今晚隔離座朋友仔過左黎同Ambrose玩，唔知點解Ambrose每次响屋企同雅雯玩都好鬼顛吓，可以話精神異常亢奮！Ambrose會超high咁行黎行去，攪呢樣攪果樣，做一d平時唔係常做嘅野，好似好有表演慾咁！我地話佢好似d猩猩咁响度求偶，諸多動作引人注意！另外，Ambrose又會見人玩咩又要玩埋一份，連平時好日都唔會玩嘅滑梯，見人玩自己又走埋去，不過只係塞住條樓梯，死都唔上去“sir”落黎架！今晚佢又無啦啦發左顛，狂抆放左响屋企成個幾月嘅巴斯光年氫汽球，係咁又搥又抆，真係頂佢唔順呀！雅雯又好斯文，好幾次都俾Ambrose好粗魯嘅動作嚇到眼都眨埋，表情好好笑！
可能Ambrose同雅雯性格實在相差太遠，除左Ambrose會走去玩人地玩嘅野之外，基本上佢兩個都各自各玩。不過例外嘅係，佢地今晚竟然一齊彈琴，Ambrose係咁彈，雖然亂哂龍，但佢好落力咁狂按琴鍵，都有板有眼。最好笑係唔知邊個按著左咩製，個電子琴突然播出好hip hop嘅音樂，再配合埋Ambrose好狂野嘅演奏，真係笑到碌地呀！
玩到成十點鐘，雅雯要走喇，Ambrose好似有d唔捨得咁，佢終於肯冷靜番少少落黎，重走去餵雅雯食提子乾，可憐雅雯好似麻麻地唔太想領情，但就俾Ambrose格硬塞入咀，重附送埋口水，睇見雅雯縮埋個頭又皺哂眉硬食口水提子乾，真係好好笑！
沒有留言:
張貼留言