Percy袋

之前Ambrose成日都話要同爹爹媽咪一樣，見到爹爹媽咪著converse綁帶鞋，成日都話要著，見到媽咪揹手袋，佢又要埋一份！結果，本身果對converse綁帶鞋太細唔啱著，要同佢周圍搵鞋，咁啱converse又無再出咁細小朋友綁帶鞋，攪到媽咪頭都痛埋！最後好彩响d小店搵度一對，如果唔係，真係可能要去美國訂架喇！

 

至於手袋，其實Ambrose都無咩揹袋習慣，連小背囊都好少用！但佢次次見媽咪揹斜揹袋，佢都好想同媽咪一樣，所以即使屋企有背囊，佢都唔多願揹！但小朋友斜揹袋真係唔多，重要係for男仔嘅，真係好難搵囉！搵左一輪都只係見過叮噹同新幹線，都唔靚！一係就係Thomas，不過好多都係膠皮面，唔係尼龍布，媽咪又唔多鍾意，所以一直都買唔到！

 

今日等Ambrose畫畫，終於俾媽咪見到個Percy袋，可手抽，又可斜揹，重要係尼龍布面，真係perfect！最開心嘅係，個袋雖然係Thomas系列，但佢唔係平時永恆嘅藍色，係媽咪鍾意，又利Ambrose嘅綠色，價錢又唔貴，所以即時拍板買下，好開心！

 

講開，真係唔係好明，點解咁多男仔野都一定係藍色，媽咪從來都對藍色無好感，偏偏生個係仔，仔嘅野成日都係藍色，尤其係初生果陣，真係好難買野囉！又，唔明點解女仔好多時都鍾意粉紅色，其實粉紅色都幾靚，不過真係唔明點解係女仔都一定係由頭到腳都係粉紅色，真係頂唔住囉！