同老師溝通過，亦係話可能佢需要d時間去適應，老師亦有講過，佢已經同Ambrose重申過好多次，留校上交安並唔係罰留堂！但Ambrose唔知點解對於無得搭校巴返屋企有份執著，總係唔搭唔開心咁！
以為只係時間嘅問題，所以一直都唯有係等待，等待Ambrose慢慢適應！點知...................
10月23日， Ambrose早上起身之後，就唔肯返學，死都唔肯換制服，搞到爺爺送唔到佢搭校巴，又要趕住送佢俾人湊然後去返工！無啦啦就咁逃學了！好彩後來嫲嫲千方百計氹佢返學，包括提議不如嫲嫲接左佢出去食午飯至再回校上交安，Ambrose都唔肯！最終，嫲嫲就話，唔上交安，唔著制服，就咁返學好唔好，Ambrose竟然話好，於是乎，明明返學時間係九點鐘，嫲嫲送Ambrose返學時已是十點十分了，俾學校吸左個遲到鐘在手冊上，但順利返學放學！嫲嫲嘅心態都係爹爹媽咪嘅心態，就係唔可以平白無事咁話唔返學就唔返，點可以俾佢無啦啦無病無痛就咁就唔返學，所以即使遲到，都一定要送佢返學！
當晚，媽咪見到Ambrose，有問過佢點解唔返學？佢真係答得好妙，佢話因為攰，想抖一日喎！媽咪提議話不如唔好再上交安啦，唔鍾意就同老師講以後都唔上喇，佢又話唔好，下堂會上，如果攰先至再唔上啦！媽咪解釋俾佢知，如果唔上，就以後都唔再上，如果決定上，就唔可以因為攰，話唔上就唔上，咁會影響其他人！結果，佢同媽咪講，佢會繼續上。反反覆覆問多佢幾次，佢至話，等佢諗吓先，真係俾佢激親！諗吓先，邊有咁老積嘅說話架？！
後來，媽咪問Ambrose，點解唔肯返學，佢又話上交安好攰，老師唔俾坐！咁又可以想像到，本來一向都要瞓晏覺嘅Ambrose，平時回家食完飯都可能要瞓覺，如果掛住玩，都頂多晏d瞓！但返交安就要留校食飯，再要留低上堂步操，一共多留兩個鐘，對於佢黎講，食完飯可能已經好攰，如果仲要無得坐只可以企起身步操，真係攰上加攰，可以理解！仲有就係，佢平時人地講野大聲少少就話人惡，媽咪同嫲嫲估計，可能叫口號時老師大聲d，佢又唔鍾意，又或者操得唔好，俾老師執佢，佢唔鍾意都唔奇！或者，當初爹爹媽咪都只係諗到步操好啱鍾意操兵嘅Ambrose，無諗到交通安全隊咁disciplined，未必適合鍾意自由發揮自主性強嘅Ambrose！
逃學當晚較夜時間，爹爹再一次問Ambrose不如唔好再上交安啦，仲話同左老師講好左喇，Ambrose竟然第一個反應係：真架？爹爹話係呀，同老師講左了，如果唔鍾意，以後都唔上喇，退出交通安全隊啦！事實上老師係有同爹爹傾左，大家都覺得既然Ambrose咁抗拒，無謂再花時間糾纏落去，如果影響埋正常返學，更加得不償失，老師同意退出嘅決定，其實只係等Ambrose一句同意，就可以了結事件！但Ambrose竟然話仲要諗吓，一時又好似話好，一時就話佢下堂會上，都唔知佢真正想點！
最後，爹爹媽咪响果個星期內，再無問Ambrose有關退出交通安全隊嘅問題，自自然然到左上星期二晚，爹爹輕描淡寫咁同Ambrose講，明天係星期三喎，仲上唔上交安呀？估唔到今次Ambrose諗都唔諗就答唔上喇！
於是十月最後一個星期三，Ambrose仍然著返佢嘅校服，正常返學放學，無再上交通安全隊了！可惜，係有一點點啦，不過，既然Ambrose自己選擇左咁，都要尊重佢嘅！
沒有留言:
張貼留言