今朝起身，Ambrose又慣常問媽媽，今日係咪跳舞呀？等左成個星期，日日都要答唔係，係要返學，今日終於都等到答係喇！Ambrose不知幾開心，都唔知佢究竟係鍾意跳舞，定係鍾意個跳舞老師，定係鍾意間房入面可以砌嘅地墊喇？！
今日有個新同學黎試堂，原來佢係之前Ambrose上playgroup嘅同學仔，佢唔講，媽咪真係唔太認得，因為小朋友實在變得太快喇，哈哈！不過呢個同學仔就比較怕羞，唔係好願入課室玩住等老師！老師黎到，就問同學仔足左三歲未，同學仔四月生日，已經足哂三歲架喇，而且都有返學，但據佢媽咪講，同學仔返學都有段有長適應時間，去到新環境可能都會有適應問題，老師一聽到都已經話小朋友要獨立上堂先收，如果喊，佢唔會收喎！
點知夠鐘上堂，同學仔媽咪要出課室，呢個同學仔就開始喊，老師原本都話試一陣先，點知唔夠十分鐘，門打開左，老師推番同學仔出黎話唔得喇，佢 連 老師都推開唔要，又係咁喊上唔到堂！呢個同學仔出左黎由媽咪抱番呵番，一直都無收過聲，真係唔明點解可以喊咁耐！
突然間，媽咪好慶幸Ambrose真係好乖好叻！媽咪响Ambrose未夠兩歲半就開始要佢自己上興趣班，so far都無試過扭計上唔到堂嘅情況，一切都順順利利，真係要感恩！到而家，跳舞老師都未知道，原來Ambrose學左三個月，都重未足三歲，哈哈！
沒有留言:
張貼留言