遊機場

上次同Ambrose入機場接爹爹放工，因為瞓晏覺關係遲左，成六點至出發，入到機場時已經天黑哂，諗住同Ambrose睇飛機都睇唔到！太黑啦，指俾Ambrose睇，一係就睇唔到勁問响邊度，一係睇到d燈同聽到飛機飛過嘅聲，超無癮啦！於是，媽咪一心諗住復活假期同Ambrose去多一次接爹爹收工，順便搭巴士睇飛機，一次過滿足Ambrose三個願望！

 

見到天文台天氣報告，成個復活假都係天陰又有雨。為左實現Ambrose願望，媽咪決定假期第一日就同佢去，費時之後落雨去唔成！一早諗住四、五點出發入去，睇吓飛機，行吓個４D影院同其他商店，咁就差唔多等到爹爹收工！點知今日走左去公園同浠浠及天天玩，攪到成三點幾先返屋企，再撳Ambrose瞓陣覺，已經係四點喇！都有諗過咁晏，起得身黎又天黑，去唔去好呢？！姑姐話佢地一家四口都去，就係因為咁，媽咪決定照去！四點九諗住叫醒Ambrose，佢瞓到一頭汗，基本上媽咪係同佢抺汗抺醒左，而唔係叫醒佢！好彩，玩到咁攰又瞓得果一陣，Ambrose都無扭計，媽咪快手快腳同佢換好衫就出發喇！

 

五點鬆d去到市中心，姑姐一家啱啱到達，重要架巴士上緊人就開，真係時間啱啱好，出門到上巴士都唔使點等，好緊湊！上到巴士，三表姐弟又嘈住哂，又笑又叫，重唱埋歌，其他人瞓緊覺真係多得我地唔少，哈哈！呢次搭巴士輕鬆d，上次同Ambrose兩個人去，佢沿路又問媽咪呢樣又問果樣，答到媽咪都唔識答唔想答，一程巴士已經令媽咪exhausted！今次有表姐同Ambrose玩，雖然Ambrose好多時間都係睇街，但明顯少左好多問題喇！

 

去到機場近六點，去左A區外睇飛機飛出黎，今次好好多，睇得清楚，重睇埋架機係咩航空公司添！不過三隻小魔怪睇左一陣就掛住玩，追追逐逐，都唔係睇飛機喇！

 

原本諗住去T2睇埋個咩4D影院，果度有飛機模型睇，不過爹爹話果度執左喎，咁即係無咩好行啦！好彩，爹爹見成班人去接佢放工，佢早走同我地去食飯，咁我地就唔使無所事事等佢太耐！

 

食完飯去左東涌OUTLET行左陣，買左件風褸俾自己，啱哂而家乍暖還寒嘅天氣！

 

行完OUTLET，爹爹原本想帶我地去睇飛機降落，點知佢攪錯左跑道，只係離遠見到飛機降落，而唔係近距離睇到，又黑麻麻，所以見時間都九點幾喇，返歸啦，下次日光日白先再去睇喇！