今堂整復活蛋呀！
今堂爹爹終於都肯行開去食野，唔留响中心度等Ambrose放學。其實呢間中心真係幾安全，大門係電門，要負責人撳開先開到，對門又重，講真，小朋友真係唔易推門出到去，更何況小朋友都响課室內上堂，要出呢個大門之前，首先都要出左課室門先，一個老師對六個小朋友，好多時侯都未必返足六個，老師一眼關七都睇得住啦！真係出左黎，門口reception都有兩個姐姐睇實，走失機會幾乎係零！暫時重係得爹爹同媽咪去接放學，相當負責人都認得我地，唔會亂俾人接走，所以之前爹爹死都唔走，媽咪覺得佢係過份擔心！
今日早左黎到，等到夠鐘開始上堂，計埋Ambrose都係得兩個人，表姐遲到啦！見到Ambrose好快同老師混熟左，感覺都幾奇妙，原來Ambrose上堂時都好活躍架喎！之前上果個畫班，計埋試堂都上左五堂，比响度上多一堂，但媽咪都未見過Ambrose咁開心同主動，應該係話咁多野講，哈哈！媽咪覺得，可能呢度比起之前嘅畫班似上playgroup少少，有唱歌熱吓身，而且老師真係有心機，加上師生比例細少少，老師可以多少少時間照顧到小朋友，可能感覺就好好多，Ambrose鍾意d啦！
睇左一陣後，爹爹媽咪就走左去食早餐，再返黎嘅時候，就見到幅復活蛋畫喇！原本之前見老師有蛋形畫紙，重以為係就咁油顏色去decorate隻蛋，點知原來都係做一幅畫，都有少少意外！第一時間，媽咪見到背景果d撕紙撕得咁靚，忍唔住問Ambrose係咪佢撕嘅，點知老師聽到後就話係佢撕定俾小朋友自己排列去貼上畫上嘅，重以為Ambrose咁勁，撕到張張咁是正添！不過自己貼到咁整齊，都算好好架喇！就住復活蛋上面果隻Mickey頭，媽咪問Ambrose係咪老師同佢畫嘅？佢話唔係，係老師教佢畫架喎！咁即係邊個畫嘅呢？！
睇得出，有Mickey頭果隻蛋，應該係先畫左Mickey頭，Ambrose先至响外圍填色，打橫打斜咁想填滿d彎位，好攪笑！
沒有留言:
張貼留言