚執番d行李都執左幾耐，今朝起身都趕得到免費早餐。食完早餐無野做又未夠鐘，不如參觀吓呢間飯店啦，黎左幾日，來來去去都係見到地下大堂其他地方都無點睇過！上左二樓見到原來有電腦用架，而VIP房似乎响呢一層，好大，而且好多唔同公仔！因為時間尚早，又驚嘈到其他人，相機memory又已滿，無得影相，我地索性出去兜個圈行吓！不過一早真係無野好睇，買左盒奶又返左酒店歇吓！
終於都到十一點半，可以去機場喇！原本以為book架車係私家車，因為上次去台灣，酒店幫我地book車去機場，佢地真係俾左架Benz我地，點知落到樓，都只不過係Picnic款嘅的士，有d失望！酒店去機場呢一程，唔知點解比想像中要耐，不過Ambrose瞓左覺，都叫舒服。搭左成個鐘的士到達機場，唔知點解呢度又同我上次黎嘅時候唔同，我記得上次去時成個機場都好似好落後，無野行無野食，而家呢度，一望埋去都光猛d同好多食肆！
見Ambrose都重瞓緊，我地把握時間搵野食啦，我地食埋野，Ambrose正好起左身，重餵埋粥先行，時間較到啱啱好！見重有時間，都係同圍行吓，睇吓名店，無無聊聊咁，見到機場都有Dr Wu賣，不過係唔同set裝，點計都唔及我响康是美平，真係好彩臨尾果晚作最後衝刺咋！
行到咁上下，見有Hello Kitty育嬰室，好靚，入去換吓片之餘真係要影番d相留念！育嬰室入面重提供左唔同size嘅片片俾人任用，嘩，真係好好呀！台灣响育嬰嘅文化感覺上比香港好，好多時行街都會見到有育嬰室，重要係有哺乳室，幾體貼！尋日去動物園，沿路行都有好多育嬰室，又大又乾淨，唔會好似香港咁有時迫不得已搵唔到育嬰室要去洗手間換片！
去完個靚靚育嬰室，我地直接去左Hello Kitty候機室，睇書話果度有遊樂場架！而且我地班機嘅閘口正正响果度！重有大把時間，一於同Ambrose玩玩玩！
其實果個都唔算係遊樂場，只係成個場佈置到好靚，有Hello Kitty，一邊就係一個大型滑梯爬架，另一邊就係靜態d嘅台上玩具，要坐定定玩嘅！我同Ambrose梗係去玩滑梯啦，佢邊會坐定定丫！個場要除鞋入去玩，尚算乾淨，都幾多小朋友。Ambrose自己慢慢爬上滑梯玩，有時都會阻住後面嘅人，基本上玩滑梯Ambrose都幾熟悉，不過因為屋企條滑梯好短，街果d通常長d高d，咁就要好小心扶住佢玩，驚佢中左出黎，所以全程我都好似捉雞仔咁捉住佢玩，一齊“sir”滑梯喇！玩到咁上下，都係時間落去侯機室度等上機。
一般帶住bb都可以跟first class一齊早少少登機，不過因為我地唔想咁快上機受困，諗住俾Ambrose行吓玩吓先，我地決定唔單止call first class唔上，重要等economic class上埋先開始上，呢個策略都唔錯，我地上機無耐，整埋bb嘅安全帶，好快已經準備起飛喇！
又係食野時間，點少得Ambrose丫？呢一程，比去程有少少難攪，真係要不停俾野食，不停講野，不停同佢玩至得，好彩嘅係，我地以為唔見左果本動物書，今朝又無啦啦搵番，呢本書真係唔可以唔見架！又係到差唔多落機Ambrose先瞓！本以為又要抱住Ambrose去行李帶度攞番架bb車，點知今次真係一落機就已經擺左出黎俾我地，實在太好喇！去到機場停車場攞車，嘩，架車好大塵呀，好快，真係好快，返到屋企喇！
唔知係咪之前果日行左好耐，又食到飽飽就瞓覺，今朝Ambrose飲完奶奶之後又瞓番，結果我地一家三口瞓到早餐時間過左先起身，真係難以置信！去旅行去到我地咁鍾意瞓都有嘅？！遲左起身真係幾大件事，即刻彈起身整粥仔俾Ambrose，如果唔係真係唔使旨意出到街呀！之前一晚食得太飽，所以我同爹爹都無食野，諗住攪掂哂出去嘅時候先再睇吓食咩喇！
爹爹睇左出面嘅天氣，佢話無雨，似乎都可以去動物園喎，咁我地就執埋野出發！因為木柵動物園正正在捷運唔知咩線嘅終站，係比較遠嘅一個地方，打的都唔知要幾錢，所以我話要搭捷運去，唔好貪方便嘥哂d錢喇！
可能今日星期五唔係番工時間，捷運都無咩人，幾舒服！去到台北車站轉線搭嘅捷運好似細架d咁，架bb車一入車箱，幾乎無位咁濟，架車都好似地鐡咁打對面有兩排椅子，不過捷運打對面得黎中間應該係企唔到人，所以我地都係企左响門口附近。不過我地又體驗到台灣人嘅好文化，當我地迫迫地企左响度嘅時候，有人讓位俾我地坐，重要係一讓讓左兩個位，真係令人好感動呀！香港都好少有咁嘅待遇呀，甚至係我試過大住個肚搭巴士由中環返屯門無位坐，企足一程車都無人讓位俾我坐，講緊係成車人得我一個人企，唔係要迫住企果隻！香港人，唉！
由飯店去到木柵動物園計埋行去車站同轉線都係一個小時左右，都幾快，亦都慶幸無走去搭的士！一出車站閘口幾乎係半室外地方，好凍！動物園站真係動物園站，佢嘅牆身都油左好多唔同動物，好colourful！Ambrose一見到就行黎行去，條條柱都睇吓掂吓捱吓，不亦樂乎，到最後當然係爹爹抱走佢啦！由車站去到動物園入口係非常近，唔知係咪我地平日去，果度又好似有少少荒蕪，個動物園門口好大又一個人都無，驟眼睇重以為關左門，行近d先見到有兩個細細地嘅賣票counter。買完票，爹爹問知唔知幾多錢，我梗係唔知啦，原來成人都只係十鬆d蚊，Ambrose唔使錢，即係廿幾蚊入動物園，重平過去海洋公園呀，我地不期然又再為左尋日二百蚊上101肉赤呀！
朝早我地無食野，黎到動物園已經肚餓，環顧四周都唔似有野食，唯有入園望吓有咩食啦，。一入園門口附近有麥當勞同便利店，嘩，原來有好多唔知中學定小學生响度午餐。我地入左便利店望有咩野食，真係無咩好食，再望吓個地圖，似乎我地都只係可以選擇麥當勞，唉，麥當勞就麥當勞啦，排長龍都要食架！爹爹抱左Ambrose入紀念品店行，又係好多動物，同我地响誠品果間動物店係一樣，而呢度就再多d動物毛公仔，我就梗係負責去買麥當勞啦！排吓排吓至發現呢間麥當勞只係賣雞嘅食物，就連漢堡飽呢d咁classic嘅野都無得賣，對於唔食雞又肚餓嘅我真係一個好大打擊！
快快趣趣食埋野，望吓個地圖，原來可以搭一架小火車入園中心，唔使行餐死！我地拿拿林推Ambrose去個站度等車，眼見Ambrose有d呆滯，都知佢眼瞓，真係大件事呀！等左一陣有車喇，架車係一卡一卡，好似dwe入面架circus train咁，都幾得意！我地見Ambrose可能隨時會豬左，都不斷同佢講野，唔想佢到左先黎瞓，咁就真係嘥哂！
望吓地圖，終點站附近係非洲區，果度應該有齊哂Ambrose喜歡嘅動物，我地決定一落車先飛奔去果度睇左先，如果唔係Ambrose一瞓左，我地自己睇又好掃興啦！首先見到嘅係大象，有幾隻咁多，睇左一陣，又唔見佢地行近d，又無噴水，我地都係把握時間，影完相就行喇！之後係河馬，嘩，老實講，我自己都好似無見過真嘅河馬添呀！我地見到有好多隻河馬痴埋一齊瞓覺，都攪唔清果堆野有幾多隻，但有一隻唔瞓，行黎行去，原來真嘅河馬一d都唔得意，又肥又輪盡！再行就見到d好大隻嘅羚羊定羚牛，都無仔細睇佢前面嘅牌介紹喇，睇睇吓見有隻斑馬行左出黎，隻眼細細但又好精靈咁係咁望住我地影佢相，佢一路望唔郁，都幾攪笑！不過呢個動物園都幾奇怪，d動物只係用好矮嘅石牆同我地分隔住，我地真係可以好free咁去睇動物，但咁free，牆又唔高，點解d動物唔會誇過走出黎呢？佢地咁大隻，要誇咁矮嘅牆好似好易咁！之後有獅子，不過只見到一隻，重要係唔係好多毛鬆鬆果種，失望！之後見到有長頸鹿個頭露左出黎，不過搵極都唔似係响果度睇，因為實在太高圍牆喇，唔多似去啱地點欣賞咁，唔緊要，再行，見到犀牛、馬騮、好多唔同品種嘅動物。其中我地見到一隻好大嘅黑猩猩，佢行左埋去崖邊vivi，嘩，佢vivi同我地vivi真係差好遠，真係好似小橋流水，源源不絕，嘩哈哈！正當我地講緊小橋流水嘅時候就聽到旁邊有d唔知係幼稚園定小學生驚叫，原來隻黑猩猩一手兜住自己嘅booboo擺入口食呀！呢個時候，我地都差唔多行完一圈，差在未搵到長頸鹿真身，而Ambrose亦都攰到瞓左！
Ambrose一瞓著，咁啱我地就到左兩棲爬蟲動物館，我地話Ambrose真係醒，知道非洲區行完，一行爬蟲館就好知機去瞓覺，哈哈！雖然爬蟲館係唔及出面果d大型動物吸引，不過其實都幾好睇，如果有心機去睇埋d字，真係知好多野，我覺得呢度都好有教育意義！行左一輪，見到有個小食亭，忍唔住走埋去食番d野先繼續行。
雖然話去動物園係專for Ambrose而去，不過木柵真係好大同好多動物，即使大人去都唔會悶，Ambrose瞓覺期間我地都自得其樂！
再去左一陣，我地忽然見到有一堆馬，嘩，好開心呀，d馬都好活躍，跑黎跑去，唔係企哂响樹發呆架！Ambrose最鍾意嘅馬終於都出現喇，好神奇，呢個時候Ambrose明明瞓左無啦啦起左身喎！真係啱哂呀，佢竟然避過左悶悶地嘅爬蟲館，一起身又接住睇番佢嘅至愛動物，重要一開眼就見到馬，真係好喇！睇馬都睇左好一陣，因為有兩隻馬响度追逐，少見麻！
行行行，又見到斑馬，今次係去左斑馬竇喇，不過都係得一隻斑馬行出黎應酬我地，其他都入哂屋瞓覺！之後，好好彩，終於誤打誤撞去到去長頸鹿個竇，好清楚見到幾隻長頸鹿，正呀！重要有隻長頸鹿無啦啦拔足跑左幾步，大家都驚嘆長頸鹿跑呀，又真係幾難咁，條頸咁長，哈哈！
再行去左澳洲區同沙漠區，離遠見到袋鼠跳跳跳，又見到駝鳥，不過好似細隻左少少，同條頸有毛咁，同平時見到果d都有d唔同！之後有駱駝，單峰同雙峰
都有，單峰駱駝好似寒背禿頭咁，而雙峰就圍住個峰都有毛毛裙邊，都幾唔同！
睇到七七八八，中間有時會有d石造動物响條路度，Ambrose都好興奮，行黎行去，笑騎騎，佢又爬左上去隻龜同青蛙度當馬騎，又拍拍拍，好攪笑！本來都重有個樹熊館同熊貓館，我地都無入去睇喇，爹爹話唔明熊貓咁懶，懶到連交配都唔做而面臨絕種，點解要搵佢黎做國寶？哈哈，又幾有道理喎！重有個兒童動物園，其實只係將唔同動物細細隻果d擺埋一齊，真係叫做一次過睇哂咁多動物嘅bb版咁，不過果度實在唔知點解好臭，見既然都已經睇哂想睇嘅野，都係走人喇！
再下一站，係紀念品店，好多唔同動物公仔，Ambrose好high，又攞呢隻又攞果隻行黎行去，好彩我地之前在誠品店買左河馬咋，呢度咁大間都無我地果隻河馬，真係好彩有買！行完紀念品店，都已不多四點九，動物園五點鐘關門，時間啱啱好！
出左動物園，見天色開始暗，天氣又凍相機又無哂memory，本身諗住搭埋貓空纜車上貓空，諗住去飲茶同買茶葉，真係好大掙扎。不過行吓行吓都去到纜車站，諗住都黎到，搭一搭都唔會好耐掛，反正Ambrose又醒左，俾佢感受吓搭纜車都好，就係咁，買飛去喇！
入到去纜車站見無人搭，都心驚驚，我地成架bb車入個纜車車箱，個工作人員叫我地一人坐一邊，我個心都不知幾慌，不過都唔敢表露出黎，又唔敢亂郁。車箱臨關門一刻，爹爹問工作人員去到貓空要幾耐，一聽到成二十五分鐘，真係想大叫！咪即係搭左半程飛機囉！真係好後悔，Ambrose二十五分鐘可唔可能唔扭計唔郁呢？佢一郁架車會唔會搖搖吓呢？諗起都驚！再望埋上山，嘩，又斜又長，好得人驚，個車箱離地果刻真係成個心跳出黎！我知爹爹都有同樣擔心，不過既然都已經上左車，無法啦！我試圖不斷同Ambrose玩同睇動物書，一來將自己不安情緒分散，二來亦都要响Ambrose未扭計之前令佢平靜吓，唔係高空唔知幾尺佢一發顛都唔知點算呀！真係講到我口水都乾埋先到，總算舒一口氣，不過都重有回程要驚！天色黑得好快，我地上到去天都黑哂喇，一出站四圍都無咩野睇，係有幾間茶館，不過要上樓，我地推bb車又唔太方便。望吓水牌，指住去茶葉莊嘅路又黑又無人，又唔知要行幾耐，都有d卻步！爹爹話點解香港山頂都幾熱鬧，呢度一出黎真係可以咩都無？真係唔知點解，係咪我地夜上黎呢？見有個遊客counter，問吓要行入茶葉莊要幾耐，原來都要成十分鐘，雖然十分鐘又唔叫好耐，問題係天色已經黑哂，又凍又無人，靜英英咁推住bb車行十分鐘都真係好驚。就係咁，我地都係決定打道回府，又要再搭一轉纜車落山！呢一程，都唔易過，因為天黑，周圍又係d草叢，望出去都係黑漆漆，黑到有d令人心裡發毛，重要唔知點解唔見左本動物書，無左本書，係好難定住Ambrose。好彩，都無驚無險，安全著陸！
返左飯店歇一歇，換番走對濕襪，又出左飯店，行我地平日會行嘅相反方向，原來果度都好熱鬧，又有地道檔攤野食，我地都忍唔住就地坐低食左少少野，正！估唔到同Ambrose一齊都食到街邊野，哈哈！行吓行吓，又係食飯時間，諗住搵地方食野，點知又係唔係上樓或者好迫，一係就無咩人幫襯，兜黎兜去，都唔知食咩好，最尾都死死地氣入左間食台灣牛肉麵嘅餐館，都無人咁濟，不過係時候要食野，又費時再行去搵，照食啦！叫左兩碗麵、一碗酸辣湯、一碟炒菜同一碟餃，好味！食到好飽！不過個碗湯同我地心目中同飲開果d都唔同，都麻麻地好味！台灣人又係好熱情，我地無野俾Ambrose食，問左侍應要左杯水，將炒菜浸吓水過吓油先俾同Ambrose食，點知個侍應無啦啦攞左塊大大嘅炸蝦片俾Ambrose食，都真係唔知多唔多謝佢好，我地點炒菜都要隔油先俾同Ambrose食啦，佢竟然炸塊蝦片俾bb食，真係好攪笑！我地都勉強俾左少少蝦片Ambrose食就收埋左喇！
呢一晚，係我地响台北最後一晚喇！又諗緊我地咩手信都無買唔知點交代，食完飯時間唔太晏，精神又ok，即刻打的去西門町老天祿入貨去！買完老天祿，行多一陣想話去屈臣氏入埋Dr Wu，點知間屈臣氏又要上樓，而Ambrose好似又眼瞓，最後都係打的返飯店。重以為無機會入貨，點知飯店個女待應話街口間康是美收好晏，咁我地上左房，整左Ambrose瞓，我就衝左落去入貨喇！見有周年慶減價，買滿二千減三百，左挑右選，最終都買左四千幾新台幣護膚品，睇黎，未來一年我都可以唔使再買護膚品喇！
可能係最後入貨機會，我都攪左好耐先上房，嚇到爹爹死死吓！哈哈！我返去又輪到爹爹落街行吓買宵夜，無法啦，帶住個仔去旅行，唔多唔少都要分頭行事架喇！不過好慶幸，Ambrose去旅行呢幾日都同平時差唔多，作息定時，無因為去旅行而攪亂哂，更加令我覺得就算去旅行有好多地方想去都好，始終大原則都係唔好攪亂Ambrose生活規律。
人肉鬧鐘仔Ambrose去到台北，勞碌左一日早左瞓，第二朝都一樣係七點鬆d起身飲奶奶，究竟點解佢可以日日都準時咁起身呢？！真係好神奇！可能之前一晚都叫早瞓，加上張床又大，Ambrose又攰到瞓得好定（雖然兩邊床都有位落床，我都好驚Ambrose半夜典典吓碌左落床），我都瞓得幾舒服，所以一早起身要沖奶，都ok啦！起左身攪埋臭臭，煲埋粥仔，老公先起身，見未過早餐時間，又落埋去食免費早餐。台灣人都比較熱情，見我地只係搣少少白麵包俾Ambrose食，個侍應無啦啦攞左一碟餅乾同糖俾Ambrose食，又有橙汁。對於Ambrose黎講，呢d真係無咩食過，因為我通常都只俾bb餅乾同零食Ambrose食，對於不知名嘅野食，無介定係bb食品嘅野食，我都好有戒心，不過對於人地一番好意，我地都係勉強俾左少少Ambrose食自己食埋去就算喇！食完早餐返上房，唔知係胃氣攻心定早起身，好眼瞓，忍唔住上床瞓一陣，老公就帶埋Ambrose落樓下行吓同飲杯咖啡，我就昏昏沉沉瞓著左，哈哈！
瞓瞓吓有人入黎想清潔間房，大家都唔知有人，真係嚇左一跳！雖然都繼續瞓番，都已經醒左好多！十一點幾左右，老公同Ambrose返埋黎，佢話出面重係濕同落雨，唔想去動物園喎，好失望，不過落雨去自己都辛苦，所以都係算啦！唯有寄望明天啦！今日，決定近近地去101，順便行埋果邊間誠品旗艦店！
打的直接去101，首先都係行吓果度樓下嘅商店先，見Ambrose瞓左，我地都爭取時間去食左野先，順便等佢醒左之後先上101！食完野Ambrose都未起身，果度又無咩野行，全部都係名店，唯有向外走，行吓附近嘅商圈。點知行行吓入左間NET嘅時裝店，呢間野都有少少似香港嘅H&M同Zara，大大間，d衫唔係話好貴，見有d恤衫同線外套都幾啱返工，迫左老公入去試身室試吓，一試件恤衫又出奇啱身，事關佢人高但又唔大隻，好多時買衫，就到個身啱，隻袖又短，就到袖長個身又太大件唔fit，成日都買唔到衫！試左一件fit，就自然想再試多幾件啦，左挑右選加上試身，都攪左一段時間，Ambrose都起埋身喇！最好笑嘅係Ambrose成日見到爹爹入左試身室又關門又開門出黎又關門，間試身室度門唔係到地，大概應該係離地半尺左右，Ambrose忍唔住成個人扒左响地去“莊”爹爹，有幾次重差d攝埋入去間房度，真係唔知好嬲定好笑！爹爹响呢間野都攪左好耐，總算有收獲，而我，都唔輸蝕，一路好似捉雞仔捉Ambrose，一路幫眼爹爹試衫，一路自己都選左幾件唔使試嘅！
買完一大袋野又行返轉頭去101，去到買飛先發現每人都要港幣一百元，兩個人都要二百元上一上去，真係好貴吓！不過見一場黎到，又專登等埋Ambrose醒左先上去，都照買飛啦！我地又有特別優待，唔使排隊直上。其實上101係上89樓，只係佢架lift會响幾十秒間上到去咁解！我地入到架lift，好黑！架lift一開動，天花就有點點光閃閃吓，好似星星咁，Ambrose又係好新奇咁望住，不過因為咁短時間直上89樓，耳仔都塞埋，吞左幾次口水先無野，我諗緊Ambrose有無野呢？見佢無咩異樣，都無野掛！出左lift，其實咪又係果d咩咩塔咁一大幅玻璃窗同埋入錢望遠鏡，真係一眼睇哂！而因為落雨，其實望出去都唔清，白蒙蒙灰沉沉咁，真係無咩好睇，自從以前上過東京鐡塔，已經覺得無咩特別，早兩年去日本係咁易上完大阪唔知咩塔之後，老公都話唔再上其他塔，今次去埋101，我發誓我以後都唔會再上呢類嘅塔，真係嘥錢嘥時間，不過今次就當係Ambrose第一次上咁高嘅塔，咁諗會舒服d！我地知道88樓重有一層可以行，又係特別待遇，一大條蛇餅，我地唔使排，一有lift就即入，真係好好！香港邊度有d咁好嘅野架？人地見你帶住個bb分分鍾都重嫌你麻煩，街d人唔同你爭路行都已經偷笑喇！台灣呢d文化真係好好！落到去88樓，原來係d咩珊瑚石展品，悶到嘔！睇完展品就係果d專劏人嘅商品counter，全部都係果d咩珊瑚石飾品，完全無興趣去睇！好失望，真係唔知上黎做咩，走埋去問吓工作人員有無果d玻璃地俾人睇到下面，係無嘅，走得！再一次有特別待遇，唔使排隊直接搭lift走，全程上左去都無半個鐘呀！
離開101，即刻去我最想去嘅誠品，我一直都覺得台灣書種類又多，又平，真係好好，之前有上網訂書運返香港，今次黎到自然想睇吓有咩啱Ambrose啦！同埋我地一直都係搭的士點到點，根本都無搭過捷運，又無行經咩書局，聽聞台灣有地下書店街，真係無機會去到，誠品叫做最後希望喇！誠品旗艦店成幢唔記得有幾多層，都唔係全部賣書，有d樓層係賣精品時裝，兒童書藉時裝精品响其中一層，我地一馬當先上到去，靜英英！一入門口都係賣細路仔衫，有一間toy land，其實101都有一間，我地都行左，再行入少少，竟然有一間店舖係賣動物公仔，係真實動物公仔，大人手咁大隻，好靚，重有好多唔同動物，真係認真製作，我見到都好興奮，何況Ambrose真係勁鍾意動物，佢見到已經顛左！我特登睇佢第一隻會攞起邊隻動物，不過都估到，佢係攞後面果排嘅馬！因為屋企已經有好幾隻真實動物公仔，不過有d種類係無嘅，所以雖然有d貴，但都諗住會買佢第一隻攞起嘅公仔，而好彩係屋企真係無馬！Ambrose將d公仔搬黎搬去，好開心，好興奮，雖然我覺得無咩野，不過又驚個sales嫌我地，我都有叫Ambrose唔好攪，其實點叫佢唔攪丫！最後佢玩左一大餐，我地都係決定買隻馬同長頸鹿！好開心！好開心！
行完動物店，見前面有間賣精品玩具店門口放左套點讀筆教材，有台仔有椅子，我抱起Ambrose坐上去點讀套英文教材。奈何果枝點讀筆係有線連住喇叭機，加上唔知係壞壞地定無電，成日玩玩吓熄左。Ambrose其實都好鍾意聽書，部機一熄佢就要我開番聽，我連續開左好多次之後真係頂唔住部機，好想放棄，又摷吓套教材嘅櫃筒仔，有d唔同嘅書同咭，幾得意，而Ambrose見我摷佢又摷埋一份，最後都係靠爹爹抱走佢！都好想睇吓套野係幾錢，見有哂成set櫃又幾得意，不過玩左咁耐都無人出黎sell我，又無價錢牌，算罷啦！
玩完教材，再行入少少終於都係兒童書籍喇，一個箭步行左入去睇。首先睇Ellen搭我睇同買嘅兒歌dvd / cd，不過真係一d都唔吸引，明明係英文碟，個封面又係中文咁！想睇普通話兒歌，但又會混左一d台灣語，因為時間所限，我無再仔細睇，直入英文書，想睇有咩pop up書平，點知果度d英文書都幾貴，唔會平得香港好多，梗係唔想由台灣托番香港啦，又加上佢無點將d書分類，密密麻麻，一時間我都無太多時間去尋寶！再睇有一堆特價書，係幾平，不過應該係display到殘哂先做特價，原本都唔介意佢係display，反正Ambrose玩一排都會殘同埋過左某topic又會少睇，都係睇一排，不過當我想再摷吓睇吓時，一抽本書就無啦啦有隻野走出黎，嚇死我，走都走唔切啦！再睇有d早教玩具，好似幾好，不過杯套組我地本身有，又啱啱搭左Ellen團購左d玩具，功能又差唔多，又無收獲喇！再行入d就係早教書同字咭，不過都好失望，好多我响香港都見過，個價錢又同香港差唔多，真係無謂响度買丫！行左好耐，都無野啱，係有d一set嘅書，幾平，百幾二百蚊有六至十本，同我上次上網買果d一set set差唔多平，而家買就唔使運費囉，不過睇黎睇去又無啱心水嘅主題，亦無在上網買時咁多選擇，最後咩都無買到就走人！超失望！我懷疑d人成日話平書，係要响果d細細間書店又或者地下書店街度買囉！因為上網d人都係講台灣好多幼幼書架麻，我睇到果d都係香港都有，唔大分別，我相信應該有d係唔出國嘅書，係我去誠品太大路囉！行完兒童書再出番去會合爹爹，佢話佢忍唔住買埋河馬、乳牛同袋鼠俾Ambrose！
好趕咁行完一輪，見天又黑，Ambrose又累，都係打的返酒店抖吓喇！
抖左一輪之後，我地又出發去士林夜市，當然老公都係prefer打的啦！去到夜市第一時間去買我至愛嘅蜂蜜白苦瓜汁啦！好味！Ambrose見到又要，係咁易都俾左少少佢飲，哈哈！諗住行去食野果邊買大塊雞扒，點知條龍長到嚇親，推住Ambrose又無理由真係當街排隊吹風架，最後都係放棄，直入裡面d店舖睇有咩野食。我地都算勁，人地個夜市都幾多人，我地重推住架bb車左穿右插，我地都幾經辛苦，左睇右睇有咩好食，又要睇吓架車入唔入到，最終都俾我地搵左一檔食蟹、柯仔煎、花枝湯同炒菜，其中柯仔煎係超難食，花枝湯同炒菜都ok，連Ambrose都要食炒菜呀！快快食完又行過，見到臭豆腐又坐左响度食，都幾好味，不過我地都唔餓，想話要一塊又無，結果係一碟，食完超飽呀！見已經飽左又行番出去shopping，好多人，又無咩好買咁，趁完熱鬧，重好早，最後老公竟然指住街邊切好嘅生果話不如試吓囉，我地試左梨，好甜，買左一包，行行吓我地先講開咁甜係咪加左糖水？！又行吓行吓，諗住難得出黎搵食，雖然好飽，都想再食吓野先走，結果去左一間專食杏汁嘅舖頭，叫左碗杏汁豆花，一心以為係杏汁豆腐花，好想食好耐架喇，點知黎到係一碗唔知咩水，白色，入面好多杏仁粒，食左一啖，好難食！我都唔鍾意食杏仁嘅，成碗都係杏仁粒粒，真係唔想再食第二啖，但就咁擺响度又好似好衰咁，都係格硬食左幾啖先放棄！食完野，見無咩地方想去，都係打的返飯店喇！
返到飯店，Ambrose可以自由行，佢好興奮，係咁通房行，笑騎騎！我地攞左今日嘅戰利品出黎俾Ambrose玩，佢重開心，係咁揸住d動物扮行，佢重攞埋本動物書出黎睇！最醒嘅係爹爹，佢竟然攞埋智慧寶寶嘅字咭出黎，抽起我地買左嘅動物出黎，打開字咭有圖果頁，攞埋隻動物擺响幅圖前面，用枝筆一點，有果隻動物叫聲，Ambrose睇到超high，係咁咯咯笑！呢幾隻動物雖然貴左d，見佢笑到咁，又成日揸住唔放，佢真係好鍾意，都叫值得嘅！
今晚，我地原本諗住又趁Ambrose瞓左去買番之前一晚食嘅宵夜（太好味），但係實在太飽喇，放棄左！出左成日街，好攰，攪埋d開奶水同浸米，又係時間瞓喇！
終於，台北之旅真係成事喇！但因為時間太急，我都無做咩資料搜集，同埋諗住一定要去動物園，四日三夜已經有一日係動物園，切頭切尾之後，又帶住Ambrose，真係唔使諗住日日去遠嘅地方，所以都覺得唔使點計劃，一切都係去到見步行步，隨心啦！同朋友借左本台北旅遊書，咁就出發！
十月二十七日，出發喇！我地選左搭早機，八點三就起飛，之前果晚執行李，都唔知點解執極都重有野要執，攪到好夜，又怕唔知醒起身，又瞓唔得好，起身果下係六點，個天勁黑，真係唔想起身！Ambrose瞓到好林，我地起身梳洗佢都無郁過，重諗住佢會有少少醒，咁就可以順便餵埋枝奶放返响屋企，結果係我地開定左枝奶帶埋出去。Ambrose重瞓緊，衫都無換到，我地一手用被包住佢抱佢直接上車。上左車一陣佢就醒左，都唔知咩事咁，點解醒左唔係响張床而係响架車度？！哈哈！猶豫左一陣佢就喊奶喇，即刻俾佢飲埋再攬實佢，可能Ambrose都未瞓醒，定一定咁俾我攬住無反抗，亦都無四圍爬。七點鐘到左T2泊好車，我地先同Ambrose換衫，成個少爺咁！由T2行番去T1都幾遠吓，都唔知揸車係咪好d，不過可以由屋企一落樓即上車，唔使又攞行李又抱仔去搭車，係方便左少少！七點四去到T 1c heck in，原本重以為自己都有d早可以去嘆個早餐，點知原來要七點十去到登機閘口！半個鐘頭究竟可唔可以黎個快食再入埋閘呢？好似有少少抆水，推住Ambrose都係唔好咁趕頭趕命喇，唯有入左閘之後再睇吓有咩買上機食啦！一路行一路望，又唔覺有咩野食買，搭埋無人駕駛，行到去登機閘口，咩都無買到，都已經係七點九喇，真係時間啱到無人有，以為自己已經預左時間，點知好似咩都係啱啱趕得切咁！推住bb有度好，就係可以唔使排隊直接行去first class閘口，响閘口收埋車之後我地上左機安頓喇！空姐特別攞條bb安全帶俾我地扣好Ambrose，Ambrose可能早起有少少累，佢無咩反抗。好快，飛機起飛喇！真係超順利呀！
起左飛無耐就派餐，都好，有三文治食吓，好肚餓呀！Ambrose有野食就開始精神，佢都食埋一份！平時窗口位一定係我坐，今次因為Ambrose同爹爹坐，我都要讓位喇！Ambrose望吓機外，好似有d新奇咁，不過外面光線好強，我拉番個窗唔想俾佢望得太耐，Ambrose又要我拉番上去，係都要望！香港去台北只係個幾鐘，真係快，我地第一次帶住Ambrose搭飛機，台灣真係不二之選。當Ambrose食完野又無得落地行有少少扭嘅時候，望吓個螢光幕都只係十五分鐘之後降落，有望見“家鄉”嘅感覺，哈哈！我地都早有準備，隨身行李帶左黃金俠、動物書同埋智慧寶寶動物咭，由最輕巧嘅黃金俠先，玩左一陣都係麻麻地，再攞埋動物書，呢本書真係一本好書，好就好在Ambrose鍾意睇鍾意叫人讀俾佢聽，可以睇好耐唔換其他野都得！睇左一陣，Ambrose捽眼捽面好眼瞓咁，俾個咀攬住佢，豬左！
原本以為我地架bb車推到閘口先上機，理應落機時都會在閘口俾番我地，因為連book機票個agent都係咁講，點知我地落左機，d空姐話架車跟行李要在行李果邊收番，頂！咁有咩意思喎，Ambrose又瞓左覺，响最需要bb車嘅時候先話無！老公唯有頂硬上抱住Ambrose我就周圍望有無行李車推番隨身行李囉！去到攞行李，真係見我地架bb車，安頓好Ambrose就過關喇！基本上Ambrose係瞓住入境，哈哈！
之前在香港check過台灣天氣，都係同香港咁上下，十八至二十二、三度，不過因為我地晨早出發好鬼凍，所以都著左好多衫！出到台灣機場買左國光號車票，出去搭車果下至發覺台灣都幾凍，原本著住嘅衫都無需要除。上左車，Ambrose就起身喇！真係唔瞓耐d，瞓埋程車咪好囉！不過因為早起，佢都夠鐘食粥仔，我地就响車入面餵粥仔，時間都快過好多！國光號去到台北車站，我地一落車過對面馬路上的士直去酒店。去到酒店都係十二點左右，好早！以為可以放低行李上酒店房抖吓，Ambrose可以活動吓，點知，個receptionist話要兩點先check in得！無得早，因為無房！天呀！竟然咁早機都唔記得左酒店check in問題！我同老公投訴點解同事個朋友身為agent幫我地book都唔為意又唔提我地，老公話佢知有呢個情況同過個agent講，agent話叫我地照去，佢同左酒店講，而家個receptionist話唔得，重要佢話個agent無比張check in單我地，呢個agent真係信唔過！好彩係佢俾我地擺低行李，我地無啦啦都唔知去得邊，咁就唯有推住Ambrose行出去搵吓捷運站熟悉吓附近環境啦！
一路行，都行左去台北車站附近間新光三越，我地未食野，又要搵地方食野！見有餐廳係樓上舖好似幾好咁，但奈何我地推住bb車，無lift不特止，樓梯窄窄長長咁，都上唔到去！在地面的店舖，又要望入去睇吓迫唔迫入唔入到bb車，位濶唔濶，Ambrose要擒台都唔會一吓掃哂d野落地，結果真係唔係好多選擇，想食地道野都幾難，搵到一間食西式野，地方叫濶落d，人唔多，都唔要求得太多，趁Ambrose又豬左，我地都要快d食，唔係真係無啖好食喇！
食完野行左陣已經開始又落微微雨，見差唔多夠鐘就打算返酒店check in，途經康是美，見到有Dr Wu sample set做緊特價，聽人講台灣買Dr Wu平，雖然未用過都好心動，為安全計，我都係買住一set sample試吓先再決定買唔買大裝喇！
我地book嘅酒店，其實應該話係旅館定飯店，都唔係好近捷運站，可能之前我地去台灣住過一間在西門町嘅飯店，一落樓行少少已經係車站，所以呢間飯店，推住bb車都要行成十五分鐘先到車站，係有少少遠！之前在網上看酒店地圖都唔覺，去到又要推車又落雨就份外覺得遠，我地係咁話個朋友介紹得唔好！我地已經講明有小朋友，最緊要間房大有空間同方便搭車架麻！所以check左in我地都期待間房係點，如果連間房都唔合格，返香港真係要咋型喇！
間飯店其實都係特色飯店，全幢得七層，裝修有d風格，好多特別公仔裝飾，好得意，至少Ambrose在飯店大堂嘅沙發上見到有幾隻bear bear，佢就係咁搬黎搬去，見地上有一座mickey公仔又揸住佢個鼻“un”身“un”勢，不亦樂乎咁行黎行去睇野，睇見佢都覺好笑！我地間房在頂樓，都唔錯，夠高！房門係桃紅色大大隻，好sharp！一入去，嘩，好大吓！原來同網上睇真係唔差得遠，重以為d相係取巧嘅添！間房係長方型，大床對面有張長型梳妝台，大床對外，個廳有一張長沙發同一張單座沙發，真係同屋企個廳有得fight呀！大床左手面係一行過嘅廁所，好大，同我屋企個廚房差唔多大添呀！幾個人入哂去一d都唔迫，換片重方便過响屋企，重要個廁所有暖風，同Ambrose換片沖涼唔怕凍親佢，真係好好！Ambrose一入房已經好開心行黎行去，真係好enjoy咁！見間房好ok，我地都開始accept到唔係太近捷運站嘅問題喇！哈哈！
因為之前真係無計劃行程，在飯店settle down之後，都幾攰，見又落雨，又唔知去邊，都有少少懶出去！哈哈！去旅行去到唔願郁都係第一次！最後我地休息夠就打的去左西門町行吓趁吓熱鬧，順便食埋飯！不過行行吓落雨，我地都唔敢放Ambrose落地行，又抱到攰，唯有用揹帶揹住行啦！順便擔遮都方便d！越行越大雨，見Ambrose又好悶好攰咁，都係打的返飯店喇！
果然，Ambrose可能早起，又有好多唔同野睇太新奇，今晚佢好早瞓，八點幾九點已經打哂喊露要瞓覺！雖然都驚佢早左瞓會半夜起身開party，不過見佢咁辛苦，都係瞓啦！
飯店街口轉右有間康是美，日頭响台北車站都有睇過d護膚品，但趕住返去check in都無仔細睇。趁Ambrose瞓左，我見咁近自己一個人走左落去睇野，哈哈，不知幾爽！不過因為驚老公擔心，我都唔敢睇好耐，是但買枝hand cream就走人！我返去之後，又到老公落去附近睇吓行吓順便買宵夜！終於都可以一嚐台灣街頭小食喇！呵呵！
食完宵夜，蒸埋奶樽，煲定水第二朝開奶，浸定第二日粥仔嘅米，係時候都要瞓覺喇！好鬼攰！
對上一次寫成長記錄已經係十二個月嘅時候喇，我真係好懶！唔知點解，Ambrose過左一歲之後，佢突然間好似識聽你講野咁，有d野重唔知幾時識左，我覺得佢好似開始真係一個小朋友喇，唔係一個bb！
唔記得佢幾時學識，不過直至今日為止，佢有以下進程：
一、 之前用杯邊碗邊飲水或湯都可以，但飲管杯一直都唔肯飲，我本來都放棄左，多得Ellen叫我唔好放棄，我又攞番出黎，點知無啦啦又肯飲喎！不過佢都係要氹住飲而唔會自己主動攞起隻杯飲，同埋佢飲水飲到鬼死咁大聲，大聲大聲“殊”完之後會大聲丫大口“呀”一聲，好似好享受咁，真係俾佢笑死！見佢肯飲我地都無話佢咁飲無禮貌喇，等佢大少少習慣多d飲水先再糾正佢喇！
二、 已經轉左一歲奶粉，而且一日三粥喇！
三、 啱啱响十三個月前一兩日可以自己行幾步，從此開始佢步行生活，而家佢都可以行得幾耐吓，雖然有時都係會行行吓仆倒，不過佢自己都可以起番身，重要識得起番身之後拍吓對手d塵！
四、 可能佢而家唔肯坐high chair睇碟，有時放左佢落地佢又行到埋去個電視機睇，我地都成日要叫佢行返去沙發睇，唔知係咪因為咁，佢自己會面向前向後行，好攪笑！
五、 行路大致可以，但有梯級時都未係好識得提腳，上梯級都還可，落就麻麻地喇！要訓練吓至得！
六、 自己可以掉轉個人用腳仔落地，呢個動作都幾純熟，而家無論係沙發定大床咁高都可以做到，就連去酒店時佢唔熟架步都可以自己落床。暫時未試過失手！不過我地就煩喇，自從佢識自己落床，有時夜晚要瞓果時佢都會典典吓諗諗吓落左床行出廳玩，要捉雞仔捉佢返去瞓至得！
七、 識得點頭同擰頭！開初佢學點頭果時真係好好笑，因為點頭用嘅頸肌同擰頭唔同，擰頭就易好多，點頭就難d。最初佢點頭果時係成個身一齊點，好爆笑！
八、 幾個月時買左個彩虹柱入圈圈俾佢教佢玩，一直佢都當d圈圈係冬甩咁咬，叫極都唔識入柱。一歲之後無啦啦自己識得入，亦都會玩完又再倒出黎再玩過，令我相信有d野佢未到嘅話你要急都急唔黎！
九、 杯套組係有十個唔同大小嘅杯可以入埋一齊，又可以叠高佢做塔，係dwe玩具包埋嘅！之前成日同佢玩佢都會推跌哂，唔知幾時佢已經識得自己叠高做塔先推跌拍手掌，如果叠到唔夠高佢自己重會企埋起身叠，好感動呀！我覺得呢個係奶奶同朝早姨姨同dwe嘅功勞，因為自問我無教過佢去叠高架！
十、 識得自己行上條樓梯“sir”滑梯而唔係由滑梯就咁踩上去！
十一、 識得開哂我地嘅衣櫃、鞋櫃同書櫃嘅門，又開又關，不亦樂乎！
十二、 屋企有個地櫃有一級，高度幾矮，但就啱啱好可以俾Ambrose行埋去得個pat pat落去坐，唔知幾時佢自己已經將呢個當成佢嘅私家位，一話食野佢就自動自覺行埋去坐低食野，一話出街都會坐埋去等人同佢著鞋！著好鞋重會行埋去個門口度想開門，哈哈！
十三、 識得自己坐上去自己張沙發仔轉番正咁嘆住坐，之前都只係識爬上去，爬左上去都唔識擰番轉個身架！
十四、 識得聽到叫自己個名舉手，無論叫佢中文名又好英文名都好！
十五、 識分辨象、斑馬、魚、龜、馬、狗、長頸鹿、獅子、河馬、袋鼠，猴子、熊等動物。
十六、 識扁咀。
十七、 終於都識將d通粉入落個樽度！之前上playgroup有教做，Ambrose一直都唔肯做定唔識做，只會攪攪震甚至去食都唔擺入去，上幼潛唔知第幾堂又有要做，佢竟然做到，雖然好多小朋友可能一早都做到，但見到Ambrose無啦啦做到又肯做，真係好開心，亦再一次令我覺得每個小朋友發展真係有快有慢，如果佢係ready嘅，佢係總有一日做到俾你睇，如果佢根本未ready，你點谷佢都無用，亦令自己失望！
十八、 識得掉垃圾。
十九、 偶然都會識得自發收拾玩具，不過好奇怪，佢成日都會收完之後一次過又倒番哂出黎，如果唔自發收拾，爹爹俾指令佢都會收拾嘅！同埋上幼潛時佢都好肯收拾架喎！
其實好似過左一歲之後一陣突然間覺得Ambrose識得聽我地講野咁，而佢亦都有好多唔同嘅進程，有時真係好驚嘆點解佢會知會識，好得意，亦都開始唔係好記得佢重有d咩進程，我嘅小bb開始發展去做一個小朋友喇！我唔要求佢有咩叻有咩快識做到講到，但求佢身體健康，平平安安，一切都在應要識時要識就可以架喇！
好耐都無去過旅行喇！陀Ambrose之前一直都忙舖頭嘅野做咩都無時間，之後到唔做舖頭專心打工，又無假去旅行！直到零八年先去左一次日本，返黎兩個幾月就有左Ambrose，到Ambrose出左世又好忙好忙咁湊仔，有時候都好想掉低佢自己去吓旅行relax一下！但老公又唔係幾捨得掉低個仔，又怕帶住個仔去旅行好辛苦，怕佢唔習慣會扭，怕佢唔食又唔瞓又在外地好難攪，一直都怕好多野，去旅行呢個議題一直都無定案，只係話Ambrose過左一歲識行會好d！
Ambrose接近十三個月先自己開始放手行，比起表姐十一、二個月識行係慢左d，原本都諗緊年尾或出年新年左右先去到旅行，點知老公無啦啦走左去搵工、見工，人地又無啦啦比左offer佢，佢又無啦啦接受左個offer！因為諗住新入職好難攞假去旅行，所以佢趁轉工果個交接位諗住去一轉旅行，一賞我嘅心願又好，可以relax吓去吓外地又好，帶Ambrose搭飛機見識吓又好，終於都有d實質嘅諗法喇！因為第一次同Ambrose去旅行，我地都只係target近少少嘅地方，一來驚Ambrose在機上扭計我地又抱唔到佢行黎行去好麻煩，二來近近地又唔使plan好多野！
不過因為之前奶奶不斷要返醫院又驗野又見醫生，一直都無一d實質報告出黎，我地雖然hold左機位同酒店，一直都唔敢confirm，驚報告出左有d咩壞消息，咩心情都無之餘又可能有d野follow up唔方便去旅行就麻煩！所以一直所有野都on hold！直至上星期出左報告，知係零期，而follow up係幾星期嘅電療，情形都幾樂觀，同老公商量過去幾日旅行都無咩大問題，帶埋Ambrose去咁奶奶更加可以休息多d，所以台北之行應該無問題！
今日老公同同事嘅朋友confirm埋機票，酒店因為之前hold得太耐無confirm所要再book過，基本上，呢次台北之旅好似真係去得成喇！
之前聽Ellen講天水圍嘉湖海逸酒店有個幾大嘅playroom，又有泳池，一方面幾想同老公二人世界去住吓relax吓，另一方面又想帶Ambrose去玩，順便又可以試吓究竟Ambrose係跟人瞓定跟地方瞓！一直都係得個諗字，因為之前奶奶乳房原位癌要等睇report，好多野都hold住左唔敢四圍去玩，前兩日佢睇左報告知道係零期cancer，雖然都係cancer，不過係不幸中嘅大幸，大家都叫做鬆一口氣，見公司有住房優惠，老公就話不如星期六入去住返晚啦！咁啱Ambrose星期日又唔使上playgroup唔使一早撲出去，咁我即刻行動去book房喇！
可能奶奶見book間房咁平，佢又走去問姑仔去唔去，想話兩家人去熱鬧d喎！原本都有諗住仿效Ellen日頭同個仔玩完之後送返個仔俾奶奶湊，然後同老公入返去酒店二人世界，relax一下，最重要係可以好舒服咁瞓到第二日，諗起都正！不過而家奶奶叫埋姑仔，都無得咩二人世界喇！諗住佢之前病等睇報告大家都好down咁，咁佢想一齊去我咪無出聲，黎個family gathering，大家去散吓心囉！至好彩嘅係我地公眾假期入住，前一日我臨急去book多間房都重有房！
兩家人gathering，我地都係揸車入天水圍，真係唔可以睇少去一晚酒店要帶嘅野，重要係屯門同天水圍好似好近咁！我地一抽二袋咁入去check in，無belt boy，自己推住bb車載貨，都幾誇張，都無法，一共三個小朋友，想少野都幾難！
Check左in之後我地好快入左房放低d野準備出發去玩！間房真係唔錯，一入去左手邊係廁所，好大吓！右手邊係衣櫃門隱藏雪櫃加小廚房（有洗手盤同煮食爐），行入少少係個小偏廳，有沙發同茶几，同埋小餐台連椅，再入少少就係張大床！估唔到咁平價錢有咁大間房！Ambrose有足夠地方走動，唔會迫夾！
放低野之後我地是但食左少少野，把握時間去樓下遊樂場同playroom玩喇！不過下午時份室外遊樂場都幾曬，奶奶同姑仔都怕曬，係咁叫入室內玩！其實小朋友曬一陣我覺得無咩所謂，成日都係冷氣地方行街，甚少哂太陽出一身汗，難得兩家人去玩，成個遊樂場又只係得我地，我其實唔想咁快入playroom，不過都無計！落去攞左個入playroom嘅password就入去玩！同出面一樣，無人去架！得我地玩！間房其實都叫幾大，全房都舖左軟膠地墊，好安全！裡面其實設施簡單，有兩個玩具屋仔，有兩個帳蓬連隧道加波波，有個滑梯鞦韆架，有張mini氣墊板球台，另有一個洞洞帳蓬可以俾小朋友掉波波入洞！其實唔叫多野玩，可能自己都有滑梯同帳蓬隧道，所以唔覺果果度d設施好吸引！不過可能果度大，又有表姐一齊玩，成間房都幾colourful，牆上又油左d唔同圖案，Ambrose入到去同表姐一齊大叫，好似好好玩咁，又行左又行右，又爬又跑！
玩左一陣都快五點鐘，我地book左六點半buffet dinner，為免d小朋友夜晚食野先扭眼瞓，我地玩到咁上下就湊哂上去瞓覺先！點知Ambrose唔肯瞓，抱佢上床佢又走落床，又喊到好利害，我地重諗唔通要返屋企？！見佢重有成九個字先夠鐘食粥，但係咁扭我地唯有餵粥仔，佢又肯食，點知就係坐响沙發食食吓釣魚！終於都瞓左覺喇！抱佢上床瞓左陣，爹爹起身咳左兩聲佢就開眼，聽到爹爹入左廁所沖涼佢又“吉”起上半身去周圍望，又再撻番落床再瞓，隔一陣佢又開眼，又再望吓個廁所，又再撻番個頭落張床瞓．．．．．．如是者幾次，到爹爹出左黎行埋去睇吓佢，佢竟然成個人坐左起身！前後瞓左响床都無九個字！
見Ambrose起左身，又未夠鐘食buffet，抱左佢去行吓附近商場，行左陣就去食buffet喇！
Dinner buffet係出乎意料地好，雖然食物種類又唔算勁多，都叫可以，食物都好味！我地都係第一次帶Ambrose去食buffet，原本以為實攪唔掂，好彩又ok喎！Ambrose重不停咁要食野，根本無停過，佢真係破哂戒食左好多唔同嘅野，連凍野都照食呀！我地話好抵，因為Ambrose係免費，佢都食番夠本呀！哈哈！
食完buffet原本想話行一陣商場，點知沿路行去班細路又掛住玩！一路行一路行左去玩地下一個個大石波波，行前又行後，一條唔太長嘅路，行左好耐都行唔到，眼見d店舖都關左門，我地咪唯有坐在路邊睇班細路玩！
玩左一陣我地都係決定不如上返酒店個室外遊樂場玩，又係慢慢行返酒店，好彩個室外遊樂場原來唔會關門，而且重有大燈照住好光猛！又係全場得我地玩，d細路爬上爬落玩個不亦樂乎，大人就都幾攰，要一路追住佢地驚佢地有危險整親，而Ambrose就更加，因為佢細粒好多野都上唔到去玩，要“eer”我地抱佢上去佢想玩嘅地方，真係攞命！
到咁上下，我地又要湊仔沖涼。原本Ambrose响沖涼方面都幾好，佢唔使用盤沖涼，係照淋花灑，我地可以煩少一樣野！點知間酒店個花灑係固定左响上面唔可以攞出黎，而水龍頭出水又矮左少少，好難叫Ambrose一直蹲在下面沖涼唔起身，所以我地都唯有開一缸熱水同Ambrose浸浴，所唔同嘅係，佢都係企起身咁浸浴囉！哈哈！不過其實都危險架，因為都驚佢“線”腳滑到浸親，不過真係無辦法之下嘅辦法，唯有兩個人一齊同佢沖，以防萬一囉！
沖完涼，心思思又走去隔離房探表姐，哈哈！真係好似去旅行咁，唔願瞓！原本Ambrose晚晚大概十點就瞓，就算唔係佢都會捽眼捽面表現眼瞓咁，今晚成十點幾佢竟然無，望落重好似一d攰都無咁！好神奇！姑丈同Ambrose用點讀筆睇書，Ambrose又肯跟住姑丈好正經咁睇喎，本書重唔係Ambrose係表姐架！睇左大概幾個字咁耐，Ambrose終於打第一個喊露，果時都成十一點喇，我地即刻返房沖奶俾佢瞓，佢飲埋枝奶就瞓左！真係好簡單，完全無扭，同下午唔知點解喊到拆哂天有好大分別！好彩唔使真係漏夜返屋企咋！
呢一晚我瞓得好舒服，一來張床大左，所以即使Ambrose都係半夜開始企左起身要爬黎同我地瞓，都唔會踢到我迫埋一邊迫住瞓，二來可能同酒店果塊遮光curtain係有關係，間房暗d真係好似瞓得好d咁！Ambrose係個人肉鬧鐘仔，即使間房暗過平時，佢依然係七點幾就起身要飲奶奶！唔會因為之前一晚夜左瞓就瞓晏d！真係嘥哂個咁正嘅curtain！好彩嘅係佢飲完奶奶都係瞓多陣，我地都可以瞓多陣同埋睇左少少戲先起身！
九點幾十點一家三口都起哂身，之前食buffet其實係食果時好飽，過後好快餓，所以我地一早起身已經好肚餓，打俾隔離房又重瞓緊覺，我地都係唔等佢地出左去食野先！天氣其實唔係好凍，不過又無話好熱好大太陽，見Ambrose流鼻水同咳又未好得哂，都係唔去游水，費時佢攝親又麻煩！所以都係出左去食個早餐行左一陣，等埋姑仔果邊食埋個早餐，我地又去左playroom玩多陣，點半鐘左右就check out喇！
Ambrose今日幼潛playgroup第三堂，呢堂係其中一堂可以影相嘅，所以我都幾期待！但係我一紮醒已經係十點二，我即時彈起身去煲粥仔，諗住揸車去遲少少出門都趕得切，係趕d啫！所以我好努力攪好煲粥仔，諗住粥仔一得再執少少野，換埋衫就出得門口，Ambrose就更加可以上車先換衫啦！點知攪左一大餐都已經十點七，諗住入房睇吓佢兩仔爺醒左未，催佢地快d刷牙洗面換衫就出門。一入房，佢兩隻野瞓到豬咁，兩個都扒哂响度，個頭一個向左一個向右，完全係無比我整野d聲嘈醒，真係離哂譜呀！哄埋去望吓Ambrose，聽見佢有少少鼻鼾聲，摸吓佢又無反應（正常瞓左咁多摸吓佢會周身郁架麻），可能佢呢排咳要食藥個人都攰d，再望吓老公，佢重瞓到反哂身，我迫埋上床都無反應！見佢地咁攰，我都無叫醒佢地喇！雖然都有因為走左堂好忐忑不安，又肉赤無啦啦蝕左一堂，不過上playgroup都係為左個仔，見佢咁攰，都係為佢好休息吓，由佢啦！
十一點，老公同Ambrose都醒左！不過都無衝去返學喇，大人細路咁趕法都好辛苦架麻！
之但係起左身餵左粥之後，老公就話去街喇！就係咁我地又出發，去左旺角新世紀行，順便行左落去金魚街睇魚。原來金魚街除左有魚睇，重有龜啦，貓啦，狗啦，倉鼠啦，龍貓等等，都幾多唔同野睇，唔錯唔錯！Ambrose隔住玻璃見到有狗仔好似好興奮咁，好想用手拍塊玻璃，哈哈！
今日我地一家三口經過間影貼子相嘅舖頭，老公話不如我地去影貼子相，good idea！不過原來我地都好out吓，而家d貼子相又可以加野上去寫野上去，好多花神，同我地以前果d好唔同，價錢重同以前差好遠添！竟然一次要成六十蚊，超貴！我地呢d家庭照真係無咩要求，唔使咁fancy，但求有少少公仔之麻！搵勻全間舖，只有一部機收三十蚊，咁梗係呢部啦！
Ambrose人生第一次嘅貼子相，當然係無望鏡頭啦！佢重係咁要揸住貼子機果枝筆唔放，又想食，攪到我地又要顧住影相望鏡頭，又要控制佢唔好食，又要引佢望前面，都幾好笑！呢個呀媽out到影完相之後insert名落張相到，都只係insert到兩張其中一張，重要攪到時間倒數之前 一兩 秒好趕咁入好哂，印左出黎之後，先發覺Ambrose個名無左個“e”，可能係我不斷undo時唔小心delete左又唔知又趕唔切double check囉！
頭先有單意外好好笑！
話說Ambrose都幾眼瞓吓，我諗住聽埋故事書就陪佢瞓，點知爹爹原來要換埋床單，而張被，佢就攞左出廳嘅地下準備換。我見Ambrose都無扭眼瞓，咁我就話不如一齊換啦，等Ambrose一齊參與吓麻！成張被舖左落廳嘅地下度，Ambrose見到好開心，爬在上面，然後，好似平時响張床咁，佢一個頭枕落張被上面！！！！但係平時果張係床，係軟嘅，今次係地磚！一聲好大聲嘅“卜”，Ambrose喊到回唔到氣呀！見到呢個情形，我地即刻攞枝奶出黎等佢唔好喊到咁悽涼，順手飲埋奶就瞓喇！
但係，呢個呀媽真係好衰囉，一路睇住Ambrose飲奶奶，一路諗番頭先Ambrose咁傻戇咁撼個頭落地，由笑變喊，雖然都心痛佢咁撼頭落地，但又忍唔住笑！真係好好笑呀！哈哈！
今日上完幼潛之後，帶左Ambrose去太空館會合表姐。今次係Ambrose第一次去太空館，雖然人很多，又沒有位去睇天象廳嘅節目，我地都係咁易買飛入場睇太空船展覽，文字多d都無所謂啦！其實都有d幾有趣嘅資料架！原來太空人在太空船要洗手係有特定嘅位洗，兩隻手穿左去中間個盒度，因為唔係咁嘅話，d水珠會周圍飛，好攪笑！重有好耐以前唔係搵真人上太空，而係搵猴子！果隻上太空嘅猴子，當年梗係無太空衣咁靚啦！隻猴子俾人固定左入個大盒度，眼位應該可望出去嘅，不過我一見到個盒，已經即刻覺得好似棺材，哈哈！諗起隻猴子咩都唔知，無啦啦俾人綁左入個大盒，郁唔到唔知咩事，只可睇野，都咪話唔驚囉！雖然話呢隻猴子健康返左黎重可正常生育，我覺得都幾變態咁！唔知佢上左太空，响個盒入面點食野呢？！個展覽有駕駛體驗，我都試左一次，不過無咩特別，係揸住個駕駛盤用力d，轉黎轉去唔知做咩！另外有個太空漫步，都叫吸引，不過大排長龍，我地都無排lur！
Anyway，雖然個展覽其實唔太吸引，對於咁細嘅小朋友係悶少少，不過我覺得ok，睇吓知多d野，培養去多d呢類文化地方都唔錯丫！尖沙咀又多個消磨時間嘅好地方喇！
Ambrose第一次搭巴士，其實只係佢大概個幾月大嘅事，當時我重放緊產假，悶悶地，奶奶又想出荃灣行吓，就係咁我地兩個女人仔揹住Ambrose抽住bb車事前唔話俾老公知就出左去shopping！當時Ambrose都只係一味瞓，對佢黎講可能係比屋企嘈d光d咁瞓啫！
今日我同老公第一次同Ambrose搭巴士去灣仔，哈哈，好似好寸咁，第一次搭巴士！呢一次係Ambrose稍為懂事以來第一次搭巴士，真係好有紀念價值！平時佢坐私家車，總係坐唔定，由左爬向右，又由右爬向左，又要企上椅度，又要落地蹲，真係舞佢唔掂呀。今日搭巴士無得咁樣俾佢爬左爬右，車程又要成個鐘，對我地黎講係一大挑戰呀！
好好彩一落樓就有車，唔使等車！上到車，我地坐上層，Ambrose有少少好奇，都有望吓車外嘅景物！不過巴士就無得比佢左爬爬右爬爬，加上係爹爹抱住佢，佢都叫定少少，只係有時要由爹爹度撲埋黎要我抱，再由我度撲向爹爹度要爹爹抱！爹爹話佢好難攪，佢好攰！我話平時佢揸車我坐後面我重攰呀，今日叫無得比佢爬黎爬去得咁勁，已經算好好！哈哈！爹爹除左係第一次同Ambrose搭巴士之外，重應該係第一次以乘客身份同Ambrose一齊“坐”！
無驚無險，都總算搭到去灣仔！Ambrose全程都無瞓到！辛苦爹爹舞足全程，而我就幾舒服咁搭呢程車，哈哈！
會合左睇完醫生嘅奶奶，响譚魚頭飲左餐茶，再行左陣玩具街，Ambrose見到隻發聲龜，佢簡直係熱愛小動物呀，一手抓住個龜殼係咁笑哂，真係唔買俾佢都唔得啦！行左幾間玩具店，Ambrose都打哂喊露，我地又攰攰地，原本話行吓銅鑼灣都費時去喇，朝住巴士站方向返歸，再一次好彩，有巴士，唔使等！Ambrose上車已經豬左！爹爹呢程車只係攬住佢瞓，舒服好多！
唔知Ambrose第一次搭飛機嘅時候可以定幾耐呢？
成日寫Ambrose嘅第一次，其實媽媽都有好多第一次架！
今日爹爹要陪奶奶去醫院做個小手術，我就請左假湊Ambrose。其實都好少會自己一個人湊住Ambrose成日，最多都只會係星期六上午，下午爹爹放工就會返黎一齊湊，加上爹爹又轉左長短周，真係少之又少呀！一諗起要自己一個人對住個仔全日，其實都好大壓力，有d驚，唔知點捱過呢一日咁長！
早上九點起左身，call朋友仔睇吓出唔出到去食早餐，好彩佢都起左身！一人帶住一個b，我手抱，佢就推車，去到卓爾居食早餐！之前Ambrose幾個月果時我都有試過一個人帶佢搭的士去同親戚飲茶，對我黎講，果次嘅第一次都已經係有難度，因為平時我根本唔會自己一個人湊住Ambrose去唔係樓下惠康或萬寧嘅地方，所幸係果時Ambrose重細唔會太扭，一餵完奶就即行去搭的士，最多都係抱住佢食，只少佢唔會扭左扭右扭落地同周圍攪野！但係自從佢識得攞野學行掉野扭計之後，我都無試過一個人湊佢出去，重要係坐定定同人食早餐，真係第一次！不過點都要試吓架喇，唔通真係唔出街咩！抱吓又俾佢行吓就到左卓爾居，好快就叫左野食，一如想像之中咁，佢都係坐唔定，首先係攞左朋友b嘅餐具起勢fing，d餐具又fing哂落地，又想典落地，又掉濕紙巾，真係好失禮，唯有出絕招，俾餅餅，咁佢先稍為坐定定食，不過我都要好快食哂我嘅早餐至得，因為一包餅仔唔可以頂得好耐！無驚無險都勉強攪得掂！
食完早餐陪朋友仔同個女買鞋，呢個又係一大挑戰，因為Ambrose好似佢呀媽我咁鍾意鞋，响屋企成日都要攪鞋，出去買鞋又係咁將人地架上面d鞋放哂落地，就連個架都拆埋，真係好難攪！佢一d都無令我失望，去到鞋舖，做齊哂！連sales姨姨都忍唔住要話佢！我就好似捉牛咁成日要去捉佢，我話我食左果份早餐嘅energy真係唔頂得幾耐囉！之後我地上左頂層嘅冒險樂園，Ambrose一去到見有個駕駛盤，咁啱佢舉高手就揸到，不知幾開心係咁又抆又搖，叫極都唔走呀！引左佢一排先引到佢行入去，兜左個圈，就咁坐要入錢果d搖搖車就走喇！我諗而家真係唔可以成日同佢去呢d遊樂場所，因為佢真係開始唔肯走喇！
行完冒險樂園就開始準備返屋企，經過一間童裝店，我走入去睇衫，佢有張lego台俾小朋友玩lego，點知Ambrose又係搗亂，將一舊舊嘅積木係咁掉，真係令人煩惱又尷尬，我係咁鬧佢，佢都無反應，sales姨姨走埋黎，佢先識驚撲向我，之但係姨姨鬧佢，佢只係呆左十幾秒，一手抆住我，一手都重要繼續掉野，真係激死人！點解呢隻豬仔咁唔聽人講，咁鍾意掉野搗蛋，真係好擔心佢第日會好難教呀！無辦法之下，我唯有一手抱起佢唔俾佢掂野，一手俾埋錢走人！
返到屋企好快趣餵粥仔，佢一路食已經一路釣魚喇！個樣超好笑！勉強食完抱左佢入房瞓，我先叫鬆左一口氣！起碼都叫過左半日啦！呢一次係媽媽第一次自己帶住Ambrose出去食野同埋去屋企樓下以外嘅地方行街街，都叫可以啦！係我攰d囉！
下半日點過？嘻嘻！佢瞓左之後我都有好多野要做，洗野同準備佢第日粥仔料都用左好多時間，我想同佢一齊瞓都唔得！好彩佢成點鐘瞓，三點半四點先起身，起身之後又食一餐粥仔，時間真係快過！
食完粥仔之後，我第一次自己帶佢去搭小巴去市中心！無車仔又無揹帶，就咁手抱！如果唔係咁，我根本都搭唔到車出去，我唔想行喇！成功去到市中心，個腦不停諗做咩好，但因為我真係好肚餓，我諗今晚又唔知幾點先有得食晚飯，成四點幾只食左份早餐，真係無哂力！所以我決定去食野！！！身上又無錢，第一站係去櫃員機禁錢！禁錢都有d難度，因為我無力單手抱住Ambrose又單手禁錢，唯有放低佢，但又驚佢行左去，好彩我排左個櫃員機係近一個角落，咁我就由佢响個角落度拍吓牆，係咁同Ambrose講叫佢唔好郁，等一陣媽咪，當佢想行開去嘅時候，又用好誇張嘅語氣指住個出錢位同佢講話陣間有野出架，咁佢先定左一陣望，到有錢出黎我好快手攞左收好就一手抱番起佢走人！
諗緊邊度有d地方有得坐好少少又快，最好有人送埋餐，咁我可以唔使煩！最後我去左Euro go go食下午茶，買完飛响最近出餐位嘅地方竟然有張台四張椅，啱哂我，夠哂大唔怕Ambrose攪攪震！好好彩亦都好順利，我又係用餅仔定住Ambrose自己嘆埋個下午茶，又氹到佢飲少少水添，重勁過朝早食早餐呀！今次係我第一次單對單同Ambrose出去食野，哈哈！
嘆完個tea，終於都有力氣喇，同Ambrose行入左Bossini，果度有張玩具台，佢去到唔知點解又好興奮咁睇人玩，又自己揸住d玩具fing，我就响附近睇衫仔，期間有d姨姨同sale姐姐走去撩Ambrose，我都有埋去應酬吓，不過見d姨姨好似好鬼熱情咁又摸Ambrose又流哂口水大讚佢皮膚靚，我即刻有d毛管棟，又怕d人不懷好意，都係快快抱起Ambrose叫佢同人say goodbye就走人喇！出到去見有Xbox遊戲機擺出黎任人玩，有d扭扭格同大食鬼公仔，Ambrose見到又好奇又有d驚咁，想擺佢去同食鬼影張相係咁都要走番黎，玩扭扭格又係咁。我地玩玩吓頭先流哂口水個姨姨又出左黎見到我地又撩過，我真係有少少唔太鍾意d陌生人咁熱情，一來我要應酬講幾句，二來我又唔識佢地，又摸又搣Ambrose又流哂口水咁，真係怕左佢囉！
我地玩完又走左去二樓bb部行吓，見到有件抓毛外套好抵，同左Ambrose試完又幾好睇咁，決定買喇！去到俾錢果度要排隊，好衰唔衰隔離係玩具部，啱啱有部Mickey Mouse單車放左出黎，佢一見到就想落地，但我又要排隊俾錢，唔俾佢落地，佢又係咁典，我真係手都斷埋，好辛苦不斷格硬抱實佢，一手又要攞住件外套同摷手袋攞定錢，又係咁不斷同佢講要等陣，真係驚險呀！好辛苦俾完錢之後我就放佢落地，但佢睇完架單車就俾隔離袋波波吸引左，係咁响度篤！好攪笑！
之後我驚Ambrose睇太多玩具唔願走，我俾佢睇左陣玩左陣一手又抱走佢，去左我行開間時裝店睇衫喇！雖然Ambrose去到都好痴我，唔肯俾人抱抱，但佢都無點扭計，sales姐姐好主動攞左條絲巾出黎同佢玩，佢又ok，玩到咯咯笑，之但係一定要响我附近先得，每當我一行遠兩步佢就苦哂口面望住我！雖然因為咁我唔可以去試衫同試褲，但咁樣都有個好處就係我唔可以盡情購物，慳返！最終，我都係買左件衫同一條legging就走喇！
望吓錶，原來已經六點幾，天都黑喇，係時候返屋企！經過藥房，用埋今日到期嘅減二十元嘅優惠卷買埋包學習褲就走。唔知好彩定唔好彩，小巴站排哂長龍又無車，我見又抱住Ambrose，又揹住手袋，又抽坐包紙尿褲，即刻行去搭的士返去，減左果二十元就用黎幫補的士錢，呵呵！
返到屋企已經六點九，近七點鐘，老爺黎到，接手湊住Ambrose，我可以抖吓！今日真係超充實！估唔到除左第一次同Ambrose出去食早餐成功之外，我竟然可以自己帶住佢去市中心，嘆下午茶同埋shopping，呢個第一次令人太振奮喇！有左第一次，應該之後再有第二三次唔會太難掛！Ambrose，媽咪終於可以同你出街街喇，唔使再等人返黎先出得門口喇！嘻嘻！
屋企樓下商場近日新開左吉之島十蚊店，今晚老公要出去應酬，我同奶奶就帶左Ambrose去趁熱鬧。十蚊店在商場二樓，所以要搭自動電梯，原本最近我有機會就放Ambrose落地行，去到見有自動電梯嘅時侯，我就想抱起佢，點知奶奶又話俾Ambrose自己搭。其實我就唔係幾想架喇，好似有d危險咁，又驚Ambrose周身郁，又驚佢隻腳仔唔及時伸高踏入同踏出條樓梯，不過見奶奶堅持話唔怕，又諗住一人拖佢一隻手，有咩事都可以一人一手“的”起佢先，所以都試吓啦！點知Ambrose原來都識行入去，之後又好乖唔郁，不過佢其實唔鍾意兩個人拖手，佢一直都係只肯每次俾一個人拖一邊手，所以搭自動電梯果陣佢都企圖想甩開我地其中一隻手，不過我同佢講，話平時可以拖一隻手，但搭自動電梯嘅時侯一定要兩個人拖手至得架，咁佢又好似明明地無再要甩手喇！
今次係Ambrose第一次搭自動電梯，重要係上兩層同落兩層都係自己搭架，佢自己搭完都笑哂，覺得自己叻叻！
Ambrose已經十三個月喇，想佢兩歲讀N班，原來要成年之前要開始攪，即係而家！大部份幼稚園都係九月先開始接受報名，有d早到一出世有出世紙就報得，有d要足二十個月先交得表。其實區內有N班的學校不多，最近就是樓下的啟思，但我自己其實又唔太喜歡一落樓就返學，好似好奇怪咁，哈哈！不過勝在近同方便！加上近年實在太多人生BB，我覺得報一間幼稚園都未必穩陣，分分鐘隨時無得返學，所以我另外都有物色多兩間學校俾Ambrose！
心儀另外果兩間都係區內有好多人話好嘅學校，其實點好，又真係唔係好知！好多時d野都係人地話好，到自己嘅時候又唔係心目中果回事，所以今次選幼稚園，除左人地講之外，我都好想親身去睇吓個環境，望吓d老師，所以都會非常留意學校幾時有開放日！
今日係新一代嘅開放日，呢間係一間英文幼稚園，而區內其實數得出係英文幼稚園真係唔多，我自己知就得兩間，所以呢間學校多人話好，我唔會覺得出奇！三間心儀學校入面，我比較看重呢間，英文幼稚園喎，讀到呢間，可以唔使再搵上咩英文playgroup好，可以集中著重體力肌肉發展嘅playgroup，反正N班又無學卷，呢間學費又同其他學校差唔多，好似比較一舉兩得！不過讀呢間就要諗搵人湊返放學問題，有好大機會要搭校巴！
同個朋友仔一齊去新一代，都搵左一陣個門口再問人先搵到！好奇怪，個入口係响商場唔起眼嘅緊急出入口門入去上樓梯先到！一入門口已經有好多本地同外藉老師係咁good morning，我放Ambrose落地任佢行！開放日schedule左唔同時段有普通話同英文劇場，見未夠時間，又直行出去已經係室外遊樂場，咁我地都係出左去玩！
Ambrose都麻麻地投入咁，都係行吓望吓有時又要你抱吓咁，睇唔到佢入到去見到咁多colourful嘅野同遊樂設施有多大興趣，呢個我都有d意外，我以為佢一定會開心到怪叫添！
見佢唔太投入，我同個朋友都有問題要問，所以就衝入去招生間房問野喇！等候期間，我地都有睇吓唔同級別嘅書本係點，原來佢地三份二時間都係英文，其他時間係普通話教學，真係幾好！書本亦有普通話架！Ambrose落左地之後又要我幫佢攞本書出黎睇，但到我攞左出黎，佢又同我走左去攞第二本書出黎，一味就响度做搬運工人咁，真係失禮哂！終於等到有老師去解答我地問題！而我地亦都順便取埋報名表喇！不過原來唔係報名先要交錢，係攞form就已經交錢喇！有d市僧咁！而憑老師小小嘅舉動，我已經覺得佢唔夠細心！因為我地之前已經話bb係八月出世，佢地係八月中開學，咁bb要足兩歲先返得學，佢地就會變左插班，無得同其他小朋友一齊開學之餘又無左家長陪小朋友返學果個星期嘅適應期，個老師又好似覺得係咁架喇，我覺得呢個安排同佢呢個態度好似有d唔係幾好！再之後我地都有問佢interview幾時，佢又話十一月，我已經覺得好奇怪，十一月，Ambrose只係得十五個月，咁佢又話要歲半先interview，十五個月見黎就咩？咩都唔識架啦，佢又問我地bb幾大，好似完全唔記得之前我地先講要插班嘅問題，同埋問佢d報名程序，佢都有少少猶豫去答咁，令我覺得好似攪得個開放日唔係預左人問架咩，咁都有？！最後，因為我地兩個bb都有少少坐唔定，我地隨手攞左d糖呀餅仔俾佢地攞住，點知佢又好似好好心話d糖硬喎，大佬呀，我地都只係話俾佢地攞住啦，都無話俾佢食，同埋，唔好唔記得佢地都只係十三個月，你唔會覺得佢地係食到架麻？！我話佢地邊食到嘅時候，佢先至話係喎，食唔到架喎！係有少少覺得我如果交左個仔俾你地，你地係咪真係可以睇實佢架？！
之後我地去望吓d班房同廁所，無咩特別！入左其中一個班房做手工串珠仔，不過好明顯呢d都唔係for我地咁細嘅bb玩，係有d失望！我覺得佢地有N班同K班，攪得開放日，總要照顧吓細bb囉，無奈地又走去睇英文劇場，點知因為佢地要用projector而較暗左間房，又係一d剪影晝咁，成間房好似灰灰暗暗咁，而個故事唔知點解要講小紅帽俾狼食嘅故事，佢地扮聲扮得唯妙唯肖架，不過對於咁細嘅bb，其實真係唔係好啱囉，朋友仔個b一坐埋去無耐已經驚驚，Ambrose就坐坐吓都唔肯撲去我度，我地又走番出去室外遊樂埸玩喇！
我由Ambrose自己行去玩佢想玩嘅野，佢大部份時間都去左玩三隻搖搖板嘅大玩具，行左去又走番去！見有條蟲蟲隧道，佢都有幾次走埋去裝入面有咩咁，不過就無爬，唔知係咪佢覺得唔係可以爬嘅地呢，佢都有好多次想跌想跌而去盡力定住唔跌！不過好彩佢無爬，唔係真係有排同佢抺手抺腳喇！加上佢又著左短褲，地下果d墊又好“鞋”咁，都唔知會唔會擦損架麻！
總括黎講，呢度唔係好似我想像中咁大，個戶外遊樂場都好鬼曬，都唔緊要，我覺得有戶內遊樂場都緊要囉，呢度又唔覺有！再者又覺得佢唔係想像中乾淨咁，可能始終我地大部份時間在室外玩啦，其他野又好似睇唔到d咩咁！同埋佢套校服，一d都唔smart又唔cute囉！哈哈！唔知其他學校係咪都係咁上下嘅呢？定我要求高呢？暫時黎講，呢度嘅好都重係英文囉！其他野又唔係覺得好好又或者好差囉！
