唔知由幾時開始，Ambrose好興咩都要講“啦屎”，即係“last”咁解！俾野佢食，食哂佢又再問攞黎食，大人唔俾，佢一定會話“啦屎”！刷完牙漱口之後洗杯，係都要媽咪開個水喉俾佢，名義上洗杯洗手，實際上玩水，玩完關水喉，佢又會話“啦屎”，一定要洗多次！明明講好左講幾多個故事就好瞓覺喇，佢真係精，攞夠數嘅故事書入房應該左媽咪，但每本講完都話“啦屎”，要媽咪講多次，幾本故事書，前前後後加埋可能講左十個故事出黎都唔定！
呢排，Ambrose又有另一句金句，就係“呢個係我架噃，唔係你架噃”，笑唔笑死丫？明明枝原子筆係媽咪嘅，有次去飲茶無野安撫Ambrose坐定定，媽咪先至攞枝筆出黎俾佢畫吓野，點知早幾晚去食飯，媽咪攞枝筆出黎寫餸，佢就不停話“做咩事媽咪攞左我枝筆？”“呢個係我架噃，唔係你架噃”重有林林種種唔同情況，Ambrose咩野都覺得係佢架，成鬼日走黎講呢句金句，真係唔知好嬲定好笑！
唔知佢幾時學識做“yes sir”嘅動作，成日係咁做，做時又一齊講埋“yes sir”。近日，重學識埋“yes madam”，不過佢會食字，做動作嘅同時，只係會講“yes sir madam”！佢做個動作嘅時候，重要係扮cool樣，笑都唔笑，真係頂佢唔住！
重有，Ambrose好鍾意表演magic同功夫，最近佢重進展到要教媽咪，成日指指點點，又要媽咪“要好嬲”，又要某d動作一定要咁咁咁，媽咪做錯左就會話“唔係咁”，做啱左就話“係喇，係咁喇”，真係成個教官咁！
重有，唔明佢點解好鍾意講“包包”，完全諗唔到有咩意思，好多野都鍾意加個包包响尾度講，例如“媽媽包包”，自己講完都响度笑！
沉迷左“the wheels on the bus”呢首歌，成日係咁唱，咩都唱埋入首歌度，日唱夜唱，爹爹直頭話係魔笛，忍唔住叫過Ambrose唔好再唱得唔得！Ambrose有時更加會改歌詞，會無啦啦又中又英咁唱，好似“the lion on the bus goes跳舞舞”！
當然，佢平時果d“做咩事”同“點解”都繼續keep住講keep住問啦！
沒有留言:
張貼留言