唔記得左講85大樓民宿添！其實幢大樓都幾攪笑，一邊係寫字樓，另一邊係住人！樓下大堂要匙拍入，保安都ok，每層都再要用門匙拍入，如果唔係住果層拍匙係入唔到嘅，所以今次我地分左兩層住，幾麻煩吓！因為check in時太趕，本來我地係住綿羊房，但最後就俾表姐住左！另一間時尚少少，有公主同心心公仔嘅，係就係大間d，不過媽咪都係鍾意綿羊房多d囉！不過其實間房幾大，個窗又大又望得遠，好舒服！五百幾蚊一晚重包埋早餐，真係超值！
今日day 2，嫲嫲睇錯時間，明明只係六點幾佢以為八點幾，叫醒哂我地先知原來好早，大家齊齊再瞓番！不過六點幾嘅高雄都已經好鬼光，唔似六點幾咁早！八點鬆d起身梳洗換衫去食早餐，Ambrose好乖，之前同佢講左去旅行唔用奶樽開奶飲，就咁飲紙包奶，佢又真係無扭要沖奶飲喎，所以媽咪就咁開包保利牛奶俾佢飲，之後就落去食早餐喇！
包車去墾丁約左十點鐘，實際攪得呢樣果樣出發時已經係十點三、四個字喇！車程要兩個鐘，Ambrose之前又係成日講住唔要坐綠色架福仕，但唔要唔要都係要坐架啦！
十二點幾去到墾丁牧場旅棧check in，不過未執好房，所以我地放低行李就行出大街搵野食。中午嘅大街唔係幾熱鬧，無咩特別，好多都唔知有無開門，因為間間都唔開燈，好奇怪！同埋成條街間間舖都係賣泳衣、拖鞋之類嘅野，媽咪心諗，又話好熱鬧好多野行嘅？！
食完野返民宿攞房，一間三人房主題係龜龜，另一間四人房主題係牛牛，兩間打對面，兩度門只不過係幾尺之遙，好方便！原本plan左去到墾丁自己一家三口瞓龜龜房，姑仔一家同嫲嫲住牛牛房，點知個大表姐一去到就走勻哂兩間房睇，睇完就話要住龜龜房，死都唔肯住牛牛房！今次真係激死媽咪，因為一早已經plan好左架麻，有咩理由俾個小朋友咁樣揀架，咁霸道！原本媽咪諗住算啦，住四人房重大d，其實主題係咩都無所謂，不過回頭一諗，我地一家三口住左四人房，人地一家四口重要加埋嫲嫲就住三人房，好似講唔過去喎，咁咪即係又要我地同嫲嫲一齊同一間房囉，咁梗係唔得啦！爹爹已經好醒目咁走去勸表姐同姑姐話佢地唔夠位瞓，又迫，點知表姐死都唔肯，姑姐又話唔緊要！咩唔緊要呀，你唔怕迫係你嘅事，咁無理由又係我地同嫲嫲一間房架麻！嬲到媽咪死死吓！撇除同唔同嫲嫲一齊瞓呢個問題唔講，媽咪真係唔明點解可以縱容一個小朋友咁霸道，點解佢一句要就要遷就佢呢？Ambrose都好鍾意呢間房架喎，而且一早已經講左龜龜房係我地架啦！結果媽咪同爹爹講好唔開心啦，平日已經同嫲嫲住架喇，去旅行都已經一齊去，而家重又要同一間房，重要個理由只不過係個小朋友霸左，唔係其他d咩實際更有說服力嘅理由喎，唔嬲就假啦！
最後，爹爹同姑丈傾過，答應左第二日大家對掉間房，但呢個方法，其實都平息唔到媽咪嘅怒火同失望！大佬，掉房咪又係搵著媽咪黎攪，d野又唔可以太放肆咁攞哂出黎，又要執多一次個喼，咁麻煩！重有就係d被舖，suppose人地都唔會同你換過架麻！
嬲嬲地，媽咪自己關埋房門執野，爹爹就同姑丈出去攞車（租左架Wish响墾丁自駕），謝絕任何人再入黎刺激媽咪！媽咪思前想後，又覺得自己好似好小氣咁，但呢啖氣又真係好難下，係人都知媽咪嬲架喇，咁點丫，算，知咪知囉，媽咪都費時扮開心呀！
爹爹攞左車返黎，大家又再出發周圍遊覽喇！不過爹爹同媽咪講，原來頭先攞車佢都有揸過，但因為呢度係左軑車嘅關係，佢唔慣，差d撞左人架車，所以佢都係俾姑丈揸喎！真係好危險呀！
第一站係去墾丁牧場，不過人影都唔多個，入到去只係見到草地，咩動物都唔見，有d懷疑呢度係咪真係牧場，兜左個圈，見真係無人又無動物，都係唔好浪費時間喇，即走！
第二站船石，好彩唔太多人，影相都幾靚！Ambrose又好鍾意行果d石，係咁拖住媽咪越行越遠，要爹爹追出黎叫返我地走人！
第三站係鵝巒鼻公園，估唔到咁嘅公園都要收入場費！個公園有好大嘅草地，好靚，不過好痕囉，有野咬！上左去睇埋個燈塔，本來想話食少少野至走，不過真係好多野“嬲”住好痕咁，唔可以停留喇，到此一遊就算，走人！
本來第四站係去最南點，都已經泊埋車架喇，但泊好車先知要行入去最南點要行800米，行入去再行出黎即係要1600米，嫲嫲唔行，但同小朋友咁行入去加埋就唔止1600米 架喇！但都決定行啦，一場黎到！點知落車時有幾個大陸人走埋黎問我地架車，我地已經講左架車係租返黎，佢地都一味係咁問d性能，我地唔理佢地諗住開始行架喇，點知佢地又唔走，一直都蹲响我地架車車頭附近，攪到嫲嫲叫住我地唔好走左留低佢一個人！但問題嫲嫲一定行唔到，班男人唔走我地又唔可以行開，咁點呢？响車外行黎行去又等吓d小朋友去廁所，班男人一直都蹲响度無走過！車外又勁多蚊，原來廁所多蚊到根本去唔到，結果，就係因為果幾個大陸男人同埋果d揮之不去嘅蚊，我地都係放棄無去到最南點喇！
再之後就去左龍磐風景區，都係睇吓d風景，海同石。中途見到有d牛定羊嘅動物，又停左車去睇吓！見公路無車行，又响公路中間影吓相，都幾得意嘅！
睇完龍磐風景區，其實太陽已經開始落山，但都重好光！嫲嫲可能太攰，又話太陽落山，公路又無街燈，怕再揸車入得去黎出返黎會太黑。但以我地嘅判斷，應該唔會黑得咁快，所以唔理佢唔太高興喇，一場黎到，一定要去埋風吹沙！其實風吹沙真係好似佢個名咁囉，風吹到變左沙，成個崖壁都係沙，d沙重吹埋落條公路上面。姑丈同爹爹落車視察環境，返黎之後就話唔適合同小朋友去睇，決定走喎，咁媽咪無理由過門不入架麻，所以落車去睇！呢度真係一個懸崖黎架，同之前响龍磐區果d比，呢度真係危險少少，行出一步都會跌落去，不過景色真係好浩瀚同震撼，好彩堅持落車睇咋！
風吹沙之後，都差唔多要食飯喇，去左熊家萬巒豬腳度食，但似乎名過其實，d豬腳無咩特別，爹爹好失望！
食完野，係時候打道回府。途經一間叫“全家福”嘅鞋店，望入去好似都老老土土咁，但因為嫲嫲對拖鞋爛左，所以都停低車入去睇吓有無野啱啦！點知間野除左大人鞋重有小朋友鞋，幾個小朋友入到去就係咁搗亂，精神哂！佢地又攞呢對又攞果對黎試，又叫又笑又跳又跑，好鬼嘈！情況就好似我地响香港行行吓街撞正班自由行黎掃貨，大聲夾無準，乞鬼人憎咁，我地就好似果d自由行喇，超樣衰！兩個表姐都買到公主閃光鞋，姑姐姑丈都有揀到鞋，媽咪就無野啱，只係買襪。本來幫Ambrose試左對Birkenstock款式嘅Mickey涼鞋，但最細都17碼，好大對呀，唔要啦！但諗黎諗去，390台幣好抵丫，又係媽咪鍾意嘅Birkenstock款，又有Ambrose鍾意嘅Mickey，算啦，買定出年啦！連嫲嫲都買到件風褸，哈哈！响呢間“全家福”擾攘左成個鐘都有，買完野，真係要返民宿喇！
同Ambrose沖左涼，留低佢同表姐俾嫲嫲睇住，四個大人就出左去行墾丁大街！原來夜晚嘅墾丁大街真係好熱鬧，好多野食！不過媽咪對食就無咩心架喇，成日就想睇吓有咩野行有咩野買，好希望呢度有康是美，無都希望有間屈記，可以買吓護膚品丫！好彩，真係有間屈記，但媽咪諗住咁近就唔行住，行哂成條街先，就算day 3再去睇都唔遲。點知個姑丈真係一心出黎搵食，檔檔都停低買野食，悶死媽咪！大家target唔同，其實可以分開行囉！Anyway，一齊黎旅行，媽咪唔出聲，由佢啦，要補行都可以明天行嘅！反正都係得果一條大街咁多！
應承左兩個鐘內一定返去，都要守承諾嘅，始終睇住三個小朋友都好辛苦架喇，又行左成日！返到民宿，敲左門無人開門，重以為幾隻小魔怪同嫲嫲都瞓哂啦，點知過左一陣門打開左，幾個小朋友响哂被窩度眼碌碌望住我地，哈哈哈！
又係要整Ambrose瞓，又係沖埋涼摸黑上床，咩都唔執唔整就瞓左喇！
呀！同埋好想話，奇摩天氣真係信唔過，之前睇左高雄同墾丁，都係有雲會落雨，點知一滴都無落過，重要好鬼熱！
牛牛房
廁所都好靚
全部野都係乳牛
租左呢架車
船石
天氣好熱
鵝巒鼻公園
燈塔
大合照
Ambrose第一次飲椰青
Ambrose無野揸手
去旅行都俾人教訓
龍磐風景區
風吹沙
沒有留言:
張貼留言