Shining Garden –Little Learner (第五堂)

今日Ambrose上堂吽吽豆豆，不在狀態！可能因為朝早去左隔離座朋友仔屋企玩到太晏太開心，返到屋企遲遲都唔願瞓，到得番果一個鐘頭佢先瞓著，出門口上playgroup都係抱醒左佢！

今堂主題係Barbecue，生字有meat / corn / bread / chicken。今堂擺完咭仔之後再自由去台上攞呢d食物玩具放入相對嘅袋度，Ambrose終於第一次有積極參與，不斷行去攞食物玩具再去放，全部啱哂，叻叻！

今堂小插曲係行去台度坐好準備做手工定snack time，Ambrose唔坐，我要抱高佢諗住整佢坐，點知佢伸直對腳，我唔知點樣抱到佢一“鄧”坐左落張椅到，其實都係好細力，完全無整到佢，佢無啦啦就喊，真係好少見呀，Ambrose都未試過上playgroup喊架麻，係有一次好細個時上堂俾另一個bb扯頭髮喊過之外，佢未試過喊，真係俾佢嚇親，唯有同佢猛道歉，話我整到佢，但都唔得，最後都係同爹爹打眼色要佢入黎攪番掂個仔，哈哈！好彩爹爹抱吓佢之後又無野，可能都係借d易扭眼瞓啦！

放左學，爹爹要返工，而我就同Ambrose返婆婆屋企。婆婆買左三樣新玩具俾Ambrose，一個係搥蟲仔，呢個平時上幼潛Ambrose都好鍾意玩嘅玩具，不過我就一路都唔買，等佢返學玩就算喇，點知婆婆買左，真係好！另一個係毛毛狗仔，開著左係會行會叫，最攪笑係兩眼發光！最後係一架車仔，開著自己行，四個碌都發光。Ambrose似乎對於會郁果兩件玩具最大興趣，而當中狗仔就更係玩左好耐！一開始其實佢都有少少怕隻狗仔，一方面好想去摸，但一方面當隻狗仔埋黎時佢又有d怕，避避地隻狗，好好笑！不過玩得一陣，佢已經可以就咁攞起隻狗，成日唔俾佢行，又放上張椅到玩，玩到隻狗行到跌左落地又笑，真係頂佢唔住呀！呢晚，雖然佢都係瞓得好少，有新玩具之下佢都無扭計，只係到最尾食完飯後有少少一定要痴實我，一行開就想喊，見到佢咁我都係執埋d野返屋企同佢洗白白，等佢早少少可以瞓喇！