要往哪裡走呢？(4y2m)

媽咪又買書喇！Ambrose應該會鍾意！佢平時响街上見到標誌或指示牌，會問係點解？同埋自己會估吓係咩意思（反而未會問字*_*”），呢本「要往哪裡走呢？」入面，係因著一個小朋友响商場同街上嘅唔同情況，引導小朋友去望標誌搵路！書中嘅標誌係全頁大咁濟，每個標誌都可揭起繼續睇故事，真係好有趣，亦都好日常生活化，好實用！個紅綠燈公仔，仲好真實添呀！

講開標誌，媽咪諗起一件生活小事！


有一日，爹爹揸車經過一個地盤，坐在Car Seat上嘅Ambrose突然就問，點解唔俾人跳水？爹爹媽咪完全唔知發生咩事，仲以為係講緊上泳班時佢成日跳水，跳到媽咪都忍唔住叫佢唔好成日跳喇！媽咪於是話唔係唔俾佢跳水，不過都要等老師ready好話可以，先至可以跳架麻，唔係會紮到老師架！點知，Ambrose話唔係呀，係出面個牌呀！

只見個牌上畫有一大個開口嘅長方形，入面有水，長方形頂上企有一個人仔，形態係跳落下面咁嘅樣，個標誌劃有斜線，好明顯真係講緊唔好跳落去！Ambrose問，點解呢度話唔俾跳水，但呢度都無水，點解唔俾跳水呀？媽咪望望四周，見到地盤地下有一個好巨大嘅深坑，正正就係一個長方形，坐响車中其實睇唔到入面有咩同埋有幾深！媽咪估計，個標誌應該係講緊呢個大坑，唔係泳池！個標誌應該係警告d人，小心坑內有水，唔好跌落去，而唔係唔俾人跳水，哈哈！

雖然Ambrose係有點搞錯個標誌（其實媽咪嘅演繹都未必啱），但都好欣賞佢嘅logic，知道個牌講咩，然後諗點解無水又話唔俾人跳水，果一刻，真係好想同佢一齊落車行埋去睇吓，究竟坑內係咪真係有水！