空手道初體驗

唔知Ambrose响邊度學番黎，佢成日都响屋企打功夫、紮馬同出拳，又舞刀弄劍咁，都幾似模似樣架。Ambrose熱愛耍功夫，一見到朋友就會耍。有次行超級市場撞到朋友仔同爹爹一齊，朋友仔爹爹唔知，真係以為Ambrose學緊功夫，真係好笑！

 

其實媽咪都有諗過俾Ambrose學功夫，不過見絕大部份嘅功夫班都起碼要四歲先可以報，所以媽咪唯有等吓啦！未學功夫之前，咁咪去學跳吓舞先囉，等身體都柔軟少少，同埋又睇吓Ambrose有無興趣跳舞麻。男仔學跳舞係好少數，應該有著數嘅，哈哈！

 

Ellen姨姨好有心，知道有媽咪攪左個空手道試玩班就叫左媽咪去，雖然要出青衣咁遠，為左睇吓Ambrose有無興趣，媽咪都一於少理，即刻話要去！

 

今日出到去，Ambrose一入活動室就已經warm up哂，同d小朋友亂跑亂叫亂笑，好開心！到教練正式入黎開始上堂，Ambrose都一本正經，好專注咁跟教練做熱身，重要有d動作要打側身，Ambrose都要擰個頭望番教練點做，真係好專心！其他小朋友，有d就唔多郁，有d都跟住做，但有一部份就扭計唔肯上堂！爹爹媽咪一路睇住Ambrose做熱身，一路就覺得好好笑，因為佢有d動作真係做得好滑稽，又企唔穩，好攪笑！

 

呢堂試玩班一共係兩個鐘，由教練正式入黎開始到落堂，都起碼有成個幾鐘。黎嘅小朋友都算幾多，大概有二十幾個，但肯玩嘅可能只係得十幾個，到熱完身正式開始打同踢雞脾，果十幾個小朋友走走吓只係得番十個都無，哈哈，當然，Ambrose係由頭玩到尾果個啦！

 

最好笑係，Ambrose明明已經食左早餐去上堂，中間break果陣佢已經話好肚餓，到落堂嘅時侯己經係咁問攞野食。至斃媽咪都無預佢會咁肚餓，只係怕佢扭計帶左d零食例如藍莓乾同乳酪糖，完全無帶乾糧，攪到Ambrose係咁問其他姨姨攞野食充饑，媽咪真係無面喇！

 

後記：攪手媽咪事後同媽咪講番，話教練同佢講左有幾個小朋友有潛質，其中一個就係Ambrose。不過因為教練住港島區，要佢入屯門教媽咪諗都幾難，山長水又遠，時間車錢都蝕埋；但要媽咪帶Ambrose出咁遠學，媽咪又唔多想，大家都好辛苦啫！所以如果教練唔入黎，咁唯有都係等四歲先正式學啦，到時會多d班可以報，唔使專登出去咁遠學，就係為左佢兩歲幾去學囉！