黑糖薑母茶

食蕃薯糖水唔鍾意食蕃薯只飲糖水，唔知有無人係咁，我就超鍾意，哈哈！薑茶，我不嬲都鍾意飲，不過要自己整，好難喇，所以無整過！曾經買過現成d即沖薑茶粉，不過沖出黎嘅味道，完全唔係果回事囉！成包野飲得果一次就擺响度！最近無意中見到原來台灣有出薑茶磚，一磚可以沖開一大杯黎飲，重有堅嘅薑皮薑肉架喎，網上comment好多人都話好正，好夠薑味！原本薑茶應該冬天好凍飲就至正，而家都就黎夏天，都無咩理由飲薑茶咁，不過除左夠薑味吸引我之外，呢隻黑糖薑母茶原來對手腳冰冷同月事期不適都有幫助，夏天無件外套响身邊都唔得嘅我見到當然蠢蠢欲動啦！check過要响台北買，月中會去墾丁停留一日高雄都應該買唔到架喇，行過大型超市都唔見有得賣，所以膽粗粗網上同人買左一包返黎試囉！

 

今晚即開左一磚黎試，包裝話用熱水沖泡或煲開都得，我梗係用熱水沖啦，方便丫麻！不過我見舊磚都幾大舊又硬掘掘咁款，怕佢唔易溶，所以搵左隻暖杯沖熱水焗一陣，一陣之後打開，成舊磚溶哂，超方便喎！聞落已經好有薑味，即刻飲一啖，yeah！就係呢隻味喇，I like it！好好味呀！好有薑味，夠辣呀！可能我不嬲都唔鍾意甜野，隻薑茶我跟指示用左500ml水開，我覺得都係甜左少少，下次可以開多少少水，又或者試吓將一舊茶磚分一半再酌量沖水，日頭飲左去，好過夜晚食完飯臨瞓至黎飲咁多水丫麻！