紅孩兒: 高雄墾丁之旅2012@Day 1

今日搭香港航空十二點十分嘅機去高雄，為左去機場嘅Traveler’s Lounge食免費早餐Buffet，又因為一行八人有大有細，所以雖然係中午先起飛，我地八點半就已經出發喇！

去到機場放下行李，真係好慶幸响網上攪左登機嘅野，咁就可以唔使排隊就寄到行李，好快！如果唔係就要排隔離果條蛇餅，都唔知要花上幾多時間喇！火速去左最近閘口嘅Traveler’s Lounge，搵吓位，食吓野，攪埋d小朋友食野，好快又話十一點幾喇！本來重諗住早d入黎食早餐同埋行街（因為爹爹在機場禁區買野部份有折），但原來食完早餐，一行八人拖拖拉拉之下，只係夠時間行左Coach就要去閘口喇！

去到513閘口，原來再要搭巴士先可以登機。由於天氣開始轉差，出面落雨，空姐派定即棄雨褸俾大家，爹爹覺得奇怪，上巴士應該唔會淋到，照計落巴士直接登機係無機會濕嘅，點解會派雨褸呢？等左一陣，夠鐘上巴士，原本以為Ambrose會好開心，不過似乎佢太過期待上飛機，等了又等，佢一見到又係上巴士，都有嘈住要搭飛機！巴士响停機坪度穿梭，直至見到有一架香港航空嘅飛機就停低左。原來今次登機唔同平時有條橋直接行入機倉，而係就咁有條樓梯行上去，爹爹話怪唔知得要派雨褸啦！媽咪覺得咁上飛機都幾得意，但原來爹爹話無錢嘅航空公司先會要客咁上飛機，佢之前check過應該唔係咁上喎！是但啦，咁咪重好，俾Ambrose見住架飛機上喎，國家領導人都係咁上落飛機之麻！

由於d人一窩蜂咁落車，我地一行八人都係留後慢慢至行，不過，突然間見到d人又响架飛機行番落黎，經過一輪擾攘之後，先至知道巴士司機車左我地去錯飛機，咁都有？！check左一輪，終於再開番車，去番我地真係要上嘅機度，爹爹媽咪都重講緊點解會車錯飛機，唔知d行李會唔會攪錯寄錯呢？

正式上機時天氣已經轉壞喇，又大風又落雨，雖然有派雨褸，但見只係幾步樓梯，都係費時又開又著喇，手抱Ambrose就咁上機就算！

原本去高雄嘅航程一個鐘都唔洗，但一上機settle down之後，機司宣佈控制塔話天氣差，所以會有起碼半個鐘嘅延誤，真係晴天霹靂！之前又唔延誤，上哂機扣好哂seat belt至話延誤，重要半個鐘咁多，真係唔知d細路會唔會發哂顛架麻！

講番呢架飛機，媽咪之前重諗住平機票嘅航空公司都無咩特別，點知上到飛機，又覺得佢嘅位都好濶落好舒服，比起之前搭國泰機好好多喎，而且位與位之間嘅手柄可以提起，對於湊小朋友真係方便好多，抵讚！之前老公book另一班機機位full左，所以book左呢班遲二十分鐘嘅，似乎都唔係壞事，因為成架機都係得三四十人坐，無咩人，我地八個人坐左三行三人位都無問題！

好好彩，講完delay都唔夠十分鐘，無啦啦又話可以起飛喇，實在太好！好快，真係好快，架飛機就開始滑行，之後，極快地，架飛機已經起飛左！唔知點解，媽咪硬係覺得點解平時要滑行咁耐至飛，今次真係極快，行左一陣就已經飛起左，好似好得人驚咁！不過呢d都未算，架機起飛左之後，成架機都係成斜上狀態咁飛左好耐，同埋平時就算有少少拋，都係幾下，好快就過去，又或者好輕微咁時而拋上拋落，今次好唔同，架機斜上之餘，重要時不時上下拋動，唔係輕微，係好大力，大力到媽咪都要用雙腳去踩住前座椅腳黎定住自己！開始幾下唔算大力拋動，Ambrose都已經驚驚地，後來有幾下好大力，拋到媽咪覺得好似坐緊海盜船咁有離心，Ambrose已經大叫好驚喇！最慘係起飛未可以解seat belt，坐位間嘅手柄唔可以提起住，攪到爹爹唔可以攬實Ambrose安撫佢。曾經有一刻，媽咪真係嚇到諗緊會唔會真係出事架，如果有下次都係唔好貪平坐平機喇！

過左起碼十五分鐘以上，終於有signal可以解除seat belt，望出機外，飛機已經穿過雲層，去左雲頂，天氣比起起飛時差好遠！由於成程機一個鐘都唔洗，重要seat belt未除得，d空姐唔可以派餐，所以一除得seat belt之後，d空姐好火速咁開始派野食野飲。不過一路派，盞seat belt燈一路都著，即係話又有氣流，大家都唔俾亂郁，空姐做野就無計啦，但乘客唔可以去廁所要留响位囉！好彩一個鐘啫，如果係長途而又成日都唔郁得就慘喇！要讚嘅係，雖然呢間係平價機票嘅航空公司，空姐個個都好有禮貌，經歷左十五至二十分鐘嘅戰鬥機模式飛行後，佢地都好有心咁過黎問候我地，安撫我地！見到d小朋友坐响度瞓著左，又主動去攞枕頭同被俾我地，好細心！據空姐所講，之前嘅大力搖晃，完全真係因為天氣好差，聽到之後，又對呢間航空公司有番d信心啦！

去到高雄機場，天氣好好，風和日麗！唔知點解成個機場無咩人，靜英英咁！原本約左包車公司有專車接我地去高雄85大樓，點知出到黎都無人黎接我地機。行前行後都唔覺有人似係黎接我地，照計佢地都應該知班機delay左架啦，唔通知道左之後等唔到又走左？咁點好呢？最原本個plan都係分兩批人去打的架喇，而家無車，咁似乎真係要分車打的啦！即刻去兌錢，諗諗吓又驚人地真係唔知係咪等我地，都係打個電話去問聲啦，點知一打去個司機話佢已經企左响我地後面，早唔出黎，累我地浪費左十蚊啦！

平時Ambrose成日提住福仕嘅車，今日黎接我地架車係福仕，不過係幾舊嘅九人車，舊就舊少少，不過好鬆動，坐咁多人同擺哂d行李都唔迫！Ambrose就唔多鍾意架車，係咁話唔搭呢架車，笑死人！

因為book民宿時已經幾full，最終雖然book到兩間房，但就唔同層數，為左唔好浪費時間响房度，我地將所有行李推左去一間房擺低，稍為執左隨身個袋d野就又出發去街喇！因為始終都成八個人，驚分車去目的地會走散左，所以同之前個司機傾好左價錢，包埋架車車我地去龍虎塔，再去新堀江！以防萬一，叫埋司機車我地去“台灣大哥大”出兩張電話咭先！

因為出黎時太趕，完全唔記得左攞相機，所以呢日嘅相都要痴姑丈相機影喇！龍虎塔其實無咩野行，最主要都係龍口入虎口出，保平安喎，因為無人會虎口入架，哈哈！黎到唔上塔好似又講唔過去咁，嫲嫲唔多行得，唯有搵左張椅佢坐等我地上塔睇吓風景先！一上就成五六層樓梯係咁轉住上，都幾辛苦架！上到去之後，地方好細，圍欄又矮，怕d小朋友唔覺意碌落樓梯又或擒圍欄，都係快快走人，影完相即走喇！

再行埋隔離個觀音像，都差唔多行左一個鐘，熱到死，都係去新堀江啦！

去到新堀江，其實都幾似旺角咁，好多舖仔街邊檔，不過一行八人，又大又細，想行都好似唔知點行好！另外，因為只帶左一架bb車，架bb車算大同穩，拆左個太陽檔放平之後都可坐兩個小朋友，但我地有三個！呢個時間，三個小朋友都攰，係咁嘈住要坐車，個個都無咩晏到覺，自不然又扭計又嘈交，沒完沒了！重邊有心機行丫！

之後二表姐話要去廁所，附近真係唔知有邊度可以去，唯有過對面嘅麥當奴，去埋廁所大家都抖吓再作打算！擺低左嫲嫲、bb車同行李响麥當奴，幾個人响附近行吓，算係輕鬆左少少！呢日响高雄應該係唯一一日可以shopping買野，所以媽咪一見到有野啱即買，因為無得再返黎架麻！响新堀江買左對390台幣嘅閃石涼鞋同四件打底背心！d背心真係超正，件件都有珠或石或lace，質地超得，媽咪去旅行前响香港買左一件類似都要港幣$130，呢幾件重靚過媽咪買果件，都係540台幣，圍起只係港幣$148咋！

見個個都好似塌哂皮咁，本來schedule左去六合夜市，爹爹話都係响呢度搵間餐廳食左就算！不過拖拖拉拉之下，嫲嫲又話照去啦，佢ok喎，咁就時打的去左！不過八個人去食野，真係好煩，尤其是有小朋友，我地只係去左一檔食炸魚湯，重諗住慢慢掃街，點知唔係唔啱小朋友食就係唔啱嫲嫲食，一係就好多人無咁多位俾你坐，總之再行再睇都好似好難搵到野食咁，重開始越黎越多人，唉！細路其實都肚餓，真係要速戰速決，所以最後大家分頭去買野食，全部攞走，之後打的返民宿開餐！响六合夜市期間，媽咪趁大家重食緊炸魚湯同水果時，走左入屈記睇野，好好彩重買左枝特價嘅kids sun play，香港mannings賣七八十蚊一枝，呢度只係159台幣，圍起只係港幣$44左右，超抵！

返到民宿食野，真係好可惜，d野食麻麻地，蚵仔煎好似好濕好水咁，嫲嫲話唔好食，都無人敢食喇！本來有買三枝栗米，點知買左燒果隻唔係水煮，d栗米乾哂好難食，細路仔都唔食俾番大人，有d食物一係辣一係太多味精好咸，魷魚又太“un”咬唔開，最後唯有開左自己帶去嘅迷你杯麵俾小朋友同嫲嫲食！

攪掂d小朋友食完餐晚飯，沖好涼，又聚埋一間房玩喇！Ambrose攞住個風筒係咁話係佢枝槍周圍“bom”人，笑鬼死！想話食完野即碌出去行sogo又或者康是美同誠品，好可惜settle左之後都成九點幾，sogo同誠品十點都關門啦，碌出去都話近唔近，話遠唔遠，出到去可能都關門行唔到喇！好失望，唯有落樓下七仔行吓買吓野食野飲啦！