復活節又點可以無復活蛋架？不過媽咪唔想買食得果d蛋，因為唔係糖就係朱古力，俾錢買d唔係好想Ambrose食落肚嘅野，只為應節？No Way啦！媽咪決定做復活蛋手工，一來可以應吓節，二來又可以做吓手工麻！
本來媽咪諗住要Ambrose一手一腳整隻蛋嘅，不過媽咪無整過，唔知要幾耐，所以都係由媽咪試整一隻先，睇吓難唔難至決定俾唔俾Ambrose做蛋模！材料有汽球、宣紙同埋漿糊。可能媽咪太貪心，諗住反正都係整，所以將個汽球吹大d做大蛋！點知原來紙塊唔可以太大，如果唔係易起摺，所以要細塊細塊咁舖上去，舖滿一層都幾花時間，媽咪足足花左兩個鐘至舖左兩層，見隻蛋好似濕漉漉同埋d紙貼得好皺，都唔知係咪咁，所以舖左兩層都係停手等佢乾左先算！
大蛋乾後似乎都唔錯，不過媽咪好衰唔衰又走去放左個汽球嘅氣，聽見果d紙同汽球分離時果d啪嚦聲，真係嚇鬼死媽咪！抽走左汽球，再用白膠漿封口，媽咪至發覺原來用白膠漿痴果度比用漿糊硬d架喎！
由於發覺整蛋模工序太長太繁複，呢個任務都係等媽咪做埋去啦！第二、三晚，媽咪整左兩隻細蛋，再轉用白膠漿痴紙，諗住會硬d，點知乾左之後都係一樣，太大力都係會撳凹隻蛋！重要如果唔係一次過痴宣紙，等隻蛋乾左先再想補多層嘅話，原來都唔係好work，隻蛋本身嘅紙會即時林哂，隻蛋會凹凹凸凸，唉，真係唔整過唔知！呢兩隻細蛋媽咪已經唔敢抽走汽球喇，留番個“訂”俾Ambrose油果時揸住好d，費時佢撳吓撳吓撳凹隻蛋啦！
成個復活節假都出左去玩咁濟，今晚爹爹返夜，媽咪見無咩野攪，就同Ambrose開始油復活蛋！佢都講左好耐話要油架喇，再唔油就過哂氣啦！
因為之前凍嘅關係，有好長時間都無玩過水彩喇，而家天氣唔凍，媽咪開番d水彩出黎俾Ambrose玩，佢都不知幾開心！跟出跟入幫手攞野同埋舖地，真係唔話得！以前Ambrose會好快將色碟果d顏色撈埋一齊，今次佢竟然無，做用左唔同顏色油落隻大蛋度，好colourful！不過到油細蛋時，就開始亂黎喇！呢三隻蛋，玩左一個鐘，但媽咪係要用三晚嘅時間去整隻蛋囉！值唔值呢？其實就麻麻地架咋，鬼叫市面果d發泡膠蛋細隻得黎又貴，同埋最重要係發泡膠上唔到水彩色囉！可能其實要用廣告彩先至“遮”到個底掛，但媽咪只有kid paints，無理由為左油蛋又買盒平時唔會用到嘅廣告彩啦！
下年真係要再諗吓點先可以整好d至得！好似話個底用報紙會夠硬，咁下次可能整左報紙再舖宣紙試吓啦，不過一定要記住唔好貪心，試整左細細隻先，得至整大隻d喇！
新手工衣剛剛好
自動波開始油顏色
好叻無將顏色溝埋
大蛋完成品
兩隻細蛋都完成喇
係都要畫車車上蛋度
大蛋乾左嘅蛋模
細蛋剛舖好兩層濕漉漉個樣
沒有留言:
張貼留言