屯門半天遊 (2y7m)

因為爹爹返夜在家瞓覺嘅關係，今日上完畫班之後，媽咪就要同Ambrose搵地方去，費時阻住爹爹瞓啦！好彩，今日有埋姑姐同兩個表姐一齊，雖然兩個人湊三個小朋友係好攰，不過時間又真係易過好多喎！

 

上完畫班，就同三個小魔怪去開餐，順便同Ambrose買左個Thomas畫袋，以後都唔使揹住前畫室個招牌畫袋周圍行喇！本來姑姐提議去冒險樂園果個波波池玩，不過媽咪嫌貴啦，$40玩20分鐘，$80任玩，前者係平但玩得果一陣，小朋友邊夠架，後者任玩，但大人又可以支持得幾耐丫，咁樣set價錢，其實即係變相迫人俾$80咁！媽咪從來都對playhouse之類嘅玩意都麻麻地，覺得要俾幾十至百幾蚊去玩，真係幾貴！其實小朋友有得玩，去邊度都一樣開心架啦，即使係去屋企樓下嘅公園玩，都會好開心架，有無需要俾咁多選擇佢玩呢？更何況，Ambrose已經同兩個表姐一齊，唔係自己一個，三個小朋友一聚頭，即使只係一個lift lobby咁大地方佢地又跑又叫又笑，都一樣開心！所以媽咪對於收費嘅playroom真係有所保留！玩，其實又使咩咁花巧架？

 

唔去playroom玩，又諗唔到有咩好做！媽咪未去過爬蟲館，所以提議去睇吓！結果經過圖書館借廁所，諗諗吓既然已經入左黎，咁點解唔去睇吓書呢？就係咁，一行五人就去左睇書喇！不過星期日下午嘅圖書館真係好多人，搵個位坐都無咁濟，不過就唔使驚小朋友反斗嘈住人囉，因為已經幾熱鬧喇！講左好多本故事，媽咪終於忍唔住話走喇！

 

離開左圖書館就直接去爬蟲館，Ambrose應該之前去過，係媽咪一次都未去過啫！個館比想像中細，不過又比想像中多野睇，我地好好彩，見到條郁嘅鱷魚，哈哈！行左一陣，姑丈就叫左我地去黃金玩彈床。如果平時嘅話，其實都可以去完爬蟲館再去附近公園玩，都幾方便！

 

去到黃金，有兩個大型彈床，一個係又高又直嘅滑梯，另一個係鱷魚入口嘅普通彈床，入面重有個小型滑梯添！望落就梗係鱷魚啱Ambrose玩啦，同埋直滑梯都有年齡限制，Ambrose同二表姐都玩唔到架喇！但大表姐想玩，就俾佢去玩左先啦！點知佢上到去，唔知係咪真係太高太直嘅關係，佢死都唔肯“sir”落黎，坐左响上面，笑死人！同一時間，鱷魚已經輪到Ambrose同二表姐喇，媽咪就同佢地除鞋玩啦！不過二表姐一早已經話唔玩，而Ambrose其實係想玩，但大人唔可以陪入，二表姐又唔肯玩，只得佢一個人又唔係好敢爬入去喎，結果都係要等埋响滑梯頂嘅大表姐落黎陪Ambrose入鱷魚玩喇！

 

已經叫左大表姐好好照顧Ambrose，點知個大表姐應左我地之後，一入去有得玩就咩都唔記得，攪到Ambrose响入面又話驚又話唔玩！好彩有條滑梯，媽咪氹Ambrose爬上去，幾經辛苦爬左上去嘅Ambrose，拖住大表姐一齊“sir”左落黎之後就即時愛上，又高高興興咁死命爬上去又“sir”落黎！八分鐘後，工作人員叫停，佢兩個重爬緊上滑梯，玩埋至肯走，哈哈！

 

彈床旁就係遊樂場，二表姐咩都無玩响度等左咁耐，點都要應酬吓佢嘅，所以玩完彈床，三個小魔怪又去左遊樂場玩！Ambrose好鬼叻，咩都走去爬，唔使人幫，其他人見到都嘖嘖稱奇！重要有條橋係無扶手，一行上去就會有少少搖晃，有d大過Ambrose嘅小朋友都要人扶住行，但Ambrose由爬上去到行橋都唔使人幫， d家長就猛咁讚佢，佢就更加得戚喇！

 

玩完遊樂場，去左沙灘果邊間餐廳食tea，再去姑姐家再玩過！咁樣玩法又一日喇！好彩無去俾錢玩波波池啦，今日除左食同搭車，玩果d全部都係免費架！