Home Craft Time – PlayCorn ABC (2y9m)

上年聖誕節時買左盒PlayCorn同Ambrose玩，諗住既簡單又方便！說明書重話加上個筆套，PlayCorn重可以揸响手當crayon咁畫！不過媽咪發覺，PlayCorn濕水濕得多會溶得好快，畫上畫紙上面亦都幾啜吓，唔多順，攞黎當筆就麻麻地喇！至於砌野做手工，唔知係咪第一次做，濕水濕多左，PlayCorn好易溶咁，重要一路痴一路甩d色落手度！其實問題都唔係好大，果時攞黎砌左架飛機俾Ambrose，問題係第二日Ambrose自己攞架飛機玩時將佢拆散哂，拆完後d顏色又甩左落對手度，嫲嫲見到又自然唔多高興架啦，話怕佢又放入個口度喎，始終係顏色喎！所以玩左果一次之後，成盒PlayCorn收埋左喇！

 

呢排見到Herman媽咪買左類似嘅PlayCorn黎做手工，媽咪至諗起自己盒PlayCorn玩左一次未郁過，所以媽咪又諗住攞吓黎同Ambrose玩！唔想同佢砌公仔，一來對於Ambrose黎講都應該好覆雜，二來媽咪怕佢掛住玩成粒PlayCorn溶哂都未砌好！所以媽咪諗不如同佢玩平面啦！

 

印左ABC字體出黎，俾Ambrose將PlayCorn逐粒沿住英文字母筆順貼上，俾佢多個機會認吓英文字母。不過，由於PlayCorn實在太方便，只要濕吓水就可痴上紙上，基本上，好似印印仔咁，响海棉上印一下沾水，再在紙上一貼就貼住左，Ambrose極速貼哂ABCD幾個字母，媽咪發覺唔多對路喇，咁玩法，一盒500粒PlayCorn隨時極速玩哂，都係收工做其他功課先，留番PlayCorn真係做手工時玩好d囉！至於貼英文字母，都係用番圓點貼好d，哈哈！

Baby著色本@2012年5月31日 (2y9m)

尋晚先至KO左一本coloring book，今晚Ambrose又話要油顏色！見之前Ambrose對於coloring無咩大興趣，一直都無添置更多coloring book，所以，今晚攞埋最後一本而家啱做嘅coloring book出黎俾Ambrose油，結果，又係一油就油哂一本！

 

都係啦，呢本size幾大，Ambrose又係見到就狂掃，攪到出哂界！其實佢咁掃自己對手都好攰，中途重同媽咪講話好攰，笑死媽咪！不過話就話攰，佢都無放棄，一路油，一路揭睇吓重有邊頁未做，如果第日做功課都係咁小心就好喇！

寶寶快樂塗色@2012年5月30日 (2y9m)

近日Ambrose好似愛上左coloring咁，俾功課佢揀，佢都會揀油顏色！繼之前做完嘅塗色入門後，媽咪又摷左本兩年前去深圳書城買落嘅油顏色書“寶寶快樂塗色”俾Ambrose油！呢本顏色書一頁係樣版，另一頁就係俾小朋友跟住油顏色嘅！叫左Ambrose跟住顏色黎油，佢又唔聽，自己鍾意攞咩色就咩色，俾佢激死！不過Ambrose又好奇怪架喎，佢鍾意撞幾隻色一齊油，呢幾隻色並唔係跟據d邊界一隻色油一格咁油，而係自由派咁全個公仔隨意亂撞，都唔明點解佢要咁做？其實係咪應該要帶Ambrose去睇吓畢家索嘅畫展呢？哈哈！

 

之前做Kumon Workbooks同塗色入門所要油嘅公仔都係比較細，範圍唔大，所以Ambrose都好似油得比較好，起碼佢會慢慢油左外框至油中間，咁就少d出界！但呢本寶寶快樂塗色size細過A4 size少少，成個公仔都要自己油顏色，範圍都幾大，所以見Ambrose一落筆就起勢狂掃，就係咁，好多時都出哂界！唉！

 

一本有成十幾個公仔要油嘅顏色書，Ambrose一晚要油哂！咁就KO左一本喇！

似乎要搵d顏色書，size唔好太大，但要油嘅公仔又要簡單線條，好似都幾難搵咁！

Home Craft Time – 紙袋獅子 (2y9m)

今晚又同Ambrose做功課，由於呢排晚晚都做功課咁濟，本塗色入門話咁快就KO左喇！另外之前做緊嘅數與量概念，可以俾Ambrose做嘅都做哂，淨番排1-5最高最矮、最多最少、最長最短果d，咁複雜，都係留番佢再大少少至做喇，費時講到口水都乾喇！

 

媽咪食完飯將尋日唧水雪嘅冰攞左出黎俾Ambrose玩，佢係咁開水喉沖d冰，攪到d冰好快溶哂唔見哂，無得玩！

 

夜食飯，時間唔係好多，所以媽咪摷左好耐之前買落嘅紙袋手工出黎俾Ambrose整獅子！其實之前已經做過類似嘅手工，只係之前做嘅係乳牛同埋青蛙，而因為之前Ambrose重細，媽咪主要都係用雙面膠紙痴好位至叫Ambrose搣同貼，今次，媽咪覺得Ambrose應該可以試吓自己搽膠水，所以今次攞左板白膠漿俾Ambrose慢慢唧！

 

不過枝白膠漿略嫌太實，見Ambrose唧得好辛苦至唧得少少，一係就一下子又太多，下次買白膠漿都係要捏吓至好買喇！由於有時Ambrose唧白膠漿太多，媽咪會教佢用個唧頭掃番勻d膠漿至好痴，佢就不時問媽咪點解，然後重好大聲好興奮咁大叫“好好玩”，真係俾佢笑死！

 

做好哂隻獅子，最後步驟就係幫隻獅子貼圓貼裝飾身上嘅pattern，Ambrose貼貼吓無啦啦貼左入去獅子個口入面，媽咪忍唔住問佢做咩貼入去呀，問Ambrose獅子要食野咩？佢就答，係呀，獅子要食燒賣魚蛋呀，之後自己笑到咯咯聲，哈哈！

 

好耐都無同Ambrose做手工喇，見到Ambrose咁有興趣，明明想睇電視都衝左過黎要做，又肯坐定定做哂全部工序，媽咪好安慰，因為明白其實唔係個個小朋友都有興趣做手工做功課，Ambrose有興趣又肯做，其實真係好難得，媽咪真係要不斷鞭策自己，唔好成日都懶，只係同Ambrose玩玩具或畫吓公仔就算，真係要花d時間同佢玩多d手工同做多d功課至得！

要好大力唧呀

擺咩入獅子口?

咪就係燒賣魚蛋

完成品

 

 

Dropper玩水@2012年5月28日 (2y9m)

因為今日Ambrose唔瞓晏覺，攪到黃昏嘅時候忍唔住瞓著左，成七點幾至起身，所以今晚Ambrose唔眼瞓，係咁要玩同做功課。玩完stamping同numbers matching之後，媽咪就攞出星期六同Ambrose睇醫生時經過街邊檔買到嘅手掌吸盤玩水。

 

遊戲材料有：一杯熟水加食用顏色，一個dropper，一塊吸濕布同埋一塊手掌吸盤。玩法係要Ambrose將水樽嘅顏色水，用dropper抽出，再响手掌吸盤上面嘅大小吸盤上唧水，但唔可以唧到漏出黎！

 

不過，Ambrose似乎未掌握到點抽d水，佢可能以為係畫筆，係咁將枝dropper放入去又攞返出黎，哈哈！偶然佢都可以抽到少少水，但當要佢在吸盤上唧水，佢往往將dropper篤實個吸盤度，本來唧左出黎嘅水又俾佢索返上去！

 

見用吸盤玩似乎都要有少少技巧，而Ambrose又重未掌握到點樣撳同放個dropper先至吸同唧到水，媽咪即時降低難度，响雪櫃攞左個冰格出黎，叫Ambrose隨意吸完水唧返落d格格度。結果，Ambrose都可以做到，不過都要媽咪不斷提佢，未係好協調做哂全部steps！最後，可能Ambrose自知有排都未fill滿個格，但以佢個性係一定想繼續玩落去，佢就不斷同媽咪講“不如我地一齊填滿呢格丫？”其實就係要媽咪出手同佢一齊抽水，至於唧水呢個動作，佢就堅持自己做番，哈哈！

 

最後成個冰格都唧滿哂水，媽咪臨時決定，將個冰格放番入雪櫃，叫Ambrose提媽咪明晚攞番出黎睇吓變成咩樣，唔知Ambrose會唔會唔記得左呢？

Numbers Matching@2012年5月28日

今晚同Ambrose試玩Numbers Matching，基本上，佢見到d貼紙就已經自動波去搣搣貼貼，不過佢就完全唔理個遊戲規則，係咁亂貼！媽咪要大聲數俾Ambrose聽，貼左幾多個，爭幾多個，失卻左呢個遊戲嘅原意啦，媽咪原本諗住Ambrose見數字或聽數字就自己動手去貼！另外，Ambrose亂貼到會貼貼吓呢格，都未貼夠數，佢就貼左落下一格，又有時佢會貼番去上一格，真係俾佢激死！

 

好明顯，Ambrose重未認到數字啦！頭幾格即1-3都尚可，不過之後果d就越來越亂，到最後佢都唔理咁多，務求貼哂手上張貼紙就算！似乎，下次媽咪應該集中玩1-5先！同埋應該一個數字一張會好d，費時佢成鬼日睇錯上下格亂咁貼！

Stamping@2012年5月28日

今晚Ambrose又話要做功課，咁啱學校嘅小肌肉訓練就係stamping，原先媽咪都懶得同佢做，因為stamping訓練Ambrose成年前已做過一排架喇，所以諗住唔做照tick返交學校。不過尋日媽咪响公司執野，又順手print左幾張stamping嘅格仔紙，所以都係同Ambrose又玩吓啦！

 

不過今次媽咪要Ambrose用印台印而唔係用原子印，咁佢就好似唔識就力喇！吓吓都鬼死咁大力印落個印台度，再用九牛二虎之力印落個格仔度，真係服左佢！媽咪教Ambrose細細力，佢都好似唔多識得細力咁，之後自己又走去攞其他原子印自顧自印喇！印完一張又一張，結果預先print好嘅格仔紙都印滿哂，Ambrose都仲要繼續印！媽咪唯有即場用手畫格仔紙俾佢慢慢印！

 

講番stamping，其實Ambrose都掌握得唔錯，都會識得一格一個印仔，係有時個原子印擺得唔好印左落去印唔哂，佢又要再印多次補番，同埋有時太快手，响同一格印完，好快又印番同一格度，不過so far都唔係好多時係咁！另一個問題係，媽咪其實想Ambrose順住格仔由上而下由左至右（或右至左）咁一路印印仔，不過Ambrose就比較不依次序，有時佢會打直印完一行再打橫印一行，先至再由第二行開始打直或橫再印過，好似要印好個框框先咁！又或者未印完一直行又走左去開第二行印，比較亂，印完一餐之後，重有幾個空格未印又睇唔到，真係唔知佢係大意定對眼有問題，唉！

Thomas雨褸

今日買左件新雨褸俾Ambrose！之前果件雨褸係Ellen姨姨幫媽咪淘寶團購返黎嘅，已經係Ambrose一歲鬆d嘅事！件雨褸今年先多少少機會著，今年著就好fit！媽咪其實好鍾意件雨褸，又平（好似都係廿幾蚊）又靚，所以都無諗過要買過第二件俾Ambrose！直至上星期同Ambrose出街，媽咪見有少少雨，得媽咪同佢出街，都係俾Ambrose著雨褸好d，唔係媽咪一把遮，遮得自己又未必遮到Ambrose。落到街，真係落雨，媽咪幫Ambrose笠頂帽，至發現原來頂帽對於佢黎講太細喇，頂帽只可以笠到去佢頭頂，前額嘅頭髮係笠唔到！其實如果細雨都無咩大所謂嘅，但如果大雨，咁就真係麻煩喇！

 

重要嘅係Ambrose而家要返學，平時爹爹車返學當然無問題啦。但如果爺爺湊返學，爺爺要同Ambrose行去搭輕鐡返學嘅，所以媽咪諗，如果遇著爺爺湊返學至落大雨，要佢一個人又要擔遮又可能會抱起Ambrose行，真係顧得自己都顧唔到Ambrose，或者相反啦！所以Ambrose其實真係需要一件雨褸，同佢著左，就算大人遮唔到佢，大家都不至於濕哂丫麻！

 

因為咁，買新雨褸就變得好有理由啦，哈哈！不過其實今年唔買，出年都應該要買過啦，舊果件都會再細再短架麻！咁不如今年買，一件雨褸，age range都係3-5歲，如果唔爛，呢件雨褸都可以著幾年喇！

 

市面上好多雨褸都係膠布，媽咪唔多鍾意，因為一來膠著起上黎好焗，二來摺起上來又厚，下下成舊野攞出街真係唔多方便，三來媽咪好怕d膠摺完再要打開會痴住哂，好麻煩！舊果件咁平都係尼龍布，要攞出街真係可以摺到好細，極方便！所以媽咪一心target要搵尼龍布嘅雨褸！另外，好多雨褸都係過頭笠，心口位有幾粒鈕，媽咪又係唔多鍾意，因為總覺得過頭笠有少少麻煩，唔及開腔方便，所以買雨褸第二個criteria就係要開腔喇！睇完一輪，發現呢兩個criteria都唔太難meet，不過好多都係女仔款囉，男仔款就只有叮噹同埋Thomas，兩件都係藍色！咁嘅情況之下，媽咪都係買Thomas啦！

 

其實本身舊果件係直身雨褸，媽咪比較鍾意，感覺上無傘型咁輪盡，但返到屋企試雨褸時，嫲嫲講開先至發現，傘型雨褸，係可以揹埋書包至著雨褸，連書包都可保護到，真係唔講都無為意！

 

所以呢件雨褸，真係返學必備，盛惠$139，好貴呀！

Amos Kid Driver

上星期五响灣仔玩具街見到呢盒Amos Kid Driver，油完顏色吹脹個紙ballon，加車碌就可以整架車出黎，又簡單又好玩，所以無咩點研究就買左一盒返屋企！媽咪一心以為一盒裡面有三架車仔，因為媽咪好白痴咁見到3D Ballon時以為係3s Ballon，重諗緊封面有school bus同fire engine，咁第三架會係咩車呢？車碌係得一set定係有三sets可同時整哂三架車出黎嘅呢？點知媽咪影相時就發覺盒上面已經貼住左“school bus”字樣，呢個時候媽咪先驚覺原來成盒應該只係得一架車！

 

為左證實真偽，媽咪即時打開黎睇吓，點知發現真係得一組車碌，而架車車Ballon竟然無左！即係呢盒野次左啦！唉！媽咪有少少擔心星期一先返去同店員講話打開無左個車身，都唔知受唔受理，始終又無單，個盒係用膠紙密封無開過，無啦啦無左個車身真係幾奇特，都唔知有無人信，同埋呢d舖仔服務態度真係好一般架麻！

 

終於到今日，一放lunch就即時行去同店員講盒Kid Driver入面無車身

 

店員：“吓，如果無就無架喇喎！”

媽咪即時指住盒面就話：“但呢度寫住Ballon，唔可能無架喎，無嘅話點整車呀？有車碌架喎！”

店員死死地氣話：“咁你去開過另一盒睇吓有無先啦！”

 

然後完全唔理媽咪繼續同人打牙較，媽咪見橫掂要換，攞左盒Fire Engine，因為Ambrose成日都叫爹爹媽咪畫Fire Engine俾佢睇！媽咪攞去收銀至打開個盒，真係見到入面有個紙Ballon，再同店員講番，個店員重話“吓，真係有呀？咁你攞呢盒囉！”

 

好彩最終都換得番咋！亦都好彩媽咪八掛打開個盒睇吓咋，唔係收埋左就算，完全唔知道無左架車身，到要玩先至發現無，真係無得追架喇！老實講，當初真係以為有三架車，$55就覺得幾抵！但原來成盒得一架車仔嘅時候，媽咪就覺得有少少貴喇！其實入面嘅顏色筆真係唔多想要架麻，屋企太多顏色筆喇，次次買野又要連埋顏色筆一齊賣，買埋買埋都用唔哂，如果可以，媽咪寧願佢平少少唔包顏色筆囉！類似玩法嘅動物面罩，Jusco Living Plaza都係賣$12一個，唔包顏色！所以，呢盒Kid Driver嘅顏色筆，相對真係好貴囉！

數與量概念

呢本“數與量概念”買左好一段時間，$100八本任揀，係超平嘅workbook。有見之前媽咪實在太懶，成日同Ambrose做功課都只係做油顏色workbook，所以都係的起心肝摷吓有咩workbook啱Ambrose而家做啦，唔摷出黎就成日都係買完放响度，浪費左！

 

啱啱早兩日至摷出黎，星期六Ambrose病住都話要做功課，所以二話不說，同佢做呢本，一做又係十幾頁！呢本workbook，好多已經都啱Ambrose做，主要係少大小、高矮、長短，估唔到媽咪完全無教過，Ambrose返學唔覺唔覺已經學識左！最出奇嘅係佢竟然都識分濶同窄，真係好神奇呀！

 

呢本數與量概念入面有分高矮長短排1-5，不過媽咪覺得要分5種長度／高度對於Ambrose黎講都應該難，而且佢都未識寫字，所以跳開哂呢d頁數唔做住！$12.5一本嘅workbook，有咁嘅內容質數，真係唔錯！

Ambrose生病了之二

尋晚最终咩都唔做，同Ambrose一齊瞓佢至無再成日醒左搵人，但今朝早八點幾媽咪發覺Ambrose原來瞓响媽咪個肚度，真係俾佢紮死！想話卸低Ambrose個頭，點知一路卸，爹爹就係呢個時候開大門，Ambrose成個醒左，要出去搵爹爹！

 

媽咪人都散埋，唔理爹爹放工返黎未瞓，照撻响張床度唔郁，哈哈！近十點，媽咪聽見Ambrose又好精神咁捉住爹爹陪玩，見佢又退左燒，唉，都係同佢去畫班啦！

 

上完畫班，食埋晏，Ambrose都好似好精神，咁就同佢玩左一陣冒險樂園，兜左一圈反斗城，又夠鐘要返屋企食藥休息吓喇！再要讚Ambrose好乖，去冒險樂園只係要玩打籃球，玩完無扭計再玩其他，乖乖走人！去反斗城都係，睇見佢望住d玩具，尤其是槍呀、怪獸果d，好似好想要，但媽咪話要儲吓錢，下次乖又儲夠錢先買，佢又真係無扭買玩具，重要爹爹話走喇，佢拖住爹爹手一齊行返出去，真係好乖仔！

 

返屋企換左衫媽咪就陪Ambrose瞓，可能媽咪呢兩晚都瞓得好少，所以都好快瞓著左，直到六點幾，Ambrose起身出房門搵爹爹，媽咪至醒，呢一覺瞓左三個幾鐘，真係估唔到！

 

本來諗住如果瞓醒重有精神，都會同Ambrose去碧堤個會所玩吓，但瞓醒都近七點喇，唔使去啦！唔想Ambrose太失望，決定同佢去表姐家食晚飯，順便俾佢地聚一聚玩吓開心吓！

 

又係啦，出左去一陣之麻，本來响屋企好鬼生猛嘅Ambrose，一陣又表現好攰咁，由佢對眼皮已經可以知佢攰唔攰啦！九點鐘走人，返到屋企同呢隻臭豬沖涼，至見到佢右眼入面有一pat眼屎痴住，都唔知係鼻涕捽左入去定係熱氣？！不過媽咪見佢眼腫腫咁，都係有d唔放心，明天都係決定唔返學喇，睇多次醫生先得！

 

呢日可能晏覺瞓太多又太晏喇，Ambrose入左房之後好耐都瞓唔著，唉！好辛苦瞓著左，三點鐘佢又醒左企左响度唔出聲，係咁抖大氣！本來又係想扮睇唔到，等佢企攰左會瞓番，點知等極都重係企！媽咪唯有起身問Ambrose做咩啦，佢話佢抖唔到氣，真係陰公！抖唔到氣又真係唔知可以點幫？想話撳低Ambrose瞓佢又唔肯！突然醒起好耐之前買左嘅鼻爽貼，專係鼻塞時用嘅，又即管試吓啦！不過Ambrose始終都唔識呻鼻，佢個鼻好塞，又有鼻水响入面，呻唔到真係好唔舒服，就算貼左鼻爽貼都無咩大幫助咁！見夠鐘可以食藥，又開左藥佢食，希望佢舒服少少，同埋眼瞓少少可以快d瞓番！同時間，媽咪諗起之前買嘅VICKS傷風膏，於是攞左出黎同佢捽吓個心口仔，再搽左d响鼻下，希望舒緩到佢嘅鼻塞！

 

攪左一大輪，都唔知幾點，大家又瞓番！爹爹就話放假可以抖吓，媽咪要返工，朝早真係唔想起身返工囉，好鬼攰呀！

Ambrose上新畫班之十二 (2y9m)

今堂又係畫鴨仔，不過今次同之前果次有少少唔同，今次係畫好鴨仔之後剪落黎貼上另一張畫紙上面，叫有少少立體，唔係咁平面啦！

 

呢三隻鴨仔都算畫得唔錯，起碼真係鴨形！另外，個藍色底色，Ambrose油得都幾靚，唔知點解佢果張係特別藍，其他同學仔都係好淺色架喎！不過第一隻鴨仔，頭dup dup咁，隻眼又sad，攪咩呀？！