bb公仔

一直好想買個bb公仔俾Ambrose玩，因為Tweety姐姐話玩公仔無分男女，而玩公仔係可以幫到小朋友嘅模仿力，諗住Ambrose呢方面都有需要訓練下，所以都有不斷留意。不過坊間可能已經界定左bb公仔一定係女仔玩嘅，如果唔係點解周圍嘅bb公仔都一定係bb女，同埋全身都係粉紅色，想搵一個唔好話男仔bb，只係想搵一個中性少少嘅bb公仔，又或者唔係著粉紅色衫嘅bb公仔，原來真係好難，加上Tweety姐姐話俾小朋友同bb公仔換衫，我又要搵個bb公仔嘅衫係可以除同有配套換衫嘅，係難上加難！

搵黎搵去都搵唔到，真係開始有少少屈服，粉紅色就粉紅色啦，不過我心目中又想個bb公仔同初生bb嘅size差唔多，咁樣我都可以唔使另外買衫仔俾bb換，直接攞返Ambrose初生著過嘅衫俾佢換，解決左配套衫仔永恆粉紅色嘅問題，不過，大size嘅bb公仔一樣難搵，真係無咩頭緒！好彩多得Wing姨姨提醒，話mides好似有bb公仔size幾大樣又幾真，我又醒起好似係喎，只係唔知佢display果個bb係咪都賣嘅，所以今日收工之後就直奔mides專門店睇喇！

行到埋mides個櫥窗已經見到個bb，真係幾啱眼緣，再望吓原來佢隔離有個牌仔係寫住“公仔$ 288”，好明顯個bb公仔係賣架！真係太好喇！入到去再攞起個bb睇，個樣都幾男仔樣，佢都係著緊mides嘅夾衣，重襯埋頂帽仔，size真係同初生bb差唔多，而且隻眼好大好精靈，手感有番咁上下重，一切都比我心目中想要嘅野好接近，唯一係我鍾意全身都係膠做，而呢個bb只係頭、手掌同腳掌係膠造，身體係入棉嘅！雖然成二百幾三百蚊，我都覺得有d貴，但真係好難搵到心頭好，就算我去反斗城買個bb公仔，size細過呢個，個個都百幾蚊，如果再買多套衫仔替換，又要成五十蚊，都唔係平囉，重要唔係咁啱心水，所以見到呢個mides bb公仔，我都忍唔住要大破慳囊喇！

Sales介紹個bb原來有分四個表情，叫“喜、怒、哀、樂”，怒同哀係皺哂眉同扁咀樣，其實都幾得意，而喜同樂其實都差唔多，樂個樣係個口笑得開一d，而喜只係個口笑得細一d，同埋喜係可以塞隻手指入個咀到食手指嘅！哀同怒就唔會買喇，因為點都係笑好d，諗左一陣究竟要喜定樂好呢，最後因為喜可以食手指，我諗住可以用佢教Ambrose唔好食手，所以最後決定買喜喇！

買到心水bb公仔，真係好開心呀！