數字及英文字母手抓板

之前見Ambrose玩圖形手抓板玩得唔錯，為左睇吓佢係認到顏色定認到形狀先入到手抓板，我又走去反斗城買顏色手抓板、數字以及英文字母手抓板，不過為免太難，我都只係開左顏色手抓板俾佢試吓先。估唔到佢玩左一日就已經識玩，已經肯定左佢係識分形狀同顏色，見佢玩得越黎越熟同快，我又加埋數字手抓板。數字對於Ambrose黎講係難d，因為形狀好唔同，同埋手抓板係數字，而個孔入面係唔同數量嘅公仔。無顏色手抓板玩一日已經識哂咁利害，佢都玩左成個幾兩個星期，先至可以唔使人幫放好哂。開頭玩嘅時候佢應該係以為配對顏色，佢會將手抓板數字所屬顏色放落相同顏色公仔嘅孔度，結果梗係唔啱啦，經過奶奶平日日頭同佢玩，糾正佢，佢先至識得玩，越黎越有進步！

見Ambrose連數字手抓板都識得玩，爹爹話不如攞埋英文字母手抓板出黎俾佢玩啦！因為之前買返黎第一晚試玩過，Ambrose都只係對板上面嘅公仔有興趣，又成日攞起個手抓板睇孔入面果公仔，我果時嘅結論係佢掛住睇公仔唔係玩，又成日倒哂出黎，廿幾個有排執，加上見第一晚玩魚魚顏色手抓板都唔係幾順利咁，當晚已斷定Ambrose有排都未識玩字母住，都係收埋第日至玩。經過顏色同數字手抓板嘅洗禮，令爹爹相信字母都可以攞埋出黎試吓喇！

就係咁，我地將所有手抓板放哂出黎，而Ambrose又好神奇地玩左個幾禮拜，又開始識玩套英文字母手抓板，當然，因為字母形狀更多變，有時佢搵啱左個位都要花少少時間去扭返正塊板放入個孔度，其中見佢成日都好快搵到G同Q，但成日都要扭好耐先放到，而C同D，就因為佢塊板構造形狀係幾乎一樣，只係掉轉左咁，有時Ambrose無望清楚就會將C擺左响D度，要我開口話佢知係C定D，佢至睇到再去放啱佢！

自從買左同放哂呢d手抓板出黎俾Ambrose玩之後，我發覺佢都好鍾意玩，再加上佢已經識玩哂，可能真係好有滿足感，佢而家日日不斷都要我地同佢一齊玩，係咁車輪轉咁攞出黎玩，一d都唔厭，有時一玩又好耐都唔願停，我地都悶哂！不過見佢玩得咁好，都好慶幸當初無攞番d板去反斗城換，同埋，我發覺而家嘅Ambrose學野開始快喇，真係要俾佢試多d唔同嘅野至得喇！