DHA Gummies (4y2m)

表姨從加拿大回來帶來了兩大樽DHA Gummies俾Ambrose試試！剛巧之前媽咪在香港亦試買過一隻士多卑梨味魚仔形狀嘅DHA俾Ambrose試，佢食左幾次都無話唔好食，但又無話好好食，點知，食左個幾兩個星期後，佢終於同爹爹講話唔想再食，話有少少難食喎！咁又係嘅，媽咪自己都試過，士多卑梨只係魚仔膠囊嘅味道，一咬破膠囊，入面果D真係pure 魚油，其實都有少少腥，唔多好食架，只係好似mix埋一齊易少少入口咁囉！

膠囊好處係夠pure，食一粒就可以食到高成份，但唔好係難食！表姨買嘅DHA Gummies，係將魚油mix埋塘，佢check過成份天然安全，媽咪都唔使考究咁多！但因為mix左糖，一粒成份就會少好多，但相對易入口，所以每次要食4粒，每日以4歲黎講可以食1-2次！Ambrose對於DHA Gummies當然好接受啦，媽咪試過同平時嘅bear bear糖差唔多，今次佢仲係攞正牌日日食糖，哈哈！其實仲有個好處嘅，就係反正如果要食糖，咁不如食呢隻黎代替左，好似亦比較健康一點吧！

至於點解食DHA，其實都唔知係咪有幫助，只係媽咪見Ambrose平時無咩記性，有時簡直係過目即忘，聽人講DHA對腦部發展好，再回想當初為Ambrose揀奶粉時，完全唔相信咩添加左DHA呀、AA呀果D成份，所以當時Ambrose食嘅奶粉都無呢D野，亦唔係熱門奶粉。而家有時好傻咁諗，唔知Ambrose而家嘅無記性同當初食嘅奶粉有無關係，不過既然無得追番以前，咁咪而家又試試會唔會好少少囉！而且DHA對眼部發育亦好有幫助，對於有家族眼病史嘅媽咪黎講，當然想好好保護Ambrose雙眼，所以至會一試！