高雄墾丁之旅2012@預備篇

四日三夜嘅高雄墾丁之旅，唔使媽咪plan行程，其實都無咩好預備，只係負責執行李，諗住收工返屋企執都得。點知爹爹返左兩晚夜，媽咪放工返去接力湊Ambrose，等到佢瞓覺黎，連嫲嫲都瞓埋，要執野行出行入開衣櫃，完全執唔到啦！媽咪發覺唔對路，原本只係攞左去旅行果兩日假，都要火速攞多日假黎執野至得！

 

送左Ambrose返學就即返屋企開始執野，先係執兩仔爺嘅衣物出黎都執左個幾鐘喇，無法啦，奇摩天氣又話高雄墾丁果幾日落雨，但爹爹話墾丁應該唔落，所以執d咩衫去真係考起媽咪，怕落雨會凍又怕唔落雨又會好熱。結果，幫佢地執齊哂長袖衫同背心、長褲同短褲等等，以應付唔同天氣！原本Ambrose都可以食街外食物，不過上次新加坡之旅有太多食物唔啱Ambrose食，好彩爹爹話攞埋個電子燉盅去燉粥，果次覺得有個燉盅真係好方便，所以今次爹爹都堅持要攞埋個燉盅去，咁之前又要買定少少baby food可以撈落d粥度！重有就係迷你杯麵、快熟通粉同少量零食！即棄奶粉袋原來得番兩個，之前無check所以唔知，又唔想帶奶粉格去，所以媽咪冒險少少，照帶果兩包奶粉，最多都係一朝無得飲啫，另外帶左一pack六盒嘅保利牛奶，索性如果可以就奶都唔沖，起身就飲一盒奶，慳水又慳力，唔使又要煲定熱水，晨早又要起身較水溫沖奶同埋洗奶樽。

 

日頭執好哂d野出黎，夜晚食完飯至一次過擺入個喼度！Ambrose開始識野喇，見到媽咪成日响度執野，佢好開心又興奮，係咁話要幫手！佢重攪笑到媽咪行去邊佢就跟住行去邊，總之行出行入佢都跟到實，爹爹就話媽咪終於可以嘗試吓俾Ambrose痴到實嘅滋味，真係好似膠布咁痴到媽咪實一實呀！同埋最好笑係Ambrose揸住自己個水樽係咁話要帶埋去，成日趁媽咪唔覺就擺入喼，俾佢笑死！最後，媽咪為左滿足佢一齊執喼，幫媽咪手執行李嘅願望，媽咪都係咁易pack好每樣野之後請Ambrose放入個喼度，滿足哂佢啦！