長槍

之前爹爹買左枝有聲又有光嘅短槍俾Ambrose玩，媽咪嫌太嘈，所以收埋左，直至早排執玩具又攞左過婆婆度，諗住就算玩都係一星期過去一次，都可以接受嘅！Ambrose發現番果枝短槍後，真係好鍾意，成日去到婆婆度都即時去摷槍，又成日話想將枝槍攞返屋企，梗係唔得啦，嘈到死，點可以帶佢返屋企日開夜開架！

 

星期日同姑姐去反斗城行，姑姐發現清貨區有枝長槍，即刻攞左俾Ambrose玩，Ambrose一見到就兩眼發光，係咁揸住唔放，姑姐見佢咁鍾意，就話買俾佢喇！枝槍原價$99.9，特價只係$50，真係好抵，不過媽咪都好猶豫，係咪俾姑姐買好呢？始終枝槍有聲，真係好煩架麻！不過叫Ambrose放番低都好難，佢真係好熱愛槍。平時行反斗城唔會扭買玩具，媽咪想買玩具俾佢問佢要唔要都話唔要，叫佢走又好合作，所以媽咪見佢唔肯放低枝槍，都知佢真係好鍾意！唔買都唔得啦！但媽咪唔想佢覺得唔肯放手大人就會買俾佢，所以同Ambrose講，要佢擺枝槍上車仔度，期間唔可以再攞出黎玩，行完睇完反斗城之後，如果佢真係肯唔攪枝槍，咁媽咪先俾姑姐俾錢買！

 

結果，Ambrose有幾次都好想攞枝槍出黎玩，媽咪即時提佢，响度玩左就唔俾錢買走，佢又真係即時縮手，哈哈！不過因為佢太鍾意枝槍，好多時，佢都行番埋架車仔度，用一隻手掂住枝槍跟住行，好似守護住枝槍咁，無走去睇其他玩具，真係好好笑！

 

最後，當然買左呢枝長槍俾Ambrose，佢不知幾開心，成日攞住玩，又成日擺唔同pose，超攪笑！呢個Ambrose，真係好男仔，鍾意玩果d野全部都係典型男仔玩具！