近日爹爹覺得張床好似有野咬，明明床單都係新換嘅，總係瞓到身痕咁！之前都有諗過換左張床肉，反正張野都唔係瞓得舒服，趁換床肉可順便轉埋尺寸，瞓得舒服d！不過換床肉又要換埋張床，都唔係一時三刻可以換到，Ambrose又重會偶然瞓覺尿床，換左新嘅尿濕左又係心痛！同Ellen姨姨講開，佢就提議借佢果部“神級”Rainbow俾我地，吸吓張床乾淨d先，捱多陣等Ambrose唔尿床再換過哂d野重好！
就係咁，爹爹就攞左呢部價值二萬幾蚊嘅Rainbow返黎！吸完張大床，成缸水就變到一池嘔吐物咁，起哂泡，好似蛋糕咁，發到好高！原來我地每日瞓果張床，真係好污糟，唔怪得知爹爹呢排鼻敏感持續發作啦！不過又好奇怪，爹爹話吸其他床肉就比較乾淨，無雙人床咁誇喎，唔知係咪因為雙人床係彈簧床，有好多空間去儲存呢d污糟野，而其他床肉係乳膠，所以無咩位藏塵蟎呢？
呢部Rainbow早响Ambrose出世之後有人上門推銷過，媽咪都覺得好好，但係個價錢真係神級囉，二萬幾蚊，真係唔捨得！錢，其實都係其次，最重要係，部野真係好大部，個樣又好笨，諗黎諗去，真係諗唔到咁大部野可以收去邊唔阻地方，所以最終都無買！今次借用，爹爹都好impressed，連爹爹都曾經都有一刻諗買番部，不過就係得一刻囉，現實歸現實，部機擺邊先？！
到媽咪返到屋企，又試用吓，真係幾好用，不過個電床扒，都真係幾重，爹爹問，你會唔會咁神心用部機？一個月會唔會開到一次？媽咪放低個扒話，應該唔會，順手同爹爹講，都係pack番佢還番俾Ellen姨姨喇，好重，都唔好玩嘅！哈哈！
好彩Ellen姨姨住得近，又肯借部咁貴嘅機我地用，咁即係我地唔使買啦，下次可以再問佢借都得，嘩哈哈！
沒有留言:
張貼留言