Home Craft Time @ Totally Tape (4y2m)

通常做開手工，Ambrose都會陸續有來，尋晚做完Play Corn車仔，今晚佢又要求再做其他手工。而家同佢做手工，真係講求快靚正，因為以前唔趕時間，可以玩大壇野都得，而家放工返黎，要跟吓功課，又要預留比較長嘅故事時間俾佢，最好就練埋其他野，搞掂而有時間（其實都唔會太多時間淨）嘅話至可以做吓手工同佢玩！

 

今晚見時間又係尚可，都可以玩少少手工。見佢而家成日自己搣膠紙痴野，諗起之前買落本Totally Tape，就正正係用膠紙decorate畫作，諗住都啱而家嘅Ambrose玩！

本Totally Tape入面係有好多頁數嘅圖畫，每頁都有d位灰左，俾小朋友搣唔同色膠紙貼上去decorate嘅！示範左俾Ambrose睇，佢就自己開始整！不過由於佢係一路搣出膠紙一路用手貼上去，搞到膠紙都貼唔直，皺皺地咁！於是媽咪就教佢搣出若干長度膠紙出黎然後拉衡後一下就貼落去，再度吓差幾多先到位，再貼埋果少少，咁就應該係最直嘅！但好明顯，Ambrose唔係好handle度一下子憑肉眼就到約要用幾長膠紙，佢都係用自己方法自己貼，盡量直d囉！

 

結果，貼左三幅圖之後，佢就話唔玩喇！可能對於佢黎講，有少少難啦！同埋佢都係咁問，點解唔可以貼其他地方，點解一定要貼灰色預設位置！Ambrose就係咁架喇，自己有自己諗法，如果有時要佢跟死某d野咁做，佢又唔係太鍾意跟，成日問點解！