幼潛 － 第十堂

幼潛第十堂，亦係呢一期嘅最後一堂，係做評估嘅。首先係坐靚靚，然後就開始逐個叫名出去頒發結業證書，今次我同爹爹都有備而黎，唔會好似上一期咁連相機都無帶，最後要靠同學仔俾番d相我地。今次爹爹除左帶左單鏡機去，重帶埋新買嘅攝錄機，非常之齊備。

爹爹將部攝錄機set好位，可以拍到叫Ambrose名，Ambrose行出去同姨姨握手，再接過證書，爹爹幫我地影完相之後再俾左部相機同學仔家長，黎個合照，真係perfect呀！唔知點解其他人都係一個去影相另一個同小朋友接受張證書，佢地真係無諗過可以叫人代勞，咁樣咪可以父母同小朋友都可一齊影到呢張咁有紀念性嘅相囉，爹爹今次真係叻叻喇！頒完證書黎個大合照，之後就係逐個叫名做評估喇！

估唔到好快就叫Ambrose，同上次一樣，好似係頭二三個就到喇！唔知點解做評估連自己都緊張埋，真係好攪笑！首先姨姨攞左個方型插木柱出黎，唔使講都知點玩喇，呢個我唔太擔心，因為上第一期幼潛時Ambrose雖然唔太純熟，但佢都好快做到。姨姨之前有教，玩木柱如果再加d難度就要小朋友唔好順住入，放哂兩邊之後再放中間果d，咁樣佢地隻手就要就番先入到中間果d木柱，Ambrose响呢一期上堂時就自發地放哂兩邊先放中間，所以我相信佢玩呢個已經無難度喇！只見Ambrose唔使姨姨講就已經攞起木柱放左兩邊，之後可能姨姨見佢兩枝都係用右手，姨姨刻意按實Ambrose隻右手，Ambrose就用左手入埋中間果兩枝，超快完成！

之後姨姨攞左條毛絨條出黎，我一見呢條野，就知係要串飲管喇！心諗，死得啦，Ambrose都唔鍾意穿野，除左上一期好快咁同我穿哂一條之後，呢一期上堂時要穿佢都只係不停睇人穿，自己無穿到。而我平時响屋企都嚐試同佢玩穿木珠仔，攞番條毛絨條出黎同佢穿飲管粒，但佢一律都唔吼，死都唔會同我玩，所以我已經界定左Ambrose唔鍾意呢類活動，見到姨姨攞出黎，重諗Ambrose唔知肯唔肯做，肯做又做唔做到呢？！點知Ambrose又好神奇喎，佢又無抗拒喎，要佢穿幾多粒佢都照穿，無問題喎，呢part意料之外順利過關！

再之後姨姨攞左個籃出黎，入面有三樣野：波波、車車同牙刷，我就諗姨姨應該係要Ambrose俾佢要嘅野。點知姨姨係攞起個波波，問Ambrose係咩黎，一向唔多識講野嘅Ambrose竟然識答姨姨“波波”，真係好出奇呀！不過之後姨姨俾車車，佢都仍然係“波波”緊囉！哈哈！姨姨再攞牙刷出黎問Ambrose，唔知係咪表姐見到Ambrose答唔到車車，之前叫左佢唔好出聲只準睇，佢竟然衝口而出話係牙刷，俾我厲一厲，哈哈，姨姨見表姐答左都無話佢，亦都無要Ambrose講牙刷。之後姨姨要Ambrose俾個波波“麻媽”，Ambrose開頭就俾左姨姨，姨姨再叫Ambrose俾個波波“麻媽”，叫左幾次Ambrose都唔識俾，我就細細聲同姨姨講，不如你叫佢俾個波波“媽媽”啦，因為我地係叫“媽媽”而唔係“麻媽”，姨姨改正番之後，Ambrose即時已經識得俾我喇，真係一額汗呀！之後姨姨要Ambrose俾車車姨姨，Ambrose照做無問題，最後俾牙刷俾表姐，都做到！就係咁，姨姨話個評估做完，我心諗，吓咁快就完，原來都好易咋喎！姨姨話Ambrose响班入面係比較叻果個，我已經無等佢再講落去點叻法，忍唔住話：吓，唔係下麻？！姨姨好肯定話係，話Ambrose好多野都做到，而且佢話唔係好多男仔可以上堂咁定唔走唔郁，Ambrose係堂堂都可以做到，係好叻喎！呢樣我唔會否定，Ambrose上堂係比較乖，可以話坐靚靚就坐靚靚，有玩具同有野食都唔會响姨姨未叫得之前扭或者衝出去，睇番其他男仔同學甚至乎女仔同學，佢係比較定果個。但之後姨姨話Ambrose講野都叻，我真係啞左，我已經同姨姨講佢唔識講野，兩歲都要返健康院跟進，但姨姨話佢講野都ok，佢有嚐試講同埋都講到某d野，佢話同齡男仔之中，佢係叫ok喎！呢個就有少少“R”頭喇！不過姨姨都有話Ambrose聽得明好多野，所以都唔擔心唔識講，只係遲早嘅事！我都有問姨姨，Ambrose平時唔鍾意穿野，姨姨話可能Ambrose覺得自己識就唔會去練喎，同埋亦有問姨姨佢唔願用兩隻手一齊做野，姨姨就話Ambrose未係好習慣協調兩隻手一齊用，多d鼓勵同訓練番係無問題喎！

聽見姨姨讚Ambrose，我都不由得好開心嘅，唔知之後寄黎嘅評估報告，Ambrose在各方面會唔會都有進步呢？

所有人做哂評估之後，又係時候唱bye bye歌喇，今次係最後一次黎呢度上堂，我自己都有d唔捨得呀，呢度地方又好，可以俾爹爹表姐一齊入去睇，老師又好好，甚至乎其他家長都比較平易近人一d，如果唔係遠，我都好想跟番呢個姨姨呀！