減肥

成日恃住自己瘦底，食野唔戒口，唔做運動，生完Ambrose之後重要有段時間瘦過未生之前，就更加得寸進尺！個mindset重成日覺得自己係瘦架喇，唔使理咁多，鍾意食就食啦，即使係臨瞓之前都要食完至瞓，從來都未驚過自己會肥！終於，因為“漸”嘅關係，我真係肥左好多，重要自己都唔知道，直至二嫂新年前食飯以為我有左唔敢問，過年時驚見我跳跳紮，先知原來攪錯左；直至Cherry有日一臉認真咁問我，“舅母你個bb幾時出世呀”，真係令人傷心。童言無忌，我先至驚覺原來事態嚴重！再加上夏天將至，最近著番上季嘅衫，一著上後就驚現大肚腩，挺胸收腹都唔多掂，去買夏天tee，以前可以著XS或S，而家竟然要著M，先可將小肚腩隱藏少少！我咁大個女，做左幾十年人，諗都無諗過有一日竟然要買M碼tee，真係好大打擊！

 

其實肥左都有跡可尋，之前有段時間覺得自己肥左，都有嘗試做吓sit-up減吓，但由細到大都係零運動嘅我，可能年紀大左，再加多條士啤軑，想做sit-up都起唔到身，做果 一兩 下做唔掂就停，又自我安慰自己唔係肥丫，套用我媽咪嘅金句，係女人都有肚腩仔架啦，理直氣壯咁放棄自己，自暴自棄！直至冬天過去，夏天將至，扭吓自己條腰，嘩，d肉已經多到可以摺埋兩層，真係前所未有，恨錯難返，一次一次咁錯過左要action嘅時候，而家至發現咁鬼肥，真係唔知可以點算！

 

唔開心，真係好down！咁大個女都未試過條腰可以摺埋咁得人驚！老公話唔緊要啦！但自己點都過唔到自己囉！以前就聽過同事講，話老公話佢肚腩大過胸，我果時重覺得係笑料一則，而家先知原來真係可以咁架喎！

 

點算點算？最直接當然就係諗做運動啦，因為，食，我根本就唔食得多，加上我血糖真係可以好飄忽，一肚餓起上黎可以好突然，一餓就好餓，好似俾人關左總制無哂energy咁，好暈好似就死咁，節食對我黎講我諗唔太work囉！至多係唔食零食架咋，都應該幫唔到我減番已有嘅大肚腩啦！

 

運動，其實一直都想做運動架喇，唔係只係減肥原因嘅，都因為我嘅長期病患死都唔斷尾，歸根究底，可能做運動先可以幫到根治，所以一直都“想”做運動！不過“想”同“做”真係兩回事！屋苑會所無咩設施，只有泳池同球類運動場，游水我又唔多夠氣游，想游都唔游得耐，又未到夏天未開得住；球類運動場即係要孖住人一齊去打波，一來無球拍，二來要約埋人一齊去打波所要嘅恆心重要多d咁！至於離家步行約二十分鐘嘅運動場，其實都可以考慮，不過安排上又有難度！收工返到屋企都七點半，食左飯先嘅話又要等個幾兩個鐘至可以跑得步，試過之前隔太少時間去跑，一陣就肚痛！但到抖夠可以去跑喇，又到呀仔就瞓覺嘅時間，運動場都就關門啦！唔食飯去跑咩，跑完都要食飯，似乎重吸收，重易肥！重要就埋老公返早返夜要接力湊仔，都唔知點“必”d時間出黎做運動！

 

樓下本來有間Physical好方便，係做運動嘅好選擇，不過上次老公上過去試玩，都未玩任何野就已經俾人捉住sell左兩個鐘，呢個不愉快經歷又令我卻步！

 

在職母親似乎想做運動就只可以留番响屋企做喇，重要等個仔瞓左先得！跳繩係帶氧運動，本來都幾好，不過要等個仔瞓左至做得，都起碼係十一點啦，呢d時間至黎跳，唔俾樓下投訴都會嘈住同住嘅奶奶啦！唉！咁再數落去，都係得sit-up同呼拉圈！呼拉圈都還可以，但sit-up真係好難攪！

 

開始左呼拉圈加sit-up幾日，老公不斷督促我“做運動啦”，有時我都會有好多理由藉口推遲至做，不過佢都好堅持要我一有時間就做吓，幾吓都好喎，都啱嘅，唔係又好快無恆心架喇！佢就教埋個仔去督促我做運動，要Ambrose記得就提我做運動！前晚，當Ambrose悠然睇緊電視我做緊sit-up抖緊果陣，Ambrose無啦啦擰個頭黎一本正經同我講“你個肚腩咁大，你做運動啦”！都唔知好嬲定好笑！

 

呢兩朝，戒左朝早唔係好健康嘅早餐 – 燒賣粉果 / 餈飯加凍檸茶，取而代之係即熟麥皮，唔係想減到咁艱苦，而係想趁呢個機會戒左朝早果杯凍檸茶！中午果杯好難戒，不過起碼嘗試戒左一杯先！唔知我可以堅持幾耐！希望放完假番黎都重堅持到啦！