唔知幾時買野送左呢包Ultra Facial Moisturizer SPF 15嘅sample，見之前用同牌子防曬50度都幾好用，加上做完treatment治療師係咁提我記得要搽防曬，咁諗住平日返工都唔使搽50度啦，所以咪開左呢包15度防曬試吓囉！
好想講，呢隻野唔好用！！！唔知係咪for冬天用嘅呢？我呢d乾人都頂唔順呀！搽完落街只係搭左一個鐘頭巴士，落車一陣就覺得點解塊面立痴痴，一時都醒唔起原來搽左呢隻防曬，重以為天氣真係好焗攪到乾人都出油！返到公司坐左一陣，成塊面好焗，好似有野gel實塊面咁，有冷氣都咁油？莫明奇妙之際至醒起用左呢包sample，十成十係佢出事啦！
焗左一日，返屋企用洗面奶洗面，終於都舒服番哂！呢包sample，即時俾我掉左，無得留低！
今堂整熊貓！睇落完全係手工畫，無油顏色，都幾得意丫！熊貓係用碟整，眼耳口鼻都 應該係 老師整好左俾小朋友痴架喇！背景嘅綠色紙，老師話淺色係佢搣，深色係Ambrose自己搣，但老師都係話Ambrose未識搣紙！睇番其他人嘅熊貓，都係Ambrose整得靚d，係個身（即兩隻碟）可以拉開少少咁隻熊貓可以高身d，而家都好cute嘅！其他同學仔嘅熊貓，有d手腳同個身都係一堆野，所以話Ambrose呢隻算好！哈哈！不過論背景，Ambrose呢張寡左d，深綠色紙又唔多，其他同學仔，似乎背景整得豐富d！
媽咪去接放學，見老師用雙面膠紙幫小朋友貼埋撕埋個底紙，感覺唔好！其實係咪應該用膠水呢？用雙面膠紙都唔緊要，應該俾佢地自己搣底紙囉！唔知係咪因為就落堂所以趕d，要用雙面膠紙speed up呢？放左學入房影相，見Ambrose果張勁多膠水未乾，咁似乎真係唔係一直用雙面膠紙嘅！
Ambrose由bb開始，搽pat pat都係用呢隻玫瑰花蕾霜。次次打開佢條片，pat pat紅紅地，只要用水清潔完用佢黎搽pat pat，到下次換片時，之前嘅紅都會退哂，pat pat靚靚，真係好好用！呢隻叫萬用玫瑰花蕾霜，所以有時Ambrose有d咩蚊釘或敏感出粒粒，甚至乎損左流血面仔爆拆，總之有d咩都係搽呢隻玫瑰花蕾霜先，好使好用，連嫲嫲同埋朝早湊Ambrose嘅姨姨都對呢隻玫瑰花蕾霜讚口不絕！
直至而家Ambrose兩歲幾就黎三歲，唔知用左幾多盒喇，都仍然用緊！唔係好多地方有得買，而且有都唔係平。不過呢隻玫瑰花蕾霜耐唔時都同某本雜誌攪promotion，剪印花去7-11或OK以特惠價買，平好多。優惠期間，其實去壹蘋果店買，係完全唔需要印花就買到，所以媽咪每每等到家中存貨開左最後一盒嘅時候，就會耐唔時Lunch走去睇吓有無得賣！
今日好好彩俾媽咪見到有，嘻嘻，即刻補番一盒貨！返屋企問埋班朋友仔，下星期再去買同牌子另一隻萬用薄荷花蕾霜，呢隻有薄荷成份，對蚊釘痕癢，太陽灼傷、暈船浪同埋傷風感冒引起之鼻塞都有舒緩作用。夏天又黎喇，買定一盒傍身先得！
三角形嘅glue sticks
平時用果隻
一直都想同Ambrose戒奶咀，雖然佢都只係响屋企瞓覺先會用到。但媽咪發覺佢對個奶咀都幾痴戀，半夜有時會喊住搵奶咀，一瞓醒又搵奶咀，甚至乎反而係瞓醒出廳玩都要食奶咀，就算唔食，都一定要揸住過手癮咁，媽咪見到佢咁迷戀個奶咀，真係無咩信心可以戒到。又覺得Ambrose瞓前已經唔飲奶，又有刷牙，咁戒唔戒奶咀又好似唔係好緊急嘅事，所以一直都無實際行動！
三月二十九日，爹爹同Ambrose瞓晏覺，爹爹話大個仔唔食奶咀喇，就係咁開始左戒奶咀嘅日子。原本以為Ambrose戒奶咀會好難，重諗住佢會好似d人吸毒咁又扭又喊好多日先攪得掂。點知，又估唔到好順利喎！無扭無喊，只係頭幾次瞓覺會不停口同大人講話要咀咀，呢頭講完大個仔唔要咀咀，佢話好，轉頭第一句就話要咀咀，超攪笑！雖然如此，Ambrose無大叫大喊大扭過喎，好平靜咁問左幾日攞咀之後，已經無再問過喇！
諗都無諗過戒奶咀原來可以咁簡單，早知就早d戒左佢，唔使媽咪耐唔時要去買奶咀替換舊果d啦！睇落好順利，好簡單，但媽咪開始覺得Ambrose有d野唔同左！自從佢戒左奶咀之後，耐唔時都會見佢擺隻手入口，佢之前已經無擺手入口嘅表現架啦，無啦啦又食番手，真係唔知係因為戒左奶咀要搵野寄托，定咁啱佢吽大牙，媽咪睇唔到？
另外，最唔同嘅係Ambrose痴多左爹爹！本身佢已經係勁痴爹爹架喇，自從戒左奶咀之後，佢一起身會問爹爹响邊度，同佢講爹爹返左工，佢又唔信，要行哂成間屋至信，有時佢重會因為見唔到爹爹喊！同爹爹講，Ambrose似乎將對奶咀嘅迷戀轉移左去佢身上，佢又話唔覺！梗係啦，平時Ambrose已經好痴佢，痴多左同痴多左好多，可能對於爹爹黎講已經無咩分別！但對於自己個仔唔痴自己嘅媽咪黎講，係幾明顯！除左起身會搵爹爹之外，Ambrose重變本加厲咁萬事非要爹爹不可！以前可能氹吓佢都可能跟吓其他人，戒左奶咀之後，Ambrose有時重會講，要爹爹唔要媽咪，咁大打擊，媽咪梗係覺啦！
唉！真係唔明點解Ambrose咁鍾意爹爹，而家已經戒左奶咀返唔到轉頭，咁可以點呢？
去埋旅行後，Ambrose同爹爹就更加難捨難離，媽咪可以點呢？唔通要爹爹唔好成日同佢玩至得？！
唔知係咪呢個四月實在太多假期嘅關係，Ambrose唔使點返學，日日係咁玩，無日留响屋企！加上本身已經有好多時間陪佢嘅爹爹又會在平日放學瞓醒覺之後同佢去樓下玩，再加埋專登請假去嘅旅行，呢個四月，Ambrose返學嘅日子唔知有幾多日，玩到個心都野哂！
而家佢一起身就會問大人“我地去邊度玩呀？”真係服左佢！
去完旅行返黎，可能日對夜對表姐幾日，又成日話搵表姐，搵姑丈！
再慘嘅係，平時唔會扭唔返學嘅Ambrose，竟然唔願返學，一話返學就話唔想返，要放假！
呢兩日佢自己無啦啦同媽咪講，話佢响學校喊，問佢做咩野，佢話佢搵爹爹！媽咪都半信半疑，信係因為Ambrose已經可以表達到少少學校嘅野，疑係因為以Ambrose過往穩定個性，媽咪唔係好信佢會喊！
不過爹爹已經問過老師，Ambrose真係响學校無原無故喊住搵爹爹！爺爺亦都話送Ambrose返學去到門口唔願入，同埋喊！
諗番起成個旅行，好鍾意爹爹嘅Ambrose只要有爹爹响度，咩人都埋唔到身，媽咪都唔例外！其實媽咪都習慣左架喇，不過難得去旅行，當然想有多d親子時間啦，唔肯拖唔肯抱，至少一齊行一齊玩都好丫！好可惜，媽咪成日都俾表姐拖住，呢個表姐去邊度做咩野都要拖住媽咪，攪到媽咪完全無時間接近Ambrose！原本應該係親子之旅，就變成左爹爹同Ambrose自己親子之旅，所以去完旅行之後返學搵爹爹，真係唔出奇！！！
唉！！！我呢個媽咪完全無地位架喇！
睇奇摩天氣話高雄墾丁都落雨，所以一直都諗住唔買防曬喇，買左平日又懶用，不過最後都唔放心，買定for暑假室外活動都要嘅，所以不買不買還是買了。好彩，真係好彩，買左真係用得著！
之前買嘅時侯只係試上手，見質地唔厚就買，咩comment都無睇過，算係冒險！不過旅行日日都用呢隻防曬，易搽易推，搽完唔會白雪雪油立立，真係唔錯！我勁懶，通常出左門上車至搽，不過都幾豪，用埋佢黎搽手腳，哈哈！出左成日街，又出汗又玩水，又懶到唔補搽，但以墾丁咁鬼曬嘅天氣黎講，咁樣求其搽都無曬黑，呢枝防曬真係唔錯！哈哈！夜晚沖涼時又唔使特登用卸妝液洗，都係普通洗面膏洗完就算，個身果d只係普通沖涼液沖左就算，洗完沖完，唔會好似其他牌子咁會啜手喎，證明應該真係就咁洗甩哂囉！感覺幾好！
係價錢貴d囉，如果係全身用嘅話！
老公全程無用防曬，一湊仔返學就俾各師奶話佢曬黑左，哈哈！
今日就要返香港喇，四日三夜行程真係好快過！
好彩民宿包早餐，今朝落樓食埋個早餐，响間屋前後影埋d相後，大約十點半左右，包車到達接我地去高雄機場。原本應該係約十點嘅，不過司機話要十點半，諗住大把時間，由佢囉！點知黎到接完我地，又走番去自己屋企車埋佢老公，由佢老公揸車去機場。都唔知有無攪錯，架車雖然係好大，可坐十至十二人左右，但因為無尾箱，放唔到行李，所以行李都要放在椅上，霸左部份位，重要司機兩公婆坐埋車頭，爹爹同姑丈就被迫同行李坐，媽咪就坐得唔迫嘅，不過可以一齊坐就最好囉！
個司機好cool，無講過野，不過都無野嘅，反正小朋友都要瞓覺！成日話唔瞓覺嘅Ambrose次次上車無耐就暈吓暈吓瞓著覺，今次都唔例外。因為坐車尾，好震盪，媽咪唯有將Ambrose打橫俾佢瞓在媽咪大脾上，費時佢頭chok chok又震會整親！個司機好似完全唔會理有小朋友，揸鬼死咁快！行行吓去到油站又話要休息五分鐘，全車人除左佢要落車去廁所買野食同食煙之外，都無人要落車，呢個break其實係佢自己要多d囉，佢知唔知自己阻住我地d時間架？！重要佢落左車食煙，媽咪見到佢原來只係踢住對人字拖，有無攪錯，成兩個鐘頭車程，接人家一家八口有大有細，佢竟然就咁踢住人字拖黎揸車！！！到左機場都無話幫手攞行李，全程就成個大男人咁要個老婆响隔離針茶遞水抺手指，Shit！！！
機場check-in左擺低行李，其實都唔係有好多時間淨，大概四十分鐘左右就要去閘口。响附近見一間餐廳，用埋身上嘅現金食埋餐午飯，真係啱啱好！
食完野行去閘口，班機原來未到，要delay！唉！又要等！
好彩，等多左半個鐘左右就可以上機，算係咁啦！唔知點解，去程唔使一個鐘，但回程竟然要一個鐘頭三個字，點解呢？呢程機都係唔多人，幾舒服！天氣又ok，比起去程嘅顛簸，呢程真係平穩好多！
落左機，順便去埋Asia Miles嘅counter攪埋redeem下年沖繩嘅機票！原本諗住同姑仔一家再去，今次就一行七人！點知攪左好耐先知，同一班機唔可以多過五個redeem嘅機位，左度右度，攪左一個鐘頭，都攪唔成！Redeem五張再散買兩張機票，似乎唔多抵，因為一張要四千幾蚊！其實媽咪覺得，要就黎就去，咁不如自己去好過啦，唔使煩！
攪完一大餐，已經夠鐘頭可以去潮樓食“一蚊雞”喇！
今日八點幾起身，Ambrose都係飲盒裝奶，完全無話要沖奶奶，叻仔！不過佢飲盒裝奶就真係好慢，飲左好耐都未飲完，到我地落樓下食早餐都攞埋去飲，原來用樽飲真係可以飲得又快又多，怪唔知得姑娘話要戒奶樽啦！
民宿包早餐其實幾方便，俾著係以前二人世界嘅時候一定瞓到起唔到身食，有個細路就一定起到身，而且Ambrose已經大到可以食街外野，包埋早餐食左至出發確實方便好多！民宿主人好有心思，安排矮檯同埋動物造型小椅子俾我地，小朋友坐得好開心，又啱高度，讚！
今日行程係去海生館，爹爹話海生館有個水池，小朋友可去玩水！一入到海生館，就有一個水池同一條假嘅大鯨魚，爹爹話呢度只有假鯨，其實有少少失望架！不過即使如此都不減Ambrose嘅開心情度嘅！佢一見到條假鯨就跑去用超人死光去“招”佢，笑死人！
再行入d就見到爹爹講嘅嬉水池，入面都有好大嘅假鯨！成個池無人玩水，爹爹有d失望，再加上明明尋日熱到死，今日打算黎玩水先黎陰天，重要好大風，真係天公不造美！猶豫緊俾唔俾小朋友去玩水，姑姐已經拖住小朋友去水池，諗住試吓水溫。凍，d水幾凍吓，如果天氣熱玩就一流，不過天陰有風，對小朋友黎講係凍左d囉！但三隻小魔怪一掂到水之後開始放肆喇，基本上係一發不可收拾，想叫佢地落返黎唔玩都唔得！大表姐最顛啦，係咁撥水，連媽咪揸住相機响岸邊影佢地都俾佢潑到個身濕哂！好彩相機無事咋！
玩左一陣，大表姐一下唔小心成個人滑左落水度，水唔深，人當然無事，不過佢成條褲濕透哂！玩到濕哂之後，佢開始豁出去，玩得重顛重放肆！反觀Ambrose，好明顯佢唔多想自己濕哂，所以佢都幾小心，重要每次面有少少濕，佢都要走一走落黎又再爬上去玩，見佢行黎行去個樣，好似好忙咁，真係幾攪笑！不過Ambrose玩多一陣之後都失守，條褲濕哂，哈哈！
三個小魔怪掛住玩水咩都唔理，難為岸上嘅我地，驚佢地凍親。同埋最主要係無諗過會玩到咁樣，面衫底衫底褲都濕透，雖然有攞定替換衫褲，但就要急急去買毛巾同佢地抺身換衫囉！
換左衫，入去行館，有d館係有真嘅海洋動物，而有d館只係有電腦做出黎嘅海洋動物嘅動畫睇，相比香港嘅海洋公園，好多都係真野，媽咪覺得海洋公園好睇d！不過海生館有白鯨睇，媽咪未見過，都算特別！但Ambrose對於白鯨完全無興趣，係咁話要出番去睇街果條黑鯨，俾佢激死！
行完d館出番去睇黑鯨，呢個時候成個池都係小朋友玩緊水，好開心！重要出猛太陽！三隻小魔怪又話要再玩多一次，好可惜，我地只係帶左一套衫黎，再玩就無衫換喇，Ambrose就話有帶泳衣，如果要玩都可換衫去玩多次嘅，但兩個表姐無帶，都係快快走人，費時夜長夢多！
出左海生館，打算到後壁湖食輝哥魚生，但三隻小魔怪可能玩完水勁攰，上左車後就瞓哂覺，爹爹同姑丈停左車之後諗住去探路，ok至叫醒班小魔怪。點知佢地去完返黎話行好遠，都唔緊要，最重要係可能撞正星期六，又係午飯時間，已經有好多人响度排隊。原本佢地諗住反正有車，咁小魔怪唔使行黎行去，佢地買外賣過黎响車食都得，等佢地可以瞓多一陣，但好可惜，唔俾外賣喎！
無野食，唯有走人，唯一得著係睇左d風車，哈哈！
再過佳樂水食野，點知咁樣入一入去都要俾錢，都唔明點解度度都要係咁易收費？！無法啦，全部人都未食野，點都要俾錢入去架啦！入到去，人影都無隻，當然啦，未見官先打三十，係人都唔會入黎食囉！不過無人有無人好嘅，起碼我地有老人家又有細路，如果多人要等位搵位都幾煩！
是但搵左一間最近嘅店舖就坐低叫野食喇！呢餐好豐富，叫左即開海膽、魚生片、小龍蝦、枇杷蝦等，好鮮味！食完野，影左相，都無行入去，出發去茶山吊橋！
一出去就行錯左路，哈哈！不過好彩好快就已經兜番條啱嘅路！條吊橋，又係要收費嘅，都唔知有無攪錯！不過一場黎到，唔會唔行啦！
行完吊橋，都係時侯回程喇，因為今晚要還車，諗住早少少返去打點休息吓，再响墾丁大街搵野食！回程途中唔覺意講起身上嘅錢，由於成個trip都係同姑丈一家一齊唱錢，由兩個男人袋大數，媽咪同姑姐有少少錢扎吓袋以防萬一，所以大家對對方有幾多錢就唔太在意。唔講尤至可，一講就大件事，原來大家食完餐海鮮餐後身上加埋嘅錢所淨無幾，租車未找數，扣埋之後d錢等於港幣六百蚊左右，夜晚餐飯都要慳住食呀！點解唔再唱錢？因為要去恆春果邊唱，都幾遠吓，同埋，星期六日係無得唱錢架！
返民宿安頓左之後數吓錢，真係無數錯，真係無錢喇！懷住既失落又不安嘅心情去還車，點知又話唔知整唔見車入面一個咩架，搵勻全車都無，咁點算？賠錢囉！已經無錢架啦，重要賠左五百台幣，其實唔係多，不過响非常時期，真係好傷囉！身上無錢嘅感覺真係無咩安全感，既緊張又擔心，真係無哂心情！求其搵左間餐廳坐低食野，炒飯都唔敢叫，叫餸同白飯就算！雖然又唔係慘到無得食，不過感覺上真係幾慘情！呢個姑丈重要响咁無錢嘅時候重堅持要買台式飲品，同埋水果，究竟佢知唔知道用哂d錢，明天唔知點過架？真係俾佢激到彈起！
是日重要係大表姐生日，好彩午餐都叫食左海鮮餐啫！成個墾丁都無西式蛋糕買，小朋友生日都都要切吓蛋糕，所以用左僅餘嘅錢去左便利店買左兩條蛋卷返民宿慶祝吓！
今日去完街返民宿，見原來都有人執房，張床又整齊番，所以今晚都係決定對掉間房瞓，今晚Ambrose可以住龜龜房喇，佢都不知幾開心，係咁攞d龜龜公仔玩，同佢地除龜殼，話同佢地沖涼，哈哈哈！
慶祝完生日，係時候又出動去街喇！嫲嫲唔想架，話又出街！不過去旅行就係咁架啦，唔行吓不如返屋企啦！更何況媽咪之前已經錯過左康是美，尋晚又諗住去屈記買野又無去到，今晚一定要去！一出門口就落雨，好彩唔大，係入左屈記之後就傾盤大雨，重好，可以慢慢行！其實target係買Dr Wu產品，屈記產品當然比康是美少架喇，不過有都好過無啦！身上無錢，先要confirm係咪收visa，好彩都收，唔係真係要打道回府喇！
响屈記買左枝jumbo size嘅Dr Wu洗面gel，花王嘅身面防曬，台灣品牌嘅走珠防蚊液、爹爹指定要嘅撒龍巴斯止痛貼同埋補購多枝Ambrose嘅特價Sun Play，咁就已經二千台幣多d，無啦啦送左盒茶杯連碟，見到就頭痛！原來屈記做sales，買滿二千送二百coupon，問左sales可即時用，兼且唔使買夠幾多錢就用得，即係錢黎嘅，好正！即時再買多枝花王面部防曬，補多59台幣，真係好鬼抵！
買完野，雨又停左，即刻返民宿，要執行李喇！
唔記得左講85大樓民宿添！其實幢大樓都幾攪笑，一邊係寫字樓，另一邊係住人！樓下大堂要匙拍入，保安都ok，每層都再要用門匙拍入，如果唔係住果層拍匙係入唔到嘅，所以今次我地分左兩層住，幾麻煩吓！因為check in時太趕，本來我地係住綿羊房，但最後就俾表姐住左！另一間時尚少少，有公主同心心公仔嘅，係就係大間d，不過媽咪都係鍾意綿羊房多d囉！不過其實間房幾大，個窗又大又望得遠，好舒服！五百幾蚊一晚重包埋早餐，真係超值！
今日day 2，嫲嫲睇錯時間，明明只係六點幾佢以為八點幾，叫醒哂我地先知原來好早，大家齊齊再瞓番！不過六點幾嘅高雄都已經好鬼光，唔似六點幾咁早！八點鬆d起身梳洗換衫去食早餐，Ambrose好乖，之前同佢講左去旅行唔用奶樽開奶飲，就咁飲紙包奶，佢又真係無扭要沖奶飲喎，所以媽咪就咁開包保利牛奶俾佢飲，之後就落去食早餐喇！
包車去墾丁約左十點鐘，實際攪得呢樣果樣出發時已經係十點三、四個字喇！車程要兩個鐘，Ambrose之前又係成日講住唔要坐綠色架福仕，但唔要唔要都係要坐架啦！
十二點幾去到墾丁牧場旅棧check in，不過未執好房，所以我地放低行李就行出大街搵野食。中午嘅大街唔係幾熱鬧，無咩特別，好多都唔知有無開門，因為間間都唔開燈，好奇怪！同埋成條街間間舖都係賣泳衣、拖鞋之類嘅野，媽咪心諗，又話好熱鬧好多野行嘅？！
食完野返民宿攞房，一間三人房主題係龜龜，另一間四人房主題係牛牛，兩間打對面，兩度門只不過係幾尺之遙，好方便！原本plan左去到墾丁自己一家三口瞓龜龜房，姑仔一家同嫲嫲住牛牛房，點知個大表姐一去到就走勻哂兩間房睇，睇完就話要住龜龜房，死都唔肯住牛牛房！今次真係激死媽咪，因為一早已經plan好左架麻，有咩理由俾個小朋友咁樣揀架，咁霸道！原本媽咪諗住算啦，住四人房重大d，其實主題係咩都無所謂，不過回頭一諗，我地一家三口住左四人房，人地一家四口重要加埋嫲嫲就住三人房，好似講唔過去喎，咁咪即係又要我地同嫲嫲一齊同一間房囉，咁梗係唔得啦！爹爹已經好醒目咁走去勸表姐同姑姐話佢地唔夠位瞓，又迫，點知表姐死都唔肯，姑姐又話唔緊要！咩唔緊要呀，你唔怕迫係你嘅事，咁無理由又係我地同嫲嫲一間房架麻！嬲到媽咪死死吓！撇除同唔同嫲嫲一齊瞓呢個問題唔講，媽咪真係唔明點解可以縱容一個小朋友咁霸道，點解佢一句要就要遷就佢呢？Ambrose都好鍾意呢間房架喎，而且一早已經講左龜龜房係我地架啦！結果媽咪同爹爹講好唔開心啦，平日已經同嫲嫲住架喇，去旅行都已經一齊去，而家重又要同一間房，重要個理由只不過係個小朋友霸左，唔係其他d咩實際更有說服力嘅理由喎，唔嬲就假啦！
最後，爹爹同姑丈傾過，答應左第二日大家對掉間房，但呢個方法，其實都平息唔到媽咪嘅怒火同失望！大佬，掉房咪又係搵著媽咪黎攪，d野又唔可以太放肆咁攞哂出黎，又要執多一次個喼，咁麻煩！重有就係d被舖，suppose人地都唔會同你換過架麻！
嬲嬲地，媽咪自己關埋房門執野，爹爹就同姑丈出去攞車（租左架Wish响墾丁自駕），謝絕任何人再入黎刺激媽咪！媽咪思前想後，又覺得自己好似好小氣咁，但呢啖氣又真係好難下，係人都知媽咪嬲架喇，咁點丫，算，知咪知囉，媽咪都費時扮開心呀！
爹爹攞左車返黎，大家又再出發周圍遊覽喇！不過爹爹同媽咪講，原來頭先攞車佢都有揸過，但因為呢度係左軑車嘅關係，佢唔慣，差d撞左人架車，所以佢都係俾姑丈揸喎！真係好危險呀！
第一站係去墾丁牧場，不過人影都唔多個，入到去只係見到草地，咩動物都唔見，有d懷疑呢度係咪真係牧場，兜左個圈，見真係無人又無動物，都係唔好浪費時間喇，即走！
第二站船石，好彩唔太多人，影相都幾靚！Ambrose又好鍾意行果d石，係咁拖住媽咪越行越遠，要爹爹追出黎叫返我地走人！
第三站係鵝巒鼻公園，估唔到咁嘅公園都要收入場費！個公園有好大嘅草地，好靚，不過好痕囉，有野咬！上左去睇埋個燈塔，本來想話食少少野至走，不過真係好多野“嬲”住好痕咁，唔可以停留喇，到此一遊就算，走人！
本來第四站係去最南點，都已經泊埋車架喇，但泊好車先知要行入去最南點要行800米，行入去再行出黎即係要1600米，嫲嫲唔行，但同小朋友咁行入去加埋就唔止1600米 架喇！但都決定行啦，一場黎到！點知落車時有幾個大陸人走埋黎問我地架車，我地已經講左架車係租返黎，佢地都一味係咁問d性能，我地唔理佢地諗住開始行架喇，點知佢地又唔走，一直都蹲响我地架車車頭附近，攪到嫲嫲叫住我地唔好走左留低佢一個人！但問題嫲嫲一定行唔到，班男人唔走我地又唔可以行開，咁點呢？响車外行黎行去又等吓d小朋友去廁所，班男人一直都蹲响度無走過！車外又勁多蚊，原來廁所多蚊到根本去唔到，結果，就係因為果幾個大陸男人同埋果d揮之不去嘅蚊，我地都係放棄無去到最南點喇！
再之後就去左龍磐風景區，都係睇吓d風景，海同石。中途見到有d牛定羊嘅動物，又停左車去睇吓！見公路無車行，又响公路中間影吓相，都幾得意嘅！
睇完龍磐風景區，其實太陽已經開始落山，但都重好光！嫲嫲可能太攰，又話太陽落山，公路又無街燈，怕再揸車入得去黎出返黎會太黑。但以我地嘅判斷，應該唔會黑得咁快，所以唔理佢唔太高興喇，一場黎到，一定要去埋風吹沙！其實風吹沙真係好似佢個名咁囉，風吹到變左沙，成個崖壁都係沙，d沙重吹埋落條公路上面。姑丈同爹爹落車視察環境，返黎之後就話唔適合同小朋友去睇，決定走喎，咁媽咪無理由過門不入架麻，所以落車去睇！呢度真係一個懸崖黎架，同之前响龍磐區果d比，呢度真係危險少少，行出一步都會跌落去，不過景色真係好浩瀚同震撼，好彩堅持落車睇咋！
風吹沙之後，都差唔多要食飯喇，去左熊家萬巒豬腳度食，但似乎名過其實，d豬腳無咩特別，爹爹好失望！
食完野，係時候打道回府。途經一間叫“全家福”嘅鞋店，望入去好似都老老土土咁，但因為嫲嫲對拖鞋爛左，所以都停低車入去睇吓有無野啱啦！點知間野除左大人鞋重有小朋友鞋，幾個小朋友入到去就係咁搗亂，精神哂！佢地又攞呢對又攞果對黎試，又叫又笑又跳又跑，好鬼嘈！情況就好似我地响香港行行吓街撞正班自由行黎掃貨，大聲夾無準，乞鬼人憎咁，我地就好似果d自由行喇，超樣衰！兩個表姐都買到公主閃光鞋，姑姐姑丈都有揀到鞋，媽咪就無野啱，只係買襪。本來幫Ambrose試左對Birkenstock款式嘅Mickey涼鞋，但最細都17碼，好大對呀，唔要啦！但諗黎諗去，390台幣好抵丫，又係媽咪鍾意嘅Birkenstock款，又有Ambrose鍾意嘅Mickey，算啦，買定出年啦！連嫲嫲都買到件風褸，哈哈！响呢間“全家福”擾攘左成個鐘都有，買完野，真係要返民宿喇！
同Ambrose沖左涼，留低佢同表姐俾嫲嫲睇住，四個大人就出左去行墾丁大街！原來夜晚嘅墾丁大街真係好熱鬧，好多野食！不過媽咪對食就無咩心架喇，成日就想睇吓有咩野行有咩野買，好希望呢度有康是美，無都希望有間屈記，可以買吓護膚品丫！好彩，真係有間屈記，但媽咪諗住咁近就唔行住，行哂成條街先，就算day 3再去睇都唔遲。點知個姑丈真係一心出黎搵食，檔檔都停低買野食，悶死媽咪！大家target唔同，其實可以分開行囉！Anyway，一齊黎旅行，媽咪唔出聲，由佢啦，要補行都可以明天行嘅！反正都係得果一條大街咁多！
應承左兩個鐘內一定返去，都要守承諾嘅，始終睇住三個小朋友都好辛苦架喇，又行左成日！返到民宿，敲左門無人開門，重以為幾隻小魔怪同嫲嫲都瞓哂啦，點知過左一陣門打開左，幾個小朋友响哂被窩度眼碌碌望住我地，哈哈哈！
又係要整Ambrose瞓，又係沖埋涼摸黑上床，咩都唔執唔整就瞓左喇！
呀！同埋好想話，奇摩天氣真係信唔過，之前睇左高雄同墾丁，都係有雲會落雨，點知一滴都無落過，重要好鬼熱！
牛牛房
廁所都好靚
全部野都係乳牛
租左呢架車
船石
天氣好熱
鵝巒鼻公園
燈塔
大合照
Ambrose第一次飲椰青
Ambrose無野揸手
去旅行都俾人教訓
龍磐風景區
風吹沙