今堂畫飛機，開正Ambrose果瓣啦！
見隻飛機殼畫得咁是正，重諗住唔係Ambrose畫架喇，問吓老師，老師話係Ambrose自己畫架飛機，果然，鍾意嘅野係畫好少少，起碼都有個形狀睇到！哈哈！
今堂學校無啦啦派左張評估表俾媽咪，媽咪完全唔知黎畫畫都會做評估，都幾surprised，但同時又對呢度加分！雖然感覺上呢度始終唔係好專業教畫，但呢度環境真係一流，又乾淨又安全，而且重可以俾家長响中心入面坐住等放學，真係唔多地方可以咁樣！媽咪對於Ambrose學畫畫都無咩expectation，始終佢都重係細，小肌肉都未係發展好好，畫嘅野可以似得去邊丫？！所以份評估，都唔係好focus佢嘅畫功，而係上堂情況！老師話Ambrose好快就同同學老師混熟，好快投入到，而且同同學老師關係果欄重要係融洽，呢點已教媽咪好開心！因為要佢咁細個自己上堂，投入到真係好重要，投入到嘅話，要學好係時間同興趣問題，唔使再花時間去慢慢適應！而關係融洽，即代表佢都應該鍾意黎呢度學畫畫，同同學仔老師相處唔錯！坦白講，媽咪覺得小朋友無扭計，投入同易相處，老師都會鍾意d，某程度上都係著數少少！
不過老師都有評Ambrose撕紙動作唔多得，要多加訓練，唉，呢個媽咪都知，不過Ambrose真係未開竅，媽咪都唔知點教佢好，頭痛！
沒有留言:
張貼留言