今日行程係去動物園，因為book左回程車三點八，所以我地都要一早起身食野出發至夠時間行。Ambrose似乎一夜無夢，無咩點反瞓過，張被仔仍然响佢身上面，所以連帶我同爹爹都好好瞓，夠鐘要起身嘅時候都要懶左一陣床，哈哈！我起身梳洗完先至叫爹爹起身梳洗，Ambrose超眼瞓咁起左身，面腫眼腫又捽眼捽鼻，個樣超好笑！爹爹打過隔離房睇吓姑姐一家起身未，出乎意料之外佢地已經起哂身亦都換好衫喇！
去到白虎餐廳食自助早餐，呢個係package包埋嘅，不過由於package包嘅從來都無計小朋友，所以呢餐自助早餐，亦都唔例外要度高收費，講起都覺得攪笑，兩個大人就有包，反而小朋友係要收費！不過可能朝早人多，而且包嘅早餐又無lunch buffet同dinner buffet咁賺錢，今次二表姐同Ambrose都係可以免費，咁就差唔多！不過入到去搵野食時，發覺出面d野食咩都無，包又無粥又無，真係枉佢重話自助早餐，都未見過d盤行幾次出去都重係吉架，難為奶奶同老爺係要另外俾每人八十大元入去食架麻，八十元就係咁嘅質數，真係好想投訴囉！唯一大量供應嘅係烚蛋，不過Ambrose都唔食得蛋，又無包，又無粥，都唔知有咩比佢食好！本來出面有個麵檔我見好多人都費時排，但為左Ambrose有野食，我唯有都行去排啦！不過要知道大陸人嘅排隊文化有幾差，我出去時個麵檔細細都有一條人龍，由中間開始係面對面，咁其實就即係無排囉！d人就不斷叫我要咩我要咩，就連企起我後面果個人都出聲，我都未出聲架喎！個麵佬又好似愛理不理，整好左d麵出黎就求其俾個咁，一d秩序都無，我心諗呢次真係有排都無得食喇！我唯有死死氣地又同個麵佬係咁講要兩碗粉囉，等左一陣，佢終於攪好一碗俾我，但我同佢講我要兩碗，佢唔出聲，無啦啦响台面攞左一碗應該係之前整好擺左响度嘅粉俾我，呢個時候我後面果個人竟然伸手想接過碗粉，而我雖然唔係好想要果碗唔知擺左幾耐嘅粉，但見條咁嘅人龍，我再唔攞都唔知重攞唔攞到，梗係手快快接過碗粉就走，只聽見後面個女人好似好氣憤咁話我，我真係覺得呢d人真係有問題，我已經話我要兩碗，我又唔係要十碗，咁佢又企我後面，咁我自己攞番我自己order嘅粉有咩問題呢？！攞完碗粉都已經嬲到爆炸，其實不特止，呢度d河粉，係粉同菜分別用水滾起夾落碗度就俾客，係一d湯水都無架！到我攞番入個位度想食，d粉响無水浸住嘅情形之下實哂，夾都夾唔起，真係想講粗口囉！攪左一大餐，Ambrose仍然係無咩好食！
好彩最後姑丈話餐廳另一邊係西式野食，果度少人好多，同埋格調高d，佢地終於都攞到一d似樣嘅野食黎食喇，不過仍然係好多蛋囉，又係炒蛋同煎蛋。見到有多士，我都唔理熱唔熱氣啦，俾左一塊Ambrose食，我自己對於果度嘅野食都係麻麻地啱胃口，同埋真係重覺得好嬲，所以都無咩心機行出行入搵野食，是但食左d野就算喇！唔叫好飽，亦都唔可以叫餓嘅！
食完早餐，一行人行到去酒店正門等shuttle bus去動物園喇！架車每隔十至十五分鐘一班，免費嘅，車程都好快，都係五至十分鐘左右就到！不過天公不造美，入左動物園開始有少少雨灑，再行多一陣，雨開始大粒，本身我都有攞傘，但寄存左响酒店度，所以行左一陣見開始大粒雨，都忍唔住買左把傘。買完用唔夠十分鐘，無哂雨，真係吹脹！
入園無耐就已經見到一棵樹，上面有幾隻鸚鵡同一隻大咀鳥，唔知點解d雀仔咁奇怪，佢地係唔會飛走架喎，亦都無野鎖住佢地，呢個情形同我地貴賓樓樓下個水池度有好多鸚鵡同黑白天鵝又係唔會走嘅情況一樣，天鵝就話走唔到啫，點解鸚鵡都唔走呢？真係唔明喇！好多人圍埋去睇，d雀仔都重係好悠然自得，我都係第一次睇到真嘅大咀鳥，重要係勁近，不過就無見佢開口個樣，唔知佢食野要丫開咁大個咀有無難度嘅呢？！
大咀鳥附近就有白犀牛，我之前一心就係想同Ambrose睇犀牛，原因係响台北動物園無見過，所以一入去見到佢，真係好開心（不過事後再睇番去台北嘅相先至發現原來台北係有犀牛架）！隻犀牛响佢自己地盤不斷圍住棵樹兜圈，唔知佢係咪好悶呢？有時諗吓佢困住响果度咁細，同佢應該生活在非洲草原簡直係兩個世界，真係好似好慘咁！如果唔係勁兜圈行，真係行幾步就無得行喇！
睇完犀牛，離遠已經聽到一d動物叫聲，沿叫聲行去睇，原來有兩隻黑猩猩定馬騮响樹上一唱一和係咁叫，叫到咁上下佢地重沿兩棵樹中間嘅繩行，又好似空中飛人咁飛黎飛去，十足表演咁，好攪笑！都未見過d動物咁有表演慾！
行前去又見到有紅色屁股嘅狒狒，好多人掉野食同糖俾佢地食，其實都幾無公德心。有隻狒狒心口有隻bb攬到實一實瞓左，好得意！唔知點解佢地個屁股會紅色嘅呢？同埋有d狒狒個屁股唔係平，係一舊一舊咁，唔知佢地係爛屁股定點，諗緊佢地咁樣點坐呢？睇左一陣之後就聽到有狒狒尖叫，爹爹話可能有人掉左d食物落河度，而果條河係有電線，唔知係防d狒狒走定防人掉野食俾佢地，總之佢地一過果條防線就有電電佢地，真係好可憐呀！離遠見到有隻狒狒好利害，佢不斷响度打筋斗，d人見到又不斷掉野俾佢食，又令我諗起尋晚隻黑熊，搵食真係艱難呀！唔通動物園俾嘅野食係好少唔夠食？再睇多一陣之後，突然間見有兩隻狒狒打架咁，好似係搶野食，都唔知係被搶定搶果個係咁追住對方，總之就係一隻狒狒係咁追住另一隻狒狒，恕氣沖沖咁，足足追左兩個幾圈先停落黎，其他狒狒見佢地係咁跑都避之則吉，呢d狒狒真係好人性，除左national geographic睇嘅記錄片d動物會在原野打架偷襲，我真係從未見過動物打架，我以為野外嘅動物係為左生存至會咁樣啫，估唔到動物園嘅動物都會打架，佢地唔係應該已經純哂架咩？！
好喇，唔睇狒狒，我地決定都係加快速度去搵車站入野外區睇動物，驚唔夠時間睇呀！一路行又覺得無咩人同我地同方向，一度以為會唔會行錯呢，好彩最尾我地都去啱地方，不過工作人員話要等十至十五分鐘先有車，佢係咁話如果我地包車，一架車十個位，二百蚊一台車，係可以即時上車，好似好吸引咁，等我地差d都想話好，不過再問真d，佢話原來唔使錢同要錢架車嘅分別係唔使錢果架要同人坐，包就自己坐，兩架都係一樣咁多時間停留入面，司機會在每個景點略為停頓一下俾我地影相，係唔可以隨我地意思停幾耐睇幾耐，要錢果架係清靜少少架喎！我地見分別唔大，最重要係無得由我地話事停幾耐，擺明同唔使錢果d一樣啦！所以我地都係安心等架唔使錢嘅車黎就算！車到左，架車其實分成幾卡，我地一行九人當然坐埋一卡，雖然真係要同人坐，不過我地都坐左成兩行，其實都唔使點同陌生人坐，又無咩唔好丫！
未入野生區之前，Ambrose已經好攰，不過入到野生區見到有唔同動物，佢都勉強提起精神睇動物。野生區入面真係有唔同嘅動物隨意走動，有時更加係响架車隔離行過，最勁係有隻駱駝正正响架車出面，成大陣味，我地見到都嘩嘩聲叫！獅子老虎豹就無咁隨意行喇，佢地都係响個山頭度坐，雖然話唔係隨意走動，但我覺得佢係要衝埋黎其實都唔係唔可能架喎！又見到黑熊，重要呢隻大大隻，唔知係咪有人掉野食俾佢，佢又企左起身！沿途其實都有d不知名嘅動物，我估有毛牛、大象、長頸鹿、孔雀、駝鳥、斑馬、犀牛、河馬、唔知咩鹿、唔知咩雀、唔知咩馬同埋唔知咩羊，哈哈！好多唔知，其實有個導遊不斷介紹緊，不過佢講普通話，我又掛住望，又抱Ambrose望，所以咩都無聽入耳！不過最尾Ambrose都係忍唔住瞓左覺，係有少少可惜，不過主要果d佢都睇左，算係咁啦！
睇完哂野生區，其實都幾快，大概都係半小時左右就出返黎。架車去到尾段時我地見到遠處有個地方有人餵緊長頸鹿食野，我地諗住出去就搵呢個地。落車時就見原來有好多架車泊左响度，我地覺得根本佢係有車，又走黎氹我地唔使等嘅話就湊夠十人包車，實質d車係一樣，有大把車，佢唔開俾人之麻，cheap到死！
行吓行吓真係俾我地行左去餵長頸鹿區。超近距離見有好多隻長頸鹿行埋黎食野，其實我地同佢之係一幅矮石屎牆之隔。好多人買左一柄柄葉舉高手等長頸鹿低頭食葉影相，d長頸鹿低頭嘅高度往往就係响人嘅頭上面左右，真係零距離，咁大個女都係第一次咁樣睇長頸鹿，最衰Ambrose瞓左啦，唔係佢一定又會大叫架喇！我地都買左葉去餵長頸鹿，真係又驚又想試，好好笑！原來長頸鹿都幾大力，我揸實條葉都俾佢抆到個人郁一郁，好刺激！最驚嘅係無啦啦有一下我揸緊相機同姑丈影相時突然感覺到頭後有d野咁，原來有隻長頸能烏左埋黎，嚇到我走都走唔一切，呢一幕爹爹拍到，笑到大家死死吓！爹爹話其實一路都有長頸能响我身後烏烏吓，不過我唔知喎！真係太刺激呀！
餵完長頸鹿，我地又再行前搵左個地方坐低休息吓，食吓野！呢個時侯Ambrose都醒左，好彩離餵長頸鹿區唔太遠，我地又抱左佢去睇人餵長頸鹿，雖然無買野餵，不過就咁睇佢都已經睇到呆左，哈哈！睇完長頸鹿我地返埋位度諗住焗通粉俾Ambrose食，點知d通粉唔係想像中咁易焗林，唯有一路等一路食麵包，到d粉勉強林時再餵Ambrose食，點知佢可能嫌d粉用水焗林無味唔肯食，真係大件事呀！因為我地無其他野食俾佢喇，只係得麵包同餅乾，唯有不斷俾麵包佢食啦！
開始回程時見到有大象同河馬，今次嘅距離係重近過上次去台北動物園，而且象嘅數量亦較多，我都忍唔住自己走埋去影番張相先！無啦啦又有兩隻象打架，佢地發出巨响，又用個鼻亙撞，又用腳踏地，真係唔明點解呢度d動物做咩好似成日都打架咁！
行經熊貓館，即管入去行吓，諗住都無咩野睇！點知出乎意料之外，入去無耐已經有隻熊貓坐左响度食竹。一路行都見有幾隻熊貓攤左响度瞓覺，超舒服咁，重要好似人咁打側瞓，距離又係幾近，睇得好清楚。再行再行，又見到有d無瞓嘅熊貓响d人造樹丫度瞓住（定坐住？！），又用腳“R”痕，動作加埋佢個眼圈，又真係有d攪鬼嘅！不過熊貓一直以黎都話係黑白色，呢度見到地唔係黑白色囉，正確d黎講係黑泥黃色，佢地好污糟呀！再行出去又見有兩隻熊貓唔似打架但就攬埋一堆，最後其中一隻瞓左响度上半身抬起望住隔離果隻，成個人咁款，真係好笑！再行多幾步，有一隻熊貓瞓左落個斜坡仔度好嘆咁食竹，好多人望住佢，佢重好enjoy咁食食食，我都係第一次睇咁近睇到熊貓咋！之前睇果d唔係遠到咩咁就係瞓左唔郁，呢度真係唔錯，好多動物又近又動作多多，大人睇都好有樂趣！
不經不覺，又係時候返酒店攞埋d行季上車返香港喇！Ambrose呢一程車非常之扭計，除左因為瞓得少，最重要我地諗佢可能肚餓，真係慘喇！我地除左通粉同麵包，真係無預備其他食物俾佢，本身諗住氹佢瞓，點知佢又唔肯瞓，又好扭計，喊到個人熱哂。佢開始連麵包都唔肯食，係咁扭計，响無辦法之下同姑姐借左個奶樽沖奶俾Ambrose飲，諗住都可頂到一陣，因為自己果個奶樽朝早用完之後趕住check out無洗到就pack埋左，都唔預佢要日頭飲奶架麻。Ambrose見到枝奶有少少疑惑，我都知大件事喇，唔係佢平時用開嘅樽佢未必飲，果然佢連樽都唔肯揸住更加唔肯開口，我地唯有塞入佢個口度期望佢掂到個咀知道係奶就肯飲，但最後換黎嘅係更大嘅喊聲，真係唔知點算！最後我唯有試吓提子乾得唔得啦，好彩一出提子乾佢就收左聲喇！呢一程車，雖然佢無再大扭，不過都唔瞓，耐唔時有少少扭計，最慘係重要塞車，真係辛苦哂爹爹湊足成程車呀！我估今次都係Ambrose有生以黎第一次嚐試到勁肚餓無得食嘅滋味，平日三大碗粥／飯，重要係中間食不停口嘅佢突然咩都無得食，真係一粒米都無落過肚度，又餓又攰，雖然好陰公，但諗落又幾好笑咁！我地一落車直去酒樓，台都未set好已經叫哂白飯同叉燒俾呢班餓壞左嘅小朋友食先，Ambrose有飯落肚，起勢咁食左一輪之後，終於見番佢個招牌笑容喇！哈哈！呢次旅行教訓我地，無論點都要預備定米飯俾Ambrose食，佢餓起上黎係連麵包都唔食架，麵包只係佢嘅零食！
沒有留言:
張貼留言