池田麵包超人止痕蚊貼

上兩星期爹爹帶左Ambrose落樓下踩單車，點知踩完之後返屋企至發現Ambrose已經俾蚊咬到一身都係。不過沖左涼，蚊咬嘅地方好似無咩野咁，爹爹不以為意。以防萬一，媽媽臨瞓前都有同Ambrose搽藥膏，諗住唔嚴重搽左都可以快d好麻！

 

點知第二朝早起身，蚊咬過嘅地方全部又紅又腫，一舊一舊咁，好誇張！媽咪趕時間返工，只係同Ambrose搽藥膏就出門，放工返去再見到Ambrose，佢已經抓到損哂！無辦法之下，仍然都係搽藥膏。但晚晚瞓覺，Ambrose都係咁抓，即使瞓著左，佢都痕到舉起雙腳係咁抓，真係好慘呀！抓都唔係問題，最斃佢抓到損哂，流哂血！就算同Ambrose搽完膏再貼膠布，因為膠布始終有虛位，Ambrose可以抓甩埋d膠布！

 

咁樣過左幾日，唔係好消腫，媽咪都有少少唔知點攪，因為未試過咁！大人就話知道忍吓啫，小朋友唔識，一路抓一路損一路都唔好，唉！

 

Ellen姨姨知道後，就話借盒止痕蚊貼俾媽咪，收到之後，至發現媽咪曾經買過，但摷勻全屋，都唔見，唔知係咪之前無咩用，到期掉左？！

 

唔理啦，用住Ellen姨姨果盒先！其實呢隻止痕貼就好似膠布咁，只係平時膠布中間有紗布cover住傷口，呢隻止痕貼係完全無，一塊膠紙咁！媽咪有少少猶豫架，因為Ambrose果d蚊癩已經損哂，正確黎講，全部都係傷口，唔知隻止痕貼貼落去再撕返出黎會唔會整損過，又或者有傷口應唔應該長期有野遮住唔夠通爽難埋口呢？！不過現實係Ambrose不停抓，傷口都未好又再抓到出血，所以媽咪都唔理得咁多，一定要搵野遮住傷口，唔可以再抓喇，呢隻止痕貼話哂都有藥用成份，又完全密封咁貼住，fulfill哂媽咪要求，點都要一試啦！

 

沖完涼就同Ambrose貼左先瞓覺。果然，貼左止痕貼，唔見Ambrose豎起對腳係咁抓喇，總算成功！如是者，每晚沖完涼都同Ambrose換一次止痕貼，佢嘅傷口總算開始埋口喇！爹爹話小朋友新陳代謝咁快，Ambrose竟然要咁長時間先可以埋到口，真係傷得好重！！！

 

不過，因為Ambrose實在俾蚊咬左好多啖，每次換一換止痕貼，都要用上六、七、八張，一盒止痕貼都只係三十幾張，連貼幾日之後，已經差唔多用哂Ellen姨姨果盒蚊貼喇！但，重有d傷口未好哂，Ambrose又好堅持要貼止痕貼，媽咪唯有慳住用，傷口明顯未得嘅至貼，望落埋左就由佢！

 

今朝起身，Ambrose又抓損左另一撻喇，流哂血，真係貼少一塊都唔得！

 

本來媽咪已經托人去日本買幾盒回來架喇，但早兩日發覺用得好快時估計應該等唔切，所以想去BNM買，但問左BNM無貨！有貨嘅地方又好遠，去唔到買！唯有貴少少上網買再速遞送來。最快明天收到，但今晚就無得用喇！唔知又會抓損幾多喇！唉！

 

呢盒“池田麵包超人止痕蚊貼”真係好應該有一盒放响屋企看門口！原本以為一盒成三十幾張有排用，但今次之後，發覺小朋友一俾蚊咬就唔止一、兩啖咁少，次次都十粒八粒。加上Ambrose似媽咪，一俾蚊咬真係要痕成個幾星期至好，所以一次又要貼好幾日，一盒止痕貼真係夠用一次中招事故。今次反正要俾速遞錢，又要還番盒俾Ellen姨姨，所以一次過訂左幾盒返黎！