一次意外

唉！自從上次爹爹同Ambrose落公園踩單車，响無搽蚊怕水無貼蚊貼情況之下，兩仔爺俾蚊喪咬！爹爹通常被蚊咬完第二日就好返，果晚見Ambrose雖然有好多粒蚊癩，不過見唔太嚴重，就以為佢都會同爹爹一樣第二日無野！點知第二朝d蚊癩又紅又腫，好嚴重，原來Ambrose同媽咪一樣，一係唔易被咬，一咬真係手尾長！

 

經過左之前不斷搽藥膏，抓損，貼普通膠布，攪左一大餐都唔好，最後，用左Ellen姨姨嘅日本止痕貼，先至有少少進展，起碼貼實哂蚊癩無得抓損都係好！亦因為深怕Ambrose抓損傷口難好，媽咪幾乎同佢24小時貼住，重要一貼貼足幾日，務求快d令傷口埋口！點知，傷口係就係埋口，但可能因為止痕貼一貼就幾日，即使每日更換，但沖涼搣左沖完涼好快就貼番，皮膚有得抖氣時間唔多，所以有幾撻傷口係就係埋左口，但周圍嘅皮膚又紅哂，足足一個止痕貼咁大！結果，又痕過，重要今次唔可以再貼膠布喇！

 

真係頭都大埋！無法之下，又用吓朋友介紹嘅雙飛人藥水，但其實又唔係想像中咁有效，叫好過無啦！有時媽咪懷疑Ambrose成日抓，根本唔係真係痕，因為有d傷口真係埋緊口，無咩理由重係咁痕架麻，應該係佢心理作用。無野可以做之下，唯有同Ambrose搽番細個敏感出粒粒時用過有效嘅Physiogel Cream，再著長褲，減少佢半夜抓損嘅機會，因為有媽咪話乾都可能身痕喎，所以咪當同佢補濕囉！

 

如是者試左幾日，其實都重見佢半夜會抓，但都逐漸好緊！不過真係好慢！再加埋有時去姑姐家，唔多唔少又咬 一兩 啖，真係好難完全好番哂！有幾撻重要傷得好深，同佢搽雙飛人時Ambrose都話好痛（拿到痛）！最後媽咪發覺著長褲嘅Ambrose仍然可以伸高雙腳掀起褲管係咁抓，真係煩到唔知可以點幫佢！

 

最後媽咪見敏感過左，又買黎3M防水膠布，响傷口好深果幾撻到貼上，成張膠布密封住同皮膚緊貼，Ambrose要抓都好難，如是者又係幾日，終於都見佢嘅傷口就黎好喇！

 

呢一次意外，真係搞左個幾月喇，而家Ambrose手手腳腳都係印，重有幾個傷口重未好得哂，真係好慘好慘！