塗色入門

今晚Ambrose又話要做功課喇！見時間唔係好多，都係同佢油吓顏色算喇！之前果兩本關於填色嘅Kumon Workbook已經做完哂，今晚開左一本响當當網訂返黎嘅“塗色入門”俾Ambrose油！呢本塗色入門每頁都有一個已油好左嘅公仔俾小朋友跟住油，同Kumon Workbook有少少唔同，Kumon Workbook只係要油成個圖案嘅部份，呢本就要油一個圖案，不過都係好簡單嘅形狀，而且唔大，Ambrose好快油完一個再做下一個，好有滿足感！

 

今晚媽咪留意到Ambrose油顏色有技巧左，之前佢只會係咁响要油嘅地方狂掃，今晚媽咪見到佢油顏色，先會圍住圖形外圍油左先，之後先掃中間位置，有時隻手唔啱位，佢重會轉本書黎就番角度先油，好叻！睇到Ambrose雖然都重會油出界，但整體已經出少左好多喇！媽咪再對比番今年一月開始做嘅Kumon Workbook，即時已經見到好大差別！

 

有時Ambrose油左出界，佢會用手指捽吓，試吓捽唔捽得甩，之後見捽唔甩，佢就會自言自語話“唔緊要啦”！好好笑！