今日爹爹要返工，媽咪要同Ambrose搵節目！其實之前已經好想同Ambrose去沙灘玩，但次次都未能成事！今日畫完畫，媽咪終於的起心肝，同Ambrose講要返屋企瞓陣覺，瞓醒就同佢去沙灘。唔知點解Ambrose好似好恨去沙灘咁，明明上年同佢去就喊足全程，以為佢會有唔好經驗，會無咩興趣。唔通真係睇得果本“沙灘樂趣多”多？所以佢好想去？
有得去沙灘嘅Ambrose，真係好合作，返到屋企換好哂衫再响床上面玩一陣講一陣就瞓著左喇！四點起身，重好好陽光，但姑姐放飛機話燒野食唔去，媽咪諗左一陣，見Ambrose聽見話無得去個樣好失望，都係算啦，佢地唔去自己同Ambrose去都得嘅！所以即刻彈起身執埋d野同Ambrose出發去！不過出門之後就發現個太陽開始收，天色有少少陰咁，心諗千祁唔好落雨呀！
好好彩，無落雨，又唔曬，重有d微風吹送，好舒服！Ambrose著住拖鞋一去到沙灘就入哂沙，佢即時停低，個樣好似好困擾咁，媽咪心諗，唔係又驚沙下麻？媽咪同Ambrose講係咁架，但佢都係烏低身係咁撥走d沙，最後佢索性話唔著鞋，重好啦！
估唔到Ambrose真係唔怕沙，雖然有時d沙好吉腳佢都會停一停，但至少唔會好似上年咁成個人硬哂又喊哂！媽咪响d大石邊停低舖墊，Ambrose就開始玩沙喇！呢個小魔怪，竟然無視塊墊响上面行黎行去，真係俾佢激死！玩左一陣，姑姐都黎左，三表姐弟見到面又無話好興奮咁，好奇怪，大家都各有各玩，無咩交流喎！
大概玩左一個鐘，救生員放工喇，我地都係時候走喇！問Ambrose玩沙好唔好玩，佢話好玩，不過媽咪又唔覺得佢特別high喎！下次再去過睇吓佢係咪真係鍾意玩先！
沒有留言:
張貼留言