近排Ambrose終於都識講媽媽同嫲嫲喇，亦都開始感覺到佢學緊講野。以前教佢講野，佢都未必會跟我地講，而家教佢，有時佢都開始肯講喇，雖然d音都唔係好正。最神奇嘅係佢好細個已經識講“唔該”，次次俾親奶佢飲都會講，開頭都覺得只係巧合，過左好耐之後就覺得唔係喇，不過近排好似少講左，唔知係咪學識一樣又唔記得一樣呢？！另外，Ambrose講“謝謝”係好細聲嘅，好似人講秘密咁。自從shining garden開始教講“please”或者“thank you”，我地都有要求佢問我地攞野時要講到其中一個字，唔知點解佢講“please”會變左“dale”，最離奇係要佢講“thank you”，佢竟然次次都係講“謝謝”，而我地係無教過佢呢兩個字係一樣意思。
今朝早七點鬆d，Ambrose醒左，佢都未瞓醒咁，半瞇住對眼坐左起身，之後無啦啦一個字“mi”，哈哈，個樣係好得意好攪笑，不過我就唔多明佢係叫緊媽咪個“咪”字，即係叫我丫，定係叫緊“milk”，即係要飲奶，哈哈！諗佢都係掛住枝奶多過我架喇，我問佢係咪要飲奶，佢點頭，咁我就抱埋佢出去沖奶喇！
飲完奶，我同Ambrose一齊去刷牙，刷刷吓牙，佢無啦啦停左落黎用手摸吓自己屁股，之後手指指住廁所，我問佢係咪有臭臭要去廁所，佢又點頭，不過因為我實在趕時間梳洗出門口返工，唯有同佢講媽咪趕住出門口，要等姨婆黎到先可以同佢換片片喇！其實當下心入面都有d內疚，因為呢次都係Ambrose第一次咁樣示意要去廁所，但我竟然無理佢嘅要求重叫佢等姨婆黎攪，我驚咁樣discourage左佢向我地示意去廁所嘅需要。睇黎，我都要諗一諗佢嘅toilet training幾時同點樣開始喇！
沒有留言:
張貼留言