幼潛 － 第九堂

幼潛第九堂，今堂一開始係玩拼圖，姨姨話小朋友開始可以玩拼圖，不過係由兩塊起，重要係兩塊拼圖係成直線分割，而唔係市面大多數嘅波浪紋分割。見姨姨俾嘅拼圖板都係自製，以我印象亦唔覺市面有類似要求嘅拼圖板賣，要玩呢個可能都要自己整喇！不過DWE都有一set動物圖咭係咁玩，兩張合成一隻動物，只係咭係薄而唔係姨姨果隻厚foam board，Ambrose玩呢套咭都識配對番哂動物頭尾，只係我地好少要求佢好似姨姨咁要自己揍拼埋一齊擺出黎，所以我諗未自製到或搵到拼音圖板之前，都只可以繼續玩住DWE動物咭先喇！Ambrose大致都有概念係點拼，但見佢手部唔係咁靈活咁扭正幅圖再擺啱對啱位，我諗佢嘅小肌肉都有待訓練喇！

之後姨姨分派左一d發開左嘅大粒西米，呢d西米真係好痴手，姨姨要Ambrose由碟攞起再放入個碗度，不過西米太痴手，佢要好辛苦先整甩d西米。呢d觸感刺激對於小朋友黎講通常都幾抗拒，只見有d小朋友痴住隻手時已經好想縮，整唔甩又喊，真係有d唔明點解，究竟有咩好驚？！Ambrose從來對呢d觸感刺激都係麻麻地，之前一期幼潛都有玩摸麵粉糕嘅物體，當時Ambrose大概係一歲鬆d，佢都唔願去掂，掂左少少已經唔肯再摸，但佢都ok，無扭計無喊！再之前試過另一間playgroup有得攞熟左嘅粉絲做手工，Ambrose又係不感興趣，掂一掂知道係痴立立就唔掂。今次呢d西米，佢掂左之後痴哂上手，無得比佢唔掂，哈哈，佢整極都唔甩都有俾隻手我要求我幫佢整甩d西米，雖然皺哂眉，但情緒穩定，都叫幾好！佢唔鍾意痴立立嘅野都有跡可尋，平時食飯如果有飯粒痴左落手度，佢都會伸隻手俾我，要我幫佢掉左d飯粒，真係懶乾淨咁！哈哈！玩完西米，排隊去廁所洗手，呢個環節簡直太好玩，洗極都未停！

洗完手，姨姨話要著番鞋，上樓梯去天台遊樂場玩。早知會無啦啦又出去洗手又要上樓梯，今日就唔同Ambrose著converse鞋仔啦！同佢著好鞋，又排隊扶住自己上樓梯喇！Ambrose對於要兩隻手抓住樓梯邊上樓梯似乎未係好慣，反而一個唔該，佢都係一隻手扶住上就算，姨姨見到佢一隻手扶住上，讚佢叻叻！好快就行哂一層樓兩行樓梯上到天台，我地都係第一次上黎天台，原來天台真係有好多野玩！天台一半係有蓋嘅，有車仔有廚房有軟墊活動玩，而出面中間係空地，再盡頭就係大型爬架滑梯組合！Ambrose一去到當然係一枝箭上左車仔玩啦！不過架車太重，又要自己行，佢都只係識向後行，未有力向前行，係咁想我推佢咁！姨姨話呢個年紀小朋友只識向後行，係正常喎！要到兩歲左右先能夠向前行！

玩完車仔，我地鼓勵Ambrose行出外面玩，曬吓太陽！今日我地唔知點解又有帶相機，姨姨話可以隨便影相，真係太好！Ambrose一出去就俾個平衡木爬架中間個圓心吸引住，係咁想爬穿過個圈，但因為個圈離地都幾高，佢穿過又會跌落地咁，所以佢都係貢吓貢吓咁，好攪笑！之後又去到滑梯組合玩，果度有條滑梯，上面有好多突起物，應該係俾小朋友就咁行上去，我都係第一次見，好似好好玩咁！玩左一輪之後，Ambrose行左去一個繩網架度想爬上去，見佢有興趣，又見繩網架第一格離地好高，Ambrose自己一定爬唔到上呢度再向上爬，咁我就抱起佢放左落去第一格俾佢自己爬上去。其實繩網格與格之間距離都幾大吓，我都唔預Ambrose可以爬到，都係抱佢上去俾佢感受吓，點知佢又自己爬到幾格上到最高，咁啱姨姨又行左埋黎見佢爬到，都大讚Ambrose叻，可以挑戰呢個爬架！

玩左一輪，姨姨話要返落去喇，雖然Ambrose好依依不捨，但都有bye bye遊樂場，又係慢慢行番落樓梯，再去洗手，返到班房，唱埋bye bye歌，又係時候落堂喇！姨姨話下堂做評估係要小朋友做某d教過嘅指定項目，暫時未知會做d咩，上期幼潛評估又唔係咁架喎，似係平時上堂睇表現，而今次好似即場做，有d似考試咁，都有d緊張！