今日爹爹放假，去完畫畫無咩節目，見天氣幾好咁，所以決定唔瞓晏覺，執埋d野同埋表姐一齊去沙灘玩！
不過執吓呢樣執吓果樣，又要兜姑姐一家返屋企再執佢地嘅野，再要叫埋等埋食埋外賣，出得發已經係近四點嘅事，中間重要見個天開始有少少陰，幾驚食完野出得發果時先落雨呀！
好好彩，順利出到發，不過竟然唔記得帶地墊，真係失策！攪到隋身行李要就咁放响沙上，都幾污糟！今次有爹爹响度，所以帶左枝水槍玩，Ambrose
不知幾開心，好彩佢都知道唔可以射人，最多只可以射人對腳，情況都幾易控制。今次媽咪又帶埋泡泡水俾Ambrose玩，佢呢排都有時話想玩架喇，今日，一次過滿足佢幾大願望啦，又有水槍玩，又有泡泡水玩同埋玩沙！
Ambrose其實都幾攪笑，佢一時就走左去玩槍，玩玩吓槍佢又會走左去玩沙，見到有泡泡水玩又玩左一陣，但玩左陣之後又回歸玩沙，證明佢都對玩沙幾有興趣，睇黎，今個暑假開始，又多樣唔使錢嘅節目喇！
一路玩沙，個天都有陽光，但偶然抬頭一望，見到個天有舊雲，d太陽光就响雲邊射出黎，所以望落個天好似有條閃電咁，好得意！玩左一個鐘，雖然重有陽光，但聽見行雷聲，都係快d準備走人喇！响洗腳處洗左一大餐開始行返去姑姐屋企，已經開始有少少雨，好彩過對面馬路就係！一返到姑姐屋企，開始落大雨喇！好彩無話再玩多陣咋，唔係湊住三隻小魔怪又咁多行李再落埋大雨，都唔知點攪呀！
沒有留言:
張貼留言