今晚收工之後去左反斗城行吓，原本都係想睇吓玩具bb，我想買個比較男仔少少嘅bb俾Ambrose，但奈何好多地方包括反斗城嘅bb都係女仔，重要係好多野都係粉紅色，所以失望而回。當我走緊嘅時候，無啦啦俾我見到有架車仔，遠望見有bb公仔配件，所以都有行埋去睇，見入面全部都係紅牌特價貨，不過無野啱都諗住走架喇！點知我一個轉身發現後面個架全部都係特價貨，咁又八掛行埋去睇埋。嘩！好彩有八掛去睇咋！我行埋去就見到有盒leap frog嘅fridge phonics，我好耐之前已經想買架喇，不過覺得一部機加二十六個字母，只係教letter sounds，賣成$199，好似好貴咁，等左好耐都無特價，都已經諗住算啦，自己教英文字母都得，無謂花成二百蚊買啦！眼前呢盒fridge phonics，機款應該係舊款，新款係白綠色有隻狗仔，而呢部係黃綠色，係太陽形狀加一舊雲，其實我覺得重靚過新款，哈哈！望吓盒面寫住“盒身殘舊”，特價係$90，比起正價平成一半有多，一百蚊都唔使有部發聲機加二十六個英文字母磁貼，真係超值呀！即刻諗係咪壞架，但試開過又work架喎，我諗住可能做過display啦，都無所謂，最緊要係work，所以一手揸實，好開心咁去比錢！
返到屋企開個fridge phonics俾Ambrose玩，佢都好似好有興趣咁，係咁入係咁按個字母聽，見到佢玩得咁開心，自己又執到平野，重點係呢樣野自己一直都好想買嘅，真係超開心呀！
今晚，終於攞左之前上bb talk時嘅贈品－playskool嘅積木台出黎俾Ambrose玩，佢見到個盒，已經好心急咁哄埋黎催我快d開俾佢玩喇！盒積木係膠做，唔同形狀一塊塊，每塊都係一粒一粒所組成，而砌呢d膠積木係要少少技巧，要就啱個位兩塊積木先可以緊扣痴埋一齊，如果唔係都會散開，我自己都未玩過呢d積木，我玩時就覺得都有d難，點知見Ambrose好似好易咁叠埋哂一齊，真係服左佢喇！不過呢隻積木好似有少少唔好，佢可以砌埋成架車咁，但其實郁兩郁又好易散咁，好彩係贈品囉！呢張積木台仔中間有個圓形組件有個製可按，一按之後呢個圓形組件會同隔離兩個圓形好似齒輪咁一齊轉，Ambrose成晚都係按果個製又唔俾個圓形轉，真係激死！不過佢都醒，佢將積木砌上兩個圓形上，砌到高一高，再去按製，咁果兩棟野就跟住轉，佢就鬼咁開心！
由早排開始，Ambrose已經開始識砌mega block同積木並唔係只可以一粒叠一粒單一咁上，而係可以砌成多棟有意思嘅物體，而且重知道放左半圓形或三角形之後，再唔可以放任何積木上去。呢兩盒野由佢咩都唔識，只係識咬同食就已經放左出黎俾佢玩，到而家有咁嘅認知，真係有d感動！呢排佢更加係日日都要玩mega block同積木，令我又再覺得玩具真係要放出黎，佢得閒摸吓掂吓，過一排佢就會識玩同鍾意玩架喇！今晚佢又再砌積木，佢砌左好幾棟樓出黎，好似城堡咁，砌完自己都滿意到行出行入都好小心唔好撞散，我都忍唔住影低相留念，臨瞓都無要求佢收番積木，哈哈！
Ambrose今晚就玩具大豐收，爹爹都唔弱，今日買左部video cam，佢話而家Ambrose好多表情，又周身郁，想同佢拍多d片俾佢第日自己睇番，部單鏡其實都拍到短片，但無呢部cam咁方便同輕便，對於我呢d電子產品白痴，都應該易handle到，今晚爹爹就開始不斷拍Ambrose。Ambrose都唔執輸，我地有另一部cheap cheap video cam係電話服務續約時所送嘅，一直唔用就係留俾Ambrose當玩具玩，Ambrose見爹爹係咁揸住部機拍佢，佢已經好想攞黎玩，我地醒起呢部cheap機，即刻已經攞出黎，Ambrose係咁將部機貼住自己係咁望入去，反拍爹爹咁款，睇到佢咁樣真係忍唔住笑呀！Ambrose真係越黎越得意喇！
沒有留言:
張貼留言