一早出發去嘅荔枝角公園，公園原來分左兩parts，一parts係遊樂場，另一part係古色古香嘅亭台樓閣，導遊話，電視台嘅古裝劇多以呢度取景！不過，爹爹媽咪對呢d地方完全無興趣，而且進入公園時，就已經經過遊樂場，所以一影完指定嘅大合照後，個個小朋友都已經嘈住要去遊樂場玩了！响公園逗留嘅個幾鐘，一分鐘都無踏足過亭台樓閣果邊，全程在遊樂場玩！其實，遊樂場平時都有得玩，媽咪真係唔expect學校旅行又係去遊樂場玩，仲要成個場入面，仲有另一間幼稚園學生，大概又係學校旅行吧！真係迫上加迫，未試過咁多人一齊响公園咁玩！人又多，又要睇實周圍走嘅Ambrose，簡直有點似捉雞仔咁，勁攰！一路玩，一路就見好多旅遊巴陸續黎到，有老人團又有細路團，真係夠哂熱鬧，淨係見排隊去廁所嘅人龍，就已經好想走了！
好彩玩左個幾鐘就要集合去食buffet，可以休息一下！之前學校畢業聚餐都係去熊貓酒店食buffet，果次個buffet，真係差得離哂大譜！今次學校旅行又係去呢度，已經無期望，仲要抱住有得食都算好嘅心態去，點知，有驚喜！唔知係咪跟團去嘅關係，今次真係Buffet嘅食物，唔同上次嘅三文治、腸仔等hea爆嘅食物，雖然款式唔多，但都總算靚靚地，見得人，而且味道唔錯！最正就係因為學校旅行實在太多人，平時食Buffet嘅餐廳已經滿座，全校就只有我地呢班被安排上30樓function room自成一閣咁食Buffet，有開揚景觀，有自己一間房唔使同人迫，舒舒服服咁食，實在太滿意了！
食完野，再去恆香餅家，呢一程，Ambrose竟然乖乖瞓著左！其實媽咪之前已去過參觀呢家餅家，可以話一眼睇哂，無咩野睇！今次再去，一樣係咁，基本上，雖然有專人講介d工人做緊d咩，但就係只係講佢地整緊d咩餅，同埋其實佢地坐响度整，整d咩餅，都係一樣咁嘅樣架啦，而且，簡介其實只係一句咁大把，一講完就行得，全個過程五分鐘都無，就已經要行出去外面取老婆餅試食，同埋當然係售貨區！有得食野嘅Ambrose當然好開心啦，點知佢食食吓唔知點樣成塊跌左落地下，喊到劏豬咁，其他媽咪都紛紛遞上佢地手上嘅老婆餅俾佢，真係幾唔好意思！
試食完，買完野，其實已經無野可以行喇，加上全校旅行，有成十幾架車，再加其他人都黎參觀，搞到人多車又多，爹爹媽咪都係急急同Ambrose上車等走就算！上左車，都等左一輪其他車出出入入先走到，真係好噓陷！
上左車，導遊已經話收到通知，綠田園已經爆場，預左可能要排較耐隊玩，真係想問，可唔可以直接返學校解散！其實呢d地方，自己平時都可以去到，撞啱學校旅行旺季，真係唔想同人迫囉！當然，最終都無cancel直接去啦，只係去到我地都無周圍行，搵左個空地，成班小朋友一齊玩學校派嘅泡泡水就算！Ambrose見到隔離有個彈床，話好想去玩，不過見實在太多小朋友玩緊，一來驚衞生問題，二來就係小朋友自己响入面跳，大人唔可以一齊，入面人咁多，擔心安全問題，所以爹爹媽咪唔肯俾佢去玩，係有d掃興嘅！
最後，終於捱到夠鐘可以上車回程，回程時又同老師同學一齊唱歌仔，雖然成個行程真係無咩特別，又多人，但全程Ambrose都可以同佢鍾意嘅同學仔一齊玩，超開心咁，爹爹媽咪辛苦d同悶d都值得嘅！
沒有留言:
張貼留言