今朝早九點三車，我起左身之後梳洗好叫醒爹爹起身，Ambrose响爹爹起身無耐自己都醒埋，由於之前懶床，比原定要起身時間遲左，所以執埋野換好衫，黎唔切食早餐就出左門口喇，好彩奶奶有買三文治，可以上左車先食！
响站頭匯合埋姑姐一家，等左一陣就可以上車，重以為係直通車唔使落車，點知路人甲話架車去到深圳灣係要落車過關再轉另一架車。而家嘅深圳灣真係超多人，一落車就有好多人衝入去過關去廁所轉車，其實都幾混亂。無驚無險再上車，全程車程頭尾計埋轉車過關大概都成三個鐘，比想像中要慢。
落左車嘅Ambrose超級興奮，不停咁叫，行到去個水池有個石像又叫一大餐，姑丈話佢好失禮，哈哈！爹爹一馬當先去check in，之後竟然話無房，將我地間房upgrade左去貴賓房，但貴賓房要再坐鐡車去，並唔係大堂本座，我地有d擔心太遠出入會麻煩，但接待又話唔係太遠，行番去本座三分鐘左右，係揸車要兜路至會覺得遠，加上個接待不斷話可以坐鐡車來回，令我地都放心跟佢去貴賓房。但一入貴賓樓就覺得果度好靜，雖然清靜係好，不過我地不由得諗我地有無俾人搵笨囉！去到九樓至發現，雖然我地兩間房房號係相連，但原來啱啱係長走廊嘅一頭一尾無雷公咁遠，當然即時要佢地再安排過啦！所以一行人都係入左其中一間房安頓d野先，只見房門一開，嘩，果然係貴賓房！好大間房呀！一推開門係玄關，行入少少嘅右手面係書台椅子，一大橫排嘅鏡同矮椅子，應該係梳妝台，行入去，兩大張四尺床分開安放，房間最盡係張長身貴妃椅，夠一個唔高嘅人瞓，床嘅對面係洗手間，洗手間成長方形，長方形兩邊分別係衛生間同浴間，中間橫排就係兩大個洗手盤大鏡子，非常濶落。浴間門隔離有度門可通向出面大露台，個露台之大，係大過屋企間大房，露台放置左一個大浴缸，我諗夏天嘅時候真係可以走出黎浸吓浴。間房係對正長隆水上樂園，雖然未開，但設施係好彩色，望落都好似好好玩咁！
我地一路參觀間房，一路都重諗緊自己有無俾人搵笨，始終唔响本座好似無咁方便，不過爹爹就話佢之前上過網睇過d房，我地原先真係應該唔係住呢隻房，呢隻房真係好大同好靚，酒店應該無騙我地，只不過唔知唔upgrade可唔可以強烈要求住本座囉！
我地一路講二表姐同Ambrose就一路行左出露台，當然我地梗係跟住去啦！二表姐係咁擺post要人同佢影相，而Ambrose見到個浴缸又係咁扶住想爬入去，我見佢咁樣，咪索性抱左Ambrose同二表姐入浴缸玩囉！玩得一陣之後，大表姐都衝左出黎爬埋入個浴缸度，三個人好開心咁跳跳紮，而原本揸住攝錄機嘅爹爹就唔知行左去邊無影住，我就啱啱擰轉身望吓周圍嘅野時突然聽到尖叫聲同水聲，真係說時遲那時快，電光火石之間見到浴缸個水龍頭俾人扭開左標緊水，大表姐已經响浴缸外地下喊，我同其他人就拿拿聲抱起二表姐同Ambrose。大家都好緊張咁抱走兩個細，睇佢地有無濕，可憐地下個大表姐就喊哂口未有人理佢，諗起都好笑呀！原先我重諗住大表姐唔會亂攪個水制，Ambrose就一定唔識開制，我以為二表姐都唔識，所以都無諗過有問題，至會一時擰轉身無望實，點知就係呢幾秒，二表姐走去扭開個水制，條水柱就標出黎，大表姐識行識走識反應就走都走唔切仆左出去浴缸外地下，所以喊哂，而細果兩個都唔知咩事重阿呆咁企响入面，我地驚佢地整濕哂衫褲襪當然第一時間抱走佢地，所以未黎得及呵番大表姐，呢個場面真係笑死左呀！最衰無影到啦！
小插曲之後，接待按門鈴通知我地可以安排隔離房俾我地，實在太好喇！姑姐一家過去安頓好之後，我地一行九人就出去搵野食喇！落到樓下大堂時問接待，係咪有車可以載我地去番本座，佢竟然話唔係，又話要book，又話要等，我地個個都肚餓唔想等，聽佢地話行番過去都係幾分鐘，咁就一行人行落山，體驗吓有幾遠。不過因為我地推住bb車，所以都仍然要兜路行落去，唔可以直接行樓梯，咁其實行落山都唔係真係好遠，都叫方便嘅！去到本座我地見有buffet食，不過距離果節完結時間都只係有一個鐘左右，我地都係唔食buffet。經知客介紹，我地去左飲茶，不過因為我地七點半要睇馬戲，要睇到成九點，而夜晚dinner buffet又只係去到九點半，所以似乎要食dinner buffet嘅話就要早d食，所以我地呢一餐雖然個個都肚餓，但為左個dinner buffet，大家都係食到唔肚餓但又未係好飽嘅狀態就算喇！
食完野，我地又行番去book dinner buffet，點知去到book大人小孩時，佢地竟然話Ambrose都要收費。原來佢地食buffet係計高度，唔係計年齡，我地之前只係預大表姐要收費，二表姐同Ambrose咁細，一定唔使，點知佢地一行埋去個度高尺度，過哂佢地指定嘅0.7米，即70cm，就一定要收費。我地望住個尺都啞左，70cm其實真係好矮喎，Ambrose出世都有成50cm啦，70cm嘅時候，我估佢都未識得食固體囉！70cm要收費真係好唔合理，我地再問個知客，話Ambrose得果歲幾人仔，食得d咩野，真係要收費？佢望住Ambrose都知道佢重好細，佢好無奈話係呀，佢地公司係以高度去界定收唔收費喎！就係咁，我地決定唔食dinner buffet喇！兩個咁細嘅小朋友都要俾錢，實在係唔抵丫麻，講唔過囉！
行左一陣又影左d相，我地都係決定回程返房休息，要俾細路瞓吓覺夜晚先有精神睇馬戲。返到酒店房，我地索性將兩張四呎床拍埋一齊，咁就算Ambrose唔瞓bb床同我地瞓，都唔怕太迫佢會碌左落床。第一次瞓八呎床，真係好舒服，好快我地一家三口就瞓著左喇！
近五點鐘時奶奶拍門我地至識起身，真係唔想郁，但無辦法啦，要食左野至入場睇馬戲，真係要出門口架喇！
今次我地唔推bb車，一行九人又浩浩蕩蕩行去本座度搵野食，所以今次可以行樓梯落山，原來行樓梯係快d架，咁即使去左山頂住其實都幾方便囉！不過奶奶就話夜晚返黎黑麻麻要行上山唔係幾好囉，我又覺得ok啦，間房大左，都係返黎黑少少，一陣之麻，又唔係成日行出行入，都無所謂啦！行到去本座睇吓牌，原來有個地方叫彩蝶谷响本座隔離有好多唔同野食，咁我地就決定去果度食喇！去到時發現有得任食打邊爐或者散叫野食，本來都好想打邊爐，但我地又遇著同一個問題，就係打邊爐係任食，任食嘅話小朋友都係要度高至決定收唔收費。今次個知客就無要我地一定要行埋去度，佢憑肉眼望完幾個細路之後，就話Ambrose唔收費，大二表姐都收費。我地諗吓度吓，最尾都係覺得散叫野食抵d，同埋時間又易少少掌握到，都係散叫算喇！侍應知我地係去睇馬戲，不斷催我地快d落單，話驚出餸會遲！
原來大二表姐返左房唔瞓覺，係咁掛住玩，到出黎食飯都無瞓過覺，所以幾乎一坐低之後，大表姐係即時瞓著左，而二表姐就係中段時間瞓著埋，所以我地決定唔去任食buffet同邊爐真係明智，因為兩個要收費嘅小朋友最尾都無食過野就响果度得個瞓字，哈哈！
食完飯攪掂埋d小朋友換片去廁所，慢慢行大概十分鐘就到左馬戲場地。真係好多人，我地排左隊過閘時先至知張飛要去番售票處換番正飛，真係麻鬼煩，咁樣攪一攪又花左少少時間，原本重係諗住早少少入場霸番個好少少嘅位，樣樣都比預期中花多左時間，到最後我地行去搵位時，其實好多都已經full哂，前排都唔使講無，中座都無埋，其實應該話山頂位都要行到好遠唔係場中先有一行連住嘅坐位，係山頂位最後一行，但無法啦，再行遠d都唔知重有無連位，所以我地見有就照坐喇！我地個位後面有個欄杆，欄外面有兩張長椅，係山頂之最嘅位，好明顯係額外加上去嘅位，無得挨嘅，呢行位都响我地坐好之後坐滿左人喇！
好快，馬戲開始喇，响中座位有條濶行人路，果度有好多唔同公仔行左出黎對住觀察勁歌熱舞。之後班人走哂，中間個台就正式開始表演。一開始係有個類似皇后嘅人物出黎，佢個寶座左右分別有一隻獅子同老虎，兩隻動物都好乖咁坐左响度，不過其實係佢兩隻動物隔離有人不斷餵野食，所以至咁乖。寶座放响圓形台中央，而同一時間有一隊馬不斷响度兜圈跑，佢地一出場，Ambrose已經“err”喇，可能呢個情景同佢本DWE storybook入面有一場係circus嘅好似，只係本書講馬上面係beautiful ladies好似跳ballet咁樣，而呢度唔係，不過都幾類似！早知攞埋本書去旅行啦，可以睇完馬戲再睇本書加深吓丫麻！之後真係有女仔坐在馬上，一路兜圈一路掉絲巾落地，掉好一圈之後，佢地就在馬上拗身面向天咁執番哂d巾，好勁呀！
之後有空中飛人，雖然佢地係咁飛黎飛去，我都好似係第一次睇，但可能佢地飛左都幾耐，有少少悶咁！再黎就係黑熊表演，好犀利，d黑熊係可以企起身好似人咁行路，但個屁股又扭吓扭吓，都幾攪笑，有d黑熊就踩單車，似足DWE嘅Bongo咁，除左踩單車，最得意就係黑熊拖住架人力兜，兜上又坐左隻黑熊，隻黑熊拖拖吓自己走左去，坐响度果隻唯有落兜自己去拖，好鬼馬！之後set左個鐡圈，以為跳火圈，但唔係，只係普通跳圈，不過對於黑熊黎講都已經好叻！估唔到平時形象好兇惡嘅黑熊，都有咁可愛嘅一面。最後，又set左一條繩，有隻黑熊企左响上面，四腳踏繩咁向左向右行黎行去，真係名副其實嘅踩鋼線，行左一輪都唔知佢做咩，但後尾見佢嚐試前兩手放開企起都唔成功，先知佢原來係想搵到個平衡點兩腳踩繩成個企起，只見佢一路都腳震震咁企唔起，心裡頭又覺得黑熊好慘，其實佢地本身係野生動物，呢d表演都唔知經過幾多訓練先至做到，唔知受左幾多苦，而家為左要踩鋼線企起身腳都震埋，真係忍唔住講句“搵食艱難”，有d慘不忍睹！黑熊當然最後都可以企起身啦！最後就係黑熊揸電單車作結。
之後就無啦啦有d唔同動物行左出黎，其實佢地未出場前我地坐山頂都聞到一大陣動物味，都知有動物要出場。出黎嘅動物有長頸鹿、斑馬、羚羊、駱駝，不過望落係唔知做咩架，佢地出一出黎就返入去。再之後就有人騎住隻河馬出黎，又係行一圈入返去，跟住係馬騮仔，豬仔同一隻大肥豬，行完又入番去，不過因為配樂得意，d動物又全部識得跟住指定地方行一圈，其實都幾叻架喇！
再黎係隻猩猩同小丑做d攪笑動作，加埋配樂，又係幾生鬼嘅！
接住就係有一隊黑白馬，裝飾得靚靚地跑出黎，開頭見佢地都係圍圈跑，無咩特別，點知佢地跑跑吓識得自己變陣，由單行跑變到去雙行再變三隻並排咁跑，跑到咁上下又慢慢變番雙行再單行，都幾神奇，因為唔見有人去做d咩令佢地知時候變陣，睇落好似好合拍！不過跑得一陣我就見白馬最尾兩隻成日都痴埋一齊，跑最尾果隻成日迫住佢之前果隻，有時都有少少走亂左，不過整體真係幾好，最重要係d馬其實好靚，長毛架！跑到咁上下終於都收隊，之後有隻黑馬出黎做單腳屈膝動作，再有隻白馬出黎，做雙腳離地企起動作，呢個環節又完結喇！
過場有堆黑人跑左出黎玩叠羅漢，之後就係之前上you tube睇過嘅風火輪喇！成個風火輪除左中間個圈之外重有四個圈，個風火輪不停慢慢轉動，表演人逐一上圈，佢地除左响圈入面跑，亦都爬左上圈上面做高難度動作例如跳繩，嘩，真係睇見佢地都驚啦，個風火輪係好高，而且又不斷咁轉，佢地升到最高果度我諗有幾層樓咁高，重要响上面個圈外好似倉鼠咁跑，成日都好驚佢地唔小心跌左落黎！佢地跑跑吓個輪重出埋火花，全場暗哂，雖然睇落好似幾靚，我覺得真係好危險，又再一次諗起“搵食艱難”！之後最恐怖係佢地竟然攞左個黑色頭套出黎笠住個頭响圈外跑，我睇到自己都心跳加速呀！
風火輪完左之後，就係人扮企鵝跳水表演，其實都幾得意，最驚嘅係最尾有一個人原來响個馬戲帳篷頂standby，準備由果度咁高跳落水，真係超高，根本唔可以想像點跳落去呀，重要下面個水池，其實只係圍住個台嘅一條幼幼河道，我真係唔係幾夠膽睇囉！個感覺就好似見到有人要跳樓自殺咁，當然，最尾又係無驚無險完成左啦！成場馬戲去到呢度已經到左尾聲，中座走廊位又有唔同公仔走出黎唱歌跳舞，最得意係有隻象行出黎，佢個鼻係不停扭扭吓郁，好好笑！重有就係有一群紅鶴亦都跟大隊行出黎，真係估唔到喎！最尾，好多人都開始走緊，突然間好多雀鳥由唔知係咪台度向山頂飛出黎，好彩我未企起身，唔係可能成隻雀撞左埋黎塊面度，嚇都嚇死呀，我見到有隻唔知咩雀，正正响奶奶頭上方少少飛過，呢一幕真係夠哂surprised喇！
個半鐘嘅馬戲其實真係幾好睇，可能同未睇過有關啦！Ambrose今日都比較攰，雖然佢都瞓左一陣至出黎，不過可能係比我地嘈醒左唔係自然醒，佢去到嘅反應都係一般，如果個場黑左暗左，佢都會想喊想走咁，個台一有番光又ok無野，對於佢今日舟車勞動，成日都係坐响度無得郁動黎講，佢嘅表現都唔錯喇，可能等佢再大d明多d再睇過會更有趣嘅！成個馬戲最令我不滿嘅係前兩行竟然有人耐唔時揸住部手機企起身拍片，阻住哂我地d視線，同埋佢地重要食煙，真係好乞人憎囉！
睇完馬戲返酒店playroom玩左一陣就返房白白豬，三個小朋友又玩埋一埋，姑姐將d被攝哂落兩張床嘅中間，俾班小朋友行障礙賽，玩到顛哂！最尾，姑丈落逐客令，話Ambrose要食奶奶，要表姐們同佢say bye bye，哈哈，我地都無話佢要飲奶奶，好明顯係趕我地返房啦！
呢一晚，Ambrose一定好攰，先係早起無咩點瞓，又坐車坐咁耐，又睇馬戲不斷有唔同射燈射黎射去，又去左表姐房玩到十一點幾，佢飲完枝奶奶一陣就瞓著左覺喇！
