今晚Ambrose又話做功課，見時間唔係好多，都係做埋本塗色入門啦，費時又開過第二本有排攪呀！
啱啱先至寫完blog話佢油顏色有技巧左，都唔知係咪小氣，今晚同佢油，佢都心不在焉，隻手油緊，個頭就四圍擰，都唔係一心一意睇住黎油，咪油哂出界囉！油油吓重要揀公仔黎油，死未？重有就係唔知係咪學校學過將枝crayon瞓平去掃，佢油油吓又咁樣掃，好輕易就油好，不過梗係出哂界啦，媽咪即時話鬼佢懶，佢重話係呀，因為我好攰囉，俾佢激死！媽咪話攰就唔做啦，又唔肯喎，响度死磨爛磨都唔捨得去瞓，呢隻仔真係心野！
最後，有一幅重要趁媽咪唔為意無睇住，成幅油左藍色，重要起勢大力油，油錯色，又出界。所以，都係收工啦，無心機，唔好浪費左本功課薄！
沒有留言:
張貼留言