ELC收獲

去得Mega Box，媽咪一定要去ELC睇野，因為果度嘅Art & Craft貨品算係多，價錢平，而且有d貨品真係唔係出面常見架！至於玩具，果度都有好多唔同嘅選擇，尤其係細b啦，Ambrose大左，好多差唔多嘅玩具已經買左係少d選擇架喇，不過就算唔買，睇吓見識吓都係好！好似果張sand and water table，真係好正，可惜我地唔係住村屋，呢張table，真係次次睇見都覺得好好玩！

 

今日去到ELC，門口已經見到有d玩具做緊折呀，七折至半價不等，數量唔多！其實都好多係細b玩具，但媽咪見到盒Build It嘅玩具，自己動手砌機械人，好似都幾啱Ambrose咁，$150半價只係$75，都幾抵丫，所以諗住買喇！點知行到入去，再見到同系列有d大盒d嘅玩具，有d都做半價，其中媽咪見到有盒消防員架，不過見又係有制撳有聲，覺得唔好，費時Ambrose成日去撳嘈住哂，所以即使知道Ambrose一定鍾意都無買！最後媽咪見到呢盒，係砌人同車架，多d件數，又多少少變化，重有枝好似螺絲批嘅工具去扭螺絲，啱哂Ambrose鍾意咩都自己黎嘅性格啦，又係機械人同車，媽咪估Ambrose一定鍾意，呢盒原價$375，半價左$187.5。以媽咪角度，除左Lego，一份超過$150嘅玩具都叫貴架喇，平時都要諗過度過至買，念在佢原價都咁貴，又好似幾好玩咁，媽咪最終都忍唔住買埋喇，最多留到Ambrose生日至當係生日禮物送俾佢囉，哈哈！

 

另外，媽咪買左件手工衣俾Ambrose，好靚，紅色，上面重有唔同動物公仔架！其實Ambrose本身有件Crayola嘅手工衣，由佢十九個月著到而家近三歲，果條魔術貼好似開始無咁痴咁，而媽咪一直都鍾意手袖同衫連住嘅手工衣，但市面又全部係分開嘅，想買番Crayola連身果件都已經無出。所以當媽咪見到ELC呢件連身手工衣嘅時候，真係開心到暈！不過件手工衣係for 18 months or above，比起Crayola果件係短d細d同窄d囉！Crayola果件平時著都要摺袖，所以呢件就啱啱好，不過始終都短d窄d，都係而家著左佢先，Crayola果件留一留到佢再大d都重著到，當俾條魔術貼休養吓囉！

 

而家用AE咭响ELC買正價貨品重有八五折添，有效期去到四月三十日喎，抵呀！