尋日爹爹話Ambrose有少少燒，食左藥，到媽咪收工返去時己經無燒喇！不過Ambrose一路食飯一路眼眨眨，對眼由原來嘅單眼皮變左雙眼皮，都知佢一定好眼瞓啦！問親Ambrose係咪好眼瞓，佢一定答唔係，隔一陣媽咪再問佢食完飯不如刷牙講故事同瞓覺，佢又出奇地順攤，證明佢真係好攰！
呢一晚，Ambrose十點都未夠就瞓左，真係罕有！不過媽咪成晚都唔係幾好瞓，因為要不時起身睇Ambrose會唔會發燒，真係好辛苦！
可能Ambrose早瞓，所以早醒，六點都未夠佢就坐左起身，媽咪想扮瞓唔理佢，但佢對腳叉埋黎又熱到死，媽咪起身同佢量體溫，成38.8度，唉，臨天光至發燒！即刻起身開藥俾Ambrose食，好彩而家嘅Ambrose好叻，唔使夾佢食藥，開好一杯之後俾佢飲完再俾水佢飲，無難度！好快食完藥，氹Ambrose不如瞓多陣先啦，天都未光，好彩佢又肯瞓番低，可能發燒，個人都攰d，好快佢又瞓番，真係謝天謝地，唔係媽咪真係要六點起身陪佢玩架喇！
Ambrose發燒，今日嘅芭蕾舞堂都無得上！十點幾同Ambrose睇醫生（呢次應該係媽咪第一次自己一個人帶Ambrose去睇醫生），食埋野至返屋企，佢都唔係幾好胃口，平時可以自己食，今日就唔願郁，媽咪唯有出手餵食，都食到半碗通粉嘅！返到屋企，Ambrose攰到扒响沙發上面，氹到佢食藥，好順利，但要佢起身換埋衫入房瞓，佢就唔肯，成個人瞓响沙發上面唔想郁，真係好可憐！無法啦，媽咪叫佢扮bb仔就咁瞓响度，媽咪就咁同佢換好衫，抱佢起身行入房瞓！只見Ambrose入左房瞓响爹爹隔離，自己拉被蓋上身，之後就無郁過喇！隔五分鐘，媽咪再入房睇，Ambrose仍然係同一個姿態，原來真係瞓著左！
今晚重買左飛睇個光影劇添，都唔知去唔去好，始終又約左Ellen姨姨，又要去元朗，媽咪唔去，可能只有Ellen姨姨自己去！見Ambrose點幾瞓醒覺，又好似好精神咁，跳跳紮，同平時都無咩大分別，媽咪又一早打算去睇光影劇都係打的去打的返，Ambrose自己又成日話要睇“風水戲”（講唔正），總之連佢都好似好想去睇戲咁，所以諗住食完晏再捉Ambrose瞓多陣抖吓，夜晚都係照去睇劇啦！
點知Ambrose呢轉可能唔太眼瞓，鬼打咁精神，响張床又行又跳又唱，攪到爹爹媽咪都無覺好瞓，過左好耐，佢至瞓著！果時都已經四點幾，五點幾就話出發喇！
五點幾要格硬叫醒Ambrose，係有d唔忍心，不過佢自己話要去睇戲，如果真係唔去，媽咪驚佢會嬲囉！結果，被人叫醒左嘅Ambrose心情真係麻麻地，比起平時有少少扭擰啦，證明佢真係好眼瞓，哈哈！無法啦，鬼叫佢唔快d去瞓覺咩，但佢都叫好合作，一聽到話出去睇戲，佢都肯起身換衫出門口！
約左Ellen姨姨一齊去睇光影戲，但要食d野先，Ambrose死都話唔食，媽咪同佢講，你唔食媽咪都要食，媽咪好肚餓！真係好想讚Ambrose，病左都咁乖，佢真係好好耐性，自己真係唔食，但有耐性等媽咪食完，重要好有耐性等call的士到！
不過呢個時候，媽咪已經發覺Ambrose個鼻開始塞喇，佢自己都話唔抖到氣，但媽咪都無野可以做，的士又到左，都係照去啦！
點知去到又要等一大餐至入得場，入左場又要等一餐至開始，真係等到Ambrose狀態開始轉壞，唉！個劇到中間嘅時侯，Ambrose已經叫走，不過浠浠期待左好耐嘅動物未出現，佢又唔想走住，所以媽咪唯有出動藍莓乾等Ambrose有野食吓可以坐耐d！
不過由於個劇有少少悶，到最後睇完動物，未正式完嘅時侯，我地都走左！一出門口就截的士返去！原本之前諗住睇完戲同Ellen姨姨一齊食埋野至回家，不過見Ambrose真係抖氣都抖唔到，係咁用口抖大氣，成晚都唉聲嘆氣咁，眼仔又紅紅同好攰，探熱至知佢又再發燒，又係成38.6，唉，都係唔食喇，直返屋企就算！
無咩胃口嘅Ambrose，都係唔願自己食野，又係媽咪餵，好彩都重肯食白粥！食完粥食埋藥，本來想同Ambrose沖涼，但佢又係唔肯，重開始扭計！平時Ambrose好少扭計，所以媽咪都估佢應該好攰，唔想郁得好緊要！所以媽咪勉強同佢換左衫用濕布抺左身，就直接入房瞓。今晚Ambrose要做隻污糟豬喇，但呢隻豬咁病都不忙要媽咪講埋故事先瞓，真係服左佢！
Ambrose又係好快瞓著左，不過成晚好醒瞓，媽咪未去瞓覺，佢已經斷斷續續醒左三次搵媽咪，最後，媽咪投降喇，唔上網，快趣又同佢食多次藥，一齊去瞓覺！
沒有留言:
張貼留言