Shining Garden –Little Learner (第六堂)

今朝Ambrose八點半起身飲奶，飲完之後都唔願瞓，係咁爬去床尾想落床出去玩，但我同爹爹都無理佢，太眼瞓唔願郁，Ambrose出盡法寶，又叫又拍我地，又成個人坐落我地個頭度，真係俾佢激親呀！足足玩左我地成個鐘頭，Ambrose先瞓番，到十一點半佢又再醒左攪我地，今次爹爹都忍唔住起身同佢出去玩喇！其實諗番轉頭Ambrose都好慘架，瞓醒左想出去玩，爹爹同媽咪又掛住瞓到死豬咁，點整都唔起身，唯有好無奈又瞓番，哈哈！

不過由於爹爹生非滋勁痛，食完野之後無聲無息咁入左房瞓覺，留低我一個人同Ambrose玩。Ambrose呢排愛上左玩手抓板，今日我同佢一齊玩，前前後後，車輪轉玩完一個到一個，玩完又玩，玩完手抓板又玩積木，玩完積木又到mega block，玩完mega block又車輪轉玩果四塊手抓板，真係攰死我呀！咁樣玩法，Ambrose足足玩左兩個幾三個鐘呀！佢真係一d都唔嫌悶，可以不停重覆又重覆玩都有！

玩到三點鐘，又係時候叫醒爹爹起身梳洗出發上shining garden playgroup喇！爹爹可能知道我同Ambrose玩左幾個鐘頭無得抖，今次佢自告奮勇同Ambrose一齊上堂，叫我响出面抖吓！因為無入去上堂而在出面睇，所以都唔係好知佢地上堂嘅情況同Ambrose嘅反應，不過見到Ambrose唱weather song時都有做動作，都叫ok啦！

今日主題係How do flowers grow？生字應該有：flower pot / seeds / watering can / rain fall / sun shine。其實有教shovel，不過因為無寫出黎，只係俾左個玩具shovel佢地扮“畢”泥入去自己較早前裝飾嘅flower pot度。見到佢地教呢個主題，好似好深咁，唔知Ambrose明唔明呢？

今日手工係將一d棉花粒放入去之前裝飾好嘅flower pot度，再自己逐粒放種子入去，老師攞住watering can行埋黎，再同小朋友一齊淋水，呢個手工都幾得意。我地攞左個flower pot番屋企調整番棉花粒同種子位置，再放去窗台位曬太陽，我諗好快會發芽，到時再俾番Ambrose睇，呢盆係佢第一盆種嘅盆栽，都幾有意思！