對上果次打高爾夫球，原來已經係三月份嘅事！有成八個月無去打波，原因真係好多！一來係因為未買到高爾夫球桿。第一次係去打高爾夫球，係去埸地內的小店問吓有無桿賣，店員話無貨，但搵到一枝小童用嘅可租用一次，到第二次去時，都係無貨，正想打發我地，我地就話上一次有一枝小童桿可租用，店員搵左一大餐至搵到，仲要租金海鮮價，求其講個數就租俾我地，但已經比起第一次租金貴了一個double，所以總係覺得，都係自己有桿帶去玩好d，費時唔知幾時佢話無桿又或者唔再租！其實都有去過Sogo睇過，又係咁啱無貨，見Ambrose又無話提住要去，所以又無好積極搵桿！到後來，小店打來話有小童桿返貨了，又到Ambrose剛巧開展左唔同嘅興趣班，又比賽又考試等等，無咩時間！再加上正值夏天吧，更加提唔起勁帶佢去打高爾夫球兼餵蚊！於是，不了了之！
估唔到隔左咁耐，Ambrose竟然自己提出話要去打高爾夫球，爹爹當然唔會say no！今日放學就直接帶左Ambrose去打波了！好彩，小店嘅小童桿仍然有貨，唔係，可能又要問佢地係咪有得租，又要搞一大餐，分分鐘去到無桿可用，要打道回府，到時都唔知點安撫Ambrose了，哈哈！
Ambrose嘅桿係42＂的，對落就係39＂。爹爹話原來有個身高表，度高就知應用哪種長度嘅桿！Ambrose嘅高度，正好紮响39＂同42＂個交接位，店員就叫爹爹買42＂俾Ambrose，可以打耐d吧！
雖然打波位置同休息位置中間有鏈攔住，但爹爹擔心如果自己揮桿時，Ambrose無多個人可以睇住，萬一Ambrose突然走近佢就真係好大件事了！所以，爹爹自己無向場地借桿，一心諗住Ambrose自己打就算喇！原來場地職員話學生租埸半價，叫爹爹下次記住帶Ambrose出世紙去先可享半價喎，同埋，要真係Ambrose用場地至得喎！
爹爹話Ambrose打中率都幾高，不過姿態就梗係麻麻地啦，始終無專業人士教，都係俾佢自己打吓玩吓，當係練下協調，所以都唔太講究！Ambrose又真係好自得其樂，自己倒波、放波、打波，重重複複咁，打足成個鐘，爹爹叫佢走時，佢竟然話點解咁快架，哈哈！
媽咪放工返到屋企，見到Ambrose嘅高爾夫球桿，無咩特別，之前仲以為小朋友桿會好colorful，但原來只係銀色一枝桿！攞上手，發覺原來幾重吓！諗緊，點解Ambrose可以揸住呢枝桿fing足成個鐘，都話唔攰？！
而家手套同桿都有齊喇，場地仲可以有半價，天氣又開始涼了，咁即係，黎緊都可以成日去打高爾夫球啦！
沒有留言:
張貼留言