可幸是，爹爹都認同可樂、檸檬茶等飲品碰不得，怕佢一旦嘗試了便成日都想要飲，好易上癮，所以暫時此類飲品都仍然可以緊守無飲過！Ambrose飲嘅，三歲半前都係絕大部分係bb淡味嘅飲品，係後來爹爹俾吓俾吓，就俾左益力多、果汁先生橙汁同利賓納等等，出街食野，由於Ambrose唔飲奶類飲品如好立克、美綠等，媽咪都允許飲凍檸水同埋柚子蜜，感覺上好似好少少咁！
糖，無得避免！自從返左學，就成日收到各式各樣嘅糖，點都避唔到，可幸係Ambrose唔鍾意朱古力，可以煩少一樣！
至於，薯片，今晚終於破戒了！而家偶然可以食到少少辣嘅Ambrose，見到爹爹食辣薯片，竟然眼金金咁望住，奸奸地笑咁話佢好肚餓喎！爹爹話辣架，佢都話要試。媽咪諗住辣嘅，佢都食唔到，佢想試吓就俾佢試，佢自然唔要，因為Ambrose一向如此，唔俾佢試唔心息。點知，估唔到咁辣嘅薯片佢竟然食到，仲食到好滋味咁款！
爹爹俾左幾塊Ambrose食，佢珍而重之咁慢慢嘆，真係好好笑！仲要玩媽咪，話請媽咪食一塊，以為佢咁乖，媽咪為左佢唔好食咁多，就即時烏前去食，佢就即時笑哈哈咁走左去！惡有惡報嘅Ambrose，為左避媽咪，走得太快，竟然跌左一塊薯片响地下，媽咪見狀就話唔要喇，一手執起打算掉左塊薯片，為食Ambrose即時喊到嘴都扁埋，真係喊到有眼淚流出黎，唔知以為虐待佢唔俾野佢食咁慘呀！
結果，當然又係廿四孝爹爹出動，俾番塊薯片個寶貝仔啦！
沒有留言:
張貼留言