今日放工返屋企，見Ambrose重未沖涼，即係話可以同佢玩d污糟d嘅野啦，玩完至去沖涼，啱啱好！要玩污糟d嘅野，莫過於係水彩啦！
之前响Jusco Living Plaza買左盒白色輕黏土返黎，一直都無時間同Ambrose玩，今晚正好可以同佢玩喇！本來其實應該攞kid paints出黎撈d色落黏土度，不過媽咪怕大大枝攞出黎嘅話，Ambrose會不受控咁倒勁多出黎，浪費哂！靈機一觸，諗起之前Auntie Fannie買俾Ambrose嘅排裝kid paints，就用佢啦，應該唔使好多顏料嘅！臨時又諗唔起d畫筆收左去邊，Ambrose又係咁催促媽咪要玩，所以只好攞左用黎“不”漿糊嘅棒棒出黎，充當住“不”顏料嘅工具先啦！
開左盒輕黏土，發現好濕好爛，同之前畫班玩果隻唔同！呢隻搓上手，好多黏土會痴响手上面，成手都係，又好難搓走！明明記得好耐之前買果盒綠色，質地唔係咁架喎，好爽架！至於畫班果d應該又係另一種質地，唔痴手，但好難搣出黎，搓落重有少少彈力，同呢隻唔同，呢隻真係好似搓麵粉團咁！
開哂壇至發現呢隻輕黏土真係唔係幾理想，但想收檔都唔係易，唯有頂硬上啦！叫Ambrose幫手“不”顏料撈落輕黏土度，媽咪開始搓勻d色，由於媽咪都係第一次玩，所以都係試驗性質，叫左Ambrose睇左媽咪做先，下一轉至落手做！點知撈左顏色入黏土度，一搓，成手都係顏色同黏土，重要搓極都黏唔起痴左响手上面果d黏土，成手都好污糟，my god！！！
又唔知係咪黏土太大顏色太少，點搓都搓唔勻d顏色，攪到好似雲紋石咁，同想像中係兩回事！整完藍色，再整黃色，好似好少少！之後媽咪諗起可以用棒棒幫手响張檯度“炒”黏土，咁“炒”之後，d色就好好多！所以後尾整綠色同紅色時，媽咪都有叫Ambrose幫手“炒”，佢不知幾興奮！
本來Ambrose係叫媽咪一齊整盒上面隻馬騮公仔架，不過係啡色，媽咪見“炒”黏土已經幾麻煩，要溝啡色出黎煩上加煩；再加上Ambrose係咁要將果排kid paints嘅顏色都整一舊輕黏土出黎，唉，都知好難真係跟住整果隻馬騮啦！
整左藍色、黃色、綠色同紅色出黎，都唔知整咩好，無理由只係“炒”完就收檔架，點都要整少少野出黎，最緊要係簡單！所以媽咪諗起太陽伯伯！用左紅色做中間，黃色做外圍！本來想叫Ambrose搓長條做光線，Ambrose都好落力係咁搓，不過媽咪發覺要將呢d條條痴上個圓形上面，有d難度囉！所以最後，媽咪都係將黃色托响個圓形下面，痴好左之後，用漿糊棒界左太陽邊就算，好懶！Ambrose見到媽咪咁整，佢同一時間，自己攞起兩舊黏土，自己搽白膠漿，痴埋，重要似模似樣咁用枝漿糊棒學媽咪係咁界條邊，哈哈！當然，佢梗係界到一pat pat啦，但媽咪已經勁讚好靚！佢重要好叻咁將之前媽咪界左出黎嘅黃色黏土痴上去做眼、鼻、口，好利害！雖然太陽伯伯唔係藍、綠色，不過呢個太陽伯伯真係好特別！
沒有留言:
張貼留言