粒粒

呢幾晚Ambrose都瞓得好差，半夜時份無啦啦喊，以為佢甩左個咀，塞番俾佢又發脾氣咁，有時又坐起身，有時又成個人瞓落我地個身度，佢瞓得麻麻之餘，我地重差，幾乎成晚都要起身同佢執咀，搬番好佢，同埋成晚俾人扎住或者踩住瞓，第日重要返工，真係命都無！第一晚之後我就諗緊Ambrose會唔會係出牙仔唔舒服呢，因為Ambrose平時一定唔會咁樣扭擰，加上上個月已經發現佢出緊牙，見Ellen姨姨話heihei出牙係夜晚瞓得差，所以諗緊Ambrose係咪再爆多d牙仔！第二日我都好努力叫Ambrose開口俾我睇吓，但奈何佢開個口一下又合番埋，我都趕唔切仔細望佢嘅牙仔。不過奶奶就見Ambrose身上出左粒粒，佢話可能有野咬，即刻同佢洗哂所有床單被舖。我其實都唔太信有野咬，因為Ambrose都唔係一粒半粒咁出，係一堆鞋手嘅粒粒，又唔叫嚴重，奶奶就話可能熱，但其實天氣持續都凍，Ambrose汗都無滴，無咩可能熱到出粒粒，我比較相信Ambrose係食物敏感，至於係食咩野敏感真係唔清楚。每當我問返奶奶同老公俾左d咩俾Ambrose食，佢地永遠都係話無咩特別，都唔係太想同我講咁，真係令人好氣餒。其實我會諗食物敏感都唔係咁神經緊張啫，起碼問清楚明白食左d咩，咁估吓關咩野事，下次咪試吓唔食會唔會好d，咁樣唔係重好過次次出親d唔知咩野，又要走去同佢睇醫生，但又無咩結論，都係俾敏感藥水同藥膏就打發我地走更好咩？佢地唔明白有d食物食一次食兩次可能都唔會有問題，因為如果真係敏感可能係要食到一定份量先至會發出黎，所以响佢地心目中咩都係無咩特別，咩都之前食過無問題囉！但其實可能幾日前食左嘅野要過幾日至發出黎，咁佢地又只會諗見到粒粒發出黎果日食左d咩就算，果日無食過d咩特別野，就又不了了之，又或者歸咎於小朋友皮膚係咁易敏感啦，焗到出粒粒嘅各種理由！當然，我唔係專業人員，亦都唔可以話Ambrose咁樣就一定係食物敏感,，我都係自己估估吓，可能我都有估錯，但我就唔係好高興，佢地根本唔信我講嘅野咁！已經諗可能係蛋敏感，唔食蛋，叫停埋麵包，但都係日日都食住麵包，真係無法囉！