事發經過係响媽咪入門口前無耐，嫲嫲同Ambrose一齊去開檯準備媽咪回來開飯。家中用嘅係蝴蝶檯，每次開飯都要開一邊檯板出來，其實只係將檯板抽高，將檯腳頂在中間鎖上就可以，但可能因為張檯有碌，檯腳嘅角離地些少，而當嫲嫲抽板時，張檯有少少傾斜，而Ambrose又不知道並無退開，以致檯腳角位紮在Ambrose腳面上，但張檯並唔係成長倒下，只係紮了Ambrose腳一下。據說，Ambrose並無即時叫痛，過左一陣之後佢至同嫲嫲講佢整親隻腳，之後就開始腫起上黎喇！其實媽咪都唔係好想像到究竟張檯點樣整到Ambrose，只係知檯腳角紮了一下Ambrose腳，並唔係好大件事！
當Ambrose同完媽咪講意外經過之後，佢就要媽咪同佢一齊坐，仲要坐低之後，又要媽咪肉貼肉咁坐，拖實媽咪隻手放向自己心口，坐到定一定咁唔郁！當媽咪諗住行開攞野或準備開飯，Ambrose都唔俾，佢一定要媽咪坐响隔離陪實佢！媽咪估計，Ambrose應該係驚，驚隻腳點解會腫成咁，因為佢未見過！媽咪曾經叫過Ambrose試下企下行下，但Ambrose都拒絕，話隻腳好痛，死都唔願郁！最好笑嘅係，當佢肯俾媽咪行開整少少野，佢都不忘再補一句，媽咪快d返黎陪我，聽到都覺得好冧（雖然Ambrose個樣係勁可憐）！
盤算緊應唔應該同Ambrose睇醫生，感覺上，佢隻腳只係撞腫左，應該過d時間就會散；但腫成咁又真係未試過，佢又唔肯落地，唔知入面有無整到，嫲嫲就好肯家咁話只係紮了一下，唔會骨折，媽咪相信都唔會，只係唔知小朋友骨嘅硬度可承受幾多，又唔確定張檯紮落去嘅角度係點，會唔會紮一下，剛好受力嘅話入面嘅骨唔斷但有裂都唔知！爹爹咁啱又返夜，才剛回到公司，如果要睇醫生，夜晚已經好多醫生關門了，要睇的話媽咪只有搭的士去港安，仲要Ambrose行唔到，要預全程都要抱住佢，真係諗起都覺甘！在猶豫睇唔睇醫生之間，Ambrose就好堅持要去睇醫生，再影埋相俾爹爹睇過之後，最後決定都係同佢睇醫生安心d。而爹爹就即時請假又由公司趕回家再帶Ambrose去港安睇醫生，咁媽咪就唔使一個人應付喇！
等侯爹爹爹回來去睇醫生時，媽咪提議不如食飯先，食完就剛好等到爹爹回來出發睇醫生。呢個Ambrose都係一名緊張大師，死都唔肯郁，又唔肯食，話要睇完醫生至食野喎！又唔俾媽咪行開，結果，媽咪要裝碗飯坐正佢隔離食，食食下問佢食唔食，餵到佢嘴邊，佢先至識話肚餓要食，見佢肯食，餵都要餵左佢食先啦！真係搞笑，Ambrose由細到大都係自己動手食野，爹爹媽咪甚少要餵佢食，竟然今晚佢就成個大爺咁，都四歲喇，仲要餵到口邊！
去到港安，比平時耐左少少至有得睇，可能咁啱之前有人撞車整親，所以睇耐左！Ambrose响等候嘅時候終於又回復番佢嘅活潑，仲可以落地跛跛下咁行。另外，又因為嫲嫲於撞腫後即時同Ambrose搽喜療妥，去到港安時，感覺上無之前腫得咁利害。所以，媽咪預計今次見醫生都係例行公事，應該唔大問題！
點知，個醫生見到Ambrose隻腳之後話要照X-ray，雖然之前都有預左要照，但後來見Ambrose企到行到少少，媽咪曾經以為可避過！去到X-ray房，醫生要Ambrose瞓上床，見Ambrose有少少驚，都諗住爹爹一齊陪佢照。但最後，問左兩次Ambrose可唔可以自己瞓响床上唔郁，醫生同佢腳仔影張相好快就走得，佢又ok，所以連爹爹都出埋房，Ambrose自己一個人瞓在床上等照X-ray，叻仔！好彩醫生都好快手，而Ambrose又好合作唔郁，一共影左兩次，好快就搞掂出番去！
等左十分鐘就沖好X-ray片，攞番俾醫生睇時，醫生就話入面d骨無事，總算安心！以為都差不多，可以出去等攞藥走人，點知個醫生又話要洗傷口。講真，都唔知洗咩傷口，佢果d血跡，只係得好少，無同Ambrose抹乾淨係驚佢痛，費時搞佢，佢嘅傷口根本唔大亦唔嚴重，聽到洗傷口呢個terms真係好愕然，但都無法啦，醫生話要，唔通唔洗咩！媽咪睇住姑娘開左一份物料，入面係幾粒棉花粒、紗布同膠夾，見姑娘醮左少少消毒藥水，一粒棉花粒抹一下傷口就掉，一共抹左三粒，乾左嘅血都無抹清，就已經敷上紗布同膠布，咁就話搞掂洗好！
去到藥房俾錢，盛惠千五大元！醫生話要兩星期至好喎，仲話驚佢細菌感染，三日後要覆診喎，真係好奇怪，明明就係撞腫，其實唔係應該睇點幫佢消腫咩？係咁講個傷口同細菌感染，真係莫名其妙！d藥仲搞笑，可能因為順手睇埋流鼻水，醫生竟然開左枝抗生素俾Ambrose，另加一枝大大枝嘅消炎藥，果然貫徹地認為佢傷口會感染！全部藥都係內服藥，一枝藥膏搽下都無！
哇，乜腫成咁，好肉痛吖！
回覆刪除所以有時我地拉枱，都要家希行開，都驚唔小心，一時唔留神夾到佢隻腳
哈哈...佢本身隻腳肥厚,腫起左就好似好勁咁囉!
刪除無呀,我地要佢幫手做野,佢會幫手開收檯櫈,今次事件好彩唔太嚴重,當係俾個教訓佢自己要小心留意四周囉...哈哈哈....佢而家都仲會幫手開飯架,無陰影....